IRHT

Enquêtes menées sous les derniers capétiens

> Enquête menée par le bailli d'Amiens, sur le chapitre d'Amiens et l'abbaye de Saint-Acheul près d'Amiens (Somme). 1299.

Archives nationales, J 1031, n°15

Enquête

[1]

Ph. Dei gratia Francorum rex, ballivo Ambianensi salutem. Ex parte religiosorum virorum abbatis et conventus monasterii Sancti Acheoli juxta Ambianum, Ordinis sancti Augustini, fuit nobis graviter conquerendo monstratum quod tu, de mandato nostro, ut asserunt, ad recipiendum Stephanum dictum Pigoul, clericum, in suum canonicum et in fratrem ipsius monasterii, jure nostro regio, niteris compellere per suorum temporalium captionem, licet idem abbas et conventus coram te se asserant pretendisse quod non sunt de nostra gardia speciali nec fundati eciam a nostris predecessoribus existant, asserentes insuper quod de mandato predecessorum nostrorum regum Francorum in suis novitatibus aut abbatum ipsius monasterii, cum ad ipsius regimen assumuntur jure regio, nullus extitit actenus receptus in canonicum monasterii prelibati. Quare tibi mandamus quatinus si, vocatis evocandis, evidenter tibi constiterit ita esse, a compulcione ipsorum penitus resipiscas manum nostram a suo temporali, si illud hac occasione forsitan saizivisti, amoveres indilate. Si vero tibi occurrerit dubium in hac parte super premissis, cum diligencia te informes utrum videlicet predecessores nostri usi fuerint jure suo regio ibidem canonicos posuisse, an eciam de nostra speciali garda aut a nostris predecessoribus fundati existant, et quod inde inveneris nobis sub tuo sigillo interclusum quantocius studeas remandare, temporale suum ipsis religiosis interim recredendo. Actum apud Sanctum Agilium, in crastino festi Sancte Marie Magdalenes, anno Domini MoCCo nonagesimo nono.

Maistre Ernous de Fournival, archediacres d'Amiens, de l'aage de IIIIxx ans, tesmoins juré, oïs et requis, dit par sen serement qu'il a bien 55 ans qu'il est canoines d'Amiens et set que l'eglise de Saint Acheul est fondee du demaine du capitre et de monseigneur Saint Fremin le Confesseur qui les fonda de son yretage, si comme il l'a veu et trouvé par leurs privileges qu'il en ont.

Requis s'il set qu'il soient en le warde le roy par especial, dit que non, car li capitres d'Amiens est en le warde le roy et ledicte eglise est desous le capitre et doiet sanc au capitre et toutes obediences et nient au vesque et quant li eglise de Saint Achueil a aucune chose a faire as gens le roy, se traient le gent de l'eglise au capitre et chil du capitre traient a le gent le roy pour l'eglise dessus ditte.

Requis se il vit onques mettre en l'eglise nul canoine de par le roy, dit que non, mais il vit bien, du tens le saint roy Looys, et du tans le roy Phelippe, et du tens le roy nostre segneur qui ore est, qu'il en i ont volu metre et tourjours se sont desfendu li canoine de leditte eglise, que metre ne li es pooient car il n'estoient mie en leur warde par especial ne fondé dans ; et seur che on les en laissoit en pais. Requis se plus en set, dit que non.

Jehans Godris et Simons de Croy, chitoien d'Amiens.

Lidis Simons et Jehan, de l'aage de 60 ans chascuns, ..., dient par leur seremens que sires Willames de Hangest, adonc ballieus d'Amiens, i en vaut un mettre du commandement le roy a Saint Chueil, mais chil de Saint Achueil s'alerent a court pourçachier et aporterent une lettre audit ballieu que s'il trouvoit qu'il ne fussent en l'epecial garde le roy, et fondé de l'aumosne a ses anchiseurs, qu'il s'en chessat, et lidiz Willames, adonc ballieus, en commist une enqueste a faire asdis Jehan et Simon, liquel le firent comme homme le roy, et fu portee a court et en furent delivré tout che que nous a recordé lidis Guillaume et dit qu'il a bien 11 ans ou 12 que che fu fait.

Requis se plus en sevent, dient que non.

Phelippes Gamars, serjans le roy en la vile d'Amiens, ..., de l'aage de 50 ans, ou de plus, dit par son serement que, entour 12 ans a, li sires du Hamel aporta unes lettres du roy pour rechevoir un sien neveu a l'eglise au ballieu d'Amiens qui adonc i estoit il ne le vaurrent rechevoir. Pour che qu'il ne le vaurrent faire, leur bien furent saizi et pris en le main le roy. Li canoine se traïsent a court et aporterent une lettre du roy au ballieu d'Amiens en lequele il estoit contenu qu'il fesist enquerre s'il estoient fondé du roy ou de qui il l'estoient ne s'il estoient en se warde. L'enqueste fu commandee a faire a Jehan Godri et Symon de Croy, hommes le roy.

L'enqueste faite, ele fu portee a court. L'enqueste veue, on se chessa dans contraindre a rechevoir le neveu dit segneur en leditte eglise, et en ont demouré a pais duques a ore.

Requis se plus en set, dit que oïl car entour 26 ans il vit que uns maufaterres fu pris a Saint Achueil et fu menés par devers le capitre et justichiés dudit capitre. Et dit chil qui parole qu'il a tour jours oï dire qu'il sont fondé dudit capitre et de mons. Saint Fremin.

Maistres Paris de Montlion, canoines d'Amiens et clers le roy, de l'aage de 60 ans, ... dit par sen serement qu'il a veus tous les privileges de Saint Achueil et dit qu'il a veu et trouvé qu'il ne sont fondé de nului, fors de saint Fremin le confes et du capitre devant dit.

Requis se il set qu'il soient en le warde le roy par especial, dit que non, mais il set bien que li capitres est en le warde le roy et l'eglise de Saint Achueil est de le fondacion dudit capitre, si que il ne sont point en le warde le roy, fors pour les menbres dudit capitre.

Maistres Jehans li Fevres, de l'aage de 60 ans, ... [cf. 4], fors tant qu'il n'a point veus le privileges de le ditte eglise, et dit encore que il set bien que l'eglise de Saint Achueil est fondee du capitre et de Saint Fremin et qu'il ne vit onques du commandement le roi rechoir canoine en l'eglise dessuz ditte.

Maistres Pierres Saymiaus, de l'aage de 64 ans, ... [cf. 5] dit que commune renonmee est qu'il sont fondé du capitre et nient du roy.

Mesires Thonmas de Praiaus, canoines de Saint Martin as Jumiaus d'Amiens, de l'aage de 60 ans, ... [cf. 5].

Mesires Fremins li Monniers, canoines de Saint Martin as Jumiaus, de l'aage de 55 ans, ... [cf. 7]

Mesires Diex Donnés, capelains de Nostre d'Amiens, de l'aage de 70 ans, ... [cf. 7]

Mesires Jehans Pietins, capelains de Nostre d'Amiens, de l'aage de 60 ans, ... [cf. 7] et dit que commune renonmee si est que l'eglise de Saint Achueil est fondee du capitre devant dit, et qu'il ne sont en le warde le roy, fors que par les membres du capitre dessus dit.

Mesires Hues de Saint Nicholain, capelains en l'eglise de Nostre Dame d'Amiens, de l'aage de 60 ans, ... [cf. 10], et dit que commune renoumee est que chil de Saint Achueil sont fondé dudit capitre et de mons. saint Fremin.

Mesires Adans de Lambert Sart, capelains de Nostre Dame d'Amiens, de l'aage de 60 ans, ... [cf. 11].

Maistres Nichole Li Tonloiers, capelains de Nostre Dame d'Amiens, de l'aage de 70 ans, [cf. 12].

Mesires Robers Li Carpentiers, prestres d'Arguerre, de l'aage de 60 ans, ... [cf. 13].

Maistres Jehans Poiers, canoines d'Amiens, de l'aage de 60 ans, ... [cf. 14].

Comment citer cette notice

Elisabeth Lalou, Xavier Hélary. "Enquête menée par le bailli d'Amiens, sur le chapitre d'Amiens et l'abbaye de Saint-Acheul près d'Amiens (Somme). 1299. (Archives nationales, J 1031, n°15)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete61/ .

Mentions légales | Colophon | Contacts | Haut de page