[1]

r^o C'est ce que nous poons avoir appris de la mort et de la bleceure Jehan Chavesnel seur le segnieur de Foillouel que l'en encoupoit de la mort. Nous venimes premierement a Chauni et oÿmes premierement Huon le Bulle, prevost de Saint Quentin, honme le roi, parler. Et dist cis Hues Li Bulles par son serement que il fu a Saint Quentin la u Jehans Chavesniaus requist l'asseurement du segneur de Foillouel devant les ballu de Vermandois, et i eut pluseurs paroles dites. A la pardefin li sires de Foillouel requist le retour a Chauni la u il ert couchans et levans et hom le roi de Chauni, et adonc li baillus de Vermendois lui li assena jour a Chauni a le premiere assise venant a lui et a Chavesnel et li fist donner a Chavesnel astenance et respit dusques as octaves de la premiere assise. Et dist cis Hues qui parole par son serement que il fu encore a Chauni a cele assise, la u cis Jehan Chavesniaus requist l'asseurement du segneur de Foillouel, et offri a prouver qu'il i avoit en paroles par coi il ja feroit bien asseurement, et seur ces paroles cis Jehans Chavesniaus fist ajourner celui Huon qui parole a le premiere assise a Chauni pour tesmoigner. Requis se cis tesmoins qui parole, s'il savoit chose par coi il i deust avoir asseurement et qu'il en tesmoignast, il dist qu'il oÿ dire mon segneur Jehan de Ramicourt que a Jehan Chavesnel ne demandoit il riens, mais il dist qu'il iroit la u li sires de Foillouel le marroit pour lui maufaire. Requis s'il set que li sires de Foillouel en soit coupables du fait celui Chavesnel, il dist qu'il n'en set riens, fors que de oÿ dire, et de l'asseurement qu'il requist et que il ne pot avoir. Et bien dist cis tesmoins qui parole que il fu li premiers a contraindre le segneur de Foillouel pour faire asseurier Jehan Chavesnel, et bien dist cis tesmoins qui parole que li sires de Foillouel maintenoit tous jours par devant lui et par devant le baillu, et bien disoit : Sire, pour coi l'asseurai je ? Je ne li veil nul mal ne par moi ne par autrui, ne je ne le mennechai et se je l'encontroie ne li feroie je nul mal et je li eusse piecha fait se je vausisse, ne nul mal je ne li vaurroie. Requis s'il savoit riens de la mort Jehan Chavesnel ne de la bleceure, ne qui le fist, ne qui en fu encoupés, il dist qu'il n'en set riens, fors que par oÿ dire que li sires de Waulaincourt en est coupables et le conneist, et l'a connu a pluseurs gens et especiament a 1 sien sergant de la prevosté de Saint Quentin a cui il l'oÿ dire son hoste de Waullaincourt, et bien dist li sires de Waullaincourt qu'en demandast riens fors que a lui, et qu'il avoit fait le fait ... Requis s'il en set plus, il dist que non.

Maistres Pierres de Ribemont, dit Chenus, cousins en quart Jehan Chavesnel, tesmoins jurés, requis de la menniere de la hayne qui estoit entre le segneur de Foillouel et Jehan Chavesnel, il dist par son serement que Jehans Chavesniaus avoit acheté au segneur de Foillouel Cuerlu et et les apendances. Li sires de Foillouel voloit avoir les chisnes de l'iaue qui apartenoit a cele meson, si com cis tesmoins dist, et en fu plais en la court le roi a Peronne, et dist cis tesmoins qu'il fu determiné que Jehans Chavesniaus enporta les chisnes et seur ce mut li male amours du segneur de Faillouel et de Jehan Chavesnel.

Requis s'il savoit se li sires de Foillouel l'eust menaciet, ne se il nous en savoit adrecier, il dist qu'il n'en set riens, fors que par oÿ dire. Nous li demandames s'il nous savoit adrecier houme qui riens seust des menaces, il dist que nennil. Nous li demandames s'il savoit qui l'avoit navré. Il dit que li ceumune renoumee couroit que li sires de Vaullaincourt l'avoit navré. Requis s'il en set plus, il dist par son serement que il n'en set plus.

Jehans Li Mires de Ribemont, tesmoins jurés, requis s'il apartient riens de lingnage a Jehan Chavesnel ne a sa femme, ne a ses enfans, ne au segnieur de Foillouel, aussi il dist que sa femme et ses enfans apartenoient a Jehan Chavesnel et estoient de son lingnage.

Requis s'il set riens de la male volenté et du descort du segnieur de Foillouel et des menaces, il dist qu'il n'en set riens fort que les gens disoient a vau la vile que c'estoit pour le segnieur de Foillouel, et vit Chavesnel aler a vau la vile s'espee a son col, et 1 baston en sa main, et pluseurs gens aveuc li. Requis s'il savoit riens des menaces que li sires de Foillouel li feist, ne par li ne par autrui, ne qui nous en peust adrecier, il dist qu'il n'en set riens. Requis s'il set riens de la bleceure Chavesnel, il dist que la kemune renoumee couroit que li sires de Waullaincourt li avoit fait. Requis se il vit la plaie, il dist que oÿl, et dist qu'il en a bien veu de teles et atirer de teles qui en garissoient et de plus petites mau gardees qui en moroient. Ne il ne fu pas au commencement de la bleceure, mais il dit qu'il avoit menoison fort, si que li maistres qui l'avoit engardé, dist qu'il n'avoit gardé, s'en estoit de la menoison qu'il avoit. Et il meesmes le disoit aussi que ce cuidoit il et disoit que la plaie n'estoit mie bien sanee. Requis s'il en set plus, il dist que non.

Mesires Guillaumes d'Orlliens, chanonnes de Saint Quentin, jurés comme prestres, requis s'il ataint riens de lingnage au segnieur de Foilloue ne a Jehan Chavesnel, ne a leur femmes, ne a leur enfans, il dist que non. Requis s'il set riens de la male volenté et du descort du segnieur de Foillouel et de Jehan Chavesnel et du descort, il dist qu'il n'en set riens, ne des menaces, mais tant dist il qu'il fu en sa maison ou li baillus estoit a ostel, et demandoit Jehan Chavesnel asseurement du segneur de Foillouel, et li baillus li kemanda qu'il l'asseurement et il respondi : Sire, pour coi l'asseurai je ? N'en je ne l'ai mie menacié et c'est grant chose d'asseurement, ne je ne l'ai mie menacié, ne je ne li demande riens, et se je li vausisse avoir mal fait je li eusse pieça fait se je vausisse, et se je l'encontroye emmi les chans, ne li feroie je riens. Et, sire, je vaudrai parler a mes amis de cest asseurement que vous me requerés. Et cis Jehans Chavesnel l'en chaussoit tous jours de l'asseurement donner, et li baillus li fut ilueques donner astenance tresques apres la premiere assise de Chauni, et ilueques li mist jour a respondre a l'asseurement. Requis s'il set riens des menaces, il dist qu'il n'en set riens et plus n'en set que ce qu'il a dit par devant.

Mahius Li Atriers, tesmoins jurés, requis s'il apartient riens a Jehan Chavesnel ne a sa femme, ne a ses enfans, ne s'il ataint de riens au segnieur de Foillouel, ne a sa femme, ne a ses enfans, ne se il tient riens d'iaus, il dist que non. Requis s'il set riens du segnieur de Foillouel et de Jehan Chavesnel, ne des menaces, ne de la male volenté d'iaus, il dist que des menaces ne set il riens. Mais il fu aveuc Chavesnel pluseurs fois et chevaucha aveuc li, et se set que une letre li vint de Gant et les lut cis tesmoins qui parle, et les envoierent les gens Jehan Chavesnel, et disoient les letres qu'il se wardast, que il se gardast du segnieur de Foillouel qui cuidoient qu'il avoit honte de sen cors anceis qu'il s'en revenist et dist que Robert Huesiaus de Ribemont, et Li Moinnes, et li femmes Chavesnel li envoierent ces letres. Et dit cist tesmoins qu'il cuidoit que li contens meust entre yaus pour les chisnes de Cuerllu, de coi il avoient plaidié. Requis de la bleure Jehan Chavesnel, qui li fist, il dist que il ala veoir Jehan Chavesnel a Valenchienes, et il le dist que ce avoit fait li sires de Waulaincourt, et chil meesmes qui furent aveuc Jehan quant li fais li fu fais li conterent. Requis quant il parla a li a Valencienes, se Chavesnel li dist s'il en encoupoit le segnieur de Foillouel de riens, ne s'il l'en oÿ onques parler, il dist nennil. Et dist cis tesmoins qui parole qu'il l'avoit aucune fois loe a Chavesnel qu'il s'apaisast envers les enverssaires1. Et il ne l'en voloit croire, or s'en repentoit si comme il li dist a Valentienes. Et dist qu'il n'en set plus.

Mesires Jehans de le Heri, chevaliers, tesmoins jurés, requis s'il apartient de riens au segnieur de Foillouel ne a sa femme, ne a ses enfans, ne a Jehan Chavesnel, ne a ses enfans, ne a sa femme, il dist que Chavesnel fu estrais de son ligniage, mais il ne set de combien. Requis s'il set riens du descort ne de la male volenté Jehan Chavesnel et du segneur de Foillouel, il dist qu'il vint en la maison mon segnieur Perron de Vendueil a Saint Quent, et amena Chavesnel aveuc li pour le tesmoingnage d'un lais. Et li sires de Foillouel salua cis tesmoins qui parle et tous les autres fors Jehan Chavesnel. Jehans Chavesniaus salua le segnieur de Foillouel et li dist : Sire, Dius vous doinst bon jour. Et il dist : Je ne vous salue mie. Et il li demanda pour coi et il li dist que il ne l'amoit mie tant, et il dist : Sire, se je seusse ce, je n'i fusse mie venus. Et il dist : Si vous en alés. Requis s'il set qu'il le menaçast onques ne ilueques ne ailleurs, ne par li ne par autrui, il dist que nennil. Requis s'il set de la bleceure, qu'il le bleça, il dist qu'il n'en set riens, fors qu'il oÿ dire que ce avoit fait li sires de Waulaincourt. Requis s'il en set plus, il dist que non.

Bertrans Heisselins, bourgois de Chauni, tesmoins jurés, requis s'il apartient de riens au segnieur de Foillouel et a sa femme et a ses enfans, ne a Jehan Chavesnel, ne a se femme, ne a ses enfans, il dist que non. Requis de la male volenté du segneur de Foillouel a Jehan Chavesnel, et deu descort et des menaces, il dist que des menaces ne set riens, fors que du fait de l'assise de Chauni. Il dist que li sires de Foillouel estoit a l'assise a Chauni et oÿ et vit que Jehans Chavesniaus i estoit et demandoit l'asseurement du segnieur de Foillouel et proposoit raisons pour coi asseurement i aferoit, si comme il disoit. Et disoit promiers que en le maison le Dieu de Saint Quentin il s'en bati la u li sires de Foillouel estoit, et disoit qu'il li dist : Sire, Dius vous doinst bon jour. Et li sires de Foillouel li respondi : Si m'ait Dius, Jehan, je ne vous salu mie. Et Jehans li demanda si comme il dist : Sire, pour coi ? Et li sires de Foillouel li dist : Pour ce que je ne vous aimme mie tant. Et il dist : Sire, ce poise mi, et se je vous avoie riens meffait se sui je apareillies de l'amender bien et hautement. Et li sires de Foillouel li dist qu'il n'avoit que faire de lui ne de s'amende, si comme cis Jehan proposoit. Et dist encore cis Jehans Chavesniaus que li sires de Foillouel s'en bati seur les ouvriers Jehan Resnel Nel (sic) a Cuerlu et leur demanda qui les faisoit elekes ouvrer, et il respondirent qu'il i estoient de par Jehan Chavesnel. Et li sires de Foillouel leur respondi que ce pesoit lui quant il i ovroient, car il i ovroient contre se volenté. Et il li respondirent puet qu'il l'en pesoit, il lairoient l'ouvrage, et le laisserent si comme cis sires2 proposoit. Et li sires de Foillouel demanda se Jehans Chavesniaus estoit laiens et il respondirent qu'il n'i estoit mie. Et proposoit de rechief chis Jehans Chavesniaus qu'il avoit envoié l'abé de Yle au segnieur de Foillouel pour sentir de coi il avoit mautalent a lui, et li abés de Yle i estoit alés et avoit parlé au segnieur de Foillouel et li avoit offert : Sire, pour Diu, n'aies nul mautalent a Jehan Chavesnel, car il vous mande et par moi que se vous sentés qu'il vous ait riens meffait, veilliés qu'i soit a 1 jour en vostre hostel et de vostre lingnage, et dites en coi il vous a mesfait, et il dira ses raisons et ses deffensses. Se il se puet delivrer par ses raisons, veilliés li pais, et s'il ne se puet delivrer, et il est trouvés en aucun mesfait, il est apareilliés de amender audit de vostre lingnage. Et li sires de Foillouel li respondi que a lui n'avoit il nul mautalent, et se n'avoit que faire de s'amende, que il ne sentoit mie qu'il li eust fourfait por coi il i eust amende ne qu'il vaussist prendre d'amende. Et disoit cis Jehans Chavesniaus que li abbés d'Yle li avoit raporté. Et li baillus dist : Sires de Foillouel, que dirés vous ? Et li sires de Foillouel dist qu'il se conseilleroit et apela Adan Halot a sen conseil, et Adans Halos li respondi qu'il iroit volentiers se li baillus voloit, et qu'il avoit tant fait pour lui de pieça qu'il i estoit tenus de aler i. Et li baillus li dist : Vous irés se vous cuidiés bien faire, mais vous ne serés mie au jugier. Et il n'i ala mie. Et li sires de Foillouel dist qu'il ne responderont mie sans conseil et demoura en la prison grant piece . Et dist cis tesmoins qui parle qu'il menga aveuc le segnieur de Foillouel leur il tenoit prison et li oÿ dire ge Dius li aidast et les sains qu'il ne voloit nul a Jehan Chavesnel, ne par li ne par son pourcas il n'aroit nul mal, et se je savoie qu'i li deüst venir, je le destourneroie a mon pooir, et me mesveil pour coi il demande asseurement de moi, car c'est grant peril d'entrer en asseurement, ne sans le consau de mes amis n'i entreroie je pas volentiers. Et plus n'en set. Requis de la plaie et de la bleceure Jehan Chavesnel, il dit que la kemune parole couroit que ce avoit fait li sires de Waulaincourt et si escuier.

b

Colars Chavesniaus, cousins germains Jehans Chavesnel, tesmoins jurés, requis, nous li demandames de la male volenté du segnieur de Foillouel et de Chavesnel. Il dist que ce fu pour les chisnes ausi com cis tesmoigne par devant. Nous li demandames s'il savoit le manache de Jehan Chavesnel. Il dist qu'il ne set. Nous li demandames s'il savoit riens de la bleceure Jehan Chavesnel : il dist que Jehans Chavesniaus reconnut que li sires de Waulaincourt li avoit fait, et cil qui avoient esté aveuc Jehan Chavesnel dient aussi que ce avoit fait li sres de Waulaincourt, et oÿ cis tesmoins la connoissance de Jehan Chavesnel et de cicius qui avoient esté aveuc lui que li sires de Waulaincourt li avoit fait. Requis s'il en set plus, il dit que non.

Jehans du Fay, cousins germains Jehan Chavesnel, tesmoins jurés et requis de male volenté de Chavesnel et du segnieur de Foillouel, il dist que ce fu pour les chisnes, et dist chis tesmoins que il loa pluseurs fois a Jehan Chavesnel son cousin qu'il li donnast et cuitast ces cisnes dont il ne li savoit point de gré. Requis s'il set riens des manaces le segnieur de Foillouel a Chavesnel, il dist qu'il ne set, et dist cis tesmoins qu'il cuide mon segnieur de Foillouel si preudomne qu'il croit bien que ce n'a esté fait par sen fait ne par sen trait. Nous li demandames de la bleceure Chavesnel, il dist qu'il avoit esté a lui a Valencienes dedens le tiers jour qu'il avoit esté bleciés, et que Jehans Chavesniaus li dist que li sires de Waulaincourt avoit tournoié a lui, et plus n'en set, fors que 1 vallés qui avoit esté a Chavesnel li dist que ce avoit fait li sires de Waulaincourt. Requis s'il en set plus, il dist que non.

Gobers Chavesniaus, fius du cousin germain Chavesnel, tesmoins jurés, requis de male volenté Jehan Chavesne et du segneur de Foillouel, il dist que c'estoit pour le maison de Cueillu et pour les apendances. Apres il oÿ dire que Chavesniaus vint a Saint Quentin et que il salua le segneur de Foillouel, et il dist qu'il se fouist de devant lui qu'il ne l'amoit mie, et plus n'en set.

Requis de la bleceure Jehan Chavesnel, il dist qu'il ala a lui a Valencienes et que Chavesniaus li dist que ce li avoit fait li sires de Waulaincourt et qu'en demandast riens nului se lui non. Requis s'il en set plus, il dist que non.

Raulins Brikes de Ernaus Sart, cousins en tiers Jehan Chavesnes (sic), tesmoins jurés, requis de la male volenté le segneur de Foillouel et de Chavesnel, il dist qu'il oÿ dire que c'estoit pour les cisnes devant dis. Requis s'il seut onques se li sires de Foillouel le menachaist, il dit qu'il ne seut onques que il ne par lui ne par autrui le menachast. Requis de la bleceure a Chavesnel, il dit qu'il oÿ dire a Jehan Chavesnel que li sires de Waullaincourt l'avoit ensi atourné, et l'oÿ dire a le maisnee Chavesnel. Requis s'il en set plus, il dist que non.

Jehans Moinsnes de Ribemont, tesmoins jurés, requis de la male volenté de Jehan Chavesnel et du segnieur de Foillouel, il dist qu'il oÿ dire que Jehans Chavesniaus vint a Saint Quentin en le maison mon segnieur Perron de Vendueil et qu'i salua le segnieur de Foillouel et li sires de Foillouel li dist qu'il n'avoit que faire de lui, et il dist que se il cuidast ce, il n'i fust pas venus. Requis s'il savoit autrement que Chavesniaus eust esté menaciés, il dist qu'il n'en set plus. Requis de la bleceure Jehan Chavesnel, il dist qu'il n'en set fors que par oï dire que ce avoit fait li sires de Waulaincourt, et l'oÿ dire sen chapelain et 1 vallet qui estoit de le vile, et Rogier de Wimi qui estoit en la compaingnie Jehan Chavesnel, et disoient que ce avoit fait li sires de Waulaincourt. Requis s'il en set plus, il dist que non.

Gobert Canouele, prevos de Chauni, tesmoins jurés, requis de la male volenté de Jehan Chavesnel et du segnieur de Foillouel, il dist qu'il set qu'il plaidoient ensanle de la meson de Cuerlu pour les chisnes de l'iaue de Cuerllu, et dist qu'il fu a Saint Quentin en la meson mon segnieur Perron de Vendueil et ot entendu que Jehans Chavesniaus fu iluekes venus aveuc aucuns gentis houmes, et salua le segnieur de Foillouel et li dist : Sire dius vous doinst bonjour. Et li dist : Jehan, je ne vous salu pas. Et il li demanda pour coi. Pour ce que je ne vous aime pas tant. Sire, ce poise moi, et se je le seusse, je ne fusse pas ci venus. Et il li dist : Si vous en alés quant vous vourrés. A ces paroles ne fu mie li prevos qui parole, mais il vint tantost au segnieur de Foillouel pour ce qu'il avoit ja oÿ que Jehans Chavesnel demandoit asseurement au prevost de Saint Quentin, et li dist : Sire, pour coi faites vous ce ? vous ne faites mie vostre honneur. Et il li respondi et dist li sires de Foillouel : Se Dius li ait et les sains que s'il encontrast aveuc grant plenté de bonnes gens enmi les chans, ne li feroit il riens ne li avoit talent de mau faire. Et connut li sires de Foillouel qu'il avoit dites ces paroles devant dites au prevost qui parole. Me sires de Foillouel fu ajournés a Chauni a l'assise, a Chauni par le baillu. Li prevos qui parole fu a l'assise a Chauni la u Jehans Chavesnel requeroit l'asseurement du segnieur de Foillouel, mais il n'entendi mie bien les raisons pour coi il demandoit l'asseurement, mais il oÿ qu'il dist qu'il prouveroit bien que asseurement i chaoit. Et li baillus kemanda au segneur de Foillouel qu'il respondist, et il dist qu'il se conseilleroit, et apela Adan Halot, qui est ses hom, qu'il alast a sen conseil, et l'avoit amené aveuc lui a sen conseil, et Jehan Chavesniaus dist au baillu : Sire, il aroit bien mestier ici a conseillier la court. et li baillus li dist : Vous avés bien mestier ici, car vous estes hom le roi, et gardés que vous ne vous meffaciez vers le roi. Et li sires de Foillouel dit au baillu : Sires, je vous requier Aden Halot pour estre a men conseil, car je l'i ai amené aveuc moi, et il i est tenu de moi conseillier, et ne vous demande autre conseil. Et li baillus ne li vaut dener congié. Requis s'il set de nules autres menaces ne s'il set nului qui riens en sace, il dist que nennil, et li sires de Foillouel ne vaut respondre sans conseil. Et pour ce il demoura grant piece en le prison a Chauni. Requis s'il set de la bleceure Jehan Chavesnel, il dist que kemune renoumee ceurt par le pays que me seres de Waulaincourt li fist. Requis du segnieur de Foillouel quant il fu delivrés apres de la prison de Chauni, quant li fais fu fais apres ce qu'il fu delivrés, il dist que ce fu le jour ou l'endemain si comme il cuide. Requis combien il a de Chauni a Valencienes, il dist 21 liue. Requis s'il en set plus, il dist que non.

Raous le Kerie, maires de Chauni, tesmoins jurés, requis de la male volenté Jehan Chavesnel et du segnieur de Foillouel, il dist que de la male volenté ne set il riens ne de riot qu'il eussent ensanle, mais il vit a l'assise a Chauni, devant le baillu, le segnieur de Foillouel et Jehan Chavesnel et requeroit Jehans Chavesnel asseurement de lui, et disoit raison pour ce qu'il estoit venus a Saint Quentin en la meson mon segnieur Perron de Vendueil et avoit salué le segnieur de Foillouel et li sires de Foillouel li avoit respondu, si comme il dist, qu'il ne le saluoit mie et qu'il n'avoit que faire de lui. Et Jehans Chavesnel disoit qu'il li avoit dit que s'il li avoit mesfait, qu'il estoit pres de l'amender. Et plus disoit Jehans Chavesnel qu'il estoit venus en la maison a Cuerllu et qu'il avoit dit a son vallet que Jehans Chavesnel ne venist pas seur ces choses et s'il i venoit, qu'il n'en gorroit ja. Et disoit Jehans Chavesnel que par ces choses i aferoit bien asseurement. Et requeroit qu'i li fust fait Et li baillus dist : Que dira li sires de Foillouel ? Et li sires de Foillouel dist : Sire, je me conseillerai. Et quant il se vaut aler conseillier, il apela Adan Halot qui estoit venus aveuc lui et qui estoit de sen conseil. Et li baillus dist qu'il n'iroit pas et qu'il ne voloit mie qui li houme le roi alassent au conseil des parties. Et li sires de Foillouel dist : Sire, c'est une grant chose et perilleuse de asseurement, et sans estre bien conseillié je ne responderoie mie, et vous requier mon conseil que je ai amené. Et li baillus dist qu'il estoit defendu de court que li houme qui devoient jugier n'alassent mie au consau des parties. Et li sires de Foillouel dist : Sire, je veil bien que Adans ne voist mie au jugement. Et Adans meesmes dist : Sire, je me consuirai bien d'estre au jugement, et laissié me aler au consu mon segnieur. Et li baillus ne vaut. Et fu li sires de Foillouel en prison a Chauni grant piece, et tint prison en le maison du maieur de Chauni pour ce qu'il ne pooit avoir son consseil. Et dist li maires qui parole que me sires de Foillouel li dist priveement par sen serement qu'il ne li voloit nul mal a Jehan Chavesnel, et s'il savoit nului qui mal li vaussist faire, qu'il li destourneroit a sen pooir. Et plus n'en set.

Requis s'il set de la bleceure Jehan Chavesnel, il dist qu'il n'en set riens, fors que pluseurs gens dient que ce fist li sires de Waullaincourt. Et croit bien cis tesmoins que li bleceure fu faite a Jehan Chavesnel dedens le tiers jour apres ce que li sires de Foillouel fu delivrés de prison. Requis se chistesmoins apartenoit riens au segnieur de Foillouel et a Jehan Chavesnel, et dist que nennil.

C

Raous Gobe, bourgois de Chauni, tesmoins jurés, requis de la male volenté le segnieur de Foillouel et de Jehan Chavesnel, il dist qu'il n'oÿ onkes par lui ne par autrui qu'il le menachast Requis de toutes les autres choses, il dist qu'il n'en set riens.

Williaumes Bricart, bourgois de Chauni, tesmoins jurés, requis de la male volenté le segnieur de Foillouel et Jehan Chavesnel, il dist qu'il ne set riens de leur contens ne de leur descors, fors qu'il vit le segnieur de Foillouel en l'ássise a Chauni et Adan Halot venir aveuc lui, et tantost que il fu assis, Jehans Chavesniaus se leva et demanda l'asseurement de li, et disoit raison parcoi li asseurement i devoit estre, que il avoit dit a 1 sien sergant qui wardoit se maison qui devoit avoir dit qu'il avoit dit lait de lui, et qu'il ne voloit mie qu'il s'en batist seur ses choses. Et plus disoit qu'il estoit venus a Saint Quentin en le maison mon segnieur Perron de Vendueil, et avoit salué le segnieur de Foillouel, et li sires de Foillouel li dist qu'il n'avoit que faire de lui ne de son salu. Et il respondi que s'il li avoit mesfait qu'il li amenderoit au los de ses amis et il respondi qu'il n'avoit que faire de s'amende et par ces raisons disoit il que asseurement i chaoit. Et li baillus respondi et dist : Que dira li sires de Foillouel ? Et il dist qu'il se conseilleroit et se leva3 et apela Adan Halot qui estoit de sen conseil et venus aveuc li. Et li baillus li dist : Aden, gardés que vous faites, vous estes hom le roi et vous devés estre au jugement, et cil qui doivent estre au jugement ne doivent mie estre au conseil des parties. Et li sires de Foillouel dist : Aans se consuura bien d'estre au jugement, et laissiés le venir a mon conseil. Et Adans dist : Sire, puis que vous ne volés, je n'irai mie. Et li sires de Foillouel dist : Sire, c'est une grans chose comme requiert, je n'oseroie mie respondre sans men conseil. Et li baillus le retint et demoura en prison 15 jours en la meson au meur de Chauni. Requis de la bleceure Chavesnel et des manaces que nus l'eust menaciet, il dist qu'il n'en set riens, de la bleceure. Il dist que renoumee ceurt que ce fist li sires de Waulaincourt. Requis s'il tegnoit riens a nule des parties, il dist que non. Requis s'il en set plus, il dist que non.

Robers de Foulenbrai, bourgois de Chauni, tesmoins jurés, requis de la male volenté du segnieur de Foillouel et de Jehan Chavesnel, il dist que de la male volenté ne set il riens, ne des menaces, mais il vit le segnieur de Foillouel en l'assise a Chauni et Adan Halot venir aveuc lui et quant il fu assis, Jehans Chavesniaus se leva et demanda l'asseurement de li, et disoit raison pour coi li asseurement i devoit estre, et disoit pour ce qu'il estoit venus a Saint Quentin en le maison mon segnieur Perron de Vendueil et disoit qu'il avoit salué le segnieur de Foillouel et li sires de Foillouel li dist qu'il ne saluoit mie et que il n'avoit que faire de son salu. Et disoit Jehans Chavesniaus que s'il l'avoit mesfait, qu'il li amenderoit par ses amis, et il disoit qu'il n'avoit cure de s'amende. Et par ces raisons disoit Chavesniaus que asseurement i aferoit, car ce n'estoit pas bonne veillance. Et li baillus dist : Que dira li sires de Foillouel ? Et il dist : Sire, je me conseillerai. Et il se leva et apela Aden Halot a sen conseil, et Adans se leva et dist qu'il iroit volentiers se li baillus voloit. Et li baillus dist : Je veil bien que vous i alés se vous cuidiés bien faire, mais gardés que vous ne mespregniés. Vous savés le kemandement qui est venus de court. Et Adans dist qu'il n'i oseroit mie aler s'il ne li kemandoit. Et li sires de Foillouel disoit : Sire, il est venus aveuc moi et est de mon conseil et je n'oseroie mie respondre sans men conseil. Et li baillus le defendi qu'il ne se departist pas de prison. Et dist cis tesmoins qu'il oÿ dire mon segnieur de Foillouel qu'il ne voloit nul mal a Chavesnel ne par lui ne par autrui. Mais ce ne fu pas dit par devant le baillu. Requis s'il tengnoit riens as parties, il dist que non par sen serement. Requis de la bleceure a Chavesnel, il dist qu'il n'en set riens, fors que la kemune renoumee ceurt deu segnieur de Waullaincourt.

Oudars de la Tour, bourgois de Chauni, tesmoins jurés, requis de la male volenté du segnieur de Foillouel et de Jehan Chavesnel, il dist que il ne set riens de la male volenté d'iaus ne des manaces. Mais il vit Jehan Chavesnel en l'assise a Chauni, et requeroit asseurement deu segnieur de Foillouel par devant le baillu et disoit par 3 raisons que asseurement i chaoit. L'une estoit tele que il passoit par devant la meson et dist a 1 sien vallet que ce pesoit lui quant il s'en batoit seur ses choses, et l'autre estoit qu'il vint a Saint Quentin en la meson mon segnieur Perron de Vendueil et le salua et li sires de Foilloiel dist qu'il ne le saluoit pas, et Chavesniaus disoit que s'il li avoit mesfait qu'il li amenderoit volentiers, et il dist qu'il n'avoit que faire de lui ne de s'amende. Par ces 2 raisons et par une autre raison dont il ne li souvient, disoit il que asseurement i aferoit bien. Et li baillus dist : Sires de Foillouel que dites vous ? Et i dist : Sires, je me conseillerai. et apela Adan Halot a sen conseil. Et li baillus dist qu'il n'iroit mie car il estoit hom le roi et que li houme le roi devoient jugier, et li sires de Foillouel disoit qu'il estoit venus a sen conseil et qu'il li avoit fait par coi il le devoit avoir et Adans meismes disoit qu'il li avoit fait le pour coi et qu'il i estoit tenus a aler a son conseil. Et li baillus ne vaut, et li sires de Foillouel ne vaut respondre sans son conseil, par coi il demoura en prison au kemandement le baillu. Requis s'il en set plus, ne de menaces ne de riens, il dit que non. Requis s'il apartient riens as parties, il dist que non. Requis de la bleceure a Chavesnel, il dist qu'il n'en set riens que la kemune renonmee du segnieur de Waulaincourt. Requis s'il en set plus, il dist que non.

Jehans Gobe, bourgois de Chauni, tesmoins jurés, requis de la male volenté du segnieur de Foillouel et de Jehan Chavesnel, il dist qu'il ne set riens ne des menaces ne de la male volenté, mais il les vit en l'assise a Chauni et requeroit l'asseurement du segnieur de Foillouel et disoit que assueremens i aferoit. Et li baillus dist : Sires de Foillouel, respondés, c'est contre vous. Et li sires de Foillouel dist qu'il se conseilleroit et apela Adan Halot, et Adans dist qu'il estoit tenus a aler i pour les biens qu'i li faisoit et qu'il li avoit fait, et de lonc tans et qu'il estoit de son conseil. Et li baillus dist qu'il estoit hom le roi et que s'il estoit a sen conseil qu'il ne porroit estre au jugier, et il vous estuet estre aveuc les hommes au jugier et bien gardés que vous ne vous mesfaciés. Et li sires de Foillouel requeroit son conseil et dist qu'il ne porroit respondre sans son conseil, et li baillus li dist qu'il ne se meust de la prison puis qu'il ne voloit respondre. Requis s'il apartient riens as parties, il dist que non. Et de la mort Jehan Chavesnel, il dist que ne set fors de la kemune renoumee le segnieur de Waullaincourt.

Pierres Buire, bourgois de Chauni, tesmoins jurés, requis de la male volenté et qu'il oÿ longement durer le debat de l'aseurement, mais il ne li souvient mie des raisons que Chavesniaus metoit audit, mais il oÿ bien l'asseurement demander, et li baillus li dist, au segnieur de Foillouel, qu'il respondist, et il apela Adan Halot a sen conseil et li baillus dist : Adan, vous n'irés mie pour ce que li rois a kemandé que nus des honmes ne soit au jugement qui soit au consau de partie. Et Adans dist : Je ne veil estre au jugement et je doi bien estre a sen conseil, car je ving aveuc lui et m'a fait le pour coi. Et li baillus ne vaut pas qu'il i alast, et li sires de Foillouel ne vaut pas respondre sans conseil, et demoura en la prison a Chauni au kemandement le baillu. Requis s'il apartient as parties, il dist que non Requis de la bleceure Jehan Chavesnel, il dist que la renonmee en court deu segnieur de Waullaincourt. Requis s'il en set plus, il dist que non.

Hues Li Gruhiers, de Chauni, tesmoins jurés, requis de la male volenté du segnieur de Foillouel et de Jehan Chavesnel, ne des manaces il dist qu'il n'en set riens fors que par oïr dire qu'il i avoit eu descort des chisnes de la meson de Cuerllu. Mais il dist qu'il les vit en l'assise a Chauni et demandoit Jehans Chavesniaus l'asseurement du segnieur de Foillouel par devant le baillu, et disoit Chavesniaus qu'il avoit esté a Saint Quentin en la maison mon segnieur Perron de Vendueil, et qu'il avoit salué le segnieur de Foillouel, mais li sire de Foillouel ne le salua mie, et il li demanda pour coi, et il dist qu'il ne l'amoit tant, et metoit Chavesniaus tou plain d'autres paroles, mais il n'en entendi plus. Et li baillus respondi et dist : Que dira li sires de Foillouel ? Et il dist qu'il se conseilleroit et apela Adan Halot a son consseil et li baillus respondi : Adan, vous estes hom de la court. Et Adans dist : Sire, je n'irai mie s'il ne vous plaist. Et plus n'en set cis tesmoins que il se departi de l'assise tantost. Requis s'il apartient riens a parties, il dist que non. Requis de la bleceure qui fu faite a Chavesnel, il dist qu'il n'en set riens fors que la kemune renoume qui en ceurt par le pays. Requis s'il en set plus, il dit que non.

D

Me sires Drius d'Amiens, tesmoins jurés, requis dist par son serement que il vint au segnieur de Foillouel et li dist : Biau frere, on m'a fait a entendre que vous volés mal a Jehan Chavesnel. Et li sires de Foillouel dist : Je, biau frere, par les sains de laiens, je ameroie mius avoir perdu 200 l. de par. que maus li venist par moi ne par mon pourchas, et se je savoie que maus li deust venir, je le destourneroie a mon pooir. Et dist encore que li sires de Foillouel li avoit dit qu'il avoit desfendu au segnieur de Waullaincourt et a ses freres que pour l'ocoison de li, que il ne li fesissent nul mal, si chier comme il l'avoient. Et dist encore me sires Drius qui parole que depuis le fait il avoit parlé au segnieur de Waullaincourt et a mon segnieur Bauduin d'Avesnes et a Jehan de Hainnau, et que mesires Drius qui parole li avoit blasmé du fait qu'il avoit fait, et il li respondi qu'il li avoit fait faire pour l'orgueil et pour l'outrage qu'il avoit dit de li. Et connut bien li sires de Waullaincourt qu'il li avoit fait faire. Et apres avint que Jehans Chavesniaus fist conter a son hoste, et adont il se courba et couiça et chau en autre maladie de coi il morut. Et dist mesires Drius qui parole que il parla a mon segnieur Bauduin d'Avesnes, et que me sires Bauduins li dist qu'il estoit venus a Jehan Chauvesnel le jour qu'il se departi de Valencienes et li dist que il ne se meust et que li mire disoient qu'il n'avoit garde de se plaie se il demouroit, et li loa que il demourast, et Jehans de Hainnau li loa aussi. Et cis Jehans Chavesniaus n'en laissa riens pour iaus, ains s'en departi. Requis s'il en savoit plus, il dist que non. Requis s'il ataingnoit riens de lingnage a eus, il dist qu'il ot sa sereur a femme, et li sires de Waulaincourt et si frere estoient si cousin germain. Requis s'il en set plus, il dist que non.

Me sires Raous Garllans, chevaliers, cousins en autre a Jehan Chavesnel, tesmoins jurés, requis de la male volenté du segnieur de Foillouel et de Jehan Chavesnel, il dist qu'il savoit le contens des chisnes de Cuerllu, et pour letres que cis Jehans Chavesniaus tenoit du segnieur de Foillouel de 300 l., et il disoit qu'il li renderoit volentiers ses letres se il li rendoit 60 l., et seur ce estoit li contens. Et se gardoit durment Jehans Chavesniaus et aloit l'espee chainte parmi la vile et au moustier. Cis tesmoins qui parle li demanda pluseurs fois pour coi il se doutoit ensi et pourcoi il aloit ensi armés, et il disoit que c'estoit pour le segnieur de Foillouel. Et dist encore plus cis tesmoins qui parole que Adans Halos qui estoit du conseil le segnieur de Foillouel li dist veritablement que il savoit tant du segnieur de Foillouel que se il le trouvoit dormant en quel liu que ce fust, ne en liu le u il eust pooir, ne li feroit il nul mal selonc ce qu'il li avoit dit. Requis s'il savoit que li sires de Foillouel l'eust onques menacié, il dist que non. Requis s'il set nul homme par coi on peust savoir ne qui le seust, il dist que non. Requis s'il savoit riens de la bleceure Jehan Chavesnel, il dist qu'il ala a lui a Valencienes, et li dist qu'il le cuida avoir moirt, mais il disoit qu'il cuidoit bien qu'il n'eust garde. Requis s'il en set plus, il dist que non.

Clement de Fay, cousins en autre Jehan Chavesnel, tesmoins jurés, requis de la male volenté du segneur de Foillouel et de Jehan Chavesnel, il dist qu'il savoit le contens des chisnes de Cuerllu et des letres qu'il tenoit du segnieur de Foilloue. Requis s'il oÿ nule menaces du segnieur de Foillouel et de Jehan Chavesnel, ne qui nous en peust adrecier, il dist que non. Requis de la bleceure Jehan Chavesnel, il dist qu'il oÿ dire Chavesnel que ce avoit fait li sires de Waullaincourt et l'oÿ dire a ses gens mesmes. Et dist cis tesmoins qu'il cuidoit bien que cis Jehans deust garir quant il le vit. Requis s'il en set plus, il dist que non.

Li Moines de Ribemont, tesmoins jurés, requis s'il apartenoit riens Jehan Chavesnel, il dist qu'il apartenoit a sa femme, et est ses cousins germains, a sa femme, et si enfant si cousin. Requis de la male volenté du segneur de Foillouel et de Jehan Chavesnel, ne des menaces, il dist qu'il n'en set riens, fors tant qu'il le vit aler armé et s'esmerveilloit. Requis s'il set nul houme qui nous en peust adrecier, il dist que non, et dist cis tesmoins qui parole par son serement qu'il croit que li sires de Foillouel ne vaussist que cis maus li fust venus par li ne par son fait ne par sen pourchas. Requis de la bleceure Jehan Chavesnel, il dist qu'il l'ala veoir a Valencienes et li dist que li sires de Waulaincourt li avoit fait. Et cuidoit estre garis, et li dist que puis or en avant je chevaucherai. Et dist cis tesmoins par sen serement qu'il le vit a Robemont quant il fu venus, et qu'il n'entent et croit mius qu'il morust de la menoizon que de la plaie. Et plus n'en set.

Espaillars de Ribemont, tesmoins jurés, requis s'il apartenoit riens a Jehan Chavesnel ne au segneur de Foillouel, il dist qu'il est cousins germains a la femme Chavesnel et s'est cousins a ses enfans. Requis de la male volenté de Jehan Chavesnel, deu segnieur de Foillouel et des menaces, il dist qu'il n'en set riens. Requis s'il set nului qui nous en peust adrecier, il dist que non. Et dist cis tesmoins qui parle qu'il vit Jehan Chavesnel aler a vau la vile l'espee chaint et armé, et li demanda pour coi il aloit ensi et pour cui il se gardoit, il dit que du segnieur de Foillouel. Et dist qu'il oÿ dire a Jehan Chavesnel que li sires de Foillouel ne vaut parler a lui a Saint Quentin et qu'il n'avoit que faire de sa parole. Requis lequel il croit, que li sires de Foillouel li eust fait faire le fait, u il croit que il ne li eust fait faire, il dit par sen4 serement qu'il croit que li sires de Foillouel ne li eust fait faire pour riens. Requis de la bleceure Jehan Chavesnel, il dist qu'il oÿ dire Jehan Chavesnel a Valencienes que ce avoit fait li sires de Waullaincourt, et estoit en bon point, et ne cuidoit pas morir. Et li dist li mires que dedens 8 jours qu'il porroit bien chevauchier, u dedens 12 jours. Et puis le vit cis tesmoins a Ribemont et avoit menoizon. Et oÿ dire cis tesmoins le mire a Ribemont que il ne morut mie de la plaie, mais de la menoizon. Et plus n'en set.

Jehans de Marlle, tesmoins jurés, requis du contens et de la male volenté du segnieur de Foilloues et de Jehan Chavesnel, et des menaces, il dist que des menaces ne set riens ne par lui ne par autrui et dist biens qu'il fu privés de Jehan Chavesnel et pluseurs fois compaingna aveuc li et le vit garder l'espee chainte et ensigne de soi garder. Et li demanda de qui il se doutoit, et il li dist du segnieur de Foillouel, et il li demanda s'il l'avoit menacié, ne s'il i avoit raison pour coi il se deust garder, et il dist qu'il n'i avoit mie menaces apertes qu'il peust prouver, mais il avoit avoié au segnieur de Foillouel aucunes fois pour le debat qui estoit entre iaus, de ses chisnes et de tout autre debat, qu'il entrerroit volentiers en amour envers lui s'il voloit. Et il en respondit qu'il ne li plaisoit mie qu'il alast en liu lau il fust, et poue ces paroles disoit il qu'il s'en doutoit. Et chis tesmoins qui parole li conseilloit que il pourchasast envers le segnieur de Foillouel s'il s'en doutoit, que il fust a pais envers lui. Requis s'il savoit nului qui nous peust adrecier des menaces par lui ne par autrui, il dist que non. Requis de la bleceure Jehan Chavesnel, il dit qu'il l'ala veoir a Valencienes et li dist que celi avoit fait li sires de Waulaincourt. Requis s'il en metoit riens sus au segnieur de Foillouel, ne s'il l'encoupoit de riens, il dist que non. Et li dist qu'il cuidoit garir et que li maistres l'asseuroit mout qu'il n'aroit warde, et i vit 1 fisicien, et vit s'orine, et li dist : Adonc vous estes plus sains que une poume. Et croit mius cis tesmoins qu'il morust de la menoizon que de la plaie. Et plus n'en set.

Aubris Li Cordouenniers, tesmoins jurés, requis de la male volenté le segnieur de Foillouel et de Jehan Chavesnel et des menaces s'il en oÿ riens ne par lui ne par autrui, il dist que non. Mais il vit pluseurs fois Jehan Chavesnel aler a vau la vile l'espee chainte, et disoit on qu'il se gardoit du segnieur de Foillouel. Requis s'il en set plus, il dist que non. Requis de la bleceure Jehan Chavesnel, il dist que kemune renoumee court que ce a fait li sires de Waulaincourt.

e

Pierres Bailles de Ribemont, tesmoins jurés, requis de la male volenté le segnieur de Foillouel et de Jehan Chavesnel, et des menaces, il dist qu'il oÿ dire qu'il plaidoient ensanle de la meson de Cuerlu et pour cisnes, et que des menaces ne set il riens ne par lui ne par autrui, mais il dist qu'il le vit aler armé d'espee et de baston a vau la vile, et sauloit bien qu'il se doutast, mais il ne savoit de cui. Requis s'il set de la bleceure et de la plaie, il dist qu'il ne set, fors qu'on disoit que ce fist li sires de Waulaincourt. Et plus n'en set.

Huars Chavete, tesmoins jurés, requis de la male volenté Jehan Chavesnel et du segnieur de Foillouel et des menaces, il dist qu'il vit aler armé Jehan Chavel parmi la vile de Ribemont, lui quart et lui sisime, pluseurs fois, et li dist cis tesmoins pour coi il aloit armés et de cui il se doutoit, et il li disoit que ce estoit pour le segnieur de Foillouel, et il li disoit : pour coi ne vous pourçaciés vous parcoi vous puissiés avoir s'amour ? Et il li disoit : Si ai je fait et par cordeliers et par autres bonnes gens, et ne puis avoir pais a lui. Et dist cis tesmoins qu'il oÿ dire maistre Jehan Flament qu'il requeroit et prioit le segnieur de Foillouel que uns jours fust pris de lui et de Jehan Chavesnel par coi pais venist a lui, et qu'il vaussist que pais en fust faite, et que li sires de Foillouel respondoit qu'il ne voloit prendre jour et qu'il ne li demandoit riens ne voloit. Requis s'il oÿ nule des menaces ne par lui ne par autrui par qui il nous en peust adrecier, il dist que nennil. Requis de la paie Chavesnel ne de la bleceure, il dist qu'il l'ala veoir a Valencienes et li dist Chavesniaus que li sires de Waulaincourt li fist, et le cuida avoir mort. Requis lequel il cuide mius, ou qu'il morust de la plaie ou de la maladie, il dist par sen serement qu'il cuide mius qu'i morust de la plaie que de la maladie, et dist par sen serement qu'il n'apartient a nule des parties, ne ne tient riens d'aus. Et dist qu'il n'en set plus.

Wiars Li Fevres de Rebemont, tesmoins jurés, requis s'il apartient riens a Jehan Chavesnel, ne au segneeur de Foilloieel, il dist que non ne il, ne femme, ne sa maisnie, ne ne tient riens d'iaus. Requis de la male volenté d'iaus et des mennaces, il dist qu'il n'en set riens for ce que les gens disoient qu'il se gardoit du segnieur de Foillouel et qu'il aloit a vau la vile 1 baston en sa main et au moustier et s'espee chainte. Et disoient a vau la vile que c'estoit pour la meson de Cuerllu, de coi il plaidoient ensanle. Requis du quel il morut, il dist qu'il ne set fors qu'il dist qu'il avoit menoizon. Requis de la plaie qu'i li avoit faite, il dist qu'il ne set fors que les gens disoient que ce avoit fait li sires de Waulaincourt. Et dist qu'il n'en set plus.

Williaumes Dourlles, tesmoins jurés, requis s'il et sa femme apartient riens as parties, il dist que non, ne ne i tient riens d'iaus. Requis s'il set riens de la male volenté d'iaus, il dist qu'il n'en set riens fors qu'il oÿ dire que c'estoit pour les cisnes, et vit pluseurs fois Jehan Chavesnel pluseurs fois (sic) aler a vau la vile l'espee chainte et 1 baston en sa main. Et dist qu'il n'en set plus ne ne set qui la plaie li fist.

Robers Huesiaus de Ribemont, tesmoins jurés, requis se il et sa femme a parties apartient riens, il dist que non5 mais il estoit mout familiés a Jehan Chavesnel. Requis de la male volenté du segnieur de Foillouel et de Jehan Chavesnel et des menaces, il dist qu'il ne fu en liu qu'il le menaçast, mais il dist qu'il vit Jehan Chavesnel garder et aler armé parmi la vile, par pluseurs fois, et il meismes i ala aveuc li. Et li demanda pluseurs fois de cui il se doutoit, et il li dist du segnieur de Foillouel, et il li demanda comment il savoit qu'il li vaussist mal, et il dist que il avoit dit que li sires de Foillouel avoit dit a 1 sien vallet que il ne l'amoit mie, et se maus li venoit qu'il ne l'en proessorroit ja. Et plus li dist que il estoit venus a Saint Quentin en la meson mon segnieur Perron de Venduel, qu'il l'avoit salué. Et li sires de Foillouel dist a Jehan : Je ne vous salue mie car je ne vous aim point. Et pour ces paroles je me doutoie de li. Et dist cis tesmoins que Jehans li dist que par 2 abés il l'avoit fait savoir au segnieur de Foillouel que uns jours fust pris et que s'il li avoit riens mesfait, qu'il li adreceroit par lui et par ses amis. Et li sires de Foillouel li respondi qu'il n'en prenderoit ja jour s'il ne li rendoit ses letres du marchié, mais s'il li rendoit ses letres deu marchiet, il prenderoit volentiers jour, et li paieroit et l'asseneroit. Et cis tesmoins li loa qu'il preïst jour et il ne se vaut faire.

Requis de la plaie et de la bleure a Jehan Chavesnel, il dist qu'il ala a lui a Valencienes et li dist Chavesniaus que celi avoit fait sires de Waulaincourt, et le cuida pour mort, et ne le nie mie li sires de Waulaincourt, si comme il dist, et dist que quant Chavesniaus s'en vint, qu'il estoit en tel point qu'il cuidoit bien morir et qu'il avoit plus cher a morir a Ribemont que la, et l'en amena cis tesmoins qui parole. Et dist encore cis tesmoins que le lundi apres ce que li sires de Foillouel fu delivrés que li fais avint a Jehan Chavesnel. Et plus n'en set.

Mahius de Saint Nichaise, tesmoins jurés, requis s'il apartient riens, il et sa femme, au segnieur de Foillouel et a Jehan Chavesnel, il dist que la femme Jehan Chavesnel estoit sa suer, et si enfant sunt si neveu. Requis de la male volenté du segnieur de Foillouel et de Jehan Chavesnel, et des menaces, et dist qu'il n'en set nule, mais il oÿ dire que Jehans Chavesnel vint a Saint Quentin en le la maison (sic) mon segnieur Perron de Vendueil et qu'il salua le segnieur de Foillouel, et li sires de Foillouel li dist qu'il ne saluoit mie, et il li demanda pour coi, et il li dist pour ce que je ne vous aimme mie tant, et il dist : Dont m'en irai ge. Et il dist : Alés la u vous cuiderés bien faire. Des menaces ne set il riens, mais il vit Jehan Chavesnel pluseurs fois aler armé a vau Ribemont, et issir hors de Ribemont armé, et le vit pluseurs fois aler par Ribemont un baston en sa main et l'espee chainte. Et il oÿ dire que Jehans demanda asseurement, mais il n'i fu pas.

Requis de la plaie et de la bleçure Jehan Chavesnel, il oÿ dire a ciaus qui furent au fait que li sires de Waulaincourt le fist, et plus n'en set.

Tassin Diron, tesmoins jurés, requis s'il apartient riens as parties, il dist qu'il estoit fius deu cousin en autre Jehan Chavesnel, et ert a li en chief. Requis de la male volenté Jehan Chavesnel et du segnieur de Foillouel et des menaces, il dist qu'il n'en set riens des menaces, ne du descort, fors si comme il oÿ dire, pour les chisnes de l'iaue de Cuerllu.

Requis de la plaie de Jehan et de la mort, il dist qu'il i fu tous present et vit le segnieur de Waulaincourt qui le feri, et Jehans li crioit merci, et il li dist qu'il ne diroit jamais vilenie de gentil houme qui ne l'en souvenist, et feri le coup apres ce. Et dist qu'il n'en set plus.

Rogiers de Wimi, tesmoins jurés, requis s'il apartient riens au segnieur de Foillouel ne a Chavesnel ne a sa femme, il dist que non, n'en tient riens d'iaus. Requis de la male volenté du segnieur de Foillouel et de Jehan Chavesnel ne des menaces : des menaces ne set il riens, ne de la male volenté ne set il riens fors tant qu'il oÿ dire Jehan Chavesnel qu'il estoit en bonne astenance et en bune (sic) asseurement et cuidoit estre.

Requis de la plaie Jehan Chavesnel, il dist qu'il i fu tous presens et vit le segnieur de Waullaincourt qui le feri et Jehans li crioit merci, et bien dist li sires de Waullaincourt : Je sui sires de Waullaincourt. , mais cis tesmoins ne savoit se c'estoit il ou non, mais il connissoit bien que c'estoit il. Requis s'il en set plus, il dist que non.

Robers de Bantouzel, qui a la fille Jehan Chavesnel, tesmoins jurés, requis de la male volenté le segnieur de Foillouel et de Jehan Chavesnel, ne des menaces, il dit qu'il ne set riens des menaces, et dist que Chavesnel envoia 1 message parler au segnieur de Foillouel qu'il ne pooit estre a ce jour qui devoit, et li sires de Foillouel li dist qu'il ne faisoit mie ce qu'il devoit et qu'il n'en goiroit ja. Et dist cis tesmoins qu'il l'oy dire au vallet que ensi avoit dit li sires de Foillouel. Requis de la plaie et de la bleceure Jehan Chavesnel, il dist qu'il i fu tous presens lau li sires de Waullaincourt li fist et vit le coup ferir et Jehans Chavesniaus li crioit merci, le vit cis tesmoins ferir le coup. Requis s'il en set plus, il dist que non.

Oudars du Bourgel, tesmoins jurés, requis si apartient riens au segnieur de Foillouel ne a sa femme, ne a ses enfans, ne a Jehan Chavesnel aussi si, il dist que non, mais il dist que il tient de par sa femme terre du segnieur de Foillouel a censsel et est son hoste et son couchant et son levant. Requis de la male volenté et du descort du segnieur de Foillouel et de Jehan Chavesnel et des menaces, il dist par son serement que il ne seut onques que li sires de Foillouel vaussist nul mal a Jehan Chavesnel et que pluseurs fois oÿ que on disoit au segnieur de Foillouel que Jehan Chavesnel se doutoit6 de li et c'on li faisoit a entendant et que Jehan Chavesnel le faisoit entendant a la gent. Et li sires de Foillouel disoit et respondoit a la gent que ce pesoit li et qu'il ne li voloit nul mal, et se Dieus li aidast et ses sains, que il ne voloit que nul mal li venist ne pourchasseroit. Et oÿ cis tesmoins qui parle que ce oÿ a pluseurs a gens qui li disoient. Requis de la bleceure Chavesnel, il dist qu'il n'en set riens, fors que la renoume ceur (sic) du segnieur de Waulaincourt, et plus n'en set.

Maistres Jehans Flamens, de Ribemont, tesmoins jurés, requis s'il apartient riens au segnieur de Foillouel ne a sa femme, ne a ses enfans, ne a Jehan Chavesnel, ne a sa femme, ne a ses enfans, il dist que non, ne ne tient riens d'iaus. Requis de la male volenté et du descort du segnieur de Foillouel et de Jehan Chavesnel et des menaces, il dist qu'il n'en set riens des menaces faire, mais il fu devant le baillu de Vermendois a Saint Quentin la ou Jehans Chavesniaus demandoit a estre asseuré du segnieur de Foillouel, et disoit qu'il i avoit bien raison pour coi, car il avoit salué le segnieur de Foillouel en le maison mon segnieur Perron de Vendueil, et li sires de Foillouel respondi que il ne le saluoit mie, car il ne l'amoit mie tant, et li avoit dit aveuc, si com cis Jehans Chavesniaus disoit, qu'il widast l'ostel et qu'il faisoit que faus quant il s'en batoit la u il estoit Et disoit encore que li sires de Foillouel avoit dit a 1 sergant Jehan Chavesnel qui demouroit a Cuerlu qu'il faisoit que faus quant il demouroit la en servige Jehan Chavesnel. Et par ces raisons demadoit Jehans Chavesniaus l'asseurement, car il disoit que li sires de Foillouel estoit bien si grans hom cui il devoit douter. Lors respondi li sires de Foillouel qu'il ne li demandoit nient, et que s'il li vaussist avoit fait mal, qu'il li eust fait piecha, et que s'il l'eust trouvé enmi les chans tout seul ne li eust il fait mal ne ne feroit s'il le trouvoit. Et dist qu'il avoit la pau de sen conseil et de ses amis, pour coi il requeroit au baillu qu'il li asseist jour par devant lui a l'assise de Chauni. Et la il en responderoit avenant. Lors li assist jour li baillus et li fist avoir en convent bon respit dusques a l'assise. Por coi cis Jehans peust requerre sen asseurement sans peril.

Au jour de l'assise de Chauni, li sires de Foillouel vint et ses consaus, et Jehans Chavesniaus qui requeroit a estre asseurés du segnieur de Foillouel par les raisons deseur dites. Lors dist li sires de Foillouel qu'il se conseilleroit et apela Adan Halot a sen conseil ? Lors dist li baillus de Vermendois que bien s'avisast Adans Halot, qui estoit hons le roi, que s'il aloit au consau le segnieur de Foillouel, que il ne seroit mie au jugement aveuc les houmes. Et respondi Adans qu'il n'iroit mie s'il desplaisoit le baillu. Et li baillus dist qu'il ne li desplaisoit mie ; mais il feist ce qu'il deust. Adonc dist li sires de Foillouel : Sire, ne m'enpeechiés mie men consseil. Et li baillus dist : Sire, non fa ge, mais je di ce que li rois et ses conssaus ont ordené. Et l'avoit ja dit li baillus, si comme il disoit, par 2 assises. Quant on se parti de cele assise, li sires de Foillouel s'en ala hors de Chauni, chis Jehans Chavesniaus poursui le baillu a sen hostel et li requist qu'il retenist le segnieur de Foillouel, car il n'avoit riens respondu a chose qu'il eust dit pour coi il se defaloit, pour coi il requeroit au baillu qu'il en fist ce qu'il devoit, par coi il fust asseurés du segnieur de Foillouel. Lors eut consau li baillus qu'il envoia querre le segnieur de Foillouel et le retint a Chauni.

Requis s'il set riens de la bleceure Jehan Chavesnel, il dist qu'il n'en set riens, fors ce que Jehans Chavesniaus li dist a Valencienes, la u il l'ala veoir, et que il li avoit dit que ce li avoit fait li sires de Waullaincourt, et dist que plus n'en set.

Wautiers de Tenailes, tesmoins jurés, requis s'il apartient riens as parties, il dist qu'il est fius de la cousine germainne Jehan Chavesnel. Requis de la male volenté et du descort Jehan Chavesnel et des menaces, et il dist que Jehans Chavesniaus li dist qu'il est alé a Saint Quentin au segnieur de Foillouel et qu'il le salua. Et il li respondi qu'il n'avoit cure de son salu et qu'il ne l'amoit pas et il li dist qu'il ne l'amoit pas, widiés mon hostel, et il li dist : Se je cuidasse que vous ne m'amissiez je n'i fusse pas venus. Et il li dist : Widiés mon hostel et si vous en alés. Et plus oï dire cis tesmoins a Jehan Chavesnel que on l'avoit gaitié au revenir de Peronne.

Requis de la bleceure Jehan Chavesnel, il dist qu'il avoit oÿ dire a Jehan Chavesnel que li sires de Waulaincourt li avoit fait, et vit cis tesmoins la plaie, et le vit en esperance qu'il cuidoit garir, mais menoisons le prist et s'en fist aporter a Ribemont en litiere. Et li mires li dist qu'il ne s'en meteroit ja plus et qu'il ne meteroit ja main. Et dist qu'il n'en set plus.

Jehans de Barllues, tesmoins jurés, requis s'il apartient de riens au seigneur de Foillouel ne a sa femme ne a ses enfanz, ne a Jehan Chavesnel aussi, il dist que non. Requis de la male volenté du segneur de Foillouel et de Jehan Chavesnel, et des menaces, il dist qu'il n'en set riens et dist qu'il ne fu onques en lui la u il oïst dire au segneur de Foillouel nul mal de Jehan Chavesnel, et a esté en pluseurs lius la u il a mout homiere et dist qu'il ne set, fors que li sires de Foillouel se tenoit au mau paiés de letres qu'il tenoit de lui et qu'il ne li voloit rendre, et plus n'en set. Requis s'il set riens de la bleceure Jehan Chavesnel, et qui la fist, il dist qu'il n'en set riens, fors que pluseurs gens dient que ce a fait le sire de Waullaincourt. Et plus n'en set.

Mesires Jehans de Raincourt, chevaliers, tesmoins jurés, requis s'il apartient de riens au segnieur de Foillouel ne a Jehan Chavesnel, ne a leur femmes, ne a leurs enfans, il dist qu'il fu cousins germains le pere le segneur de Foillouel. Requis s'il set de la male volenté et du descort le segnieur de Foillouel et de Jehan Chavesnel, ne des menaces, il dist que 1 vallés au segnieur de Foll. vint a Peronne et apela ce tesmoing qui parole et li dit qu'il voloit parler a Jehan Chavesnel et qu'il venist aveuc li et qu'il voloit qu'il fust as paroles, et li dist que 200 l. qu'il devoit metre en manoir de Cuerllu pour le manoir refaire, que il s'esmerveilloit mout de ce qu'il ne les i avoit mis et qu'il lies i devoit metre par la convenance d'iaus 2. Et adonc respondi Jehans Chavesniaus : Je m'esmervau mout de ce que li sires de Foillouel me mande tes paroles, et se je savoie ou il seroit et ou il eust de ses amis, je li offreroie tant qu'il s'entenrroit bien a paiés. Et il li dist qu'il seroit a Saint Quentin a 1 jour qu'i li nouma. Et Jehans Chavesnel vint a Saint Quentin en le maison mon segnieur Perron de Vendueil ou il vint aveuc gens qui avoient afaire au seignieur de Foillouel. Et salua le segnieur de Foillouel, et il li dist : Je ne vous salu mie. Et il li dit : pour ce que je ne vous ainme mie tant. Et il li dit : Si je seusse ce, je n'i fusse pas venus ici. Ge m'en irai. Et il li dit : Alés, que biau m'est. Et apres il demanda asseurement devant le prevost et dit qu'il n'estoit ne son couchant, ne son levant et qu'il ne li avoit mesfait par coi il le deust asseurer, ne s'il l'encont lui centime ne li feroit il nul mal, et qu'il avoit grant peril en asseurement et en lui asseurer pour ce c'estoit 1 mal houme qui l'en porroit bien grever. Le baillu l'ajourna a Chauni si comme il oÿ dire et a ce jour qu'i fu a Chauni i fu cis tesmoins qui parole. Et oy qu'il demanda asseurement du segneur de Foillouel par les paroles qu'il avoit dites a Saint Quentin, et li baillus li dist qu'il renspondi (sic), et il dist qu'il se conseilleroit, et apela Adan Halot a son conseil, et li baillus li deffendi qu'il n'i alast mie, qu'il estoit hom le roi, et qu'il devoit estre au jugier, et il dist : Comment responderoie sans mon conseille, il n'i doit avoir aseurement, je ne l'ai mie menacié, ne je ne li ne veil nul ma, et se je l'encontroie enmi les chans ne li feroie je rien. Et demoura le segnieur de Foillouel en la prison le roi longement, ne ne fist pas l'asseurement. Et dist cis tesmoins qui parle par son serement qu'il fu la u li sires de Foillouel pria et kemanda et deffendi au segnieur de Waullaincourt7 qu'il ne feist nul mal a Jehan Chavesnel, si chier comme il avoit son cors ne s'onneur. Il dist que non feroit il.

Requis de la plaie Jehan Chavesnel, il dist qu'il n'en set riens, fors tant qu'il oÿ dire que ce avoit fait li sires Waullaincourt, et oÿ dire qu'il avoit oÿ dire as gens quil (sic) l'avoient veue qu'il dissent qu'il ne morut mie de la plaie, car il avoit menoison. Requis s'il en set plus, il dist que non.

Pierres Saimiaus, prevos de Peronne, juré et requis seur les choses devant dites, dit en sen serement que il ne set mie que me sire Jehans de Folouel menachast onques ne deffiast Jehan Chavesnel ne que il li pourçachast onques mal. Mais il dit que, puis que Chavesniaus eut acaté au segneur de Falouel se terre de Quellu a se vie, il avint que Chavesniaus vaut esploitier les chisnes qui es iaus de Quellu estoient et les vaut prendre en chés iaues comme les siens pour le raison de le terre de Quellu et des apendances que il avoit a se vie, si comme il disoit que tel chisne estoient apelé comme iretages de terre, par quoi il apartenoient a lui, et les voloit avoir. Li sires de Folouel disoit encontre que ches chisnes ne devoit mie avoir Chavesniaus, ains estoient sien et a lui apartenoient, kar che estoient si oisel, et estoit muebles et cateus a lui, kar il les pooit tuer se il li plaisoit, ou vendre, ou oster de ses iaues toutes les fois que il li plaisoit, ne il ne tenoient a fous ne a mehine, par quoi il disoit que a lui apartemoient chil chisne et non a Chavesnel. Et eut debat de chis chisnes entre le segneur de Folouel et Chacesnel, et a bien 2 ans ou plus, si comme chis tesmoins dit, et comme il li sanle que chieus debas mut entre aus et pour le debat d'aus, chieus tesmoins, comme justiche de par le roi, prist ches chisnes en le main le roi, pour oster le debat, et asingna jour au segneur de Folouel et a Chavesnel seur le debat de ches chisnes par devant lui a Peronne, pour ce que Quellus et les iaues de Quellu sont et estoient de la prevosté de Peronne et aparurent les parties par devant lui en droit en le premerainne journee, et demanda Chavesniaus ches chisnes par ses raisons et li sires de Folouel les demandoit par les sienes, et sanloit par aparision de sanlant et de paller, que li sires de Folouel fu dalans de cele besongne, mais onques manaches ne paroles de manaches il n'i dist que chieus temoins oist, et pour che que la cause ne se termina mie en chelui journee, chieus tesmoins, comme justiche, leur assingna 1 autre jour a revenir par devant lui, et venirent et palla li sires de Falouel a chest temongnage a conselg et li dist que mout se doloit de Chavesnel qui ainsi le contralioit de ses chisnes et mout se mervegleit pour coi il le faisoit, et li dist que auvec che que il li debatait ses chisnes sans raison il li faisoit mout grant damage et vilenie, kar il, par droite convenanche d'aus deus, devoit metre une grande comme d'argent en amender le manoir de Quellu et en retenir le se vie, et l'en avoit requis et fait requerre que il le fesist et faire ne le voloit, dont il li faisoit mout grant damage et vilenie. Si requist a lui qui parole, pour Dieu, que il li vausist warder se raison. Et apres che, en chele journee, si comme chieus temoins se recorde, Chavesniaus vint a lui devant les plais et li dist que auvec les chisnes de Quellu que li sires de Folouel li enpeequoit a tort, il li enpeequoit ausi les rentes de le vile de Quellu, par quoi il ne pooit goïr. Si requist a lui qui parole que il li fesist les rentes delivrer et le marquié de Quellu, si comme le letre le roi que il en avoit le tesmongnoit. Et adonc il qui parole dist a Chavesnel que il, pour Dieu et pour lui, mesist conselg que chil debat de lui et dou segneur de Folouel fussent acordé, et bien le deveroit voloir si comme il li disoit, kar il avoit tous jours esté mout privez dou segneur de Folouel, et mout l'avoit creu li sires de Folouel, et mout avoit waagnié a lui, et li avoit fait mout grant marquié de son hiretage, si comme on disoit, pour quoi il en devoit estre plus courtois et plus traitaules vers le segneur de Folouel et meesmement li chisne ne valoient mie mout, dont il se debatoient. Et avec che chis tesmoins li dist que li sires de Folouel se doloit mout de lui de che que il devoit par leurs convenenches metre une chertaine somme d'argent en sen manoir de Quellu retenir, et il ne le voloit faire, ains en perdoit li manoirs. Pour quoi il faisoit mal se il estoit ainsi, si li monstra chieus temoins, si comme il dist, que il de ches choses vausist tant faire que il ne fust blasmés, et que le concorde se peüst faire entre lui et le segneur de Folouel. Et dist que Chavesniaus li respondi adonc que es chisnes avoit il raison et droit, si comme il li sanloit et le querroit et pourçacheroit ; et se li chisne li estoient delivré par se raison, et li sires de Folouel le voloit prier adont des chisnes, il en feroit tant qu'il l'en deveroit savoir gré. Et li dist encore Chavesniaus que a lui doroit il bien en conselg le verité de retenir le manoir, et li connut que il avoit eu convent hors letres au segneur de Folouel de metre une chertaine somme de deniers en retenir et ratourner le manoir de Quellu, et bien connut que li sires de Falouel l'en avoit requis et fait requerre de che faire, mais il dist a lui que il n'en avoit talent dou fare le, ne il ne le feroit mie, kar li sires de Falouel li fesoit grief et damage d'autre chose, par quoi il encontre che retenroit che dou sien. Et il qui parole li dist adonc, si comme il dit, que che n'estoit mie bon, et pour Dieu il li pria que il vausist metre se volenté a faire le concorde, mais Chavesniaus n'en vaut autre chose faire, ains ralerent li sires de Folouel et Chavesniaus par devant lui pour poursievir leur querele. Et ne se fina mie la querele encore en chelui jour, ains leur asist il qui parole autre journee. Et fu puis ceus jours dou plait que Chavesniaus se defali d'aparoir et en demanda li sires de Folouel a avoir pourfit de chele defaute. Et puis aparut Chavesniaus et li sires de Folouel se defali et demanda Chavesniaus pourfit de le defaute le segneur de Falouel. Et dit a lui qui parole que il, en le journee de devant ou il n'estoit mie venus, il n'avoit osé pour le segneur de Folouel qui waitié l'avoit ou fait waitier pour lui faire vilenie, si comme on li avoit dit, mais il qui parole ne seut rien de che wait. Et en chelui jour il qui parole ne delivra mie encore le besongne, ains rasingna jour et le fist savoir au segneur de Folouel que il se cause poursievist se il li plaisoit. Mais puis li sires de Folouel n'i vint ains se mist en defautes pluzeurs, mais tous jours si aparoit Chavesniaus et as jours ou il venoit la, il i venoit a plenté de gent et armes, si comme il qui parole oï dire plureurs fois, mais il ne le vit onques armé, mais il vit 1 grant cheval awec lui par plureurs fois que il faisoit mener apres lui, et li i vit auqunes fois 5 persones ou plus qui il ne connut, qui awec lui estoient et chevauchoient, et li disoit Chavesniaus que ainsi le faisoit aler li sires de Folouel, et que il, pour le doute de lui qui menachié l'avoit, n'osoit aler seus. Mais il qui parole ne set rien des manaches. Et poursievi Chavesniaus se querele par tant de jours par devant lui qui parole, et li sires de Falouel se defali tant que il qui parole, par les hommes le roi de la court de Perone, osta se main des chisnes et les delivra a Chavesnel. Et puis vint Chavesniaus a lui qui parole, et li dist que il n'osoit mie bien seurement repairrer a Quellu pour le doute dou segneur de Falouel, et dist que 1 hom de Quellu qui a non Fauvains, qui il avoit mis la pour warder ses choses, n'osoit demourer la, ne prendre warde a ses besognes, pour le segneur de Folouel. Et manda il qui parole chelui Fauvel, mais il ne li tesmoigna nules manaches que on li eust faites, mais il li dist bien que il de che se se melloit a emis pour Chavesnel, pour le doute que li sires de Folouel, qui se sires estoit et est, ne l'en seüst mal gré. Et adonc il qui parole li dist que seurement wardast en faisant raison, kar il n'avoit warde de mal. Et puis, che plait fine, et en tant comme il dura il qui parole oï dire par plureurs fois a plureurs persones dont il ne se recorde et a Chavesnel meesmes que li sires de Folouel li voloit mal et que il avoit esté espiés et waitiés pour lui mal faire de mon segneur Mahieu de Waullaincourt, et li dist on a lui qui parole, mais il ne set qui, que auqunes fois, chieus me sire Mahieus et autre avoient esté pour waitier Chavesnel a Maurepast en le maison mon segneur Simon de Folouel, frere mon segneur Jehan de Folouel, mais il qui parole dit en sen serement que de ches wais il n'en set rien, fors par l'oïr dire, et dit que pour che que il ooit ains dire que li sires de Falouel voloit mal a Chavesnel il fist savoir par unes letres a Martin de Ribemont que il en avisast Chavesnel, par quoi il se presist warde de lui.

Et dist que puis il ne seüt rien de chelui debat et peu vit Chavesnel reparrier vers Quellu, mais il dit que a le Pentecouste nouvelement passee il estoit a Amiens, et si i estoit li rois. Vint adont renonmee a le court et au roi que Chavesniaus estoit mout navrés, si que on quidoit que il deust morir, et gisoit vers Valenchiennes, et disoit le renonmee que che li avoit fait me sire Jehans de Waullaincourt, et disoient auqun que il quidoient que che fust par le pourkas dou segneur de Falouel. Et pour aprendre de che fait, li rois quemanda que on i envoiast, et fu dit de par le roi et quemandé a lui qui parole que il alast aprendre de chelui fait. Et l'en fu baillié la letre le roi. Et pour chertainement aler avant, il qui parole ala a Valenchiennes, ou Chavesniaus gisoit, et li demanda dou fait, et Chavesniaus li dist que il estoit mout blechiés, et li monstra sa plaie, droit seur sen front, haut, et dist que une grande pieche de sen test li estoit ostee et le vit il qui parole, kar li maistres li monstra, et il qui parole li demanda comment il se sentoit, et il li respondi que il se sentoit bien et que il n'avoit warde, si comme il quidoit et si comme ses maistres li avoit dit. Et dist adont que il s'en iroit hardiement et s'en porroit bien aler en sen païs, mais il n'osoit pour le doute dou segneur de Waulaincourt, qui le waitoit, si comme on li avoit dit, pour lui ochire, et mout estoit dolans, si comme on li avoit dit que il ne l'avoit ochis, mais il qui parole de che ne set rien, fors si comme Chavesniaus li dist. Et dit encore chieus temoins que li surgiens qui entour Chavesnel estoit dist a lui qui parole que Chavesniaus, si comme il li estoit avis, n'avoit warde de mort, ains estoit en bon point et tous vigereus. Et il qui parole dist de tant comme en lui en est, que Chavesniaus estoit adont tout vigereus, et ausi comme waris, ne il plus vigereusement ne plus apertement ne le vit onques paller que il faisoit adont. Et estoit vestus et couchiés, et fu entour 15 jours apres Pentecouste que il qui parole fu a Valenchiennes a Chavesnel, si comme il li sanle. Et bien li dist Chavesniaus que li sires de Waulaincourt li avoit che fait, lui dousime ou li tresime, tout armé, entre Valenchiennes et Fontenele l'Abeie. Et il qui parole li demanda se li sires de Falouel i avoit esté, mais Chavesniaus li dit bien que non, mais il i connut, che dist, 1 frere le segneur de Waullaincourt qui est clers, et 1 neveu mon segneur Alart de Honecourt, qui il ne savoit nommer, et 1 esquier qui a non Grans, sires de Houdaing. Et dist Chavesniaus a lui que Gobers de Bantousel et Bauduins li Maires de Mares et Rogerés, freres Jehan de Grangies, et Tassins Diron estoient avec lui Chavesnel et en se compagnie et bien virent le fait. Et dit chis temoins que Chavesniaus li dist a Valenchiennes que quant mesire Jehans de Waullaincourt le tenoit pour lui vilener, si comme il fist, que il crioit merchi et li disoit que il a lui n'avoit onques eu contens ne descort que il seust. Et se rien li avoit meffait, il li adrecheroit volentiers, et me sire Jehans de Waulaincourt li respondoit, si comme il dist, que il li avoit meffait et fait despit et a sen lingnage, en tant comme il avoit dit vilenie de lui et aathi a lui avoit, et dit que pour lui ne l'aroit a quiter se raison, et et que il se cheviroit de lui, et avec che, il li disoit que il en sen despit estoit alés armés a Valenchiennes, et pour ches despis que il li avoit fais, il li dist que il l'atourneroit tel que il ne diroit jamais vilenie de gentilg homme, ne feroit, que il ne l'en sousvenist, et il Chavesniaus li escondisoit tous jours tant comme il pooit, mais che ne li valut rien que il ne le navrast, si comme il estoit navrés. Et dist Chavesniaus a lui qui parole, que il creoit que che li eust fait faire li sires de Folouel pour les debas que il avoit eus vers lui, dont il ne peut onques estre aseurés, tout l'eust il bien requis, et li dist que pour che que li sires de Folouel ne le vaut aseurer, li baillieus de Vermendois l'en retint en prison, et pourçacha li sires de Falouel se delivranche, et fu delivrés par le roi en 1 semmedi et li fais du fais le lundi prochain apres et par le neveu le segneur de Folouel, si comme il disoit. Pour quoi il dist a lui qui parole, que il croit que che li avint par le segneur de Folouel. . Et dist qu'il n'en set plus.

Bertemus de Tenailes, tesmoins jurés, requis s'il apartient de riens au segnieur de Foillouel ne a sa femme ne a ses enfans, il dist que non, mais il dit qu'il est fius de la cousine germainne Jehan Chavesnel.

Requis s'il set riens de la male volenté et du descort du segnieur de Foillouel et de Jehan Chavesnel, et de menaces, il dist que des menaces ne set, mais il dist qu'il i avoit 1 descort entre iaus des cisnes du vivier de Cuerlu, et dist cis tesmoins que il fu aveuc Jehan Chavesnel et qu'il li oÿ dire pluseurs fois qu'il se doutoit de li. Requis pour coi il le dit, il dist que c'estoit pour les cisnes de ce vivier. Et apres cis tesmoins oÿ dire a mon segneur Jehan de le Heri que il avoit esté a Saint Quentin en le meson mon segneur Perron de Vendueil ou Jehan Chavesnel salua le segneur de Foillouel, et li sires de Foillouel li dit qu'il ne le saluoit mie, et il li demanda pour coi, et il li dit qu'il ne l'amoit mie tant qu'il le saluast et il li dist que s'il seust ce, il n'i fust pas venus. Et li sires de Foillouel dist : Se vous en alés se vous volés8 et widiés l'ostel. Et ensi dist cis tesmoins que il l'oy dire au segneur de Le Heri et plus n'en set.

Requis s'il savoit de la plaie, qui l'avoit fait a Jehan Chavesnel, il dit qu'oit alé veoir Jehan Chavesnel a Valencienes et lidit Jehans que li sires de Waullaincourt l'avoit blecié. Et li dirent aussi les gens a Chavesnel qu'il l'avoit blecié. Et oÿ dire cis tesmoins au mire qui l'avoit gardé a Valencienes qu'il se confortoit mout bien de la garison et qu'il cuidoit mout bien garir, mais il le vit puis a Ribemont et dist qu'il avoit menoison et qu'il se morot et que li cerviaus li chaoit ja de la plaie, si comme il oÿ dire. Requis s'il en savoit plus, il dist que non.

Adans Halos, tesmoins jurés, requis s'il apartient de riens au segnieur de Foillouel ne a sa femme, ne a ses enfans, ne a Jehan Chavesnel aussi, il dist que non, mais dist qu'il est tenus au segnieur de Foillouel par le bienfait qu'il li a fait. Requis de la male volenté du segneur de Foillouel et de Jehan Chavesnel, ne s'il set riens des menaces, il dit qu'il oÿ dire le segnieur de Foillouel et Jehan Chavesnel que a Saint Quentin avoit Jehans salué le segneur de Foillouel, et li sires de Foillouel avoit dit qu'il ne le saluoit mie. Jehans dit : Pour coi ? Il respondi : Pour ce que je ne vous aime mie tant. Et Jehans dist : Sire, se je seüsse tel, je ne me fusse mie ci enbatus, si m'en irai. Li sires de Foillouel respondi : De par Diu. Puis la, dist Jehans audit tesmoing par pluseurs fois que il se doutoit du segneur de Foillouel et se fust la fais asseurer de lui si peust, et fesist encore volentiers. Et pria cis Jehans a ce tesmoing que il mesist painne de lui apaisier vers le segnieur de Foillouel. Cis tesmoins mist sus au segnieur de Foillouel en lui blasmant que il li estoit grans hontes et grans blasmes de ce que il voloit mal a Jehan Chavesnel. Li sires de Foillouel respondi que il ne li vaurroit mal faire ne pourchasier a son cors, mais mau gré li savoit de ce que il qui avoit esté a sen conseil si longement estoit si aigres envers lui de plaidier de sen tort, et s'il le trouvast enmi ses bos de Foillouel, qu'il ne li fesist nul mal, mais folie estoit de Jehan qui armés chevauchoit pour le segnieur de Foillouel, si com Jehans disoit. Et eust creu li sires de Foillouel ce tesmoing de apaisier le descort de Jehans vaussist estre venus au segnieur de Foillouel. Et dist cis tesmoins que plusieurs des amis Jehan et des amis le segnieur de Foillouel li disent que il blamast Jehan de ce qu'il chevauchoit armés, et qu'il disoit que c'estoit pour le segnieur de Foillouel, car c'estoit despis as amis le segnieur de Foillouel et merveille quant despis n'en estoit fait a Jehan, mais qu'il disoient que li sires de Foillouel disoit qu'il ne voloit a Jehan nul mal. Apres avint que il fu raporté au segnieur de Foillouel a 1 lundi au soir a Condren que Jehans avoit enpris a venir a armes a Chauni le mardi suiant. Li sires de Foillouel semont et manda de la gent a armes ce qu'il en peut avoir et issi de Condren s'espee chainte, sans autres armures, et fist faire pluseurs wais pour Jehan penrre et arrester et despit faire s'il peüst, s'il avenist que Jehans venist par la a armes. Et dist li sires de Foillouel a ce tesmoing que se Jehans venist seus, 1 escuier aveuc li ou deus sans armes, qu'il ne li vaussist faire mal ne despit. Jehans ne passa mie adont, mais cis tesmoins oÿ dire le segnieur de Foillouel que ses niés li sires de Waulaincourt avoit ledit Jehan waitié a Peronne, et s'avisa li sires de Foillouel que grans maus et grans prins pooit venir a s'ame de ceste besoingne, si manda le segnieur de Waulaincourt et li dit en consseil : Biaus niés, vous m'avés aucune fois oÿ parler courchié de Jehan paroles par coi vous poiés entendre que je vausisse que despis li venist du cors. Je vous pri et requier par le foi et par le lingnage que vous avés a moi et par le loiauté qui est et doit estre en vous que vous ne faciés ne ne pourchaciés mal a Jehan, car je n'averoie jamais pais de cuer ne de conciensse se Jehans avoit mal de cors pour l'ocoison de mi. Adont respondi li sires de Waullaincourt que a grant painne estoit il osés venus parler au segnieur de Foillouel de hontes de ce qu'il n'avoit Jehan tué ou affolé pour ce que Jehans s'estoit vantés que il chevauchoit armé pour le segneur de Foillouel. Adont pria li sires de Foillouel tant a mains jointes et si de cuer com loiautés puet porter, si com cis tesmoins l'oÿ pluseurs fois jurer le segnieur de Foillouel en la vie et en la santé Jehan, car Jehans prioit souvent ces tesmoing que il apaisast au segneur de Foillouel, et metoit cis tesmoins sus au segnieur de Foillouel que il voloit mal Jehan et que il avoit tort, et li sires de Foillouel respondoit ce qui est ci deseure escrit, et le trouvoit prest d'apaisier et de croire ledit tesmoing et autrui se Jehans vaussist venir a lui et offrir raison. Apres avint que Jehans fist ajourner le segnieur de Foillouel a l'assise a Chauni pour avoir asseurement et fist sa demande. Li sires de Foillouel ala a sen conseil et apela ledit tesmoing. Li baillus dist que hons li roi qui aloit a consseil ne devoit estre a jugement. Cis tesmoins dit que encontre la deffensse le roi n'iroit il. Li baillus dit qu'il ne li kemandoit ne deffendoit. Li sires de Foillouel li requist qu'il li envoiast ce temoing qui parole, et pour ce que il ne le peut avoir, il ne respondi mie et fu retenus. Et dist li baillus et kemanda au segneur de Foillouel que il ne mespresist vers Jehan seur quanques il pooit faire. Et cist cis tesmoins que avant que li sires de Foillouel fust querelés de par la gent le roi de la mort de Jehan, il li oÿ pluseurs fois dire que il n'avoit parlé ne fait parlé au segnieur de Waulaincourt puis les dairainnes paroles que li sires de Waullaincourt li avoit eu convenant loiaument que il ne pourchasseroit mal a Jehan. Requis s'il en set plus, il dist que non. Et dist encore cis tesmoins que il blasma Jehan pluseurs fois de ce que il disoit qu'il chevauchoit armés pour le segnieur de Foillouel. Et Jehans disoit que il connissoit bien sa desloiauté et sa mauvaisté, et disoit que se il recevoit damage de par le segneur de Foillouel que il li seroient rendu du segnieur de Foillouel, vaussist ou non. Et disoit que il vausist que Dius ne rois ne contes ne se mellaist de lui du segnieur de Foillouel et qu'il en varroit bien a chief. Requis de la plaie et de la bleceure Jehan Chavesnel, il dist que pluseurs disent que ce a fait li sires de Waullaincourt, et plus n'en set.

C'est la verité de la complainte que Jehans Kaverniaus fist par devant lou bailli a Saint Quentin sus lou seignor de Foilluel pour avoir asseurement de lui. Lidiz Jehans en la presence dou doien de Saint Quentin, mon seignor Guillaume d'Orliens, chanoine de Saint Quentin, et lou prevost requist a havoir loudit asseurement pour ce qu'il l'avoit menacié et mandees plusors menaces. Li diz sires de Foillouel dist qu'il ne savoit pour quoi il estoit mandez et requist jour a respondre sus la requeste doudit Jehan, comme cil qui n'estoit adjornez ne n'avoit illuec point de conseil. Li baillis li donna et mist lou jour aus parties a l'assise de Chauni apres pruchiennement venant. Et li diz sires donna a Kaverniau estenances juques apres ladite assise. A laquele assise, les parties furent presentes, et dist Kaverniaus ses reisons pour quoi il demandoit a havoir son asseurement. Li sires de Foillouel dist qu'il se conseilleroit et apela lou doien de Saint Quentin, mon seigneur Jehan de Ramicourt a son consoil et Adan Halot, homme de Chauni avecques. Li baillis respondi que bien se gardast que se hons de la court aloit a nul consoil, il ne serroit mie du consoil des autres hommes sus les paroles ne sus les quereles dont il auroit esté au consoil. Adonc dist Adan : Gie sus hons de ceanz, gie n'irai mie. Li sires de Foillouel requist au bailli qu'il li commandast a aler a son consoil. Li baillis respondi que non feroit, mes s'il cuidoit que bien fust, bien i alast, mes s'il i aloit, il ne jugeroit mie avec les autres, quar li rois l'avoit desfendu, et bien leur avoit dit aus 2 assises devant passees lidiz baillis. Seur ce lidiz sires respondi quant il ne poeit avoir9 loudit Adan a son consoil il n'iroit plus avant, meesment comme il l'eust la mené pour estre a son consoil. Apres ces choses, Kaverniaus se leva et offri audit seignor : Sire, vieilliez moi jour assener en sauf conduit par devant vous et vos amis, et se vous volez dire10 en quoi gie vous aie riens mesfait, tant respondre que a nous et a aus devra soufire. Mes adés respondoit li diz sires : Gie ne li demans rien. Seur ce, les assises passees, li sires de Foillouel li doiens de Saint Quentin, messires Jehans de Ramicourt, Adan Haloz et Odarz, sergenz doudit seignor, vindrent a l'ostel dou bailli pour ceste besoigne. Li baillis dist au seignor : Sires, vous feites mal dont vous vous partez ainsit quar il est moult haiz, et qui que lou grevast, il lou metroit sus vous. Au mains collez un jour par devant vos amis, si vous partiroiz plus seurement. Li sires respondi : Gie ne li demans riens. Seur ce li diz sires demora a Chauni ne asseurer ne lou vost ne respondre autrement. Apres il envoia au roi pour sa delivrance. Le rois escrit au bailli pour la delivrance s'il n'i avoit reison pour quoi li baillis envoia a la court pour quoi il lou tenoit aveques lou sergent audit seignor. La court envoia au balli et li manda qu'il oïst les resons doudit seignor, et soufrist que Adanz Aloz fust a son consoil. Il li otroia bien ausit comme il avoit touz jourz fait, et oufri au mesaige doudit seignor a Laon par devant lou tresorier de Laon qu'il lou deliverroit moult volentiers, mes qu'il donnast un respit ou atenances audit Kaverniau, pour quoi il poist seurement venir par devant lou bailli et les hommes. Il sembla au tresorier que ce estoit assez pour oster les perilz. Li sergenz doudit seignor li porta ces paroles, mes il n'en voust riens faire, einchois renvoia a la court qui li rescrist qu'il delivrast loudit seignor et li commandast sus quant que il poist mesfere, qu'il ne mesfeist audit Kavernel ne aus sien ne par lui ne par les siens. En ceste maniere li baillis lou fist delivrer par lou prevost de Chauni. Seur ce, assez tost, il fu bleciez au revenir de Haynau. Et dit on communement que mes sires Jehans de Walaincourt lou fist, et c'est quant que li baillis en seit, que il en ha autre foiz recordé, present lou roi et lou consoil, sit comme il doit.

Pieres de Vendeul, diens de Saint Quentin, requis par sen sairement, dit qe a une journee qe Jehans Cavesniaus vint a lui au moustier mon seigneur Saint Quentin, et li dist q'i se plaing noit mout durement deu seigneur de Follouel, et dit Jehans : Jou estoie alés en vo maison et saluai mon seigneur de Follouel vo cousin. Il dit qe ce ne di jou mie a vous. Cil Jehan demanda pour coi : Pour çou, fist il, qe je ne vous ainme mie tant. Dont respondi cis Jehans : Dont m'en pois il quant je sui entrés en l'ostel vo cousin et le vostre. Et li dit le diens : Jehan, je cuidoie qe vous fuissiés plus saiges que vous n'estes qui vous estes coureciés de teis paroles qe li sires de Follouel vous a dites, et miex le deussiés connoistre que vous ne faites. Or en venez aveuc moi, je meteroie quant j'arai parlet a lui qi vous pardonera son mautalent, qe saciés vraiment qe je le connois de tant qu'il s'est ore repentis de chou qu'i vous a dit. Adont respondi au dien cis Jehans q'en toutes fins il voloit estre asseurés de lui et li diens li dit : Jehan, vous estes uns saiges hons ; se vous aviés autant dit a un autre conme il vous a dit, vous deffenderiés bien q'i n'aferroit mie asseurement en teis paroles, car vous ne dites mie q'i vous vausist mal deu cors, ni ne convient mie qe on pourçache mal a tous ciaus qe on n'ainme mie. Adont s'en ala li diens en sen hostel et dit au seigneur de Follouel : Sire, pour coi avés vous dit teis paroles a Jehan Cavennel qui vous a si grant tans servi ? Saciés vous, en serés blamés de tous ciaus qi l'orront dire et de ciaus qui vous ameront. Dont respondi li sires de Follouel : Certes ce poise mi quant je li ai dit, mais jou estoie meus de ce q'il me voloit tolir le mien, car il ne me voloit rendre lettres q'il avoit de mi la ou jou estoie oblegiés envers lui, desqueles ses grés en avoit esté fais. Et saiciés pour cose qe jou li aie dit je ne li feroie mal de sen cors ne li feroie faire. Adont s'en vint il au moustier oïr messe et i vint Jehans par devant le provost de Saint Quentin et le dien et seigneur Robert Pourcelet et autre bonne gent. Et requist derechief a avoir aseurement ne ne s'en vaust souffrir pour le priere deu dien et deu provost et de seigneur Robert Pourcelet. Adont respondi li sires de Follouel q'il n'estoit mie tenus a respondre a le requeste qe li provos li faisoit de par celui Jehan, car il n'estoit mie ses justichaules ne de le provosté de Saint Quentin. Or il avint qe li baillieus vint apres chou une pieche a Saint Quentin et estoit li sires de Follouel de recief en le maison le dien, et fu mandés par devant le baillieu, et requist autre fois a avoir asseurement deu seigneur de Follouel. Cis sires respondi q'i n'estoit mie la tenus a respondre, car il n'estoit ne semons ne ajournés, ne n'estoit mie de cele castelerie ne maiement il ne li voloit nul mal. Adont fist li baillieus doner une astinance dou seigneur de Follouel a celui Jehan dusqes a un jour apres l'asise a Chauni et i asist jour as parties, et vinrent les parties a l'asise a Chauni. Et requist de rekief Jehans a avoir asseurement deu seigneur de Follouel. Li sires de Follouel dit q'il s'en conselleroit, et apela Adan Halot qi estoit de sen conseill, et cis Jehans le debati et dit qu'il estoit hons de la court, se ne voloit mie q'i fust a sen conseill pour chou q'il seroit a juchier la querele. Adont dit li baillieus qe se nus hons de la court aloit a conseill de partie, q'il ne seroit mie a juchier la querele pour cui il seroit au conseill. Adont dit Adans au baillieu : Sire, si vous plaisoit, je iroie au conseill mon seigneur de Follouel, car je i sui tenus par men sairement. Bien me plaist, dist li baillieus, se vous cuidiés que bien soit, mais vous ne serés mie a juchier la querele, car je l'ai commandé de par le roy ja a deus asises passees. Adont respondi li sires de Foillouel : Sire, puis q'en si est, qe je ne puis avoir men conseill je demourai en vo prison tant com il vous plaira et tant qe j'arai plus de conseill. Et, sire, je me mervell pour coi je l'aseuroie, qe je ne li vauroie nul mal de sen cors ne saiciés se je l'encontroie en mi les cans tout seul je ne li feroie nul mal. Adont demoura li sires de Follouel tant que l'assise fu passee.

Et quant li baillieus fu alés en sen hostel, li diens et Adans Halos et me sires Jehans de Ramicourt le suirent a sen hostel, et li requisent qe pour Dieu q'i vausist metre conseill en ceste besoigne, qe ele se passast plus debonairement selonc chou q'il veoit qe li sires de Follouel ne voloit nul mal a celui Jehan. Li baillieus fist adont apeler le seigneur de Follouel et li dit par devant iaus en bele maniere qe c'estoit mout grant prieus de demourer en tel debat envers tel honme q'i cuidoit q'i fu haïs de mout de gens de teis q'il le vaudroient avoir ocis. Et se aucuns li mefaisoit seur ces paroles, ne douteroie q'il ne vous fust demandé. Et li sires de Follouel respondi qe tant i avoit il plus de prill a faire l'aseurement. Et quant li diens vit chou, il traist a conseill au baillieu entre lui et Adan Halot, et li dit li diens : Sire, si vous sanloit que ce fu bon je parleroie ou feroie parler a Jehan par coi il venist a une journee aveuc mi et en men conduit la ou li sires de Follouel seroit, et offrist, s'il avoit de riens mespris envers le seigneur de Follouel ne encontre se droiture, q'il l'amendast par deus de ses amis ou par autre bonne gent, il li feroit se pais au segneur de Follouel, par coi il feroit ses bons amis. Li baillieus grea bien ces paroles et s'en partirent li diens et Adans Halos seur chou, et ala Adans Halos a le requeste deu dien parler a Jehan seur ces paroles, et ne trova mie cis Adans que Jehans en vausist riens faire pour le priere le dien. Suer chou li diens et Adans s'en departirent et demoura li sires de Follouel en le prison le roy devers le baillieu.

Quant li abbés de Saint Quentin en Isle eut juré in verbo Domini comme prestres, et se main seur son pis, il fu requis des gens le roi que il desist voir a sen essiant d'endroit chou que on li demanderoit.

Premierement on li demanda se il apartenoit riens de linage au segneur de Foillouel ne a Jehan Chavennel. Li abbés respondi seur sen sairement que il n'avoit ne parage ne linage entre iaus et lui. Apres on demanda l'abbé se il oï onkes ne ne seut que li sires de Foillouel eust manechié Jehan Chavenel ne fait manechier. Li abbés respondi seur sen sairement que il ne seut onques que li sires de Foillouel l'eust manechié ne fait manechier, mais tant dist li abbés que il avoit bien oï dire que li sires de Foillouel n'estoient mie si esclatiers envers Jehan Chavennel pour aucuns plais et pour aucuns descors de chinnes et de letres que Jehans Chavenniaus retenoit encontre le volenté dou segneur de Foillouel, si comme li sires de Foillouel disoit, comme il avoit esté aucunes fiés. Et dist li abbés apres toutes ces coses que 1 jour qui passa, Jehans Chavenniaus estoit malades et deshaitiés a Ribemont et manda Jehans Chavenniaus l'abbé, par un sien neveu, que li abbés par amours et par amistés vausist venir parler a lui a Ribemont, car il alast parler a lui a Saint Quentin se il ne fust malades et deshaitiés. Li abbés ala a Ribemont parler a Jehan Chavennel, et quant li abbés fu venus a Ribemont par devant le lit ou Jehans gisoit deshaitiés, Jehans pria et requist a l'abbé que li abbés se vausist travellier tant pour l'amour de lui que il alast parler au segneur de Foillouel et dire et requerre de par Jehan que li sires de Foillouel vausist prendre 1 jour certain a Condren ou a Foillouel, ou a Saint Quentin, ou ailleurs ou il li plairoit, et que li sires de Foillouel vausist que Jehans peust venir par devant lui, sauf alant et sauf venant, et Jehans diroit et feroit tant envers le segneur de Foillouel que il demouroit et seroit ses bons amis. Li abbés otria a Jehan que il diroit mout volentiers au segneur de Foillouel toutes les paroles au mius que il porroit, et saroit, que Jehans li avoit dites. Li abbés ala a un certain jour a Ferieres, une vile qui est le segneur de Foillouel, et trova la le segneur de Foillouel et li pria de par Jehan et de par lui meismes que par amours qu'il vausist prendre 1 jour certain ou Jehans Chavenniaus peust parler et venir par devant lui, sauf alant et sauf venant, et Jehans diroit et feroit tant envers le segneur de Foillouel que il demouroit ses seroit ses bons amis. Li sires de Foillouel respondi a l'abbé : Sire abbés, je sui vo bons voisins, et vous li miens. Vraiment pour vo propre honeur warder et sauver jou iroie 40 liues loins et plus, se mestiers vous estoit. Et sachiés que il me sanle que vous ne me requerés mie cose qui me soit honnoraule de prendre jour certain encontre Jehan Chavennel par amours, sire abbés, se ne vous anuit mie, Jehans Chavenniaus est bien si sages que, se il a mespris d'aucunes coses envers mi, que il fera bien tant envers mi, tout sans jour prendre, par coi nous serons bon ami ensale. Et sachiés vraiement que se je aloie ja a Foillouel et je encontroie Jehan es bos de Foillouel, que se il ne me saluoit, que je le salueroie, car Jehans a esté mout privés et mout familiers de mi et jou de lui. Et dist que plus n'en set.

Toutes auteles depositions coume li abbés a dit par devant tesmoigne dans Jehans de Capi, moinnes de Saint Quentin en Yle, et le jura en le parole Nostre Segneur par le congié de sen abbé, et savoit esté chis dans Jehans de Capi mout familiers a Jehan Chavesnel quant il vivoit. Et mena li abbés celui dant Jehan de Capi a Jehan Chavesnel pour lui amolier a debonnaireté et a pais. Et dist que plus n'en set.