IRHT

Enquêtes menées sous les derniers capétiens

> C'est l'enqueste faite seur Guillaume de Bohon. Hec est inquesta expedita contra Guillelmum de Boon et alios forestarios.1272

Archives nationales, J 1028, n°26

Enquête

[1]

Requis premierement se il a done point du bois de sa garde, il dist que oïl, a mon seigneur Raoul Tesson une karee de perche a faire establies ; derechief a la dame des Mares une karee de perches de sous branches ; au tresorier d'Avrenches, 8 bools, a la personne de Omontville, 3 ch. mannois par le commandement Renaut de Radepont, baillif, et Robert d'Aubergeville, adont viconte, et ladite persone estoit lors clerc au viconte ; derechief a mon seigneur Guillaume de Karenten un fou de 2 karees.

Requis se plus en a doné, il dist que non.

Requis se il a point vendu du bois de sa garde, il dist que non.

Requis se il a mis bestes en la forest par quoi li tailleis soient mengié, il dist que non.

Requis se il a mis usagiers en la forest ne a avaine, ne a deniers, il dist que non.

Requis se il y a souffert nouviax usage, il dist que non.

Requis se il a mis pors es panages par quoi il soient mains vendus, il dist que non.

Requis se il a retenu les gages a serjans de sous lui qui ont gages, il dist que non.

Requis se il y a mis nus serjans sans gages, il dist que oïl, quatre.

Requis se il a alongié les ventes a marcheans outre ce qui leur fu vendu, il dist que non.

Requis se il a fait livrees a autrui que il ne doit ou autres que il ne doit, il dist que non.

Requis se il a souffert a courre a bestes en la forest et a queles et se il en a pris, il dist que oïl, c'est a savoir un daim que il dona au pere sa fame, et un cerf que il dona au prieur de l'ospital de Caan, et une biche, un cerf et un cevreil que Jehans de Chevreuses, baillif, eut a noves son fil. Et mon seigneur Guillaume de Vernon qui prist une biche en la chace d'un cerf que li rois li avoit doné, et un cevreil que li chastelain de Chierrebour ot et 1 qui se noia en la mer, que il envoia au baillif qui ores est. Et une biche que mon seigneur Guillaume de Digouville ocist, que mon seigneur Jehan Malet ot – et une biche que lidis Guillaume prist en la haye de Digouville, et fu o li Jehan de Trapes, et l'envoierent as maistres a l'Eschequier.

Item il prist ausi un chevreil que il envoia a l'evesque de Baieues. Et dist que il a pris chascun an 40 connins.

Requis se il part a ventes, il dist que non.

C'est l'enqueste faite seur Guillaume de Bohon et des bois de sa garde par mon seigneur Guillaume des Mineres, chevalier, et Hue de Saint Just, en l'an de grace M.CC.LXXII, la semaine enpres la Saint Denis.

Hamon de Booug., serjans du chastel de Chierebourc, de l'aage de 40 ans, juré et requis se il set que Guillaume de Bohon ait doné point du bois de sa garde, il dist que oïl.

Requis conment il le set, il dist que il vit bois amener et descharcher es mesons Robert de Vaus, Richart de la Mer et la fame Pierre Asse, qui venoit de la forest.

Requis se il set que il ait point vendu, il dit que non.

Requis se il a mis (chil Guillaume)1 bestes en la forest par quoi li tailleis soient mengié, il dist que il ne set.

Requis s'il set se G. a mis usage en la foret a avaine ne a deniers, il dit que non.

Requis se il set que Guillaume ait soufert noviax usage en la forest, il dist que non.

Requis s'il set qu'il ait mis nus pors es panasges par quoi il soient mains vendus, il dit que non.

Requis s'il set que il ait retenu les gages a serjans de sous lui qui ont gages, il dit qu'il croit que oïl.

Requis conment il le croit, il dit que il en oy les serjans plaindre.

Requis s'il set que G. ait mis nus serjans sans gages en la forest, il dit que oïl, 4.

Requis s'il set de quoi il vivent, il dit que de leur porch.

Requis s'il set que G. ait alongié les ventes a marcheans outre che qui leur fu vendu, il dit que non.

Requis s'il set qu'il ait fait livrees2 a autrui qu'il ne doit ou autres que il ne doit, il dit que non.

Requis s'il set que G. ait souffert a courre a bestes et as queles et se il meisme i a courut, il dit que non.

Requis s'il set qu'il ait part es ventes, il dit que non.

Requis se plus en set, il dit que non.

Richart d'Ivetot, de l'aage de 35 ans, juré et requis

Requis s'il set qu'il ait soufert a courre a bestes et qu'il y ait courut, il dit que chil G. a courut ad connins et as menues bestes, et croit que il a archoié a grosses bestes.

Requis pourquoi il le croit, il dit que 2 sien voisin i furent qui li dirent.

Jehan Pié de Lievre, de l'aage de 40 ans, juré et requis s'il set que Guillaume de Bohon ait doné du bois le roi de sa garde, il dit que oïl, 1 fou de 6 karees a mon seigneur G. de Karenten.

Requis conment il le set, il dit qu'il l'abati et l'aida a mener a l'ostel cheli mon seigneur G.

Derechief il dit que G. dona 1 chaine de 2 karees a la dame des Mares.

Requis conment il le set, il dit que il le vit abatre et charcher et que uns serjans du bois vout prendre les chevaux a la dame, quant li charretier la dame dit a cheli serjant : Ch'et li chesne que Guillaume a doné a ma dame. Et li serjans l'en laissa adont aler.

Requis s'il set que G. ait retenu les gages a serjans sous lui, il dit qu'il croit que oïl por ce que il les en a oï plaindre.

Requis s'il set qu'il sont nus serjans sans gages, il dit oïl, 3.

Requis s'il set de quoi il vivent, il dit de leur porch.

Requis s'il set que il ait soufert a courre a bestes, il dit que non.

Requis s'il set que G. y ait courut, il dit que sa mainie et il ont courut as connins et3 as menues bestes, et le set por ce que il i fu et le vit.

Requis des autres articles, il dit que il ne set riens.

Nicholas Noel, de l'aage de 50 ans, juré et requis s'il set que Guillaume ait doné du bois de sa garde, il dit oïl, 2 sommes de branches de fou a la dame des Mares.

Requis conment il le set, il dit que il meisme qui est garde de la vente les prist et Guillaume les delivra et dit qu'il li a voit doné.

Requis s'il set que il ait retenu les gages a serjans sous lui, il dit que il le croit por ce que il oy que li serjans s'en plaignoient.

Requis s'il set qu'il y ait mis serjans sans gages, il dit que oïl, 4.

Requis de quoi il vivent, il dit de leur porch.

Requis s'il set que G. ait soufert a courre as bestes ne y ait courut, ne a queles, il dit que non, mais il vit 1 chevreil qui fu presenté au baillif de part Guillaume.

Requis des tous les autres articles, il dit qu'il n'en set riens.

Estene Fournet, de l'aage de 60 ans, juré et requis s'il set que Guillaume de Bohon ait doné du bois le roi, il dit que oïl, a mon seigneur Raoul Taisson 2 karees de menu bois.

Requis conment il le set, il dit qu'il amena le bois.

Requis s'il set qu'il ait soufert a courre a bestes, il dist que il ne set, mais il li presta une fois les rois mon seignor Raoul son seignor.

Requis des autres articles, il ne set riens.

Li abbés de Chiereborc, requis se il set que G. de Bohon ait doné des bois le roi, il dit que oïl, a lui meisme 2 karees en la haye de Mont durot a relever les treilles.

Requis des autres articles, il ne set riens.

La dame des Mares, de l'aage de 50 ans, juree et requise s'ele set que G. ait doné des bois le roi, ele dit que oïl, a lui meisme une karee.

Requise se Guillaume li dona nul chaine, ele dit que non.

Requise des autres articles, ele n'en set riens.

Guillaume de Clepes de l'aage de 30 ans, jur. et requis s'il set que Guillaume de Bohon ait doné du bois de sa garde, il dit oïl, a la dame des Mare, une charee de bois.

Requis conment il le set, il dit que il l'oy dire a Guillaume.

Requis s'il set qu'il ait nus serjans en la forest sans gages, il dit oïl, 4.

Requis s'il set que G. ait soufert a courre a bestes, il dit que non.

Requis s'il set que G. y ait courut, il dit oïl.

Requis conment il le set, il dit que il vit que Guillaume prist un daim qu'il envoia au pere sa fame et un cerf au prieur de l'ospital de Caan, et un checreil et une biche as noces le fil Jehan de Chevreuse, baillif adont.

Derechief il dit que me sires Guillaume de Vernon prist un cerf et une biche.

Requis conment il le set, il dit qu'i fu au prendre.

Requis des autres articles, il dit que il n'en set riens.

Li prestres d'Omonvile de l'aage de 50 ans, requis com prestres s'il set que Guillaume de Bohon ait doné du bos le roi, il dit que oïl, a lui meisme 2 chaines et une chartee de bletrons.

Requis des autres articles, il n'en set riens.

Jehan le Picart, de l'aage de 40 ans, jur. et requis s'il set que Guillaume de Bohon ait doné du bois le roi, il dit que oïl, a mon seignor Raoul Taisson une karee de perches, et 1 fou a mon seignor Guillaume de Wateville.

Requis conment il le set, il dit qu'il fu au doner et au delivrer.

Requis s'il set que G. ait soufert a courre ne ait courut as bestes, il dit que chil G. dona un daim au pere sa fama.

Requis comment il le set, il dit que G. li dit.

Derechief 1 cerf, une biche et 1 chevreil as noces le fil Jehan de Chevreuse, adont baillif ; derechief 1 cerf au prieur de l'ospital de Caan.

Requis conment il le set, il dit que il i fu.

Derechief il dit que G. soufrit que mon seignor Jehan Malet ot une biche que li prestres de Digouville ocit.

Derechief Guillaume soufri que me sires Guillaume de Vernon prist un cerf et 2 biches et 1 faon.

Derechief chil Guillaume de Bohon ot 1 chevreil que cil qui parole ocit a la haye de Saumares.

Derechief Guillaume Poilegars ocit une biche en ycele haye, de laquele Guillaume de Bohon dona le moitié a l'abé de Cheireborc et l'autre retint, et cheli jor prist me sires Guillaume de Vernon 1 cerf.

Derechief Phelipos Renont ocit 1 cevreuil que G. envoia le veque de Baieues.

Requis comment il le set, il dit qu'i fu presens a toutes ces bestes prendre.

Derechief dit que Guillaume de Bohon a bien pris chascun an 60 connins. Requis conment il le set, il dit qu'il y estoit au prendre.

Requis des autres articles, il n'en set riens.

Robert de Vau s, de l'aage de 45 ans, jur. et req. s'il set que Guillaume de Bohon ait doné des bois le roi, il dit qu'il ne set, mais il prist 1 fou dont G. ne leva de lui point d'amende.

Requis se G. y a mis nus serjans sans gages, il dit oïl, 4.

Requis s'il set de quoi il vivent, il dit de leur porch.

Requis se G. a soufert a courre es bestes, il dit que non.

Requis se il en pris, il dit oïl, c'est a savoir 1 daim au pere sa fame et 1 cerf, une biche et 1 chevreil a Jehan de Chevreuse, adont baillif.

Requis conment il le set, il dit qu'il fu au prendre.

Item chil qui parole ocit une biche en Froide Fontaine dont il ot une espaule et Guillaume ot le remaignant.

Item il dit que G. fist prendre 2 bestes grans, desqueles li eveques de Baieues ot une et li maistre de l'Eschequier l'autre. Requis ques bestes c'estoient, il ne set.

Item il dit que Guillaume a pris des connins asses chascun an. Requis conment il le set, il dit qu'il y estoit sovent au prendre.

Requis des autres, il n'en set riens.

XII. M. la fame Pierre Asse, juree et requise de tous les articles dit qu'ele ne set riens, mais ele vit un cerf qui se noia en le mer, qui fu envoiés au bailli.

Requise se ele set ne vit que il fut chaciés, ele dit que non.

Guillaume Poilegars, de l'aage de 40 ans, jur. et requis s'il set que Guillaume de Bohon ait doné de le forest le roi, il dit : oïl, une karee es 2 chartees de beltrons de la Haye de Mont Durot a l'abé de Chereborc.

Requis conment il le set, il dit que Galtier d'Aigniaus, neveu G. de Bohon, les livra veant lui et li dit que c'estoit du commendement G. son oncle.

Item audit abé 3 chaines verses a faire le pont de Martruil. Requis conment il le set, il dit que il meismes les livra par le commandement Guillaume.

Item dit chil qui parole que Guillaume dona de la persone de Torquetenville une karee de bletrons de la haye de Mont Durot. Requis conment il le set, il dit que il oï dire a Guillaume qu'i les y avoit donés.

Item une chartee de branches de chaine de chaine a Richart de La Mer si con il croit et une karee de bletrons a la dame des Mares. Requis conment il le set, il dit que lidis Gautier, neveus Guillaume, li dit.

Requis se il set qu'il ait retenu les gages a serjans sous lui, il dit qu'il le croit, por ce qu'il les en oy plaindre.

Requis se il set que il en y ait mis nus sans gages, il dit oïl, 4. Requis de quoi il vivent, il dit de leur porch.

Requis s'il set que il ait soufert a courre a bestes et se il y a courut, il dit que Guillaume prist 1 cerf a rois mon seignor Raoul Taisson. Requis conment il le set, il dit qu'il fu au prendre et dit que G. disoit que il l'envoieroit a maistres a l'Eschequier.

Item une biche et 1 faon a icele rois en la haye de Mont Durot. Requis conment il le set, il dit qu'il fu au prendre.

Item li prestres de Tou la vile ocit une biche. Requis conment il le set, il dit qu'il fu au prendre avec Guillaume.

Item Guillaume ot 1 cevreil4 que li picars ocit en le haye de Saumares et une biche que Poilegars ocit et l'enporta Thomas Tuebuef chies G. Requis conment il le set, il dit qu'il i fu.

Item il dit qu'il fu a prandre 1 daim que G. dona au pere sa fame.

Item 1 fu l'an, Robert de Vaus ocit une biche en Froide Fontaine que G. ot.

Item il dit qu'il croit que G. ait eu bien chascun an 60 connins.

Estene Chopillart, de l'aage de 50 ans, jur. et requis se il set que Guillaume de Bohon ait soufert a courre a bestes et asqueles, il dit que oïl et que il fu presens a chacier 2 cers que li rois avoit doné a mon seignor Guillaume de Vernon et que il meisme qui parole chaçoit et en cele chace il prist une biche laquele Guillaume li vout conter por 1 cerf, mais chil qui parole ne la vout prendre et Guillaume l'en porta.

Item chil qui parole dit qu'il prist 1 cerf que G. disoit qu'i le porteroit a Jehan de Chevreuse, baillif adont.

Item il dit que il fu a prendre une biche, 1 chevreil et 1 faon que mon seignor J. Malet ot ains que li rois alat outremer.

Item il dit que il fu a prendre une biche que li prestres de Tou la vile ocit en la haye de Sau Mares, laquele G. ot.

Item il dit que G. avoit chiens dont il prenoit conins souvent. Requis conment il le set, il dist que il veoit les chiens courre.

Requis des autres articles, il n'en set riens.

Nich. Renart, de l'aage de 50 ans, jur. et requis s'il set se G. de Bohon a doné du bois le roi, il dit que oïl, 2 chartees de bois a ardoir au malade de Tou le vile.

Requis conment il le set, il dit que li malades li dirent.

Requis des autres articles, il n'en set riens.

Guill. Pié de Lievre, jur. et requis se il set que G. ait doné du bos le roi, il dit oïl, 2 pieces de bos de chaable a Roger Veel. Requis conment il le set, il dist qu'il u fu.

Requis des autres articles, il n'en set riens.

Robins Juaillos de l'aage de 35 ans, jur. et requis se G. a soufert a courre a bestes, ne s'il en a pris, il dit oïl, 1 cerf et 1 cevreil que Jehan de Chevreuse, adont baillif ot ; item 1 cerf qui se noia a la mer5, qu'il envoia au baillif qui ores est. Requis conment il le set, il dit qu'il i fu au prendre.

Requis des autres articles, il n'en set riens.

Raoul le Manant de l'aage de 30 ans, jur. et requis s'il set que G. ait doné du bois le roi, il dit : oîl, 1 fou au prieur de Londres. Requis conment il le set, il dit que il l'oy dire a Juguel son hoste.

Requis des autres, il n'en set riens.

Adan le Borgueignon de l'age de 40 ans, jur. et requis s'il set que G. ait doné du bois le roi, il dit oîl, 1 chaine au prestre d'Omonville et un autre au prestre de Sainte Crois, 1 autre a Symon le Bigre d'Agneville ; item 2 chaines ses a Escaille Grani. Requis conment il le set, il dit que G. li conmanda qu'i les livrast. Item 1 chaine vert a Guillaume Rouget. Requis conment il le set, il dit que G. li dit.

Requis s'il set qu'il ait mis serjans sans gages en la forest, il dit oîl. Requis dont il vivent, il dit de leur porch.

Requis s'il set que il ait soufert a courre a bestes, il dit que Perros le Dars, serjans Guillaume de Bohon, amena en sa garde Estene Fornet, Sout Daguet et Robert de Waus qui pristrent une biche, et quant Adans les vout prendre, Perros li Dars li dit que c'estoit par Guillaume de Bohon.

Item il dit que G. prist bien en une anee 260 connins.

Requis des autres articles, il n'en set riens.

Lorens le Fevre, de Sainte Crois, de l'aage de 40 ans, jur. et requis se il set que Guillaume de Bohon ait doné du bos le roi il dit oîl, a lui meisme 1 chaine.

Requis des autres articles, il n'en set riens.

Guillaume Rogel, de l'aage de 50 ans, jur. et requis s'il set que Guillaume ait doné du bos le roi, il dit oîl, a lui meisme un estal de chaine.

Requis des autres articles, il n'en set riens.

Symon Bigot, d'Agneville, de l'aage de 60 ans, juré et requis s'il set que G. ait doné du bos le roi, il dit oîl, a lui meisme 1 estal de chaine. R., V. supra.

R. de Ingauville, escuier, en l'aage de 45 ans, jur. et requis s'il set que Guillaume a soufert a courre et s'il en a nulle prises, il dit que non, mais il dit que il oï dire au gens de son païs qu'i venoient d'archoier d'avecques Guillaume. Requis que il sunt, il dit qu'il ne l'en merle. R. etc.

Bertaut Tuebuef, de l'aage de 60 ans, juré et requis s'il set que G. ait doné de la foret, il dit oîl, une chartee de bois a la dame des Mares a faire aloirs a son conlonbier. Requis conment il le set, il dit que la fame G. de Bohon li dit.

Item il dit que li prestres de Beeville fu pris a 2 fous des quex il dut avoir 20 s. pour l'amende, mais G. li quita. Requis conment il le set, il dit que G. li deffendi qu'il ne les levast.

Requis s'il set se Guillaume6 a soufert a courre a bestes et s'il en a pris, il dit oîl et que Guillaume prist 1 cerf, 1 cevreil et une biche que Jehan de Chevreuse ot a noces son fil. Requis conment il le set, il dit qu'il i fu.

Item il dit qui parole que a pris chascun an bien 60 connins. R. v. supra.

Thomas des Jardins de l'aage de 30 ans, juré et requis s'il set se Guillaume de Bohon a doné du bois le roi, il dit oîl, 3 fous que la gent au prestres de Beeville en menoient, lesques il aresta, quant le mainie au prestre li dirent que c'estoit li bois que Guillaume avoit doné audit prestre. R. v. supra.

Juguel le Breton, de l'aage de 60 ans, jur. et requis s'il set que Guill. ait doné du bois de sa garde, il dit oîl a lui meisme 27 et au prieur de Lo dres 1 fou. Requis conment il le set, il dit que G. li dit. R. v. supra.

Reg. le Veel, de l'aage de 40 ans, jur. et requis s'il set se Guillaume a doné du bos le roi, il dit oïl, a lui meismes, par 3 ans, chascun an 4 karees de bois8 et 2 karees au prestre de Beeville.

Requis conment il le set, il dit que G. li dit. R. v. supra.

Odart d'Issi, de l'aage de 30 ans, jur. et requis s'il set se Guillaume a doné du bos le roi, il dit oïl, a la fame P. Asse, Richart de le Mer et Robert de Waus. Requis conment il le set, il dit qu'il vit leur gent amener du bois et n'oy onques dire qu'il en paiassent a m de. Et 4 aunes a Juguel le Breton pour faire eschieles. Requis conment il le set, il dit qu'il fu present.

Requis s'il set se il9 a soufert a courre a bestes et s'il en a pris nules, il dit oïl, 1 cerf l'an J. de Chailli, fu 5 ans. Requis conment il le set, il dit qu'il fu a l'ocirre. R. v. supra.

Nicholas de Tholovaut, en l'aage de 50 ans, jur et requis s'il set que Guillaume de Bohon ait doné du bos le roi, il dit oïl, a lui meisme, 1 fou verse sec. R. v. supra.

Jean Turgot, en l'aage de 43 ans, jur. et requis s'il set que G. ait doné du bos le roi de sa garde, il dit oïl, au prestre de Beeville 2 fous. Requis conment il le set, il dit qu'il fu lan ou Guill. li otroia les 2 fous, c'est a savoir a Beeville en le maison au prestre lan ou il mengoit, et vit les 2 fous abatre et amener ; – et un chaine a Guillaume Rougel. Requis conment il le set, il dit que chil Guillaume liddit.

Requis s'il set10 se Guill. a soufert a courre a bestes et s'il en a pris, il dit qu'il croit que oîl, por ce qu'il vit gens a lui en la foret qui portoient ars et saietes, et oÿ dire ce jor meisme que il avoient ocis un cerf. R. v. supra.

Henri de Tholvaaut, de l'aage de 52 ans, jur. et requis s'il set que Guill. ait doné du bos le roi, il dit oïl, a lui meismes 1 chaine, a sa maison refaire qui estoit arse. R.

R. de Sotovaut, de l'aage de 35 ans, id., 3 chaines chaois a l'abé de Chiereborc pour refaire le pont de Martival. Requis conment – il dit que i fu presens quant Guill. conmanda a serjans qu'il livrassent les 3 chaines a la gent l'abé, et fu au carcher et au mener. R.

Guill. le Maçon, de l'aage de 40 ans, id., une chartee de bletrons a l'abé de Chiereborc. R. comment il le set, il dit qu'il les vit amener en la charete a l'abé.

Requis s'il set que G. donast11 3 chaines a l'abé de Chiereborc pour refaire le pont de Martinval, il dit qu'il mist ces 3 chaines en ouevre, mais il ne set s'il li es dona. R.

Raoul Tuebeuf, de 35 ans, jur. et requis s'il set que G. de Bohon ait pris ne soufert a prenre les bestes en la forest, il dit oïl, 1 cerf que G. dona au prieur de l'ospital de Roan, et une biche que G. en porta en sa maison, que Poilegars ocit en Saumares, et une biche que chil qui parole ocit en Harengueron, de laquele mon seignor Guillaume de Vernon ot la moitié et Guillaume de Bohon l'autre, et un daim que li prestres de Tou la ville ocit, qui fu envoiés a l'evesque de Baieues, et 1 cerf et 1 biche et 1 chevreil qui furent envoié a Jehan de Chevreuse, baillif adont, et 1 daym que Guillaume dona au pere sa fame, et 1 cervot qui se noia en le mer, que Gautier de Vilers, baillif ot.

Requis conment il set les choses desus dites, il dit qu'il i fu a toutes.

Notes

1 ajouté en interligne.

2 Id.

3 Ces 3 mots ajoutés à la place de y exponctué.

4 Cerf rayé.

5 Depuis qui, add. en interligne.

6 Ces 3 mots en interligne.

7 Ces 4 mots de même.

8 Ces 2 mots de même.

9 En interligne.

10 En interligne.

11 En interligne.

Comment citer cette notice

Elisabeth Lalou, Xavier Hélary. "C'est l'enqueste faite seur Guillaume de Bohon. Hec est inquesta expedita contra Guillelmum de Boon et alios forestarios.1272 (Archives nationales, J 1028, n°26)", dans Enquêtes menées sous les derniers capétiens, Elisabeth Lalou, Christophe Jacobs, éds, Paris : Centre de ressources numériques TELMA, 2007. (Ædilis, Publications scientifiques, 4). [En ligne] http://www.cn-telma.fr/enquetes/enquete53/ .

Mentions légales | Colophon | Contacts | Haut de page