[1]

Philippus, Dei gratia Francorum rex, baillivo Aurelianensi salutem.

Significaverunt nobis viri religiosi fratres Guillelmus Audeberti et Guillelmus Effordi, scolares Aurelianenses, latores presencium, graviter conquerendo quod prepositus Aurelianensis ipsos nuper, alterum in manu, alterum in caput, prout adhuc videri potest, vulnerando sine causa rationabili, cepit, verberavit et turpiter tractavit, unde tibi mandamus quatenus de facto hujus modi diligenter inquiras et si predictum prepositum inveneris tan tas predictis religiosis injurias minus rationabiliter intulisse, ipsum punias secundum quantitatem sui deliti et eis facias emendari. Datum apud Meledunum die lune in festo Sancti Nicholai hyemalis.

Il avint le jour des Brandons desrennement passez, au soir empres cuefvre feu Saint Pere Enpont, que les serjans le roy de Chastelet aloient par la ville d'Orliens si com il avoient acoustumé por garder la et comme il fussent en la rue du Retour Saint Benoit il trouverent clers escoliers qui issirent de leur ostel a armes et fu por ce que cez serjanz avoient osté 1 coutel a pointe au varlet a cez clers escolliers por ce que il le portoit estre sure et se pridrent a ces serjans et en batirent et ferirent 2 et leur tolirent leurs espees et en navrirent 1 si malement que l'en cuidoit certemnement que il en moureust, et por ce li prevoz d'Orliens mena l'endem parmi la ville son guiet, soi douzieme, sanz plus et ala par ladite rue savoir se il porroit trouver cez maufeteeurs et si comme il passoit outre il oi grant tumulte de genz en une meson a escolliers et li sembla bien que ce ne fussent pas bonnes genz et donques il vint a la meson et apela 1 tavernier qui demeuroit desouz en une petite meson et quant le tavernier ot l'uis ouvert, li prevoz li demanda queles genz il avoit lasus, liquel respondi : molt de genz, et si avoit il sanz doute et murtriers et banniz si comme l'en le sot puis plus certeinnement et especiaument 1 clerc maufeteur que l'en apeloit Dimenche et un autre que l'en apeloit Huchon l'Englois qui le tua puis ou fu au tuer si com il quenut puis. Et si com li tavernier ot reclos son huis et le prevost s'en voult retorner l'en lessa choair grosses pierttes et feri l'en sic le prevost sus la teste que la crinoliere de son bacinnet fu toute route et qu'i fu touz ronnez quar la pierre estoit ansine grant com 1 quarrel taillez et ansinc furent feruz pluseurs qui estoient en sa compagnie molt durement. Et quant le prevost vit ce il se trait arrieres et dist com molt esbahiz : qui es ce la ? et les clers de haut respondirent : andaz, en male avensture que Dex vous doint. Et li prevost leur dist lors : Loiaus seigneurs vos fetes mal, je sui prevost le roy. Et lors commencierent les clers a crier et a dire les plus ledes paroles et les plus vileinnes que il pouoint, et teles que lede chose est neis du recorder et lançoient pierres contre le prevost et contre sa compaignie et treoient d'ars et d'arbalestes et ferirent l'un de la compaignie au prevost en tele menniere que i li creuverent l'ueil d'une seette et quant li prevost vit que il estoient sic armé et sembloient bien malfeteurs, lors quemanda de par le roi qu'il se rendissent a li et que il ouvressent leur huis et il commencierent lors pis a dire et a faire que il n'avoient fait devant. Et lors ot le prevost conseil que il feist tant que il entrast dedenz et qu'il veist quex genz ce estoient, et por quoi il estoient armez quar il avoit bien entendu que il s'estoient toute jor guarni d'armes et de pierres, et lors ala il par la ville querre aide et i amena grant plenté de genz, 2 foiz ou 3 et n'i fesoit torjors riens per le grant deffense metaient en eux en getant et en lanceant et dura l'asaut pris du jour, et a la parfin pour l'onneur du roy et por son droit guarder et pro ce que il appartenoit bien a son office, si com i i estoit avis que il entrast en l'ostel, il fist crier le ban le roy, que l'en venist en l'aide au prevost, quar il veoit bien qu'autrement n'i feroit il riens. Et lors i ot il plus grant assaut que devant de ceus dehors, et de ceux dedenz quar ceux dedenz se deffendoient trop viguereusement et ilecques fu li prevoz bleciez et pluseurs autres navrez. Et a la parfin, li huis fu brisiez par force et i entra li prevost et sa compaignie et n'i trouverent homme ne fanme quar il s'en estoient tuit fouiz pardesus les mesons et en i ot 9 pris, aucuns armez et aucuns desarmez qui avoient ostees leurs armes et furent trouvees au matin es escoles et i ot aucuns des clers qui furent bleciez quar il se deffendoient a armes au mieuz que il povoient et plus por ce que l'en n'i veoit goute, et illecques fu feruz li moigne que l'en apele frere Guillaume, et li osta l'en 1 grant coutel a pointe de sa ceinture quar il se defendoit molt forment et avoit ja sic feru une grant torche de cire que le prevost avoit fait porter por donner clarté que il l'avoit brisiee en 2 pieces. Et einsi furent pris cez clers et por tel forfet et furent puis renduz au doien d'Orliens, en tele condition que il se tenist sic guarni d'eux et de lours biens que il en pouist fere gré au roy de ce que il avoient fet sic grant vileinnie et si grant escande en sa ville, et au prevost et aus autres bleciez de leur mehain et de leurs inhures et est tele la verité que les 9 qui furent pris estoient de diverses nations c'est assavoir Poitevins, Guascons, Alemanz, Espaignoux, Anglais, Borgueignons et Piquarz et touz mal renummez de pluseurs maufez et des quiex pluseurs estoient banniz de Paris, si com l'en disoit, et en i a puis aucuns pris par murtre que il avoient fet et ont esté jugiez et noiez par leur forfet et estoient clers. Et icez choses devant dites sunt einsit tesmoigniees par le prevost d'Orliens et par son serement. Et por savoir mieuz la verité de ce, le bailli en a enquis par le tesmoignage de ceux qui plus puent savoir du fet.

Girarz, serjanz de Chastelet, jurez et requis sus le fet desusdit, dit par son sermant que le dimanche de des Brandons novelement passee cil qui palle, Perrot Roquin, Hemeri Michelet et le filz audit Girart alaint par la ville a eure de conplie, pour ce que le prevost n'estoit pas en la ville et quant il furen au retour Saint Benooit devant la meson a escoliers que l'an apele les Tornemines il troverent 1 vallet qui avoit un grant coutel a pointe a sa ceinture et il le li oterent si con il avaint acoutumé a faire, et cil commença a crier : l'en m'a oté mon coutel, l'an m'a osté mon coutel Et leurs (sic) descendirent de ladite maison 8 homes, les coutiaux traiz et les espees et disaint : qui a le coutel, vous i morroiz Et lors vint li uns audit Hemeri, serjant dou Chatelet et li toli s'espee et l'autre feri ledit Girart de 1 coutel parmi le cors si que il chai a genouz et lors s'anfuirent tuit si conpaignon et le lessierent et puis cuida ledit Girart morir du cop et an jut 1 mais au lit. Plus i n'en set.

Michelet, serjant dou Chatelet, jurez et requis sus le fet desus dit, dit par son sermant que le dimanche des Brandons, si com il li est avis, il et ses compaignons desus diz alerent par la ville et quant il furent au Retor Saint Benooit vers la maison Thomas Billart, et troverent 1 vallet et demanderent qui est la, et tantost Girarz li osta de sa ceinture 1 grant coutel a pointe, et lors li vallet commança a criez : ne m'otez pas mon coutel, vez ci mon ostel. Et quant que il disoit ce, il descendi de 1 grant ostel ou demoraint les Fornes Mines, clers, et commancerent a dire : Randez nos nostre coutiau, et les serjanz respondirent : Venez le demain querre et monseigneur le vos randra, quar nos ne le vos porrains randre se nos ne nos volains parjurer. Et lors commaça la mellee et fu feruz Girarz de 1 coutel et toli l'an a Hemeri sa'pee et s'an departirent li serjanz li 1 ça, li autres la. Et plus il n'an set.

Perret Roquin, serjant dou Chatelet, dit par son sermant de la bleceure audit Girart, serjant dou Chatelet ansit comme Michelet, tesmoing prouchain desus dit, et dit que l'andemain, au soir, a heure que l'an moinne le guiet, il ala o le prevot et avecques aus Pierre Aaliz, le serjant Richart Bon Ami, celui Richart, Adam Jordain, Pierre de Cleri, son frere, Aignian de Chartres, Chantiau, Jehan Chevalier, et quant il furent devant la maison ou contanz fu, il oirent grant tumulte de genz et cuiderent que ce fut an une taverne qui estoit desouz et ala le prevost la et fist l'uis ovrir et dit : Vos tenez taverne estre eure, je vos ajorne a demain par devant moi. Et demanda quex genz sunt ce qui sunt l'amont, et li taverniers li respondi : Ce sont clers qui se sont to ce jour garniz d'armes et de pierres. Et apres quant que li prevoz et ses compaignons s'an issaint de l'ostel ou la taverne estoit, il vint genz a la fenestre et demanderent qui c'estoit la et il respondirent : c'est le prevoz le roy et il ditrent leurs : un estront dou prevost un estront di roy, audaz, a la male aventure, que Dex vos doint audaz, et vostre roy an espaignie et montraint leur bradies avalees rempl. par : pluseurs vileinnes paroles du roy et du prevost, teles qu'i ne sont pas a recorder. Et commancerent a lancier d'ars et d'arbalestes et ferirent le prevot sus son hacinet de 1 grant carrel, si que la crineliere de son bacinet ronpi et pluseurs autres i furent feru et Guillaume Chantiau fu feruz d'une saaitte parmi l'eau si qu'il n'an voit gote. Et lors le prevost ot consail que il queit aide et que il feist tant que il les preist et lors fit il crier le ban le roy1 quar il vooit bien que autrement ne les porroit il prandre. Et quant il ot aide, li essauz commança plus granz que devant et dura jusques pres du jour. A la parfin le prevot et ses genz porterent sus leur testes huis et estauz et vindrent jusques a l'uis a grant meschief et le brisierent et antra le prevot dedanz a po de genz et n'i trova l'an riens que loce, que une sole coite, et bien 2 charretees de pierres ou 3 et lors les segui le prevot par une fenestre et descendit an unes escoles sor 3 ou sor 4 et fist aler querre une torche quar l'an n'i vooit gote et quant la torche fu venue, il troverent 1 grant moinne que l'an apele frere Guillaume et 2 autres, 2 coites et hernais et autres choses qui estoient an males, et vit que Henri Dreue osta au moinne 1 grant coutel de sa ceinture et ronpi le pendant de la gueine. Requis se il vit ferir le moinne, dit par son sermant que il vit le moine qui feri, ne set de espee ou de baton, la torche, si qu'elle brisa et pandila 1 la flame contre val et vit cil qui palle 1, mes ne set lequel, qui feri le moinne et a ce qu'il mit le braz an le feri an la main, et lors prist le prevost ces 3 et leurs choses et puis cercha le prevot les autres et les trova an un celier quatre, et 1 autre an mi la voie, qui s'an fuiait, mes cil Roquin n'i fu pas par il gardoit les choses aus escoles ne il ne vit puis nus des clers devant ce que il furent amené devant le prevot por randre au deain et dit bien que il estoient 8 de mauvaise renommee et ont puis fet assez de mauves faiz si cum il apert quar l'un a puis tué l'autre de 2 qui i estaint et dit cil qui palle que tant com la mellee fu cil dedanz estaint au fenestres et bien armez, et plus il n'an set.

Guillaume Chantiau, jurez et requis sus les choses desus dites, dit par son sermant que le lundi d'apres les Brandons, apres queuvre feu, a heure que l'an moinne le guiet, le prevot assanbla ou Chatelet cil qui palle et les autres desus diz, Pierre Aaliz et le serjant Richart Bonami, si que il furent bien autour 12 ou 13 et quant il furent bien aparilliez, il alerent au Retour Saint Benooit et l'an dit au prevot genz qui venaint do vin que mes il n'en savoient que il estaint que il avoit mauvaise genz an 1 ostel devant la maison Robin Habert et leur le prevost feri a l'uis d'une taverne et antra dedanz lui et partie de sa gent et l'autre partie dehors. Et quant il fu dedanz et l'an ot alumé, il cercha dedanz et n'i trova ame, et leurs il s'en issi et si com il s'en issoit il vint clers au fenestres d'an haut et demanderent : Qui est ce la ? Et le prevot leur respondi : C'est le prevot le roy et sa genz. Et leurs ditrent ceux d'an haut : Fi de vos et de vostre roy, audaz, an Espaingne et se vos ne vos audaz, la male aventure vos avandra ja a des tot. Et commencerent a giter moult forment grosses pierres et a traire d'ars et d'arbalestes et ferirent celui qui palle d'une saaitte an l'eul, si qu'il n'an voit gote, et fu feruz le seigneur a celui qui palle d'une grosse pierre sus la hanche si qu'il chai en la boe et le prevoz fu feruz d'une autre pierre sus le braz et sus le bavinet et an plusseurs autres leus et pleusseurs autres furent feruz et haffrez et quant le prevot vit ce il ot consail que il alat querre aide, et fist leurs crier le ban le roy, quar autrement ne la pooit il avoir, et cil qui palle s'ala faire regarder chies un mire et puis s'an ala. D'autres choses ne set plus.

Jehannin Chevalier, jurez et requis, dit par son sermant que le prevot et ceus qui sont desus nomez vundrent au Chatelet jusqu'a 12 ou jusqu'a 13 por aler par la ville a eure que le guiet a acoutumé la nuit do premier lundi de karesme et alerent vers la maison ou le contanz fu et oïrent grant planté de genz dedanz et por ce le prevot vint a une taverne qui estoit desouz et la fit ovrir mes cil aui palle demora dehors, et quant il orent pallé au tavernier li prevoz issi hors et lors cil qui palle vit genz au fenestres qui demanderent qui est la et il respondi : C'est le prevost le roy, et leurs ditrent cels amont : nos n'avons que faire do prevot ne do roy, andaz vos, an Espaigne a vostre roy. Et commancerent a gieter grosses pierres et carriaus plus de 2 charretees et ferirent le prevot et pleisieurs autres et vit cil qui palle que une saiaicte fu traicte an l'eul a 1 home qui a nom Chantiau, si que l'an li creva l'eul, et quant le prevot vit ce et que il n'i feraint riens, il ala querre le guiet et fit crier le ban le roy, que l'an venit an l'aide au prevot et quant il furent assanblé devant l'uis, li prevoz dit : Ovrez moi l'uis de par le roy, quar ge sui prevoz le roy et vos randez a moi et vos n'aureiz garde. Et lors commancerent cil dedanz plus fort que devanttet atraire d'ars et d'arbalestes si que nus ne s'osoit pres traire, et huaint avant ribaudaille riens ni feroiz et montraint leur dos eus et dit cil aui palle que il les vit bien touz armez au fenestres et dura cest assaut jusques pres do jour, et a la parfin ceus de hors aporterent uis et estauz et firent tant que il avindrent a l'uis a grant meschief et le brisierent par force et lors antra le prevot dedanz et aucuns autres mes cil qui palle demoura hors par quoy il n'an vit pus, mes il les vit quant l'an les mena hors, pris, premieremant 2 et puis 3 et puis 4 et an i avoit aucuns armez et auquns desarmez qui avoient leur armes lessiés chooir si com l'an disoit et les vit mener en prison et dit que il estoient mauvaise genz et mal renommez, si com l'an disoit et il ont bien puis pontré par leur faiz. Et estoient de diverses nacions. Et dit que il n'an set plus.

Pierre Aaliz, jurez et requis, dit par son sermant que il ne fu pas au commancement, mais il fu un poi avant que l'uis fut brisié et oï dire que l'an avoit feste et dite grant vilenie au prevot et que il avoit esté bleciez et vit que il prevoz et ses genz porterent uis et es por avenir a l'ostel et firent tant quee il brisierent l'uis et lors antra le prevot dedanz et plusseurs autres et cil qui palle et ne trouverent riens an l'ostel fors pierres et la palle des liz, et puis le prevot par une fenestre antra en une escole a po de gent, et an troverent 3 que il vit puis pris, mes il ne fu pas au prandre et fu l'uis de l'escole ouvert et i antrerent moult de genz et puis ala le prevot an la maison fei Gile le Bediau et o lui moult d'autres et cil qui palle et an troverent 5, c'est asavoir 4 en un celier et 1 an une chanbre, c'est asavoir en la chanbre Huchon Dimanche le Guascoing2 et J. de Lile et an la chanbre 1 moine, et estoient auquns armez et auqins desarmez qui avaint leur armeures les ans, et oï dire que l'ain an avoit un pris an mi la voie anfuiant armé, et an vit mener 8 en prison, et 1 qui avoit avant esté menez et dit bien que il estaint an estat de mauvaise genz et ceu a bien esté seu par leur faiz. Des autres choses ne set plus.

Jehan d'Ivoy, jurez et requis sus le fait desus dit, dit par son serment que une nuit anviron les Brandons novelemant passez li prevoz ala an la rue ou demeure cil qui palle et li commanda et a plusseurs de par le roy que il alesseint o lui pour prandre malfaiteurs qui li avaint faite vilenie qui se tenaint contre lui o ars et o saaietes et cil qui palle dit que il i ala et plusseurs autres et quant il furent devant l'ostel cil qui palle leur cria plusseurs foiz que il se randissent au prevost de par le roy et ceux clers qui estaint en la maison pridrent a crier fi do prevot, fi do ballif, fi do roy, vie, vie ribaut, galot, la male avanture vos vandra, andaz a vostre roy, an Espaigne, et leurs commancerent ceux d'an haut a ruer pierres grosses menuemant et rondemant et traire d'ars et d'arbalestes et an nafrerent plusseurs de ceux d'aval et ainsit ceux d'aval leur trairent saaictes, mes elles estaint totes defferrees et dura l'essaut jusques pres du jour. A la parfin le prevost et sa compaignie s'aprucherent de la maison a iceux clers et porterent uis et estauz sus leur testes et s'an atargierent, lesquiex uis et estauz furent froissiez par les pierres que il gieterent desus quar l'an i an gita bien 2 charretees et plus, mais totes vois li prevoz et sa gent brisierent l'uis et antrerent dedanz jusques a 12 quar il ne voulut pas que il i antrassent tuit, qui n'i feissent domage, mais il n'i troverent riens fors que saaittes et huiches vuides ouvertes et la palle de leur liz, et le prevoz les fit sivre par desus les maisons et an une escole et troverent coites, coissins, dras, males a chevaucher et autres choses an icele escole et com il cerchessaint l'escole o une grant torche de cire ardent, 1 des malfaiteurs la feri autele maniere que elle brisa et estaint et illeuc an i ot 1 feru et croit que ce fut 1 grant moinne et puis fu la torche alumee et furent trovez 3 autres des malfaiteurs, touz desarmez, mes leur armeures furent puis trovees aus escoles ou il les avoient culles, et puis cercha le prevot une autre maison et an troverent 4, c'est asavoir 1 qui avoit nom Dimanche, 1 moinne et 2 autres don auquns estaint armez auquns desarmez, et puis il furent touz menez au Chatelet et randuz au dean autele maniere que l'an feit droit et au roy et au bleciez, et dit cil qui palle que il estaint tuit de diverses nacions, et fu bleciez cil qui parle en mout de manieres.

Guillaume d'Ievre, jurez et requis, dit par son sermant que l'andemain des Brandons, de nuiz, Jehan de Bolonville, prevoz d'Orliens, mena celui qui parle et autres, n'est asavoir Richart Bon Ami et autres, c'est asavoir Adam Jordain, Pierre de Cleri et son frere, Aignian de Chartres, Chantiau, Perrot Roquin, Johennin Chevalier si que il estaint 12 ou 13 et s'an alerent assanbleemant au Retour Saint Benooit et quant il furent devant une maison ou il demoroit clers que l'an apeloit Tornes Mines, Adam Jordain dit au prevot et a sa compaignie : De ceste maison issirent ceux qui blecierent ier noz serjanz ou de ceste maison, et montra une maison qui estoit plus au haut et lors si treidrent la et oïrent grant au au haut et leurs li prevost fit ovrir de par le roy l'uis d'une taverne qui estoit desouz et i entra, soi disieme et dit au tavernier : quex gens sunt ce que ge oi ceanz, et le tavernier respondi : il n'i a ceanz ame que moy, mais il i a lassus grant planté de genz et si com li prevot vot essir hors de la taverne de ces d'an haut au fenestres et ditrent : qui est la, et l'an respondi : c'est le prevot le roy, et leurs ditrent ceux d'an haut : andaz nos au prevot, an la male avanture ou la male avanture vos vandra ja a des tot, et tantot il commancerent a gieter grosses pierres et a traire d'ars et d'arbalestes, et ferirent le prevot de grosses pierres et plusseurs autres et fu feru ledit Chantiau d'une saaiete en l'eul si qu'il n'an voit gote, et leurs le prevot comança a dire : quiex genz estes, vos leans, ovrez l'uis de par le roy, et cil dedanz distrent tourjorz audaz an vostre male aventure et ne finerent de traire et de giter et quant le prevot vit que il ne porroient riens faire, il ala querre aide et fit crier le ban que l'an li venit aider, quar autrement ne noist il avoir genz et lors apres i ot grant essaut qui dura jusques pres dou jour et puis la gent au prevot, a huis et a es, que il portaint sus leur testes brisierent l'uis et antra le prevot dedanz et plusseurs autres, mes cil qui palle demoura dehors et puis an amena le prevot et sa gent hors jusques a 7, lesquex furent livré a cex de hors et menez en prison, et disoit l'an que il avoient esté pris an une escole et an une maison delez. Plus il n'an set.

Adam Jourdain, jurez et requis, dit par son sermant que anviron les Brandons novelemant passez, li prevoz d'Orliens, Jehan de Bolonville, prit celui qui palle et les autres persones dessus dites juqu'à 12 et les assenbla ou Chatelet a jeure apres queuvre feu Saint Pere an Pont, que le guiet doit aler, et leur dit : Alons vers le Retour de Saint Bennoit ou noz sergent furent er soir batuz et leur toli l'an leur espees. Et leurs il i alerent et quant il furent an la rue vers la maison au Tornes Mines, il passerent outre et alerent vers la maison ou le contanz fu et i oïrent grant tumulte de genz an haut et leurs, si cum il li est avis il hutherent a l'uis au clers et vint li 1 des clers au fenestres et demanda qui est la. Et li prevoz li dit : bones genz, ce sunt les genz de roy, et cil d'an haut leur ditrent : alez vos an navez que querre ceanz et maintenant l'an commança a giter pierres d'an haut et leurs le prevost fit ovrir une taverne qui estoit desouz et demanda queles genz ce leanz et le tavernie dist : ce sunt clers et le prevot n'osoit pas bien ne sa gent issir de la taverne por ce que l'an gitoit d'an haut trop forment, et totes vois il essi, et ceux commancerent plus a giter, et fu feru 1 qui a nom Chantiau d'une saaitte en l'eul et l'ot crevé, si que il n'an voit gote. Et quant le prevot vit ce, il fit crier le ban, que l'an li venist aider, et sa gent assanblee il i ot grant assaut et dura juques pres do jor et fu ferru le prevot d'une grosse pierre par la joe jusqu'au sanc et de une autre par la teste si que la crineliere de son bacinet ronpi et fu feruz Guillaume de Jevre si que il chei en la boe et quant l'an disoit a ceux d'an haut : orrez l'uis de par le roy, sauvés voz vies, et il disaint fi do prevot, fi do roy, andaz a vostre roy, an Espaingne et montraint leur dos a braies avalees et estoient au fenestres touz armez et tenoient lances et booliers. A la parfin, l'uis fut brisié et antrerent dedanz le prevot et petit de sa genz et 1 poy apres cil qui parle antra dedanz et trova le prevot an unes escoles et de sa genz qui cerchaint les et vit que 1 grant moinne fu ja pris et feruz et apres il alerent an une autre maison et an troverent juqu'a 6, auquns armez et auquns desarmez, et an fu 1 autre pris tout armé qui a nom Diagon, si com il s'an fuioit et ainsit an i ot pris juqu'à 6 et menez an la prison le roy et dit cil qui palle qu'il avaint nom si comme il se nomerent apres : Huchon l'Anglois, Dimanche le Gacon, Johan l'Alemant, Johan, moinne regulier de Saint Jehan de Cole, poitevin, Diagon l'Espoignel, Tolart le Picart, Heuart le Borgueignon, Eschar le gascoin, qui ore semont le prevot et les borjois pour ce fait. Et estaint tout cex larrons et murtriers si com l'an dit, et banniz de Paris et si i estoit frere Guillaume Hodebert et son serjant et plusseurs autres i avoit qui s'an foyrent. Plus il n'em set.

Pierre de Cleri, jurez et requis sus le fait desus dit, dit par son sermant que il assenbla o le prevot et alerent a la taverne ausit cum Adam Jordain, tesmoing devant dit et dit que avant totes choses le prevot fit ovrir la taverne et i antra soy sisieme ou cinquieme, et quant que il palloit au tavernier, ceux d'an haut commancerent3 a giter et a traire a cex dehors et an ferirent 1 si qu'i creverent l'eul et cum le prevot issi de la taverne, il fu feruz parmi la teste de 1 grant carrel si qu'i fu touz atonnez et cil qui palle fu feruz d'une pierre sus le braz et leur le prevot dist : Ge vos coumang de par le roy que vos ovraiz l'uis, et il ditrent andaz an la male aventure que Dex vos doint, et quant le prevost vit que il n'i porroit riens faire, il fist crier le ban de par le roy que l'an li venist en aide, et quant aide fu venue au prevot, il anvoia querre huis et estauz et s'an estargierent sus les testes por le fes des pierres, et lors fu li assauz granz. A la parfin li prevoz et sa gent aprucherent de la maison desdiz clers et brisierent l'uis et entra le prevot et partie de sa genz dedanz et pridrent les choses devant diz, et les menerent au Chatelet. Mes cil aui palle ne les vit pas prandre, quar il ne sigut pas le prevot en la maison.

Jehan le Poisonnier, jurez et requis sur le fait desus dit, dit par son sermant que la nuit dou soir des Brandons le prevot vint a son ostel et li requit de par le roy que il alat o lui en la ville, quar l'an avoit faite vilenie au genz le roy et il alerent a l'ostel au clers, lui et Jehan d'Ivoy, et le filz Lorenz de Saint Mesmin, Johanin, et quiderent antrer dedanz mes l'an leur gita tant et trait que il convint que il se traïssent arriers et disaint ceux d'an bas : Randez vous au genz le roy et vous n'auraiz garde et cil d'an haut disaint : Fi, ribaudalle, or avant callet et moult d'autres paroles despiteuses et ileuc orent les gens le roy brisé plusseurs uis seur leur testes des pierres que il gitaint, et puis antra le prevot dedanz et plusseurs autres et puis apres sus ledit Jehan le prevot en unes escoles darriers et trova que l'an avoit ja pris et feru 1 grant moinne quar l'an disoit que il avoit une torche atainte et depetié, et furent pris 2 autres avecques lui, et leur choses que il avoient an males es et ileuc anportees et ces 3 an menerent li serjant, dou commandement au prevot, ne ne vit onques que le prevot ferit ne le moinne ne autre ne plus il n'en set fors tant que quant il retorna il vit que l'an avoit pris ja les autres et estoient aucuns armez et auquns desarmez a qui l'an avoit osté les armes, et les aportoit l'an devant aux, c'est asavoir hauberjons, gantelez et bacinez.

Jeufroy le Page, jurez et requis sus le fet desusdit, dit par son sermant que la nuit do lundi desus dit il se leva pour aller an l'aide au prevot et i ala et vit le prevot qui dist maintes fois au clers : tenez voz an pais, ne treez pas et : vos n'aurez garde, et ceux d'an haut commancerent a huier : hu, hu, chiens d'Orliens, et montraint leur dos et feraint leur nathes de leurs paumes. A la parfin il s'en alerent par desrieres et cil garda devant que il ne retornassent et furent pris lidiz clerc, mes il ne set quoment, et dit cil qui parle, que il vit biem que cil de en haut estoient biem armez. Plus il n'an set.

Jehan de Baugenci, juré et requis sus le fet desus dit, par son serment que il se leva a la saut et vit les clers qui getaint et traint mout forment et estaint toz armez aus fenestres et hueaint et criaint or au villains, or au maatins d'Orliens et montraint leur dos et le bataint de leur paumes. Et fust celui qui parle bleciez de une pierre seur les rains et puis furent il pris mes il ne set coment quar il n'i fust pas, mes il les vit enmener et porter leur armeures. Ne plus il n'an set.

Robin dou Croecifiz, juré et requis sur le fet desus dit, dit par son serment que environ le comincement de quaresme il estoit une nuit apres queuvre feu Saint Pere Empont grant pie et oï le prevot qui apeloit a son huis et disoit : Levez, sus, venez en l'aide au prevot. Et quant l'uis fust overt cil qui parle n'i osa aller por sa fame qui gisoit dë gesine, mes il ala a ses fenestres en tel leu que les clers ne poaint fere chose qu'il ne voit et lor vit il le prevot et ses genz qui alerent vers l'uis aus clers et disoit le prevoz : ouvrez l'uis de par le roi, mez il les en covint retorner por la grant planté de pierres qu'il getaint et por les saetes barbelees et les quarriaus qu'i traint ainsi menuement comme merveilles greele, et oï que li clers disient : Vie, chiens d'Orliens, matins d'Orliens, et leur montraint leurs dos sovent et menu. A la parfin li prevoz i entra et les prit mes cil qui parle ne set coment quar il n'i fust pas. Requis des autres choses, dit que il n'en set plus, for tant que il en vit mener 2 qui furent pris.

Perret Lalemant, jurez et requis sus le fet desus dit, dit par son sermant que il se leva au ban de prevot por aler aider au prevot et vit que ceux d'an haut gitaint pierres et traaint moult forment saetes ferrees et barbelees et quarriaus d'arbalestes et fu cil qui palle feruz de une grosse pierre seur la genou si que il en cloicha 3 semainnes totes antieres, et vit que le prevot fut feru moult duremant d'une grosse pierre seut la teste et disaient ceux d'an haut : prootiau, nos cuides tu prandre, nos ne somes pas oisiaux, et quant cil qui parle vit le peril, il se trait arrieres desouz 1 mur et vit que 4 s'an foirent par de desus les maisons, qui portaint bocliers et espees et leur, por ce que il se santi blecié, il s'en ala. D'autres choses il ne set plus.

Henri le Chantre, jurez et requis sus le fait desus dit, dit par son sermant que il ala a l'asaut por la fr des genz et vit le gitoiz des pierres que ceux d'an haut gitaint et vit que il traient moult forment saietes barbalees et ferrees et dit que il oï un de ceux d'an haut demanda : Es tu la, prevosteau, vien amont seguremant, 2 ou 3 o toi, sauf aler et sauf venir et leurs 1 de ceux d'an haut dit : il le moque einsit. D'autres choses il n'an set plus.

Simon le Parcheminier, jur. et requis sur le fet desus dit, dist par son serement que cele nuit que li assauz fut fait, li prevost fist ovrir l'uis de celui qui parle et leurs celui ovrir son huis, et l'an lancea une pierre si que, se ill eust plus ouvert son huis, l'an li eust brisee la teste et leur cil qui parle ferma son huis ne puis n'an issi icelle nuit. Requis quelles genz il demoroit en l'ostel ou l'asaut fut fait, dist que 4 conpaignons don li un ert a Paris. Requis de quelle renommee il estoint, il croit qu'il estoint de bone renomee, fors que tant que un qui avoit non Escher, qui avoit bien acoustumé aler de nuit et briser ostés et prandre fames a force si con l'an disoit. Et plus il n'an set.

Guillaume le Charpentier, jur. et requis sur le fet dessus dit, dist par son serement que la nuit du premier leundi de Quaresme cil qui parle se gisoit en sa meson et se mormoit avec sa fanme, et vint le prevost apres queuvrefeu Saint Pere Empont grant piece, et cil se veilla et dist : qui est la. Et quant il sot que ce fu le prevost, il se leva et ovrit l'uis au prevost, et leur li prevost dist que genz a il ci dessus, et il respondi : les conpaignons de l'ostel si comme je croy et leurs la fanme de celui qui parle dist : par Deu, il i a plus genz qui ne seust et sunt bien garniz por aux deffendre, car l'an les doit assaillir, et leur li prevost issi hors et dist cil qui parle que quant il palloit au prevost il oït bien que l'an aportoit pierres dou vergier en la meson, delez les fenestres de la meson, et leur li prevost issi hors soi tyers ou soi quarz, et leur cil dist au 2 quieestoint au fenestres : que genz estes vos la, ovrez l'uis de par le roy, et tantoust cil qui parle vit grant planté de pierres sur le prevost et sur sa conpaignie et leur il entra en sa meson et ferma son huis, ne puis n'an issi devant que le grant assaut ot esté et que li clerc s'an furent foy hors de la meson par devers, mes il oy bien torjours que ceux dou haut disoint : fi dou prevost, la figue ton pere, la figue ta mere, audoz en Espaingne a vostre roy, et se vos n'andaz la male avensture vos avendra ja a des tost, et oy bien que li prevost leur disoit : randez vos au roy et a moy, et vos n'aurez garde, et dit cil qui parle que il palla a 2 de ces clers, c'est asavoir a frere Guillaume le Moinne et a Eschar per une fenestre qui ovroit dou vergier de ces clers en la meson de celui qui parle, et li moinne respondi : certes je ne le puis fere tenir en paiz, quar il sunt trop eschaufez, et cil Eschar dist : nos ne nos randrons pa s qui nos troveroit ja touz armez, aille con aille. Requis en quel estat il est quant il palla a aux, dist que li moinne estoit en son capulaire sanz chape et cil Eschar tenoit sa'pee et son boclier, mes il ne vit pas se il estoint armez quar la fenestre estoit trop petite, et vit bien le vallet de l'oste aporter les pierres amont dou vergier et puis qu'i s'an furent foy par de t'ers, il ovri son huis et prist 1 levier et mist cil qui parle l'uis de la meson au clers devant diz hors d'agons et entra dedanz aveuc le prevost et pluseurs autres et n'i troverent que pierres et paille, et puis les vit amener touz pris hors de la meson feu Gile le Bedau, mes il ne set qui les prist ne coment il furent pris et les vit anmener en prison et dist que il ne quenoissoit nus de ceus qui estoint en la meson, fors ceux qui i demoreint, c'est asavoir 2 moinnes, frere Guillaume et un autre moinne et Eschar et 1 autre et estoint bones genz si con il craist. D'autres choses il ne set plus.

Juliane, fanme Guillaume le Charpentier, temoin proichein dessus dit, dist par son serement que le leundi d'apres Quaresme Prenent et li fu avis qu'alle oÿ hurter a l'uis au clers et li grant moinne vint au fenestres et dist : qui est la, et cil d'avau dist : tu le verras bien, et tantost li prevost hurtha a l'uis de cele qui parle ou il avoit taverne, et se leverent lui et son seigneur et leur leur dist le prevost : vos estes mauvese genz, et il respondirent : Certes, sires, non somes et leur li prevost cercha l'ostel et quant il ot cerché il s'an issi et ceux qui estoint o lui et con le previst s'an alast vers Sainte Croiz et lessast la meson au clers, tantost cil comaincerent a giter toplain de pierres et leur li prevost retorna et dist a ceux qui estoint au fenestres : ovrez l'uis et il didrent que il n'i entrereint ja et recomaincierent a giter pierres et a trere de ars et d'arbelastres, et plus n'an vit a cele foiz et dist celle qui parle que aucuns en pallerent a son seigneur par la fenestre en la meniere que son seigneur, proichein tesmoin, dist fors tant qu'alle ne vit pas la pee ne le boclier et dist qu'alle croit qu'i fussent bien juqu'a 12 et i estoit Dymenche et Huichon et dist cele qu'al oy bien le prevost qui leur disoit : ovrez l'uis de par le roy, je sui prevoz le roi, et cil disoint : fi, por le prevost, et plus n'an set fors que tant que l'assaut dura juque pres dou jour, et en vit 2 mener. Requise des autres choses dist qu'ale n'en set plus.

Henri le conreur qui demeure pres de la meson ou le convenz fu, jur. et requis sur les choses dessus dites, dist par son serement que la nuit dou premier leundi de quaresme, grant piece de nuit, cil qui parle gisoit en son lit et oy une voy qui disoit : Se le prevost estoit ileuc, que l'an le feist parler a lui ; et leur l'an dist : vos le saurez bien et oÿ que l'an gitoit pierres moult redaiment et oy que l'an disoit : nos ne somes pas oiseaux a esponter, et leur 1 des sergenz vint a l'uis de celui qui parle et le fist ovrir por savoir se l'an porroit grever la meson au clers par sa meson et lors cil qui parle yssi hors de sa meson et se mist sous l'ovent de sa meson par de vers por cen qu'i n'osoit estre par devant.

Requis des autres choses il dist que il n'an set plus.

Jofroy Le Breton, juré et requis sur le fet dessus dit, dist par son serement que il n'an set riens et qu'i n'an passa onques l'uis de son ostel, fors tant que Jehan d'Ivoy vint a sa meson et fist ovrir l'uis et vit Johan de Yvoy qui trest saites sanz fers, ne plus n'an set.

Geufroy Tabouriau, juré et requis sus le fet desus dit, dit par son sermant que ill aala a la mellee quant elle estoit ja pre de finee4, n'an set riens fors tant que il vit traire saietes barbalees et gieter pierres de la maison au clers et que le prevot vint a la maison de celui qui palle por soi faire vooir quar il estoit bleciez duremant en la joe, et estoit fanduz son bacinet des pierres et vit Jehan d'Yvoi qui si feri qu'i eut esté tuez si ne si fut feruz et dit que il an i avoit un aus fenestres aus clers qui feroit au son boclier et disoit au genz le roy : vos ne valez pas maalle et dit que il estoient tuit bons voisins fors 1 avoit non Ertat qui estoit moult jolis.

Requis s'il an set plus, dit que nenni.

Jehan de Saint Pere Anpont, jurez et requis, dit par son sermant que il ala a la mellee quant elle estoit ja pres de finee, do conmandement do prevot, et vit que les clerc traient moult formant et disoient : fi, prevot, vilenalle, fi, chiens d'Orliens et vit que le prevot fu feruz et saignoit en la joe et huent et chanteint moult forment (et montraint leur dos et vit giter5) pierres et lanvier saietes et an vit prandre 1 qui avoit non Dragon et le despoillerent de ses armes.

Requis des autres choses, dit que il n'an set plus.