[1]

A vous, sires baillif de Bourges, soupploie an denunceant Johans Bourdons, clerc, de çou que il li apartient dou fait dessous dit, que Friolet, Colinet, Thouset, Maritorne, Coillebaut, Tevenins li sergens Friolet, sa beesse seint apellez pour ouïr la denonceation doudit Johan, et pour respondre es articles des quelx lid iz Johans vous anformera de cen qui li apartient dou fait dessouz dit.

A vous, sire baillif de Bourges, denuncie et propose an denunceant, non pas an faisent partie Johans Bourdons, clers, que le venredi apres la Saint Micheau, derrerement trepassee, apres l'eure de quevrefeu, Guillaumes d'Argeri, niés l'abbé, Guillaumes de Remors, Baudri, avec leur compleçois et lour foite an traïson agait apensse ocidrent Perrins de Rans et Robin de l'Aumosne lor compoignon et cuiderent doudit Robin que ce fust Johan Bourdon, et dit lidiz Guillaumes d'Argeri : Or ce tiegne Jehan Bourdon. 1 Et ferit ledit Robin de la mesericorde par le corps, creanz que ce fust Johan Bourdon. Et quant lidiz Robins fut feruz, il dist : Ha, Guillaume, tu m'as ocis. Et lidiz Guillaumes respondit : Ha, Robin, pour Dieu pardonnez lou moi, je cuidoie que ce fust Johan Bourdon. Item comme les genz de la rue ou çou fut fait et autres genz de la ville criesseint aucun : A la mort. et aucun : Au feu. , pour çou qu'il avoit a la rue paille ardent que les bonnes genz alumoient pour voier quielx genz s'estoient et les malfeteurs, lidiz Johans Bourdon ouït le cri et le bruit de la murtre, issit hors de son hostel en ses chauces senz soliers, et que ses serganz tenoit une lanterne pour lui alumer, et comme lidiz Johan se aprochast de celui leuf pour voier que ce estoit de tant loign comme li maufeteur le porent voier, il vindrent vers lui et le ferirent par la temple si que il chai a terre touz estordiz comme se il feüst morz an tele maniere que, puis que il fut cheoiz, les cops que il li donnerent de pans de glaives par les bras et par pluseurs parties de son corps, lediz Johan ne les sentist onques, si estoit estordiz, et que les bonnes genz le leverent de terre comme mort, et renommee estoit et disoit l'an par la ville que lidiz Johan estoit occiz des maufaiteurs dessus diz. Et comme ce fust fait l'an dist a Friolet, qui estoit justise : Pregnez les murtriers. Il n'en fist riens, eïnz fut negligenz, aidenz, consentenz et recelanz doudit murtre et dou mesfet dessus dit, et eüst bien pris les murtriers se il vossist. Et furent consentent, aident et recelent de ce fait la beesse Friolet, ses sergenz Colinet, Touset, Maritorne, Coillebaut, sergent de l'abbeie. Si vous souploie an denunceant lidiz Johan Bourdons que cil maufeteur soient pris et tenu si que justice ain puisse estre faite selonc çou que li rois mandet es lettres que vous avez receües par ledit Johan Bourdon.

Li premiers articles est que Johan Friolet, qui estoit et se faisoit justise laye a Saint Satur pour l'abbé et pour le convent de Saint Satur dist que il y auroit murtre ne demoroit pas trois jourz. Et de ce est voiz et commune renommee a Saint Satur et es leux voisins.

Le II^me article est que Guillaumes d'Argeri, niés l'abbé de Saint Satur, Guillaumes de Remors, niés au prevost moigne doudit leuf, cochoient et levoient et aveint lor espees et lor garnison an l'ostel doudit Friolet et aleint de l'ostel doudit Friolet de nuiz, resnant a vehu et a sehu doudit Friolet et retornoient arrers an l'ostel doudit Friolet. Et de ce est commune renomme a Saint Satur etc.

Li III^me article est que le venredi apres la feste Saint Micheau derrerement trepassee, Micheau La Vache, de Saint Satur, fut menacez doudit Guillaume d'Argeri et de Guillaume de Remors en la presence doudit Friolet qui excerssoit 2 la joustise dessus dicte, et demanda lidiz Micheau asseurement de la menace audit Friolet, et il ne le voult faire asseurer, einz les soustenoit lidiz Friolet et deportoit de leur folies, si que il pridrent par la soustenance doudit Friolet, qui estoit joustise, ardement de pis faire. Et de ce est commune renommee a Saint Satur et es leux voisins.

Li IIII^me art. est que celui venredi, apres l'eure de queuvre feu, cils 2 Guillaumes et Baudri, niés au celerier de Saint Satur, Colinet Maritorne, valet l'abbé ovec lor compleçors, furent vehu aler par la ville et portoient espees et bastons offensables et deffensables et çou pooit savoir et devoit lidiz Friolez. Et de ce est commune renommee a Saint Satur et es leux voisins.

Le V^me art. est que cele nuyt, apres l'eure de queuvrefeu, li 2 diz Guillaumes, Boudriz, Colinet, Maritorne, ovec lor compleçors, alerent en l'ostel de Tevenin Giraut et asaillirent celui ostel et casserent les huis, les fenestres. Et les bonnes genz de l'ostel et aucun de la rue et de la ville crient : A la mort. Et l'an dist au dit Friolet : Alez la ou l'an crie a la mort, que il i a grant peril. Et il respondit que il an y auroit avant 2 ou 3 morz que il i allast. Et de çou est commune renomme a Saint Satur et es leux voisins.

Le VI^me art. est que devant celui ostel de Tevenin Giraut, a l'assaut dessus dit, fut batuz lidiz Micheaus La Vache des 2 diz Guillaumes, de Baudri, Colinet, Maritorne et de lor compleçor, et Perrins de Rans occis. Et de ce est commune renommee a Saint Satur et es leux voisins.

Li VII^me art. est que quant lidiz P. de Rans fut occiz, lidiz Guillaumes d'Argeri ferit de la misericorde lidiz Robin de l'Aumosne, son compoignon qui estoit venuz ovec lui pour mal faire, et cuida lidiz Guillaumes que ce fust Johan Bourdon, et Robin dist : Ha, Guillaume, beau frere, tu m'as ocis . Et Guillaumes respondit : Pour Dieu, pardonnez le moi, ge cuidoie de toi que ce fust Johan Bourdon. Et çou tesmoignent pluseur personnes an l'enqueste que li abbes et li convent firent faire de lor office dou murtre et dou meffait dessus dit. Et de ce est commune renommee.

Li VIII^me art. est que Johan Bourdon, an alent au cri de cele murtre fut feruz et batuz de pans de gleves par pluseur parties de son corps des 2 Guillaumes, de Colinet, de Touset, de Maritorne et de leur compleçors et, se ne fust 1 fumiers, tres lequel fumier lidiz maufeteur abatirent lidiz Johan Bourdon, il l'eüssent ociz, mes il fereint souvent sus le fumier quant il cuidoient ferir sus lui, et çon ont tesmoigné pluseur tesmoins an l'anqueste que lidiz abbés et convent firent faire. Et de ce est commune renommee a Saint Satur et es leux voisins.

Li IX^me article est que li diz Tousez gista de sa maison pluseurs gros bastons dans la rue a ceaus qui faisoient l'assaut dessus dit, et lidiz Colinez fut vehuz a celui fait 1 gros paul 3 an sa meain, et quant la murtre fut faite, lidiz Colinet s'enz fouit chiez Johannot le cousturier, et illeuc le prist Simons Giroudet, qui estoit sergenz de la ville, an 1 liht ou lidiz Colinet s'estoit repoz, que il ne fut trovez. Et tenoit lidiz Colinez 1 gros paul de costé soi. Einssit le trova lidiz sergenz, presenz bonnes genz dignes de foi, et l'en mena pris an l'abbaïe. Et de ce est commune renommee a Saint Satur et es leux voisins.

Le X^me art. est que quant l'an quassoit les huis et les fenestres Tevenin Giraut et que bonnes genz crioient a la mort, l'an disoit a Friolet : Pour Dieu, allez la metre conseil quar il i a trop grant peril. Il respondit : Il an aura4 avant 2 ou 3 morz. et quant la murtre fut faicte, l'an li dist : Il an i a de mors, P. de Rans, Johan Bourdons. Et il respondit : Se il sont morz, si an faites charbonnees. Et çou est tesmoigné par pluseurs personnes an l'anqueste desus dite.

Li XI^me art. est que quant la murtre fut einssit faite, l'an dit audit Friolet : Pregnez les murltiers (sic) ou commendez que il soient pris , il respondit : Gie les rendré bien quant il sera mestiers . Il les en mena, c'est assavoir les 2 Guillaumes et conduit en l'abbeïe par entre le celier Mons. et la meson mestre Estiene le Chapuis. Et ce virent pluseurs personnes dignes de foi. Et de ce est commune renommee etc.

Li XII^me article est que quant la murtre fut faite, et li dui Guillaume furent an l'abbaïe, li 1 de ses 2 Guillaumes s'en alla seur le cheval Friolet et li autres seur 1 des chevaux de l'abbeïe et l'andemain l'an trova chiés Friolet une cote gamboisee et une gorgere qui esteint asdiz Guillaumes et avoit l'an porté la dicte cote gamboisee et la gorgere chiés Johan Rathon pour receler que l'an ne les trovast, mes la fame Johan Rathon ne la vost recevoir, einz anvoia arriers chiés Friolet ladite gorgiere et la cote gamboisee, qui forent trovees chiés Friolet. Et ce set la besse Friolet et ses sergenz, et ou recelerent, et autres choses sorent et recelerent dou fait dessus dit que onques n'an firent riens savoir a joustise. Et de ce est commune renommee etc.

Li XIII^me art. est que li abbés et li convenz dessusdiz ou autres pour aus firent enqueste de ce fait, an laquel enqueste se midrent lidiz Friolet, Colinet, Touset, Maritorne, Coillebaut et li sergenz Friolet, et furent a certene jornee a Saint Satur an jugement, et recongnurent que an l'enqueste l'abbé et le convent s'estoient mis, et voldrent qu'ele fust publiee et jugee. Et fut l'enqueste pupliee presenz pluseurs chevaliers, escuiers, bourjois et pluseurs autres bonnes genz, an laquele enqueste deposoient pluseurs tesmoignz assez des choses dessus dictes. Et de ce renommee commune a Saint Satur et es leux voisins.

Ce sunt les personnes principals contre les quiex l'an ha traiz ses art. es quiex il ont respondu par lor seremenz en la maniere qui enssuit.

Johans Friolez diz Panterons, accusez dou fait, requis par son serement dou premier article, dit que il le niet tant que il estoit justise laie et sergent de Saint Satur.

Req. dou segont article, dit que ledit Guill. d'Argeri avoit une couche chiés soi, et il couchoit et levoit souvent, et le demourant de l'article, il niet.

Req. sus le III, sus le IIII et sus le V articles, ledit Friolet les niet par son serement.

Req. sus le VI^me art. dit le dit Friolet que l'an dit a Saint Satur, et l'a ouï dire de pluseur, que les II diz Guillaumes et Baudri batirent ledit Micheau et tuerent ledit Perrin. Et de ce est commune renommee a Saint Satur.

Le demourent de l'art. il nie et ne croit pas que li autres nommez i fussent.

Req. dou VII^me et dou VIII^me art., ledit Friolet les niet et dit que il n'an set riens.

Req. dou IX^me art. dit ledit Friolet que il n'an set riens et le niet en tant comme il est proposé contre lui.

Requis dou X^me et de XI^me art. dit ledit Friolet qu'il le niet.

Requis dou XII^me art. dit le dit Friolet qu'il le niet en tant comme il est an soi, mes il ouït bien dire a 1 de ses sergenz, ne li souvient au quel, que il avoit por ce garder une cote gamboisee et 1 hauberjon qui estoit a Simon de Renart, qui estoient an l'ostel doudit Friolet, an garde chiés Johan Rachon, et la fame dist qu'ele n'an garderoit nul, et dou demorent riens n'an set.

Req. dou XIII^me art. dit ledit Friolez que il se midrent en l'enqueste, et que jour fut assegné a juiger la, et fut publiee et fut fait si comme il est contenu en l'article, fors ce que nuls des tesmoinz ne deposa riens dou dit fait, fors que la fame au Going et sa fille qui an deposerent que il an avoient esté negligent, en quoi ne savoient, si comme il disoient.

Colinnet, vallet l'abbé de Saint Satur, accusez dou fait, req. sur le premier art. dit par son serement que, avant et quant le murtre fut fait, lidiz Friolez estoit justise laie de Saint Satur pour l'abbé et pour le convent, et le tenoit l'an et apelloit l'an pour prevost et dou remeignent de l'art. il ne set riens.

Req. sus le segont art. dit que les II Guillaumes couchoient et levoient chiés ledit Friolet et de tout le memeignent de l'art. il n'en set riens.

Req. dou terz art., dit que il ouit bien dire a pluseurs de Saint Satur, des nons des quex ne li souvient, que ledit Michel Laynache avoit requis ledit Friolet, prevost, que il le feïst asseürer des 2 diz Guillaumes, et qu'il ne le volt faire asseurer. Et dou remeignent de l'article plus n'an set.

Req. sus le quart art., dit ledit Colinet que il le niet quant a soi, et des autres il n'en set riens.

Req. dou quint art., dit qu'il le niet en tant qu'il est contre soi, et depose quant es autres que commune renommee est a Saint Satur que les 2 diz Guillaumes et Baudri avoient fait le fait contenu an l'article, et bien y apert que il s'en sunt fouiz et dou remeignent il n'an set riens.

Requis dou VI^me art., ledit Colinet le niet quant a soi et dit que commune renommee est a Saint Satur que les 2 diz Guillaumes et Baudri avoient fet le fait et que pour ce s'en sont fouiz ; dou remeignent de l'article il n'an set riens.

Requis dou VII^me et dou VIII^me art., dit ledit Colinet qu'il n'an set riens, et le niet quant a soi.

Requis dou IX^me art., ledit Colinet le niet quant a soi, sauf tant que quant il alloit au cri que l'an crioit au feu, et il ouït sonner le seaint, il vint touz nuz piez an la rue et encontra Johannet le Cousturier qui li dit, si comme il dit : Ou vais tu, il y a trop grant meslee, et le tira en sa maeson, et puis apres grant piece lidiz Giraudez et Regnaut Tue Beuf, sergenz de Saint Satur, vindrent an l'ostel doudit Johannot le cousturier, ou il estoit couchiez en 1 lit et li commanderent que il se levast et allast garder la ville oveques les autres bourgeis, et il le fist, et a l'andemin a matin il le menerent am prison chiés l'abbé de Saint Satur. Et dou remeignent de l'article il n'an set riens.

Requis dou X^me et de XI^me art., dit que il n'an set riens.

Requis dou XII^me art., dit que il n'an set riens, fors tant que il ouït dire qu'il fut einssit fait de la cote ganboisee et de la gorgere com il est contenu en l'article.

Requis dou XIII^me art., dit ledit Colinet qu'il est einssi comme il est contenu an l'article, fors tant qu'il ne croit pas ne ne li souvient que nuls des tesmoins amenez en ladite enqueste deïssent riens contre lui ne contre nuls des autres dou fait dessus dit, ainçois furent trovez ingnocenz et absolz dou fait, si comme il dit.

Touset, valet dou four de l'abbeïe Saint Satur, accusez dou fait, requis par son serement sus le premier art., dit que Joham Friolez estoit joustise laie pour le prevost moegne de Saint Satur et se tenoit pour joustise laie, et l'an l'i tenoit aussinc, et de ce est renommee a Saint Satur. Dou remegnent de l'art. il ne set riens.

Requis dou segont, dou terz et dou quart articles, dit lidiz Touset que il n'an set riens ne par ouïr dire ne autrement.

Requis dou V^me art., dit que commune renommee est a Saint Satur que les 2 diz Guillaumes et Baudri 5 assaillirent l'ostel contenu oudit art. Dou remeignent il n'an set riens.

Requis dou VI^me art., dit que commune renommee est a Saint Satur que les 2 diz Guillaumes et Baudri batirent ledit Micheau La Vache et tuerent ledit Perrin de Rans, et bien y apert qu'il s'en sont fouiz pour ledit fait. Et dou remeignent de l'article plus n'an set.

Requis dou VII^me art., dit qu'il n'an set riens.

Requis dou VIII^me art., il n'an set riens, et en tant comme il li touche il le niet.

Requis dou IX^me art. il le niet quant a soi et dit que quant les genz crioient Au feu ! l'an sonnoit le seaint, qu'il se leva touz nuz an sa chemise et vint en la rue et y vit grant clerté de paille ardent, et i vit grant foeson de espees traites, mes ne set qui les portoit. Et dit que il vit entre les genz qui estoient an la rue ledit Colinet senz espee et senz baston qui estoit venuz au cri et que Johannot le cousturier de Saint Satur le tira chiés soi. Et plus ne set doudit art. fors tant que a l'andemain la joustise de Saint Satur prist il qui parle et ledit Colinet et mist am prison pour ledit fait.

Requis dou X^me art., de XI^me et dou XII^me, dit ledit Touset par son serement qu'il n'an set riens ne par ouïr dire ne autrement.

Requis dou XIII^me art., dit qu'il est voirs en la maniere enz contenue, sauf ce qu'il ne croit pas que nuls des tesmoinz de l'enqueste desposast riens contre eux dou fait dessus dit.

Perrins dit Maritorne, valet l'abbé de Saint Satur, accusez dou fait,

requis dou premier art., dit par son serement que ledit Friolez estoit joustise laie l'abbé de Saint Satur et se tenoit pour joustise laie, et l'an li tenoit aussinc. Et plus n'an set doudit article.

Requis dou segont article, dit que les 2 diz Guillaumes aucunes foiz se couchoient chiés ledit Friolet quant il lor plaisoit, et aucunes foiz i avoient lor garnison, et de ce est renommee. Et plus ne set doudit article.

Requis dou III^me article, dit que il n'an set riens.

Requis dou IIII^me art., il le niet quant a soi et dit que il croit bien que les 2 diz Guillaumes et Baudri furent vehuz aler par la ville de nuyz lessoir que le fait fut fait, et les vit bien cil qui parle partir de la chambre l'abbé quant il se couchoit. Et dou remeignent de l'article ne seit riens.

Requis dou V^me art. dit que il le niet quant a soi et dit que commune renommee est a Saint Satur que les 2 diz Guillaumes alerent en l'ostel doudit Tevenin Giraut et quasserent les huys et fenestres et que lui et ses genz crierent A la mort , et plus n'an set.

Requis dou VI^me art., dit que il le niet quant a soi et dit que commune renommee est au leuf que les 2 diz Guillaumes et Baudri batirent ledit Micheau et tuerent ledit Perrin de Rans, et que pour ce s'en sont fouiz. Et plus ne set de l'art.

Requis dou VII^me art., dit que il n'an set riens.

Requis dou VIII^me art., dit que il le niet quant a soi. Et dou remegnent de l'art. il n'an set riens.

Requis dou IX^me art., dit que il n'an set riens, fors tant qu'il ouït dire que Johannot le cousturier de Saint Satur avoit tiré ledit Colinet chiés soi quant il fut venuz au cri et que Simon Girodet, sergent de Saint Satur, avoit pris ledit Colinet chiés ledit Johannot le cousturier, et le menerent am prison a Saint Satur et i fut mis cil qui parle. Et plus ne set doudit art.

Requis dou XIII^me art. dit qu'il est voirs si comme il est contenu en l'art. sauf ce que il ne croit pas que il i eust nuls tesmoinz qui deposassent contre eaus. Et plus ne set doudit art.

Johans dit Coillebaut, valet dou four de Saint Satur, accusez dou fait, requis par son serement sus le premier article, dit que ledit Friolet estoit joustise laie de Saint Satur.

Requis dou segont, art., dit que les 2 diz Guillaumes couchoient et levoient quant il vouloient chiés ledit Friolet et plus n'an set doudit article.

Requis dou III^me art. et dou quart, dit que il n'an set riens

Requis dou V^me art., dit que commune renommee est a Saint Satur que les 2 Guillaumes et Baudri et Robin de l'Aumosne briserent l'uis Tevenin Giraut, et lui mesmes qui parle le ouït quasser, mes il ne set quiex genz le quasserent. Et plus ne set doudit art.

Requis dou VI^me art., dit que il est bien voir que ledit Micheau fut batuz, et lidiz Perrin de Ranz tuez, mes ne set qui le fist, fors tant que commune renommee est a Saint Satur que les 2 diz escuiers et Baudri firent le fait, et que pour ce s'en sunt fouiz. Et plus n'an set.

Requis dou VII^me et dou VIII^me art., dit que il n'an set riens.

Requis dou IX^me art., dit que il n'an set riens fors tant que il ouït dire que ledit Colinet fut pris lessoir doudit fait avant que il fust a l'anjornee, et mis am prison, et que Simon Girodet, sergent de Saint Satur (sic).

Requis dou X^me, dou XI^me et dou XII^me art., dit que il n'an set riens.

Requis dou XIII^me art., dit qu'il est voirs, si comme il est contenu an l'article, sauf ce que il ne croit pas que il i eüst nuls tesmoinz qui deposassent contre eux. Et plus n'an set.

Tevenins, sergent Joham Friolet, accusez doudit fait, requis sus le premier art., dit que ledit Friolez, son mestre, estoit joustise laie de Saint Satur, et de ce estoit renommee commune.

Requis dou segont art., dit que sovent les 2 diz escuiers couchoient et levoient chiés ledit son mestre, et quant il venoient il aportoient lor espees. Et plus n'an set doudit art.

Requis dou terz et dou IIII^me et dou V^me art., dit que il n'an set riens.

Requis dou VI^me art., dit que commune renommee est a Saint Satur que les 2 diz escuiers et Baudri batirent ledit Michiel et tuerent ledit Perrin, et que pour ce sont il fouiz. Et plus n'an set doudit art.

Requis dou VII^me et dou VIII^me art., dit que il n'an set riens.

Requis dou IX^me art., dit qu'il n'an set riens fors tant que il vit ledit Colinet am prison oveques soi a Saint Satur. Et furent longuement em prison et croit que ce fut senz cause.

Requis dou X^me dou XI^me et dou XII^me art., dit que il n'an set riens.

Requis dou XII^me art., dit qu'il est voirs sauf ce que il ne croit pas que il i eust nuls tesmoinz qui deposassent contre eaus, et plus n'an set.

Ce sunt les nons des tesmoinz et la deposicion d'iceux amenez et examinez par nous Hues Gouaut, bailli de Bourges, a la denunceacion et a la requeste Johan Bourdon, bourgeis de Saint Satur, sus la mort Perrin de Rans et Robin de l'Aumosne contre Friolet, Colinet, Touset, Maritorne, Coillebaut et Tevenin, le sergent audit Friolet.

Regnaut Tue Beuf de Saint Satur, tesmoignz jurez, requis et examinez l'an mil CCC et cinq, le dimenche empres Saint Macie, sus le premier art., dit par son serement que, avant que le murtre fut fait, lidiz Friolet estoit joustise laie a Saint Satur pour l'abbé et pour le couvent d'icelui leuf, et de ce estoit et est commune renommee a Saint Satur. Et des autres choses contenues audit art. il n'an set riens, si comme il dit.

Requis sus le segont, dit que les diz Guillaumes d'Argeri et lediz Guillaumes de Remors levoient et couchoient pluseurs foiz avant ladit murtre chiés ledit Friolet, et i avoient leur espees et leur garnison. Et dou remegnent de l'article il n'an set plus, si comme il dit.

Requis sus le terz article, dit par son serement qu'il estoit present a Saint Satur et vit ou ouït soz les voultes de la porte de Saint Satur le jour dont le murtre fut fait lessoir, si comme il li semble, que lidiz Michel La Vache demanda audit Friolet, prevost, que il le feist asseürer de Guillaume de Remors, qui menacié l'avoit, et lidiz Friolez, prevost, dist : Ge ne tiens pas ci mes jourz, mais venez la ou ge les tiens et ge vous feroi raison . Et plus ne set doudit article, si comme il dit.

Requis sus le quart, sus le quint art., dit par son serement qu'il n'an set riens.

Requis sus le sisieme art., dit par son serement qu'il vit ledit Micheau lessoir doudit venredy couchiez an 1 lit chiés Tevenin Giraut et requeroit confession et vit empres tantost lidiz Perrins de Raus et Robin de l'Aumosne occiz, entour le premier summe d'icele nuyt. Qui les avoit batuz ne occiz il ne set, mes commune renommee est a Saint Satur que les 2 diz Guillaumes et Baudri les avoient batuz et ociz et que pour ce s'en sont il fouiz dou païs. Dou remeignent de l'art. il ne set riens si comme il dit.

Requis dou VII^me, dou VIII^me, dou IX^me, dou X^me, dou XI^me et dou XII^me art., dit par son serement que il n'an set riens.

Requis sus le XIII^me, darrenier art., dit que il vit bien et sot et ouït les choses contenues oudit article et l'enqueste lue, sauf ce que il ne li souvient pas que pluseurs des tesmoinz desposassent contre les personnes dessus dictes des choses dessus dictes contre eaus proposees et plus n'an set par son serement.

Johannot le cousturier de Saint Satur, tesmoinz jurez, diligemment examinez, l'an mil CCC et V, le dimenche empres les octabes Saint Denis, requis sus le premier art., dit par son serement que, avant que le murtre fut fait, et apres lidiz Friolez estoit justise laie de Saint Satur et le tenoit l'an pour baillif de toute la joustise de Saint Satur, et l'avoit bien esté 1 an avant. Et dou remeignent doudit art. il n'en set riens.

Requis sus le segont article, dit que soventes foiz couchoient et levoient lesdiz Guillaumes d'Orgeri et Guillaume de Remoïs sus ledit Friolet, et le set par çou que il qui parole leur a pluseurs foiz porté leur robes pour eux vestir an l'ostel doudit Friolet, et quant il i alloit il trovoit qu'il aveint leur espees dejouste leur chevaz, et dit cil qui parole que onques ne vit lesdiz escuiers aler resner fors que une foiz que il qui parle vit, 1 jour dont il ne li souvient, bien a 2 anz ou environ, lidiz Guillaumes de Remors, niés au prevost moegne, qui aloit parmi la rue de devant sa maeson son espee toute nue et disoit Tevenin Giraut : Vien avant , et cils Tevenins qui estoit de l'autre part de la rue devant sa maeson dit : Voiz me ci, que vieaus tu ? . Et li donna lidiz Tevenins de son espee qu'i tenoit parmi la teste, mes ledit Guillaumes estoit armez, si que de riens ne l'empira, et puis apres firent paiz ensemble. Et dit que commune renommee est bien a Saint Satur que les 2 diz escuiers aloient resnent. Et dou remegnent de l'article plus n'an set.

Requis sus le terz art., dit que il n'an set riens, fors tant que il qui parle, qui estoit en son ovrouer, ouït dire ledit venredi a Tevenin Giraut, Micheau La Vache et pluseurs autres dont ne li souvient des nons, que mal avoit fait lidiz Friolet dont il n'avoit fet asseurer lidiz Micheau desdiz escuiers, et aussine ouït cil qui parlet que ledit Micheau s'en pleignoit, et de ce estoit et onquores est commune renommee a Saint Satur. Et dou remeignent de l'article plus n'an set.

Requis sus le quart art., dit par son serement que il qui parle vit bien ceux contenuz oudit article, fors que ledit Maritorne et Colinet, que pas ne vit ledit venredi apres queuvrefeu, et dit que il avoient bastons offenssables et deffenssables, et dit que pas ne set que ledit Friolez les peüst ne dehust savoir, et dit que commune renommee est de çou.

Requis dou quint art., dit par son serement que il qui parle vit le venredi dessus dit apres queuvrefeu lesdiz escuiers et Baudri et Robin d'lAumosne, mes il n'i vit pas lidiz Maritorne ne Colinet. Et estoient en la rue devant la maeson doudit Tevenin Giraut, et vit que il assaillirent l'ostel doudit Tevenin, et que il rompirent les huis et les fenestres, et dit que il ouït crier Au feu et A la mort . Et dou remegnent de l'article riens n'en set.

Requis dou VI^me art., dit que avant que il qui parle fut descenduz de sa maeson en la rue, lidiz Micheau La Vache avoit ja esté batuz, et ne set sil qui parle qui l'avoit batuz, fors tant que il croit que les dessus diz escuiers l'avoient batu. Et le croit par ce que il qui parle les avoit vehuz an la rue ou il avoient leur espees et bastons, si comme il a deposé ou quart art. Et dit que ledit Michel estoit couchez, quant il i vint chiés Tevenin Giraut, en 1 lit, et dit aussuit cil qui parle que lidiz P. de Raus estoit touz morz et estoit an 1 lit chiés ledit Tevenin Giraut. Et de ce est commune renommee a Saint Satir.

Requis dou VII^me article, dit par son serement que il qui parle vit bien ledit Robin de l'Aumosne qui avoit esté occis, mes ne set qui l'avoit occis, mes il qui parle ouït bien dire 1 jour dont il ne li souvient, an la semainne que ledit fait fut fet, a une fame apellee Johanne, qui a la bouiche menjee de mal, an la prison l'abbé et convent Saint Satur, que ele avoit vehu ledit Guillaume d'Orgeri ferir ledit Robin de l'Aumosne, et qu'ele ouït que ledit Robin li dist : Ha, Guillaume, biau frere, tu m'a occis , et ouït que ledit Guillaumes respondit : Pour Dieu, pardonnez le moi, ge cuidoie de toi que ce fust Johans Bourdons . Et dou remeignent de l'article riens n'an set, mes il qui parle dit que bien est commune renommee a Saint Satur des choses contenues oudit art.

Requis dou VIII^me art. dit qu'il n'an set riens.

Requis dou IX^me art., dit par son serement que il qui parle ne vit onques ledit Touset gester bastons ne autre chose en la rue esdiz mauffeteurs, ne estre au fait, mes il qui parlet dit que apres le fait il vit bien en la rue lidiz Colinet ou il tenoit 1 paul en sa meain et une espee ceainte, et li dit cil qui parlet : Que fais tu ci, trai toi arriers, tu i es de ceus de l'abbeïe qui sunt partie adverse, se les bourjois te tiennent ci il te porront bien faire villenie . Et lors lidiz Colinez se alla seoir seur une fourme en la meson de cil qui parle et puis se coucha en 1 lit ; illeuques le trova Regnaut Tuebeuf, sergent de Saint Satur, qui le adjorna et commanda que il se levast et venist an la rue fere compaignie oveques les autres boujois pour garder ceux qui avoient esté occis, et lors lidiz Colinez se leva et i vint si comme lidiz sergenz li avoit commandé. Et dou remeignent de l'art. riens de set.

Requis dou X^me art., dit qu'il n'an set riens, fors par ouïr dire.

Requis dou XI^me art., dit par son serement que quant le fait fut fet, ceux qui estoient an la rue crierent audit Friolet qui estoit venuz au fait : Ha, Friolet, pregnez les murtiers, que Perrin de Raus est morz, et pluseurs autres navrez. Et il qui parlet ouït que lidiz Friolez dist aus 2 diz Guillaumes celx moz : Que faites vous, ci alons nous an. Et vit que les 2 diz escuier et ledit Friolet s'en allerent ensemble vers l'abbeïe, mes il qui devindrent et dou remeignent de l'article plus n'en set

Requis dou XII^me art., dit que riens n'an set fors tant que il qui parlet ouït dire, si comme il passoit par la rue, 1 jour dont ne li souvient, apres le fait fait, que l'an avoit porté de l'ostel doudit Friolet une cote gamboisee et une gorgerete chiés Johan Rachon pour garder, et que Guillemin de Verdigni avoit donné an conseil a la fame doudit Johan Rachon que le n'an gardast point, et elle les fist arrers retorner chiés ledit Friolet. Et dou remeignent de l'article riens n'en set.

Requis dou XIII^me art., dit qu'il est bien voir que les personnes dessus dictes se mistrent an l'enqueste doudit abbé et convent, et les y vit mettre, ne onques ne ouït dire ne sot que nuls tesmoinz despossesseaint contre eux. Et plus n'an set diligenment requis.

Johanne de Bonnay, tesmoign juree

cf. son autre témoignage.