[1]

propose le procureur .. l'abbé et le convent de l'eglise Sainte Genevieve de Paris ou non desdiz abbé et convent que :

ladite eglise est en chief et en membres en l'especial garde le roy et fondee de roy de France.

Item que li abbés et li convent desus dit sont et ont esté en bone sesine de toute maniere de joustice haute et basse et de la voierie et de touz cas apartenanz a voierie des le fondement de l'eglise en leur terre, et especiaument en leur viez terre, et par don de roy, et en est li abbés de ladite eglise en la foi et en l'ommage le roy.

Item que il sont en bone sesine de tenir close la place dont veue a esté fete et dont contens est entre les diz religieus d'une part et le bailli de Vermandois et le prevost de Paris d'autre, en tant comme il touche chacun de labourer, de coustiver et de fere touz leur aisemenz comme en leur propre demainne par l'espace de 40 anz, de 50 et de 60 anz et de si lonc tens qui doit souffire a bonne sesine avoir acquise.

Item que ladite place est assise et enclose de toutes parz en ladite viez terre ou propre demainne et ou pourpris de ladite eglise.

Item que le prevost de Paris, a la requeste dudit baillif, est venu audit leu et a rompu le mur de ladite place et fet huis et entree et de novel, en empeschant et troublant lesdiz religieus en leur sesine.

Item que des choses desus dites est commune renommee.

Pour quoi requiert ledit procureur ou non desus dit que le trouble, l'empeschement et la noveleté soient osté, le mur fet et remis en son premier estat et eus estre gardez et deffenduz en leur sesine. Et des choses desus dites offre ledit procureur ou non desus dit a vous enfourmer ou a prouver, se mestiers est, ce qui li pourra ou devra souffire a la fin desus dite tant seulement, et nie le fet de la partie adverse en tant comme il est contraires au sien.

A ceste fin que le trouble, l'ampeschement et la noveleté soient osté, que le prevost de Paris a fet ou leu et en la place dont contens est, et dont veue a esté fete entre ceus de Sainte Genevieve d'une part et Gautier Bardin, baillif de Vermendois, et ledit prevost en tant comme il li touche d'autre part, le mur refet et remis en son premier estat et ladite eglise soit gardee et deffendue en sa sesine non contraictanz les resons ou les articles que ledit prevost a baillees en deffandant ledit baillif, dit et respont le procureur de Sainte Genevieve ou non de ladite eglise, Et premierement au premier article respont que le roy a bien l'aiesance avecques le commun des autres d'aler et de venir parmi les voies overtes, ausinques comme le commun, mes le procureur nie que en leur voierie ne en leur viez terre que li rois ait profit ne avantage plus que le commun fors que ou ressort.

Item le procureur respont au secont article que il ne croit mie especiaument en la maniere que il est dit en la viez terre sainte Genevieve.

Item ledit procureur respont au tierz article que il ne le croit mie en leur viez terre.

Item il respont au quart article et le nie en la maniere que il est dit, mes bien croit que li abbés de Sainte Genevieve est en l'ommage le roy nu a nu de la seignourie que il ont en leur viez terre.

Item au quint dit et respont et le nie et dit que quant aucunne rue est close par commun assent de seigneur et du pueple, la chose demeure au seigneur enquele terre elle est se il a haute joustice et voierie.

Item ledit procureur dit et respont au sisieme article que bien croit que quant aucune chose vient au roy par son droit, que il empuet fere sa volenté, mes il ne croit mie que la chose dont contens est soit venue au roy, ainçois dit que ladite chose est a Sainte Genevieve, pour ce que ele est en leur propre demainne, en leur poupris, en leur viez terre, la ou il ont toute joustice haute et basse et voierie.

Item il dit et respont au septieme article que il ne croit mie que cele dont contens est feüst close du commandement le roy ne que li rois en poist fere son profit, einçois en demeure le profit a Sainte Genevieve, en quele joustice haute et basse et voierie la chose est.

Item il respont a l'uitiesme article que il ne le croit pas en leur viez terre ne en terre de seigneur qui ait haute joustice et voierie.

Item il dit et repont a ce que le prevost dit que li abbés et li convent ne doivent estre oïz etc., que bien est voirs que se li abbés avoit subtrait le droit le roy, sachant que au roy apartenist, il se seroit meffet, mes en ice leu dont contens est, avant que ce feust voie ne que Paris feust clos li rois n'i avoit riens, fors que le ressort, car c'estoit et est encore en la viez terre et du fondement de Sainte Genevieve, en laquelle Sainte Genevieve a toute joustice haute et basse et voierie et ot des le fondement. Et quant ele fu fete voie, n'i ot plus li rois que le ressort. Et donc quant elle est revenue a sa premiere nature li rois n'i puet plus avoir que il avoit avant et ainsiques ne puet l'en pas dire que li abbés ait subpris le droit du roy, mes a usé de son droit, duquel il usoit avant que la voie i feust et poet user.

Item a ce que il dit que sesine ne doit estre apelee etc., respont ledit procureur que ce ne doit pas estre dite subprisure clandestine ne en repost fete, mes bonne sesine et loial a bon droit commanciee et continuee au veu et au seu du roy et de sa gent et du commun de Paris, car puis que ladite voie fu close, l'abbé et le convent furent porté a huis aparissent et sus voie commune pour leur aisement avoir en ce leu dont contens est, et longuement le tindrent en esploitant de l'aisement de celi leu et tant que la gent le roy ne nus a cui il apartenist ne le pouist avoir mesconneu, pour quoi leur sesine ne leur usage ne puet estre dit en repost, car ces choses ont il fet au veu et au seu de toutes genz et aveques ce dit ledit procureur que puis et devant que cesdiz huis et porte, qui devers la rue estoient furent estonpé, ont veu communement et seu toutes genz leur aisement et leur usages que il ont et ont eu en celi liu, especiaument ou tens de vendenges, que pour l'aisement de leur vendenges il ont celi leu overt et abandonné de leur volenté a toutes gens et reclos a leur volenté, et ce ont bien seu plusieurs des genz le roy.

Item ledit procureur dit que autre foiz ledit prevost, a la requeste dudit ballif, a fet tele noveleté audit leu, et a la requeste de ceus de Sainte Genevieve fu par ledit prevost la noveleté ostée en esclarcissant le droit de Sainte Genevieve. Et des choses desus dites offre ledit procureur a prover ce tant seulement qui souffire li pourra et devra et met en ni le fet de la partie averse en tant comme il est contraires au sien.