[1]

C'est li fez sus quoy li prevoz de Bourges se doit enformer de la multre qui ha esté faite en la vile de Saint Satur.

Lou vendredi apres la Saint Michel, l'an de grace mil III^c et quatre, vint une femme, qui est appelee Belon de Sancerre, a Jehan Friolat, prevost, et estant pour l'an prevost et en leu de prevost, en soi compleignent de aucunes genz de injures qui havoient esté fetes a icele, liquex Jehanz Friolez respondi a icele : Je ne t'en puis pas faire vengence car il sont clerz. Et icele respondi telx paroles : En non Deu, je m'en vengeré bien car je metroie avant lou feu en la meson ou l'on m'a fait l'injure que je n'en fusse vengee. Cestes paroles dites uns borjoys de Saint Satur, qui ha non Michel La Vayche, dit en tel maniere : Sire prevost, vous oez cestes paroles que ceste fenme dit par devant vous, eles porroient bien torner a grant domaige a tote la vile et vous qui estes justise y havez bien a veoir, et se ge estoie justise je la metroie en prison pour les paroles que elle ha dites.

Et uns escuyers l'abbé de Saint Satur, qui a non Guillaume de Remors, dit a celi Michel, en la presence de celi prevost : Sire vilain punays a vous que apartient a dire tels paroles vous vous en repentirez et vous en apercevroiz. Sire, je ne sai pour quoi vous me menaciez car je ne sui de rien vostre anemis.

Sus cen lidiz Guillaumes, escuyers, respondi : Se m'aïst Dex et je vuil que vous sachoiz que je sui vostre anemis et vous en mostrere samblant ne demorra pas grantment. Et a ces paroles lidiz Michels requit loudit Jehan Friolat, prevost1, Jehan, vous estes prevoz et justise de ceste vile et cis escuiers me menace devant vous et en vostre presence, je vous requiers avoir essegurement de li sus ces menaces que il me fait, li quex prevoz2 respondit : Je ne vous feré ja doner essegurement de li .

Et a cestes paroles et a cest fait furent present Andriers Le Bergoinz, Odenins Girauz, Perrins Mirepiez, dit Maltainz, Arnolz Chauderiz, sergenz de la vile, dit Grox Valez, Perreaus fils Michel La Vaiche.

Item, celi vendredi meismes, apres quevrefeuf, vindrent cis Guillaumes de Remors, escuyers, et Guillaumes li petiz, neveu l'abbé, Robins, clerz de l'Aumosne, Mal y torne3, diz Baudriz, valez au celerier de l'abbaïe, Colinez, valez l'abbé, dit Tousez, valet dou four, Johans li batars Friolet et ses sergens4, diz frere Sobtiz, convers de l'abbaye, vindrent essaillir en l'ostel Tevenin Giraut, Michel La Vaiche et quassirent les fenestres par leur force et les huys de la maison, a cele fin qu'il convint qu'il saillissent fors par force et blecirent loudit Michel jusques a la mort et occidrent Perrin de Rans, clerc, et copirent lou braz Tevenin Giraut auques tout outre, et blecirent lou fil Perreau Climent de une espee sus la teste jusques a la mort et a cest fait li voisins crierent au feuf et a la mort. En venent au cri Johanz Bordons et li Roys recovrerres — furent bleciez sodainnement des diz deux escuyers et de leur compaignie, et a cest fait furent vehuz li segretains et li chappelains de l'abbaïe, et de cen vous porroiz enformer, sire prevoz, par Jehan Rutebeuf, sergent, Perreaul Gueydon, pour Bienvenue, suer Helyot clerc, et par celi Heliot par sa beasse et par sa suer5, par Jehannet lou costurier, par Tevenin Giraut, par sa feme, Johanne de Bonay, chambariere Perrin Mirepié, Marions, fille a la riche groliere, par Babignon et sa feme, Tevenin Ferrejant et Crenant, son valet.

Item que de cen est commune renommee a Saint Satur et es leux voisins.

Item, quant li faiz fut fait, lidiz Guillaumes de Remors et Guillaumes li petiz estoient devant lou celier neuf et Johanz Friolet, prevost6, estoit present que l'on dit : Prevoz7 tenez vous saisiz de ces murtriers car il ont tué Perrin de Rans. Et s'en ala lediz prevoz et lidiz escuyers assembleement.

Et porroiz cen savoir par Johanne de Bonay, chambariere Perrin Mirepié, par Jehannet lou cousturier, sa feme, par Tybaut lou gendre Durant lou fornier, Tevenin Ferrejant et Crenant, son valet et Henris Roliaz le filz Jofroi, Barthelemi lou fil Chevalier, la feme Girart Buisson, Martin lou sergent Johan Bordon, Boyn de la Ronde.