[1]

C'est le procès fait par devant nous Hugues de la Celle, chevalier nostre seingneur le roy, commissaire donné a ce de nostre seingneur le roy, entre mons. Pierre de Galart, chevalier dudit nostre seingneur le roy, et mestre de ses arbalestiers, ou nom du roy, promoteur pour ledit nostre seingneur le roy, d'une part, et noble homme et puissant Robbert, comte de Flandres, d'autre, sus les debaz des apartenances et appendances des villes chastelanies et baillies de Lille et de Betune en l'absence de mons. Guillaume de Nivelle, qui ne vint mie souffisaument appelés selon la teneur de la commission a nous donnee dudit nostre seingneur le roy, dont la teneur est telle :

Ph. par la grace de Dieu roys de France, a nostre amé et feal chevalier Hugues de la Celle, salut et amour. Comme pour dis mile livres a tornois de annuel et perpetuel rente, a nous deuz des Flamenz par le traité derrenemant faite entre nous et eux, nostre amé et feals Robbert, cuens de Flandres, pour li, pour ses hoirs et pour les successeurs, nous ait baillé, otroié et assigné, quitté et delivré perpetuelement a touz jours pour nouz et pour nouz heirs et pour nouz successeurs roys de France, les chasteaus, les villes, chastelanies et baillies de Lile, de Douhay et de Bethune, avec toutes leurs justices, rentes, possessions domaines, fiez, arrerefiez nobles et autres, gardes, patronages, toutes leurs appendances et apartenances et droiz et avec leurs seingneuries qui y apartenent et appendent, si comme li et ses devanciers les ont ça en arrere ancienement plus plainement et plus entierement tenues avec toutes leurs ancienes charges de fiez, d'aumosnes et d'autres redevances acostumees a tenir et possesser, de nous, de nouz heirs et de nouz successeurs roys de France perpetuelement a touz jours mais, et des dites choses et checune d'iceles ait transporté en nous, pour nous, pour nouz heirs et pour nouz successeurs roys de France a touz jours tout le droit, la seingneurie, l'action, proprieté, saisine et possession qui li afferoient et apartenoient, poent et devent afferir et apartenir par quelcunque cause et manere que ce fust, et nous ait fait ces sion de toutes actions et droiz a li apartenanz pour lesdites choses contre quelcunques personnes que ce soit et de quelque condicion ou estat que elle soit, si comme les choses dessus dites et checune d'iceles sunt plus plenierement et plus entierement escriptes, contenues et devisees expressement es lettres dudit comte sailees de son seel, desqueles lettres nous vous avons baille la copie souz nostre seel, et pour le debat qui est ja meüz entre nouz gens et ledit comte sus les termes et apartenances et appendances des droiz et des seingneuries desdites chastelanies et baillies, ait esté dit et acordé entre nous et ledit comte que nous, pour nous et en nostre nom, d'une part, et li diz cuens pour li et en son nom d'autre, establirions et deputerions, ordenerions et metrions chescun de nous un chevalier qui yroient esdites parties et lieus pour enquerre, veoir et savoir desdiz contens, nous qui de vostre industre diligence et loyauté avons grant fiance, vous mandons et commetons pour la teneur de cez presentes lettres que vous avec nostre amé Guillaume de Nivelle, chevalier, nommé et esleü dudit compe, et pour li, pour fere et acomplir lesdites choses, appelé Pierre de Galart, nostre feal et amé chevalier et mestre de nouz arbalestiers, lequel nous deputons a ce pour nous, et autres de nouz gens, lesqueus vous verroiz a appeler pour garder et maintenir nostre droit, et pour vous aviser, enformer et administrer tesmoins si mestier est, sus lesdites choses et checune d'iceles, enquerés et vous enfourmés diligentement des justices, rentes, possessions, domaines, fiez, arrerefiez nobles et autres, gardes, patronages, droiz et seingneuries desquelles li cuens ou ses gens debatront devant vous et seront en descort avec ledit maistre des arbalestiers et nouz autres gens, de non estre des apartenances et appendances ancienes desdiz chasteaus, villes, chastelanies et baillies, et tout ce que vous aurez trouvé sus les choses dessus dites et chescune d'iceles nous raportés ou envoiés enclous souz vostre seel et le seel dudit Guillaume de Nivele, chevalier, a ceste prochaine Mi Quaresme. Et si par aventure il avenoit que lidiz cuens de par nous souffisaument seur ce requis par vous fust negligenz, en deffaute, d'envoier vers vous ou pooir souffisant ledit Guillaume de Nivelle, chevalier, pour aler avant seur lesdites choses en la maniere que dessus est dit, ou yceli chevalier se excusast sus ce et fust deffaillanz, si volons nous vous mandons et commetons que vous, appelé souffisaument ledit comte ou son procureur, aillés avant sus les dites choses et chescune d'iceles en la forme et en la maniere que dit est, non contraitant l'absence dudit chevalier, du comte ou de son procureur. Et donnons par la teneur de cez lettres en mandement audit comte et a touz les sougiz et justiciers de nostre royaume que il a vous et audit Guillaume ensemble et a vous tout seul obeïssent et facent obeïr diligenment es choses dessus dites. Donné a Paris le .X. jour de fevrier l'an de grace mil CCC et treze.

Pour la vertu de laquelle commission nous feïsmes adjorner ledit conte devant nous a Lile au mercredi apres les Brandons l'an mil CCC et treze a aler avant en ladite besoingne selon la teneur de ladite commission par nouz lettres pendens, esqueles estoit encorporee la teneur de nostre commission, et par les lettres especiaus du roy nostre seingneur, lesqueles il envoiet audit comte, et li signifiasmes qu'il evoiast a ladite jornee mons. Guillaume de Nivelle, chevalier, et li envoyasmes lesdites lettres du roy nostre seingneur et les nostres par Jehan du Chastel, sergent nostre seingneur le roy en la baillie de Lile, li queus sergens li bailla lesdites lettres du roy et les nostres a Grant Mont, si comme ledit sergent nous raporta et il est contenu en un instrument publique ci dessouz escript, ouquel instrument les teneurs desdites lettres le roy et de la nostre sunt contenues :

In nomine Domini. Amen. Anno a Nativitate ejusdem millesimo CCC^o quartodecimo1 indictione duodecima, mensis februarii, die XIX^a, pontificatus sanctissimi patris domini nostri domini Clementis, divina providentia pape quinti, anno nono, ad presentiam nobilis et potentis viri domini Robberti, comitis Flandrie, existentis in quadam camera terrena sita in monasterio Sancti Adriani apud Grant Mont accedens, et coram ipso comite personaliter ad hec constitutus Johannes de Castello, serviens excellentissimi principis domini regis Francorum in baillivia Insulensi, eidem comiti, in presencia mei notarii et testium subscriptorum ad hec vocatorum specialiter et rogatorum, presentavit et tradidit ex parte domini regis, ut dicebat, quasdam patentes litteras sigillo magno cereo crocei coloris dicti domini regis sigillatas, ut prima facie patebat, tenorem qui sequitur continentes (v. supra).

Quibus litteris premisso modo presentatis et a dicto comite receptis, idem serviens requisivit dictum comitem ut eas palam faceret legi coram ibidem assistentibus ; cui respondens idem comes, quod eidem comiti dicte littere dirigebantur, rogavit dictum servientem et me subscriptum notarium ut dictam cameram exiremus quousque super hiis deliberasset. Quo sic facto post aliquantulum dicte diei intervallum, infra quod dicte littere legi potuissent coram ipse comite et deliberatio super hiis haberi, dicto serviente, una mecum subscripto notario coram ipso comite revocato, et personaliter existente idem comes eidem servienti dixit quod bene viderat dicti domini regis litteras et earum continentiam, petens a dicto serviente utrum vellet aliud dicere. Cui idem serviens respondens quod sic, statim ibidem exhibuit quasdam alias litteras, sigillo nobilis viri domini Hugonis de Cella, militis, ut prima facie apparebat, sigillatas, quas legi fecit per me subscriptum notarium coram ipso comite, quarum quidem litterarum tenor talis est :

A haut homme noble et puissant mons. Robbert comte de Flandres, Hugues de la Celle, chevalier nostre seingneur le roy, saluz en Nostre Seingneur, Savoir vous faisons que nous avons receules lettres nostre seigneur le roy contenanz la fourme qui s'ensuit . Pour la vertu desqueles lettres nous vous requerons de part nous et mandons de par le roy que vous soiés ou envoiés souffisaument a Lile au mercredi empres les Brandons prochains devant nous et devant ledit mons. Guillaume de Nivelle, chevalier, esleü de par vous lequiel faites venir pour estre avec nous ausdiz jour et lieu, et pour aler avant en la besoingne selon la teneur desdites lettres nostre seingneur le roy. Donné a Paris le XII^e jour de fevrier l'an de grace mil CCC et treze. Nous sommes certain de l'entresign. pour nous dudit de. Donné comme dessus.

Quibus litteris sic perlectis idem serviens dixit dicto comiti quod contenta tam in dictis domini regis prefati litteris quam ipsius domini Hugonis eidem domino comiti intimabat et notificabat ex parte domini regis et militis predictorum et quod ad diem contentam in litteris ipsius militis apud Insulam esset vel mitteret, secundum earundem litterarum continentiam et tenorem, idem comes requirens eciam eundem comitem ut eidem super premissis responsionem daret, et ut plenius de premissis haberet noticiam, transcriptum ipsius militis litterarum sub sigillo gubernatoris Insulensis eidem comiti tradidit et deliberavit. Quibus auditis et intellectis et ipsis litteris domini regis cum dicto transcripto receptis a dicto comite petiit super hoc deliberare et dictum servientem ac me subscriptum notarium exire dictam cameram fecit et rogavit quousque deliberasset. Cumque postmodum, elapso dicte diei longo intervallo, predicto serviente revocato, et existente coram dicto comite in presencia mei notarii et testium subscriptorum, discretus vir dominus Balduinus de Senebeke, legum professor, vice, nomine et de mandato dicti comitis, respondit quod propter reverentiam dicti domini regis, qui erat dominus dicti comitis, omnes gentes servientes missos et nuncios ipsius, ubicunque esset idem comes, amicabiliter, honorabiliter et graciose reciperet et recipere vellet, sed ipse comes tunc erat extra regnum Francie, nec ibidem poterat adjornari ex parte dicti domini regis, nec volebat nec tenebatur facere seu incipere aliquem processum neque diem acceptare ibidem super seu pro negociis que essent de regno Francie, presertim cum ipse nollet peccare in dominationem regni Alemannie, in quo dicebat se esse, veluti si esset in regno Francie nullo modo facere vellet aut incipere processum super seu pro negociis regni Alemannie ne peccaret in dominacionem regni Francie. Dixit tamen quod si ipse serviens aut alius ex parte dicti domini regis vellet eidem aliquod mandatum regium facere seu eundem adjornare, apprehenderet personam ipsius comitis in terra Flandrie quam tenebat de dicto domino rege seu alibi in regno Francie, et tunc ipse comes obediret et faceret quod deberet et sua interesset. Et hiis dictis statim idem serviens abinde recessit. Actum in dicta camera, presentibus nobilibus viris et discretis domini Guillelmo de Nivella, Yvone de Verwich, Gerardo du Querke, militibus, magistro Henrico Bram, domino Balduino de Senebeke, necnon Egidio Paresis et Johanne Crespin, servientibus domini regis apud Insulam, testibus ad hec vocatis specialiter et rogatis.

Item cum postmodum, ipsa die, dictus Johannes de Castello, serviens, pro quo mandaverat ad hospicium suum dictus comes, coram ipso comite compareret, ipse comes per manum dicti domini Guillelmi de Nivella, michi notario, subscripto predictas litteras quas receperat a dicto serviente et retinuerat, ut jam dictum est, tradidit, dicendo quod dictas litteras reddebat eo quod ibidem extra regnum Francie aliquod mandatum ex parte dicti domini regis eidem comiti fieri non poterat nec debebat. Cui cum ego subscriptus notarius respondissem quod talia me non tangebant nec faciebam partem, finaliter idem comes, ad instanciam nobilis et potentis viri domini Ludovici, ejusdem comitis filii, ad hec presentis, rogavit ipsum servientem qui eidem presentaverat hujusmodi litteras, quod eas resumeret.

Cui idem serviens respondit quod nullum mandatum eidem comiti fecerat, sed bene eidem intimaverat et notificaverat contenta in eisdem litteris et terminum eidem assignatum apud Insulam, secundum ipsarum litterarum tenorem, et quod responsio dicti comitis, quam alias eidem fecerat, ut superius continetur, eidem bene sufficiebat, et eam acceptaverat et acceptabat, ex quo aliud hinc inde non potuerat et quod ipsius servientis non intererat resumere dictas litteras, neque coram me subscripto notario resumpsit easdem. Actum in dicta camera, presentibus dictis servientibus, testibus ad hec vocatis specialiter et rogatis, una cum pluribus aliis personis fidedignis.

Et ego Theobaldus de Dullendio, clericus Attrebatensis, publicus auctoritate apostolica et imperiali notarius, predictis omnibus et singulis sic in dicta camera successive actis, una cum suprascriptis testibus, prout superius continetur, presens interfui, et predicta in hanc publicam formam redegi, meoque solito signo signavi vocatus et rogatus.

Et pour ce quar entour le fin dudit instrument est contenu que quant ledit sergent li presenta lesdites lettres nostre seingneur le roy et les nostres, il estoit hors du royaume de France en l'Empire et que illeques il ne le pooit adjorner ne fere adjornement ne proces aucun, nec accepter jornee sus les choses ne des choses qui touchessent le royaume de France, et que se il le voloit de riens adjorner, ne fera aucune insinuation de part nostre seingneur le roy, qu'il le li feïst ou conté de Flandres qu'il tenoit du roy, nous, pour oster toute doute alasmes en nostre personne a Maule pres de Bruges, maison dudit conte, et la trouvasmes ledit conte et l'ajornasmes et assignasmes jour a Lille au mercredi apres les Brandons dessus dit, et li commandasmes que il y eüst ou y envoyast ledit mons. Guillaume de Nivelle, chevalier, ou autre soffisant a ce pour li, li quieus nous respondit qu'il y seroit ou envoiroit souffisaument a ladite jornee.

A laquele jornee dudit mercredi se comparurent par devant nous a Lille le mestre des arbalestiers pour le roy nostre seingneur et les gens dudit conte pour le conte, et nous continuasmes o l'assentiment desdites parties ladite jornee du mercredi par devant nous a Lille au juedi ensegant, auquel jour de juedi se comparut par devant nous ou chastel de Lille le mestre des arbalestriers pour le roy nostre seingneur, et pour ledit conte Antoine Forlignet, procurateur dudit conte, fondez par procuration dont la teneur est tele :

Nous, Robbert, cuens de Flandres, faisons assavoir a touz que nous avons mis et establi, metons et establissons nouz amé valez Anthoine Forlignet et Peiron de Sumebeke, clerc, nouz procureurs et messages especiaus, checun d'eus pour le tout, ainsi que la condicio de celi qui premier entreprendra ou comencera ne soit mie mieudre, anceis ce qui seroit comancé par l'un d'eux puisset estre pour l'autre poursui et terminééen la cause et en la besoingne que nous poons avoir a fere ou de nous ou a nous par devant sage homme et noble mons. Hugues de la Celle, chevalier, commissaire de par le roy de France nouz seingneur, sus les debaz et desoivres faiz contre nous par le mestre des arbalestiers le roy nouz seingneur des villes, chastelanies et baillies de Lille, de Douhay et de Bethune, selon ce qu'il est contenu en la commission faite par le roy nouz seingneur audit mons. Hugues de la Celle et les mandemenz a nous faiz sus ce. Et avons donné et donnons ausdiz procureurs et a chescun d'eaus par le tout, ainsi que dessus est dit, plaien pooir et especial mandement de comparir pour nous en ladite cause et besoingne et de deffendre et de recevoir nouz droiz en toutes choses, de decliner pooir, proposer, opposer ce que fera par nouz partie en touz poins et en toutes choses que mestiers sera, de jurer pour nous et en l'ame de nous, de calumpne et de verité, et toute autre maniere de juremanz que convendra, et de toutes choses faire et dire en nom de nous et pour nous qui apartenent ou apartenir porroient a faire et a dire sus la besoingne dessus dite. Et proumetons a avoir et aurons ferme et estable tout ce que par nouz diz procureurs sera fait et dit des choses dessus dites, tout einsi que se nous meïsmes presens les avoions faites et dites en la expedicion de ladite besoingne. Et prometons souz l'obligacion de touz nouz biens a acomplir la chose jugee si mestier est, par le tesmoignage de cez lettres sailees de nouz seel. Faites a Bruges et donnees l'an de grace mil CCC et treze, lendemain des Brandons.

Celle meismes jornee, les parties fondees souffisaument, ledit mons. P. de Galart nous bailla en nom du roy, present le procureur et le conseil dudit conte, les parcelles du debat des chastelanies de Lille et de Bethune en la maniere qui s'ensuit, desquiex parceles nous baillasmes la copie au procureur dudit conte.

Articuli. A celle fin qu'il soit dit et declairé pour le roy nostre seingneur ou par son noble conseil que les lieus et les choses ci dessouz escriptes soient et doivent estre et demeurent a touz jours mais au roy nostre seingneur et a ses heirs paiziblement comme soes des apartenances ou appendances de la chastelanie ou de la baillie de Lille, entent a prouver par devant vous Hugues de la Celle, chevalier nostre seingneur le roy, commissere deputé a ce avec mons. Guillaume de Nivelle, chevalier, se il y est, ou avec autre que vous y appeleroiz se il n'i est, ledit mons. Pierre de Galart pour le roy contre noble homme mons. Robbert, conte de Flandres, ou son procurateur, que toutes les choses ci dessouz escriptes sunt ou ont esté et doivent estre des apartenances ou dependances de la chastelanie ou baillie de Lille, si comme li coms de Flandres ou si devanciers les ont ça en arrere plus plainement ou plus entierement ancienement tenues.

I Premerement les molins et les portes qui sunt sus le Lis entre Menin et Helluin.

II Item des portes qui sunt sus le Lis, mouvans du pont qui siet en la ville de Menin, d'ici a une riviere qui est couranz dessouz le mostier.

III Item les poicheries des eaus des riveres des le Lis, si avant que la baillie ou chastelanie de Lille s'estent, movant de Commines, d'ici outre Coutray juques a Halebeque.

IIII Item l'omage de la ville de Werny qui feu Gautier de Werny.

Et fait ledit mons. Pierre protestation et retenue ou nom du roy que s'il y a autres lieus que ceux qu'il a dessus nommez tant en ladite chastelenie ou baillie ou en leur apartenances ou appendances qui au roy nostre seingneur deüssent apartenir, que il ou autres pour le roy les peüst demander en temps et en lieu.

A celle meïsmes fin que dessus est, sus les apartenances ou appendances de la chastelanie ou baillie de Lille, dit et entent a prouver ledit mons. Pierre, ou nom du roy, que les choses qui s'ensuivent sunt et ont esté et doivent estre des apartenances ou appendances de la chastelenie ou baillie de Bethune, si comme li seingneur de Bethune ou leur devancier et meïsmement ceti conte de Flandres ou cil dont il a cause les ont ça en arrere plus plainement ou plus entierement ancienement tenues :

Premierement la ville de Werneston et toutes ses apartenances ou appendances, soit en homage, en justice ou en autres choses.

Item, ce que mons. Jehan de Bailloel tient de Mieppeglize et Estamwerp, a la Karnoie, au Duchlieu et en toutes les dependances de cez fiez.

Item, le pont d'Estaires a toutes ses appendances et apartenances.

Item, Robertmeis et toutes ses appendances et apartenances.

Item, le manoir de la Tour et les appendances et apartenances.

Item la Noeve Terre que li sires de Haveskerque eschanja au conte de Flandres ou temps qu'il estoit sires de Bethune.

Item, le lac qui siet entre le Noef Brebin et Estaieres et Esterebroek.

Item, Terremonde et toutes ses appendances et apartenances.

Item Bernehem et ses appendances et apartenances.

Item Rikebourc et ses appendances et apartenances.

Et fait ledit mons. Pierre protestation et retenue ou nom du roy que s'il y a autres lieus que ceus qu'il a dessus nommés es apartenances ou appendances de ladite chastelanie ou baillie qui au roy doient apartenir, que il ou autres pour le roy les peüst demander en lieu et en temps.

Les queles choses dessus dites, receûes du procurateur dudit conte, a la requeste dudit mons. Pierre de Galart, nous li commandasmes que respondist a checun article par soy, liquieus procureur nous requist o grant instance que nous li donesson dilacion juques au mardi ensuivant, ainsi qu'il peüst conseiller son seingneur pour respondre plus certainement aus choses dessus dites, a li specifiees et baillies meïsmement, comme il ne fust pas bien avisiez, si comme il disoit, de respondre es choses dessus dites sans le conseil et le commandement du conte son seingneur, qui heritage ce estoit. Et nous, a l'instance dudit procureur et de son conseil, pour plus certainement et seürement aler en la besoingne, de l'assentiment dudit mons. Pierre, li donnasmes dilation juques au mardi dessus dit, a laquele jornee de mardi nous assignasmes jour audit procuratour du conte, a respondre esdiz articles, et a aler avant tant comme raison sera, et li commandasmes qu'il eüst a ladite jornee mons. Guillaume de Nivelle, chevalier, esleü par ledit conte en ceste besoingne, ou autre souffisant en lieu dudit mons. Guillaume.

A laquele jornee du mardi, present par devant nous ledit mestre des arbalestiers pour le roy nostre seingneur oudit chastel de Lille, et ledit Anthoine, procureur dudit conte, pour celi conte, ledit mestre des arbalestiers, en la presence dudit procureur le conte, pour le roy nostre seingneur jura sus les sains evangiles qu'il entendoit et creoit fermement que les choses contenues en ses articles et dont nous avoions baillé la copie par nostre main au procureur dudit conte, et a la requeste dudit procureur feüssent et estoient verayes, et que les tesmoins que il ameneroit sur ce a prover s'entention pour le roy nostre seingneur, il ameneroit bons et loiaus. Et nous encontinent requeïsmes et commandasmes au procureur dudit conte de par le roy nostre seingneur que il respondist es articles et choses que ledit maistre des arbalestiers nous avoit bailliés pour le roy nostre seingneur et dont le procureur dudit conte avoit eu la copie par nostre main, li queus procureur dudit conte ne volut respondre et dist qu'il n'avoit commandement du conte son seingneur de plus dire ne de plus aler avant en ceste besoingne, et ledit mestre des arbalestiers nous requist que nous li donessons deffaute contre ledit conte et son procureur pour le roy nostre seingneur meismant, comment le procureur dudit conte deüst estre tenuz pour contumaz, soi present, et ne volant respondre, et a veoir jurer les tesmoins que ledit mestre des arbalestiers amenoit et traioit pour le roy nostre seingneur, lesqueus nous mostrasmes au procureur dudit conte, a prouver pour le roy nostre seingneur lesdiz articles ; et pour aler avant, si comme raison sera, en ladite besoingne, nous requesismes et commandasmes audit procureur du conte qu'il venist a nostre hostel et li assignasmes jour par devant nous a Lille en nostre hostel au mercredi, juedi, venredi et samedi ensuivanz pour fere et aler avant en ladite besoingne, ce que raison seroit, en tant comme au conte apartenoit ou pooit et devoit apartenir par la vertu des lettres nostre seingneur le roy, et de nostre commission. Li queus procureur du conte respondit qu'il ne iroit ja. Et en meïsmes manere assignasmes jour audit procureur du conte par devant nous a Betune au dimenche ensuivant, au lundi, mardi, mercredi, jeudi, venredi et samedi ensuivanz et li commandasmes et requeismes comme a procureur dudit conte de par le roy que il fust par devant nous aus lieus et jours dessus diz et a checun desdiz jours, pour respondre es articles des apartenances de la chastelenie ou baillie de Bethune et a voir jurer les tesmoins que ledit mestre des arbalestiers ameneroit pour le roy et a aler en oustre et fere ce que raison seroit en tant comme audit conte apartenoit et pooit apartenir.

Le mercredi apres Reminiscere, l'an mil CCC et treze, feismes appeler par Hues Maquerel, baillif pour le roy de Heloin, le conte de Flandres et son procureur qu'il venist avant par devant nous pour aler avant en ladite besoingne, li queus ne vint ni se presenta ne autres pour li et pour ce le meismes en deffaute.

Item le juedi ensegant, deffaut ledit conte et son procureur appelés par le baillif de Heloin, en meïsme manere que dessus est dit.

Item se deffaillit ledit conte et son procureur le venredi et le samedi ensegant, appelé checun jour par ledit baillif de Heloyn chescun des jours dessus diz et nous present.

Ce sunt les tesmoins que le mestre des arbalestiers, promoteur pour le roy en ceste besoingne, trait et amene pour le roy contre le conte de Flandres ou son procureur sus les debaz des apartenances ou appendances de la chastelanie ou baillie de Lille, jurez, en l'absence de Antoine Forlignet, procureur dudit conte, li queus, combien qu'il se presentast devant, se mist en deffaut, et ne les volut veoir, jurer, ne respondre et se rendi contumas, combien qu'il en feüst requis pluseurs foiz de nous.

I Guillaume de Boisebeke de Le Lis, premier tesmoins jurez et examinez, le mardi apres Reminiscere, l'an mil CCC et treze, de l'eage de 60 ans ou environ ...[1] dit par son serement l'article estre vray. Requis comment il le siet, dit quar il est demorans prés du lieu, sus le Lis, et est de ceus qui sunt tenuz par force de moldre esdiz molins. Et dit qu'il a tel droit esdiz molins que quant il ou ses gens aportent son blé esdiz molins, il doivent tantost moudre apres celi qui est en la tremmuye, sans nul contredit et sans moien, et dit cils qui parle que aucune fois les muniers desdiz molins l'ont contredit a sa gent et il le mostroit et s'en plaingnoit au baillif de Heloyn, liqueus baillis de Heloyn est mis et ordenés par le baillif de Lille, et son subgit et il en corriget les moners et li fesoit adrecier son meffait.

Item dit cil qui parle que lesdiz molins ont tel privilege que tuit cil qui sunt habitant une luye entour les molins doivent venir moudre esdiz molins, et a veü pluseurs foiz que le baillif de Helion metoit sergent de ça le dis pour garder les moulanz, qu'il n'alassent modre a autres molins. Et quant il les trouvoit, il perdoient le blé ou la ferine et paioient 60 s. d'amende. Requis s'il en vit onques nul prendre qui alessent a autres molins qui perdissent blé ou farine ou que en païessent amende, dit par son serement que oïl, pluseurs. Requis des noms, dit que ne li en souvient. Requis se plus siet d'iceli article, dit que non.

... rien n'en siet.

... dit par son serement qu'il a veü et sceü pluseurs fois poischer les gens au baillif de Lille, et ceus qui acensoient les eves de li ou de son commandement, par tout de Lis, des Lordebeke juques a Tournay, et a esté present pluseurs fois a Lille et a Heloin quant li baillis de Lille accensoit les pecheries desdites eaus, et beü et mangié du vin et du poisson, qui estoit fait oudit marchié, quant il accensoient, et a veü pluseurs qui li disoient qu'il venoient a Lille pour paier leur accense, qu'il devoient desdites poischeries.

Item requis se il siet que lesdites eaues et poicheries du Lys, des Coutray juques a Lebeke, sunt de l'apartenance de la chastelenie ou baillie de Lille, dit par son serement que il croit que oïl, et pour ce le croit quar il a oÿ dire a pluseurs de ceus qui avoient accensé les pescheries du baillif de Lille, qu'il avoient poisché et pooient pescher des Coutray juques a Lebeke, et fesoient leur esploit de peschier juques audit lieu, a Lebeke.

Requis des nons de ceus qui ont pesché et a qui il l'a oï dire, dit a Guillot Richart, a Jehan Richart et a pluseurs autres dont il ne se recorde.

Requis se il vit onques ne sot que debat y fust mis du baillif de Courtray, dit que non, et pour ce dit par son serement lesdites eves et poischeries estre des apartenances et baillie de Lille, si comme il est contenu oudit article. Requis se plus siet dudit article, dit que non.

... riens n'en siet. Item requis s'il siet nuls exploiz autres que ceus dont il a deposé, qui aient esté faiz es lieus contenuz esdiz articles ou en aucun d'eaus pour quoi il sachent que lesdiz lieus ou aucun d'eaus soient ou doient estre des apartenances ou dependances de la chastelenie ou baillie de Lille, dit par son serement que il vit une loge au dela du pont sus le Lis, par delay le moustier, que feu (sic) jadis Rogier le Crousset, et puis fu Gautier le Beke, et dit qu'il vit illeques assembler le lieu tenant du baillif de Lille, qui avoit nom Giles de Linceles, si comme il croit, et des hommes le conte de la chastellenie de Lille, et la vit seoir ledit lieutenant, et tenir ses plaiz aveques les hommes, et vit et fu present que un homme de Rone, du nom duquel il ne se recorde, se desherita de 3 bonnees de terre et en herita par le jugement des hommes desdites trois bonnees de terre la femme Gilon de Linsoles.

Requis s'il y vit onques fere nul autre jugement celle jornee ne autre foiz, dit que non.

Requis des noms des hommes qui firent ledit jugement, dit que luy qui parle, Giraut du Chastel, Baudoin de Forest et autres dont il ne li souvient. Et dit plus qu'il oït pluseurs foiz dire a pluseurs genvres hommes de Menin : Alons nous joer en cele loge, quar elle est de la chastelenie de Lille, et la nous ne serons point en amende. Et pour ce croit par son serement et affermet par verité ledit lieu ou siet ladite loge estre et apartenir des apartenances de la dite baillie ou chastelanie de Lille.

Requis du temps que cest jugement fu fait, dit par son serement entour 22 ans, poy plus ou poy meins.

Item requis se il siet que le Lis et les autres petites yles d'entour le Lis sunt des apartenances ou appendances de la chastelanie ou baillie de Lille, dit que riens n'en siet, fors ce dont il a dessus deposé.

II Jehan Liethart, ..., de l'eage de 70 ans, ..., le mardi apres Reminiscere, l'an de grace mil CCC et treze, ... [1] dit par son serement les choses contenues oudit article estre en la chastelanie et en la baillie de Lille.

Requis comment il le siet, dit par son serement quar il a veu fere au baillif de Heloyn qui est mis et establiz par le baillif de Lille pluseurs exploiz de justice esdiz lieus.

Requis quieus exploiz, dit que il vit et sot que Gautier de la Beke perdit bois esdiz molins, liqueus li fu emblés, et se plainsist le dit Gautier au baillif de Heloin, liqueus apella pluseurs hommes de Menin et de Haloin, et ala en la loge Gilebert le Boulengier, qui siet sus le rivage du Lis, devers Courtray, au temps que li contes de Flandres tenoit la terre, et illeques comme juges, enquist la verité du fait et trouva que Jehan le Bos, de Aloin, avoit pris le bois, et fu condampnez par jugement des hommes a aler en pelerinage a Saint Jaque en lieu dudit Gautier, qui le bois estoit, et pour tant fu mis hors de la prison de Haloin ou il avoit esté mis par celi meffait.

Item dit que il oït et vit pluseurs foiz que le baillif de Heloin justiçoit et corrigoit touz meffaiz faiz es molins et es portes et par tout le terreor des molins des portes, et des le derrier pont du Lis, devers Courtray, en çay, et dit encore que aucuns menoient nés ou danrees parmi le Lis, et il ne paioent le longuel audit baillif de Heloyn ou a son commandement, qu'il les arrestoit ou Lis et les contraignoit a paier et fere amande.

Requis des noms de ceus qui il y aresta, dit qu'il ne li en souvient, quar ce estoient marcheant qui passoient le Lis.

Item dit qu'il vit prendre en la loge dudit Gilebert le Boulengier un faus monnoier, du nom duquel il ne li souvient, et fu amenés par le baillif de Heloin a Lille, et la fu bouilliz et justiciés par le baillif de Lille.

Et pour ce dit par son serement les molins, les portes et tout le terreur juques au rivage delai le Lys, par devers Courtray, estre des apartenances de la chastelanie et baillie de Lille.

Requis si plus siet dudit article, dit que non.

... riens n'en siet...

III. Johan Richart, ... de l'eage de 36 ans ou environ, ... l'an et le jour dessus dit, [1] vray.

Requis commant il le siet, dit qu'il a veü touzjours, ou temps que li cuens de Flandres tenoit la terre, le baillif de Heloyn qui est mis par le baillif de Lille justicier en touz cas les mouniers desdiz molins, et touz ceux qui se mesfasoient esdiz moulins et es portes et en tout le terroer des les molins juques au haut pont ou les nes passent, et des ledit pont, si comme le chemin le comprent, vers Haloin, et dit encores qu'il a touz jours veü que le baillif de Heloin metoit sergens qui gardoient que les moulanz de Heloin n'alissent moldre a autres molins. Et quant li sergent les trouvoit alanz moudre a autres molins, il les prenoit et arrestoit et gagnoit le blé ou la farine et les traiet a amande de 60 s.

Requis si plus siet dudit article, dit que non.

... n'en siet riens, fors tant qu'il dit qu'il vit une loge qui fu Gautier de Linac, Gautier de la Beke et Gilebert le Boulengier, qui seoit sus la riverete contenue oudit article, movant du Lis, le baillif de Heloin fere une enqueste de bois que Gautier de la Beke avoit perdu, qui li avoit esté emblés, et il dit que, l'enqueste faite, ledit Gautier trouva son bois ou Lis au dessouz des molins et demanda congié a Aner, baillif alors de Heloin, de lever son bois, et ledit baillif li en donna congié, et puis le baillif de Lille sot que ledit Gautier avoit levé son bois, si l'en traissost en cause par devant soi a Lille pour ce qu'il disoit qu'il avoit levé ledit bois sans congié. Et cils Gautier dist qu'il en avoit eu congié de Henner, baillif de Heloin, et ledit Henner le nia, et ledit Gautier l'offrit a prover.

Et sus ce ledit baillif de Lille ala a la dite loge et fit ensueste en ladite ooge, appelez aveques li pluseurs gens des mons des quieus il ne li souvient, et trouva que ledit baillif de Heloin li en avoit donné commandement de lever ledit bois, et ainsi le baillif de Lille li delivra le bois tout quitte.

Item requis si l'eau couranz souz le rerpont de Mennin, outre le moustier, devers Courtray, est des appartenances de la baillie de Lille et de Heloin, dit que oïl. Requis commant il le siet, dit pour ce que il meismes et autres de son lignage y ont poiché et paié la cense au receveur de Lille.

... dit l'article estre vray, fors tant que la poicherie commaince a Ternyai juques a Courtray et de Coutray a Halebeke et outre, bien 3 liues le lonc du Lis.

Requis s'il y a veü nul autre poichier, dit que oïl, Johan Le Lonc de Menin, Gerart son gendre, et Johan le Clerc, fil dudit Johan, Danieau le Pescheur, compaingnon de ceti tesmoing qui parlet, et pluseurs autres.

Requis par combien de temps il y a poiché et veü poicher, dit que bien pour l'espace de vint ans ou de plus, continuement et touz jours paié la cense au reveneur de Lille.

Requis qui tenoit la terre de Courtray et celle de Lille, dit que aucune fois li roys tenoit celle de Lille et le conte celle de Courtray et autre foiz que le conte tenoit le tout, et pour ce croit ledit article estre vray.

Requis si plus siet dudit article, dit que non.

... riens n'en siet.

IIII. Daniaus du Mont, ... de l'eage de 64 anz ou environ, le VI^e jour du mois de mars l'an dessus dit. [1] vray. Requis commant il le siet, dit par son serement quar il a veü pluseurs fois le baillif de Lille et celui de Heloin justicier touz ceus qui se meffasoient esdiz molins et en une terre appelee La Guillehan, qui siet entre les molins et le mostier.

Requis s'il vit nuls forfaisant, que ledit baillif de Heloin ou de Lille justissassent, dit que oïl, pluseurs qui venoient ausdiz molins, qui se entre batoient, pour ce que les uns voloient moudre avant les autres, quar il dit que lesdiz molins sunt bannier, que touz ceus d'entour les molins, une luye, y doivent venir moudre, et ainsi l'ont acostumé ancienement, aussi bien ceus devers Courtray comme ceus de çay par devers Lille et dit quar il a veü en ladite terre de la Guillehan pluseurs savoir illeques la verité des meffaiz et fere faire amende a ceus qu'il trouvoit qui avoient meffait.

Requis qui tenoit ladite terre ou temps qu'il a veü fere ces exploiz, dit que pluseurs, quant le conte tenoit toute la terre et pluseurs foiz que li roys tenoit celle de Lille, et li contes celle de Courtray.

Requis des nons de ceus qu'il a veü justicier, dit que ne li en souvient.

Requis par combien de temps il l'a veu continuement fere ces exploiz dont il a deposé, dit que bien par l'espace de 40 ans avant qu'il fust debat desdites terres.

Requis si plus siet dudit article, dit que non.

... dit par son serement que il a touz jours veü le baillif de Heloin ou de Lille justicier en l'eau contenue oudit article ces qui avoient meffait en ladite eau, et dit qu'il a veü aucuns, des noms des quieus ne li souvient, qui s'entrebatoient et se tuoient aucun et li baillif de Heloin les punissoit de leur meffait.

Item dit que au temps que li roys tenoit la terre de Lille et le conte cele de Courtray, que le baillif de Heloin levoit le longuel et les exploiz de l'eau et des molins.

Item dit qu'il vit une loge faite sus estaches, qui fu Gautier de la Beke, et puis Gilebert le Boulengier, sus la rivere contenue oudit article, qui estoit au delay du moustier, devers Courtray, outre le pont, pres du moustier. La vit pluseurs fois que quant aucuns se doutoit d'estre pris par debte ou par autre chose du baillif de Menin ou de celi de Courtray, il se metoit en cele loge pour soi garantir pour ce que elle estoit en la baillie de Lille.

Requis s'il vit onques fere nuls autres esploiz en ladite loge, dit que non.

Requis par son serement se il siet que tout le terreor qui est entre les molins et le pont de Menin, pres du moustier, devers Courtray, soit des apartenances de la baillie de Lille, dit que oïl. Requis commant il le siet, dit par son serement quar il y a veü touz jours continuement par l'espace de 40 ans et de plus justicier le baillif de Lille et de Heloyn et quant la terre de Lille estoit en la main du conte et quant elle estoit en la main du roy.

Requis si plus en siet, dit que non.

... dit qu'il a touz jours veü les pescheurs de Menin et de Heloin poischer par tout le Lis, des eaus mons. Guillaume de Nivelle juques a Courtray et a Halebeke, et ceus de Courtray et de Halebeke venir poischer en la compaingnie des autres par tout le Lis, de Alebeke juques aus eaus mons. Guillaume de Nivelle.

Requis de qui il acensoient lesdites pescheries et a qui il paioent la cense dite, dit que ceus de Menin et de Heloin les paioent au receveur de Lille et des autres, de Courtray, ne siet a qui il paioent et plus n'en siet, diliganment requis.

riens ne siet.

V. Daniaus li Poicheres, ... de l'eage de 30 ans et de plus, ... [1] dit par son serement l'article estre vray.

Requis commant il le siet, dit qu'il a touz jours veü metre nouveau mousturer au baillif de Lille ou de Heloin, et par celi mousturer garder le droit du seingneur et des bonnes gens, avant le debat, et ou temps que li contes tenoit toute la terre.

Item dit que quant aucuns se meffesoit es molins ou se combatoit, le baillif de Lille ou de Heloin les justiçoit et punissoit les mauffeseurs.

Requis s'il siet nuls esploiz que ledit baillif de Lille ou de Heloin y feit onques, dit qu'il vit le baillif de Lille pour fere une enqueste de bois que Gautier de Belebeke avoit perdu, et ledit Gautier le trouva au Lis et requist au baillif de Heloin qu'il le li delivrast et ledit baillif de Heloin li donna congié de le prendre et puis vit que le baillif de Lille en volut traire a amande ledit Gautier dont il avoit pris ledit bois, sans congié, et cis Gautiers dist qu'il avoit levé ledit bois du commandement au baillif de Heloin, li quieus baillis le nia. Et pour ce le baillif de Lille y ala pour savoir la verité, et appella aveques pluseurs hommes des noms des quieus ne li souvient, et trouva que ledit baillif de Heloin li avoit donné congié de lever ledit bois et pour ce le baillif de Lille delivra tout quitte audit Gautier ledit bois.

Requis se il soit nuls autres esploiz que lesdiz balliz y ayent fait dit que non. Et plus ne siet dudit article.

Requis sus le segont article, dit que riens n'en siet.

Requis sus le III article, dit ledit article estre vray et dit pour quoi, quar li meïsmes et ses devanciers ont accensé touz jours du baillif de Lille ou de Heloin la poicherie par tout le Lis, des les eaus mons. Guillaume de Nivelle juques a Courtray et jusques Alebeke, et dit qu'il a veü poischer ses ancestres outre a Labeke grant piece.

Requis des ancestres, dit son pere, Gile Riquart et Gautier le Poichere, et Johan le Lonc et pluseurs autres. Requis a qui il paioit la cense, ne de qui il acensoient, dit qu'il acensoient du baillif de Lille ou de son lieutenant, et paioent la cense au receveur de Lille.

Requis par combien de temps il l'a ainsi tenuees et acensees lesdites pescheries, dit que par l'espace de 18 ans et de plus.

Requis qui tenoit ladit terre de Lille, dit que aucune fois le conte et autre fois le roy, mes, quicunques la tenist, paioit il touz jours ladite cense au receveur de Lille.

Requis s'il vit onques fere nul exploit de justice entre lesdiz molins et le pont de Menin pres du mostier devers Courtray dit que non, fors ce qu'il a deposé par dessus et plus n'en siet.

riens n'en siet.

.

VI. Coustans du Lis, ... de l'eage de 50 ans ou environ, ... [1] dit par son sairement l'article estre vray.

Requis commant il le siet, dit pour ce qu'il a veü bien par l'espace de 35 ans et seüz que le baillif de Eloin, qui est dessouz le baillif de Lille, a touz jours jousticé en touz cas, soit de larroncin de blez ou d'autres choses touz ceus qu'il a trouvé meffaisanz esdis molins, et veü et seü que ledit baillif metoit mousturer celi que celi qui acensoit les molins li nommoit, et le fesoit serementer devant les hommes et les eschevins de Heloyn et celui mousturer gardoit le droit du seingneur et des bonnes gens.

Requis par son serement si autres esploiz il a veü fere audit baillif esdiz molins ne ou terreur, dit que blez fu emblez dedens les molins et cils qui l'avoit perdu doloit au baillif de Heloin, et li baillis vint en une piece de terre que l'on appele le Guelehan, et illeques appella des hommes et d'autres gens assés et fit une enqueste, mes il ne siet qu'il en fu fait ne qu'il en fu trouvé.

Requis si plus siet dudit article, dit que non.

... riens n'en siet, fors tant qu'il dit qu'il vit une loge sus estaches sus le Lis au delay du pont contenu en l'article, et la vit le baillif de Heloin assemblez avec les hommes de la baillie de Heloin et avec les esclevins (sic) de Heloin et fere loy de pluseurs actions reelles et personnelles entre pluseurs personnes.

Requis des nons des personnes, dit qu'il ne li en souvient, et dit plus par son serement qu'i croit que la rivere du Lis, qui passet souz le pont soit de la baillie de Heloin et de le Lille, et le croit pour ce que dessus a deposé et pour ce qu'il ne vit onques autre justicier en ladite eau, et plus ne siet dudit article.

... dit l'article estre vray, fors que la pescherie desdites eaus ne commence mie a Commines, mes commence des les eaus mons. Guillaume de Nivelle juques a Halebeke et outre.

Requis commant il le siet, dit que pour ce que li meismes les a peeschees par l'espace de 30 ans, et paia touzjours la cense au receveor de Lille, et les a veü pescher a Johan et Lambert le Lonc, freres, et Gilon Roart, et a pluseurs autres qui les accesoient du baillif de Lille, et paioent au receveur de Lille, et au temps que le conte de Flabdres tenoit toute la terre et au temps que li roys tenoit Lille, et le conte Courtray.

Item dit que il vit que uns hons de Menin qui avoit nom Michiel le Trousoit, qui estoit obligez en pluseurs debtes se mist en la loge dont il a deposé dessus, et fit venir une nef en la rivere qui vait de Menin a Courtray, et y mist pluseurs de ses denrees pour fouir a ses debteurs, et lors uns de ses debteurs ala querre le baillif de Heloin qui avoit nom Jaques le Polere, et en amenerent la nef au pont de Heloin, et fit loy des denrees aus creanciers, et plus ne siet des diz articles diligenment requis.

VII. Bourdins li Fevres, ... de l'eage de 40 ans ou environ, [1] dit par son sairement l'article estre vray, et le dit pour ce que quar il vit pluseurs fois que quant li contes tenoit toute la terre il vit que le baillif de Heloin, qui est mis par le baillif de Lille, metoit les muniers et les mostures esdiz molins et les fesoit serementer devant les hommes de la baillie de Lille qu'il garderoient le droit du seingneur et des bonnes gens.

Item, dit qu'il a veü que aucunes fois que les gens voloient mudre les uns avant les autres et getoient leurs blez ensemble en la tremuye, il mandoient le baillif de Heloyn qui leur departoit leur farine quant elle estoit molue.

Requis s'il siet nuls autres exploiz, dit que oïl.

Item dit que il a veü et sceü par pluseurs foiz que le baillif de Lille venoit en une terre delay les molins entre les deus eaus, que l'on appele le Guelehen, appelés les hommes de la chastelanie de Lille et pluseurs autres, et feray la enquestes et recevoir ses franques verities de touz cas et ceus qu'il trouvoit meffaiteurs il justisoit selon leur meffait.

... riens n'en siet fors tant qu'il vit et fu present que le baillif de Lille vint en une loge qui estoit sus estaches en la rivere du Lis par delay le petit pont de Menin par dela le mostier et vit que ledit baillif fit une enqueste entre Gautier de la Beke et Jehan Annere d'un debat qu'il avoient esemble par raison de bois que ledit Gautier avoit levé du Lis sans le congié du baillif de Lille, et disoit ledit Gautier qu'il l'avoit fait du congié audit Johan, lors baillif de Heloyn. Et quant ledit baillif ot fait s'enqueste, il trouva que ledit Johan avoit donné congié audit Gautier de lever ledit bois, et lors il le delivra audit Gautier et condempna ledit Johan Annere a aler a Saint Jaque.

Requis du temps qu'il a veü fere les exploiz dont il a deposé des molins, dit que par l'espace de 25 ans. Et plus n'en siet de l'article.

... dit quar il le croit, et dit pour ce qu'il a veü et sceü que les poicheurs accensent lesdites poicheries du baillif de Lille ou de son commandement, et la cense paient au receveur de Lille, mes il ne siet mie combien de lonc la poischerie dure.

... riens n'en siet.

VIII. Johan de le Lis, ... de l'eage de 75 ans ou environ, le VI^e jour du mois de mars l'an dessus dit, ... [1] estre vray.

Requis commant il le siet, dit par son serement que il a bien veü par l'espace de 50 ans le baillif de Lille, ou celi de Heloin en nom de li, justicer en touz cas de justice es molins et es portes contenues oudit article, et en toutes les eaus d'entre Menin et Heloin et sus terre.

Requis des quieus exploiz il a veü user en especial, dit qu'il a veü pluseurs qui disoient qu'il avoient perdu blé esdiz molins, des noms des queus il ne se recorde et que ceus qui avoient perdu leur blé venoient au baillif de Lille ou au baillif de Heloin qui est mis par le baillif de Lille, et se plaignoient de leur blé qu'il avoient perdu, et lors le baillif venoit aucune fois es molins et aucune foiz en une terre que l'en appele Guelehen, et la vit qu'il appeloit les hommes et autres bonnes gens et enqueroit la verité du blé qui avoit esté perduz et ceus qu'il trouvoit coupables il justisoit et aussi vit il fere de pluseurs qui se combatoient es molins es portes et entour les molins sus terre.

... croit l'article estre vray et le croit pour ce qu'il vit une loge bastie sus estaches sus la rivere et outre ledit pont, et la vit le baillif de Heloin qui assembloit ses hommes et des esclevins et fesoit loy a pluseurs querelans de pluseurs choses.

Requis se il siet les cas, dit ne li en souvient, mes il le vit fere pluseurs foiz, et estoit presenz, et dit encores que il vit par tout le temps dessus dit que le baillif de Heloin ordenoit un porveour et le fesoit serementer a recevoir le longuel des marcheandises et denrees qui passoient par mi les portes, et vit une meson entre le moster et la riverete ou il avoit taverne et que en celle meson fut ocis un homme qui avoit nom Lorin et le ocist un homme qui avoit non Florin Alart, et vit ledit homme mort, et vit venir en ladite meson le baillif de Heloin et fere l'enqueste, appelés les hommes, et puis ledit baillif fit prendre et enfoïr il le mort.

Requis des presenz a fere ladite enqueste, Johan de Les, si comme il croit. Des noms des autres ne li souvient.

Requis du temps, dit que 30 ans a ou plus.

Item, que les molins dont il a parlé ou premier article ont tel privilege que nuls molins de vent ne puet moudre d'entour une liue et que touz ceus d'entour le molin une liue devent venir mudre esdiz molins, et se il mulent ailleurs, il perdent la farine et sunt en amande de 60 s., et dit qu'il a touz jours veü que le baillif de Heloin establit sergent en la presence des hommes a garder le monnage et les amandes aussi biens devers Menin en la chastelanie de Tournay comme deçay et que quant aucuns avoit meffait a perdre la farine et paier l'amande, le sergent aloit tout entour la liue pour gager celi qui s'estoit meffait, ausi bien en la chastelenie de Courtray comme en celle de Lille.

Requis par combien de temps il a ainsi veü user, dit par l'espace de 50 ans ou plus.

Encores dit qu'il a veü que le seingneur de Menin doit paier checun an 8 l. au receveur de Lille et croit que ce soit par raison de la franchise du pontage. Et plus ne siet dudit article.

dit l'article estre vray et le dit pour ce que il a veü touz jours les pescheurs par l'espace de 60 ans ou de plus qui accensoient lesdites pescheries du baillif de Heloin une fois a poisson, autre fois a deniers, et paier ladite cense au receveur de Lille, et dit qu'il a veü que les pecheurs qui accensoient lesdites eaus du baillif de Heloin les poischeent des les eaus mons. Guillaume de Nivelle juques a Halebeke et outre.

Requis des noms des poicheurs qui accensoient lesdites eaus dudit baillif, dit : Richart du Pont, Lambert de la Nede, Johan de le Lis, Johan et Lambert le Lonc, freres. Et dit par son serement que toute la joustice de ladite eau, des les eaus dudit mons. Guillaume juques a Halebeke est des appartenances de la baillie de Lille. Requis comment il le siet, dit pour ce quar il a touz jours veu que le baillif de Heloin prenoit toutes les aventures et forfaitures en l'eau, et chaçoit par l'eau les meffaiteurs. Requis se il en siet nul en especial, dit que oïl, quar il vit Michiel le Crouset qui estoit obligés en pluseurs debtes a pluseurs, et pour ce que le baillif de Courtray ne le justisast, il se mist en la loge dont il a dessus deposé, et fit venir une nef en la rivere, qui vait de Menin a Courtray, sus laquele il mist de nuyt pluseurs de ses denrees, par fouir a ses debteurs. Et lors uns de ses debteurs qui avoit nom Jaques le Polere ala querre le baillif de Heloin, li queus prist ladite nef et les denrees et la fit mener au pont de Heloin et fit loy des denrees es creanciers. Et plus n'en sient (sic).

... riens n'en siet.

IX. Johan Li Bornes, ... de l'eage de 58 ans ou entour, [1] dit par son sairement l'article estre vray. Requis comment il le siet, dit qu'il a touz jours veü par l'espace de 30 ans justicier et fere touz esploiz de justice au baillif de Heloin esdiz molins et portes et ausdiz rivages et es eaus tant en cas de laroncin quant es autres cas et meffaiz qui y avenoient. Item dit qu'il a veü venir le baillif de Heloin et le baillif de Lille pluseurs foiz outre les molins en une piece de terre que l'on apele Guelehan, et a veü fere ausdiz baillis enquestes et franques verités et fere justice et excequcion de touz meffaiz qui avenoient et punir les meffaiteurs chescun selon son meffait qu'il avoit meffait es diz molins, portes, rivages et eaus.

Requis s'il savoit nuls des noms des meffaiteurs qui eussient meffait ne a qui il eussient meffait, dit que il ne li en souvient, et dit qu'il a veü touz jours que les baillis de Heloin prenoit le serement des moniers et des mosturiers de garder le droit du seingneur et le droit des bonnes gens. Encore dit que le baillif de Heloin establissoit sergent pour garder tout entour une liue desdiz molins que nuls n'alast modre es autres molins et dit cis tesmoins qui parlet qu'il en fu sergent par l'espace de deus ans, et que li baillis en avoit l'amande de touz ceus qui moloient de liue entour lesdiz molins a autres molins, et cil qui parlet, la farine qui estoit forfaite et 2 s. pour l'amende, et ausi bien sergentoit il en ladite liue en la chastelanie de Courtray comme en celle de Lille, et prenoit la farine et les deus solz. Et plus ne siet dudit article.

... dit par son serement que il croit mieus que la rivere et les portes soient de la juridiction et jostice de Lille que non, et le croit pour ce qu'il a veü touz jours que le baillif de Heloin et le baillif de Lille fasoient leurs enquestes et rendoient loy, appellés les hommes en touz cas et en touz meffaiz qui avenoient en une loguete qui estoit assise sus estaches sus l'eau contenue oudit article. Requis en quel cas il a veü les diz baillis excercer de cas de joustice en la dite loguete, dit par son sairement qu'il vit le baillif de Lille qui vint fere enqueste en ladite loge de bois qu'il disoit que Gautier de la Beke avoit perdu, que lidiz baillis disoit qu'il avoit levé sans congié, et cis Gautiers disoit qu'il l'avoit levé par le commandement de Johan Annere, alors baillif de Heloin, li quies Johan li avoit nié que ne li eüst commandé, et pour savoir la verité, le baillif de Lille fit l'enqueste en celle loge et trouva que ledit Johan Annere li avoit douné congié de lever ledit bois, et pour ce le delivra au dit Gautier, et condempna ledit Johan a aler a Saint Jaque pour ceste cause. Requis du temps que ce fu, dit que entour pres de 20 ans, et dit par son serement qu'il ne vit onques justicier en ladite eau, et molins et portes, autres que le baillif de Heloin ou de Lille.

... dit l'article estre vray.

Requis comment il le siet, dit pour ce qu'il a veü les poischeurs de Menin et de Heloin qui avoient accensé les dites eaus du baillif de Lille ou de son commandement poischer des l'eau mons. Guillaume de Nivelle juques a Halebeke et oustre Alebeke juques a Five, et il meïsmes les a aidé a poescher, a ceus qui avoient accensé, pluseurs fois par les lieus dont il a deposé. Requis en quiel temps il a veü exploiter et poeschier esdiz lieus dit que au temps que le conte tenoit toute la terre et ou temps que le roy tenoit Lille, et le conte Courtray.

... riens n'en siet ...

X. Ph. li Clers, ... de l'eage de 40 ans ou environ, ... [1-4] riens n'en siet, fors tant qu'il dit qu'il a esté receveur pour le conte de Flandres par l'espace de VII ans, avant les guerres, et dit que en celi temps il a checun an receü du seingneur de Menin 8 l. de par. que les pons de Menin devoient checun an aus rentes le conte, des biez de Lille. Requis s'il siet par quele cause il le doit, dit que riens n'en siet et plus ne siet desdiz articles diligenment requis.

XI. Johan de Lers, ... de l'eage de 80 ans ou plus, [1] dit l'article estre vray. Requis commant il le siet, dit quar il a veü ou temps la dame de Courtray qui tenoit Courtray et les apartenances et ou temps du conte de Flandres que le baillif de Lille justisoit par le conte en touz cas de joustice es II. molins qui sunt sus le Lis devers Heloin et les portes, et vit que le conte et la contesse, sa mere, firent fere les portes et les molins, et prenoient les profiz par raison de la chastelanie de Lille, et vit encores que les molins furent ars une fois et il les firent refere. Item dit qu'il vit pluseurs gens qui se complaingnoient au baillif de Heloin qui estoit mis par le baillif de Lille de pluseurs batteure et meffaiz, et il venoit es molins et en une piece de terre que l'en appele le Galeen, et la mandoit les hommes et d'autres gens et aprenoit la verité, et ceus que il trouvoit coupables il prenoit et menoit en la prison de Heloin, et les punissoit checun selon son meffait. Requis des nons de ceus qu'il a veü punir par ledit baillif, dit que ne li en souvient. Et plus ne siet dudit article

... riens n'en siet.

... dit l'article estre vray, fors tant que les poescheries commaincent des les eaus mons. Guillaume de Nivelle juques a Courtray. Requis s'elles vont plus en avant, dit qu'il ne siet, et dit qu'il a veu les pescheurs de Menin et de Haloin qui accensoient lesdites pescheries du baillif de Heloin et paioent touz jours ladite cense au receveur de Lille. Requis des nons des poescheurs, dit Johan le Lonc et son fil, Jehan Richart et ses freres et pluseurs autres. Et ce a bien veu par l'espace de 40 ans, et plus n'en set. Requis sus le IIII.article, dit que riens n'en siet.

XII. Gautier de la Beke, ... de l'eage de 60 ans ou environ, ... le VII jour de mars l'am dessus dit, [1] dit par son serement l'artcile estre vray. Requis comment il le siet, dit que il a tenu et a cense lesdiz molins avant le temps de la guerre de Flandres bien par l'espace de 11 ans, et les accensoit du grant receveur de Flandres et les tint 6 ans en compaingnie avec mons. Hue de Heloin, chevalier, et Giraut Le Sac, et amprés la mort dudit Giraut, o sa femme, et les tint par soi tout seul par l'espace de 5 ans, et dit quar par tout celi temps le baillif de Heloin, qui est mis par le baillif de Lille, justisoit et exploitoit touz cas de justice qui avenoit esdiz molins es portes et ou val, tant de larroncins faiz esdiz lieus, comme de meslees, et dit plus que il a veü aucunes fois et a la requeste de li meismes qui parlet, ledit baillif de Heloin venir en un terreor qui a nom Guelehen entre les deus molins, et illeuc prant veritez et fere enquestes pluseurs foiz et de pluseurs meffaiz de larroncin et de meslees, et mener a Heloin et punir checun selon son meffait, et plus dit il que lesdiz molins ont tele costume ou privilege que touz ceus qui sont demoranz entour lesdiz molins une luie, en quelque chastelanie que ce soit, sunt tenuz et doivent venir moudre esdiz molins, sauve ceus qui sunt demoranz levans et couchans dessouz le chapitre Saint Pierre et les autres gens, demorans de ladite luie entour les molins, molent a autres molins, il perdent la farine et paient 60 s. de amande au baillif de Heloin, et dit que toutes fois que l'on met noveau munier esdiz molins pour garder le monage et les amendes ou sergent pour garder le droit du seingneur et des bonnes gens, le baillif de Heloin en prent le serement, et y sont mis et establi par ledit baillif, et dit qu'il ont touzjours paié la cense desdiz molins au grant receveur de Flandres, qui recet de toutes les baillies. Et plus diz que esdiz molins a 3 hommes de fiez qui sunt appelé les heirs François de Ganz, les heirs Johan le Pours et Johan de Lovol, dit de la Monte, et dit que quant le baillif de Heloin a a fere loy ou justice par raison des molins ou de autre chose, il les appele toutes fois qu'il li plaist, et il en a mestier, et il y doivent venir et obeïr.

Requis se plus siet de l'article, dit que non.

... croit l'article estre vray, et le croit pour ce qu'il a veü une loge bastie sus estaches sus l'eau contenue en l'article, laquele loge fu ceti qui parle et puis la renta a Gilebert le Boulengier, et dit que cele loge il a veü pluseurs fois le baillif de Heloin qui fesoit venir les hommes et la fesoit loy et enqueste et aprise de verité.

Et mesmemant il dit quar il avoit debat entre ceti qui parle et Johan Aunere, jadis baillif de Heloin, sus ce que il disoit que cis Johan li avoit donné congié de lever bois qu'il avoit perdu, et puis le trouva en l'eau du Lis. Et puis le baillif de Lille l'ensuivoit et disoit qu'il l'avoit levé sans congié et le mist en prison, et tint par 9 jours et en voloit avoir amende, et puis icis Gauters s'en plainsit a mons. de Neele, conestable de France, qui lors tenoit Lille pour le roy, et disoit qu'il l'avoit fet du commandement dudit Johan d'Annere, lors baillif, et ledit Johan le li nia, et seur ce que ledit connestable commist par ses lettres a mons. Johan de Bois Martin, chevalier, et sire Baude le Borne, borgois de Lille, qu'il en seussent la verité, liquel alerent a Menin en ladite loge et illeques appelerent des hommes et des bonnes gens, et trouverent que cils Johan avoit donné congié audit Gautier de lever ledit bois, et pour ce delivrerent ledit Gautier tout quitte, et fut condempné ledit Johan a aler a Saint Jaque.

Item dit que le baillif de Courtray si avoit fait deffense que nuls ne joast a dez en la chastellanie de Courtray, et vit que quant les vallés ou autres gens voloient joer as dez, il venoient joer en ladite loge pour estre hors du pooir au baillif de Menin, et illeques estoient franc.

Item dit qu'il vit puis 6 ans en çay que les pescheurs de Menin et de Heloin mistrent un sac en l'eau qui court souz ledit pont de Menin pour prendre anguiles, le baillif de Menin l'en leva et l'en porta, et le pescheurs se plainsirent au baillif de Heloin et au baillif de Lille Le baillif de Lille fit tant par contraiente aus gens au seingneur de Menin et a son baillif qu'il rendirent le sac, et plus dit il que Johan de Relins disoit que l'on li avoit emblé argent es molins, et s'en plainsist au baillif de Heloin, et d'une perte de ventelles qui avoit esté faite a Woygat, et ledit baillif de Heloin en fit l'enqueste sus le Guelehen, et le baillif de Courtray en voloit fere loy. Lors cis qui parle, qui lors tenoit lesdiz molins, ala au conte a Huyrondalle, et li demanda a qui il apartenoit a fere justice desdiz meffaiz ou au baillif de Courtray ou au baillif de Heloin, li quieus contes dist qu'il apartenoit au baillif de Heloin et manda par ses lettres au baillif de Courtray qui lors estoit qu'il ne s'en meslast et qu'il en laissast user et fere loy audit baillif de Heloin, en qui baillie et juridiction ce estoit. Et lors ledit baillif de Heloin en fit loy et justice. Et plus ne siet dudit article.

dit par son serement l'article estre vray, fors tant qu'il ne siet mie la ou la pescherie de l'eau commence au dessus de Menin, mes il dit bien que elle vait juques a Courtray et juques a Le Beke et outre. Requis comment il le siet, dit pour ce quar il a veu pluseurs fois poeschier les pescheurs de Menin et de Heloin qui accensoient les pescheries du receveur de Lille et audit receveur paioent ladite cense.

Item dit que devoir des nes et des denrees qui vont par le Lis et passent par les portes paient le longuel a celi qui accense du receveur de Flandres par raison de la chastellanie ou baillie de Lille ou de Heloin, et se aucun des accenseurs se plainsist de aucun qui s'en fust alez sans paier le longuel, le baillif de Heloin en avoit la cognoissance et le punissoit et en levoit l'amende de 60 s., et li fesoit paier le longuel, et aussint quant autres personnes se plaingnoent par raison de debte ou d'autre meffait, le baillif de Heloin les arrestoit et fesoit loy a chescun.

Item dit que le seingneur de Menin doit checun an, de rente, a la Saint Johan, 8 l. de par. au receveur de Lille par raison de la franchise du haut pont de Menin.

... riens n'en siet.

Encore dit du secont article que il a veü touz jours justicier le baillif de Heloin par toute la chaucie des le molin juques a Haut Pont, et plus n'en siet diligenment requis.

XIII. Gautier Pollier ... de l'eage de 50 ans ou environ, ... [1] dit par son serement l'article estre vray. Requis comment il le siet, dit pour ce qu'il a touz jours veü le baillif de Heloin qui est mis establiz par le baillif de Lille justicier et esploiter touz cas de justice es moulins, es portes, es eaus et ou rivage, des le pont de Heloin tout le chemin juques a la meson qui fu Gilebert le Boulengier, d'outre le pont pres du mostier. Requis des quieus cas il a veu justicier ledit baillif esdiz lieus, dit que il vit et sot que le prestre de Menin qui qvoit nom mons. Johan fu bleciés en la teste d'un baston de quoi Gilebert de la Hale le ferit, et fu pris ledit Gilebert sus la chaucie devant dite et menez a Heloin et mis en prison, et dit qu'il a veü pluseurs cas de larroncin et de meslees ledit baillif justicier et fere loy aucune fois es molins, autrefois ou hoat ou les nes passent, et aucune fois ou galehan, et autre fois en la chaucee.

Requis s'il siet nul autre cas en especial dont il ait veü justicier ledit baillif, esdiz lieus ou en aucun d'iceus, dit que ne li en souvient, fors tant qu'il a veü pluseurs fois le baillif de Lille prendre franques verités et fere loy ou galehan de pluseurs meffaiz que l'en fesoit es lieus dessus diz.

... dit qu'il est vray.

Requis comment il le siet, dit pour ce que il a veü touz jours les pescheeurs de Menin et de Heloin qui estoient establiz par le baillif de Heloin et touz autres qui se meffasoient estre justiciez en touz cas par le baillif de Lille et de Heloin quant li cas y afferoit, et dit qu'il vit une loge assise sus estaquetes, qui fu Gilebert le Boulengier, tenoit laquele loge le pere de ceti qui parle, sit, si com il dit, sus la rivere contenue oudit article, outre le pont, et vit pluseurs fois le baillif de Seloin pluseurs fois fere loy pour les hommes et autres bonnes gens de baillie de Heloin en ladite loge, entre pluseurs gens et de pluseurs meffaiz, lerroncins et meslees et autres meffaiz.

Requis entre queus personnes et de queus meffaiz, dit que ne li en souvient, et dit plus que il a veu pluseurs fois que quant aucunes personnes de la ville2 de Menin se doutoient que il feüssent pris du baillif de Menin par debte qu'il deüssent ou par autre chose il s'en aloient en celle loge, qu'il ne fussent pris, pour ce que ce estoit en la baillie de Heloin ou li baillis de Menin n'avoit point de pooir ne de juridiction, et la estoient a garant, et dit qu'il a touz jours veü avant le temps des guerres, et especiaument avant la bataille de Mont en Pevre les choses dessus dites, et justicier le baillif de Heloin par tout le Lis, quelque part qu'il se estendet en la ville de Menin.

Requis s'il siet nuls exploiz que il en a veü fere, dit que oïl quar il a veü pluseurs fois les osteliers de Menin, quant il avoient acreü leurs denrees as mariniers qui passoient par le Lis, et il n'en pooient estre paiés, qu'il venoient au baillif de Heloin qui arrestoit les mariniers, les nef et leurs denrees et tenoit pris et arrestés juques il eussient paié ce que il devoient.

Requis des nons de ceus qui se plaingnoient ou qui estoient arrestés, dit que ne li en souvient.

... dit l'article estre vray, fors tant qu'il dit que lesdites pascheries commencent dés les eaus mons. Guillaume de Nivelle par tout le Lis juques a Halebeke et outre. Requis comment il le siet, dit pour ce qu'il a veu poescher et Johan et Lambert le Lonc, freres, Gilon Richart et Guillaume de la Pasturele, et maintenant a leurs heirs et dit qu'il accensent ladite poescherie du receveor de Lille ou de son commandement et paient audit receveur ladite cense.

Item dit seur le premier article que toutes les fois que noveaus mosturers est mis esdiz molins, qu'il y est mis par le baillif de Heloin et par les hommes, et que le baillif de Heloin prent et recept le serement dudit mousturer de garder le droit du seingneur et le droit de bonnes gens, et aussi prent il le serement, appelés les hommes du sergent qui est establiz a garder le monage et dit que lesdiz molins ont tel privilege ou coustume que touz ceus qui sunt demorans entour les molins une luie doivent venir modre esdiz molins, et se il vont moudre a autres molins il perdent la farine et paient 60 s. d'amande.

Et dit que ledit serjant puet aler gager pour le droit du molin et par les amandes gager par toute la luie entour le molin aussi bien en la chastellanie de Courtry et de Ypre comme en celle de Lille.

... riens n'en set.

XIIII. Bon Jehans, ... de l'eage de 58 ans, [1] dit par son serement que il croit l'article estre vray, et le croit pour ce qu'il a veü touz jours le baillif de Lille justicier et exploiter touz cas de joustice qui y sunt avenuz, tant es portes, es molins, es rivages et on val quant ou Guelehen.

Requis de quieus cas ne de quieus personnes, dit que ne li en souvient, fors tant qu'il vit un munier qui avoit nom Guillot Troiart qui fu pris esdiz molins pour ce qu'il fu souspeçonnés d'avoir emblé blé esdiz molins, et en fu pris et menés en prison a Heloin, et puis ledit baillif en fit enqueste et appella les hommes devant les moulins et fu delivrés par ledit baillif. Item dit qu'il vit le baillif de Heloin venir en une loge qui fu Gilebert le Boulenger, tenoit le baillif de Heloin, et la vit ledit baillif justiser et fere loy, appelés les hommes et autres bonnes gens en touz cas qui y avenoient, tant en cas de larroncin comme en meslees de gens et d'autres meffaiz de touz cas qui avenoient esdiz lieus.

Requis des noms de ceus qu'il a veüz justicier, dit qu'il ne li en souvient pas, fors tant qu'il dit que uns hom qui avoit nom Cleis du Pin, demorans a Menin, se plainsit au baillif de Heloin qui lors estoit, qui avoit nom Johan Aumere, et disoit que uns mariniers, dont il ne siet le nom, li devoit argent de ses denrees qu'il avoit acreües en son hostel, et ledit baillif fit arrester par son sergent la nef et les denrees du marinier juques a tant qu'il eüst paié. Et dit qu'il vit que ledit baillif, appelez les hommes, mist et ordena un mousturer qui avoit nom Anequin Hubert pour garder le droit du seingneur et des bonnes gens.

... dit que autre chose ne siet fors ce que dessus a dit.

... dit l'article estre vray, fors tant qu'il dit que lesdites poischeries commencent des les eaus mons. Guillaume de Nivelle et vont juques a Courtray et Alebeke et outre. Requis comment il le siet, dit pour ce qu'il a veü poischer lesdites eaus es poicheurs de Menin et de Heloin qui les accensoient du receveur de Lille, et paieent ladite cense audit receveur pour les lieus dont il a deposé. Requis des noms des poïscheurs, dit Johan le Lonc, Gile Richart et ses enfans, et li meïsmes, qui a poisché pluseurs foiys ou ledit Gile, pere desdiz enfans, et plus ne siet dudit article.

Requis sus le IIII.article, dit que riens n'en siet.

XV. Martin Corne, ..., de l'eage de 64 ans, si com il dit ou environ, ... [1] dit par son sairement estre vray. Requis comment il le siet, dit pour ce que il meïsmes qui parlet fut prevost de Heloin par l'espace de III. ans, et vit justicier au baillif de Heloin qui estoit mis et establiz par le baillif de Lille esdiz lieus contenuz oudit article, en touz cas de justice, et ou val. Et, dit qu'il a veu fere en Guelehen par le baillif de Heloin et de Lille pluseurs enquestes et loy, appelés les hommes, tant de larroncins comme de meslees et d'autres meffaiz qui y avenoient et plus avant des les molins juques au pont qui est pres de l'eglise devers Menin, et coper et couillir les saules par tout entour le rivage pour metre en ladite chaucie.

Requis s'il siet nuls cas especial de quoy il a veü user ne justicier ledit baillif de Heloin ou de Lille es lieus dessus diz, dit que oïl : Johan Copin qui se combatit oudit molin a un homme dont il ne siet le nom, li quieus se plainsit au baillif et cis qui parle, du commandement audit baillif ; ala querre ledit Johan Copin et le prist et amena devant ledit baillif et le mist en prison dedens la meson de li meïsmes qui parlet, et puis le delivra, du commandement dudit baillif.

Item dit qu'il a veü que le baillif de Heloin, appelez les hommes de la baillie de Heloin, met et establit et ordene mousturer pour garder le droit du seingneur et des bonnes genz et prent le serement dudit mosturer, et ausint establist il serjant pour garder les mounans et les amandes des molins et prent aussi appelés les hommes, le serement dudit serjent. Et dit encores que tuit cil qui sunt demorans une liue entour les molins, en quelque chastelanie que ce soit, exceptés les hommes qui sunt levans et couchans souz Saint Pierre, doivent venir et sunt tenuz de venir moudre esdiz molins, et se il vont moudre a autres molins il perdent la farine et le sac et paient 60 s. de amende au baillif de Heloin, et le sergent qui est establiz a garder les monans les puet aussi bien prendre et gagier pour paier ladite emande en la chastelanie de Courtray ou de autre lieu comme en la chastelanie de Lille dedens ladite liue, quar ainsi l'a il veü user, tenir et garder continuement par l'espace de 40 ans et de plus.

... dit que autre chose n'en siet fors que dessus a dit.

... dit qu'il est vrais, fors tant que il dit que la poischerie desdites eaus commaincet des les eaus mons. Guillaume de Nivele, chevalier, et vait juques a Halebeke et outre. Requis commant il le siet, dit pour ce que il meïsmes qui parlet a poesché esdites eaus.

Requis des noms des poischeurs aveques les quieus il poischoit, dit que ou Gilon Richart, Johan le Lon, Lambert le Lonc, Gilion de la Pasturelle, Johan Richart et pluseurs autres, et dit qu'il accensoient lesdites pescheries du receveur de Lille ou de son commandement et paioent ladite cense audit receveur.

... riens n'en siet.

XVI. Johan Marengne, ... de l'eage de 80 ans ou environ, jurés et examinés le VIII^e jour du mois de mars, l'an dessus dit, [1] dit par son serement qu'il croit l'article estre vray, et le croit pour ce qu'il a veü par l'espace de 40 ans et de plus, qu'i a touz jours veü justicier en touz cas qui sunt avenuz tant en cas de larroncin quant de meslees et autres meffaiz esdiz molins le baillif de Heloin qui est mis et establiz par le baillif de Lille et dit qu'il a veü lever amandes audit baillif de Heloin d'aucuns dont il ne siet noms, qui disoient qu'il avoient meins blé que l'en ne trouvoit quant il estoit mesuré, et pour ce il estoient en l'amande de 60 s. si ledit baillif les en voloit lever, dudit mosturer qu'il garderoit le droit du seingneur et des bonnes gens, et ainsi establissoit il sergent et en prenoit le serement, appellés les hommes pour garder les mounanz et lever les amandes desdiz molins. Et dit encore que cil molin dont li articles parlet ont tel privilege ou coustume que nuls qui demeuret d'entour les molins une liue ne puet aler moudre a autres molins, et s'il vont moudre a autres molins, il perdent la farine et paient 60 s. d'amande au baillif de Heloin, exceptez les hommes de Saint Pierre qui sunt couchans et levans souz Saint Pierre, qui poent moldre la ou il leur plaist.

Item dit qu'il vit que Gautier de le Beke avoit perdu bois que il trouva ou Lis et par le commandement du baillif de Heloin qui lors estoit, qui avoit nom Johan Annerc et le baillif de Lille ensuivit puis ledit Gautier et l'en tint en prison a Lille et en voloit lever amande pour ce qu'il disoit qu'il avoit levé ledit bois sans congié, et cils Gautiers disoit qu'il l'avoit fait du commandement dudit Johan Annerc, et ledit Johan le li nia, et ledit Gautier l'offrit a prover, et vit que le baillif de Lille en vint a Guelehen pour savoir la verité, et appella les hommes et trouva que ledit Johan Annerc li avoit donné congié de lever ledit bois, et vit que il delivra tout quitte ledit Gautier, et ledit Johan Annerc fu condempnez a aler a Saint Jaque. Et plus n'en siet, diligaument requis.

... riens n'en siet.

XVII. Baudelot de la Haumete, ... de l'eage de 40 ans ou environ, si com il dit, jurez et examinez l'an et le jour derrenement dit, [1] dit l'article estre vray. Requis comment il le siet, dit que pour ce que il meïsme qui parle fu sergent au baillif de Heloin qui lors estoit, qui avoit nom Johan Gosse, et vit et sout ledit baillif justicier esdiz molins et es portes en touz cas de justice qui y avenoient, tant en cas de larroncin comme de meslees. Requis s'il en siet aucun par especial, dit que oïl, quar il vit Guillaume Quatre Culs qui avoit perdu un sac plein de blé esdiz molins et vint au baillif de Heloin et li pria qu'il en venist savoir la verité, et ledit baillif vint esdiz molins et trouva le sac et le blé et le mist en sa main, et plus n'en siet qu'il en fit, quar cesti qui parle s'en ala tantost autre part par les besoingnes dudit baillif son seingneur.

Requis si plus en siet, dit que non, fors tant qu'il siet bien que lesdiz molins ont touz jours au conte (sic) et de la chastelanie de Lille.

riens n'en siet.

riens n'en siet, fors tant qu'il a touz jours veü accenser lesdites poischeries du receveor de Lille ou de son commandement et paier ladite cense audit receveur, mes il ne siet mie ou elles se commancent, ne juques ou elles durent.

Requis sus le IIII.article, dit que riens n'en siet.

XVIII. Rogier Richart, ..., de l'eage de 24 ans ou environ, [1] dit qu'il croit qu'il soit vrays. Requis pour quoi il le croit, dit pour ce qu'il siet bien que lesdiz molins sunt du conte et qu'il vit mons. Pierre de La Val, chevalier lors baillif de Lille, qui vint esdiz molins et appella les hommes et mist et establit mousturer esdiz molins Guillaume Gregoire et prist le serement dudit Guillaume de garder bien et loyaument le droit du seingneur et des bonnes gens.

Requis si plus siet dudit article, dit que non.

... riens n'en siet.

dit l'article estre vray. Requis comment il le siet, dit quar il meisme et son frere ont accensé touz jours, et son pere aussi lesdites pescheries du baillif de Heloin, et paiont ladite cense au receveur de Lille, mes il dit que la poischerie desdites eaus commencent des les eaus mons. Guillaume de Nivelle et vont juques outre Halebeke, et plus ne siet, diligenment requis.

... riens n'en siet.

XIX. Daniel Guerant, ... de l'eage de 50 ans, [1] dit par son serement l'article estre vray. Requis commant il le siet, dit pour ce quar il a bien veü par l'espace de 35 ans le baillif de Heloin qui est mis par le baillif de Lille justicier touz cas de justice qui seront avenu esdiz molins, tant de lerroncin quant de meslees. Requis s'il en siet nul en especial, dit que oïl, quar il vit un homme qui avoit nom Copin qui fu pris esdiz molins, a Heloin, pour blé que l'en disoit qu'il avoit emblé esdiz molins et fu tenuz pris par l'espace de 8 jours, et puis ne siet comment il fit sa pais, mes il fu delivrés.

Item que il vit le baillif de Lille qui vint en Guelehen pour fere une enqueste de bois que Gautier de la Beke avoit perdu et li baillis de Lille disoit qu'il l'avoit levé de l'eau du Lis sans congié et en voloit avoir amande de celi Gautier et l'en tint pris a Lille, et cis Gautiers disoit qu'il avoit levé ledit bois par le commandement de Jehan Annerc, lors baillif de Heloin, li quieus Johan li nia et pour ce vint le baillif de Lille au Guelehen pour en savoir la verité et appella les hommes et trouva que cils Johan avoit donné commandement audit Gautier de lever ledit bois et delivra tout quitte ledit Gautier et condempna ledit Johan Annerc a aler en pelerinage a Saint Jaque. Et plus ne siet dudit article diligaument requis.

... riens n'en siet.

XX. Roger le Sec, de l'eage de 35 ans ou environ... [1] ... croit qu'il soit vrais, et le croit pour ce qu'il vit que mons. Pierre de La Val, chevalier, alors baillif de Lille, vint esdiz molins et appella les hommes et mist et establi mousturer esdiz molins Guillaume Gregoire et prist le sairement dudit Guillaume de garder le droit du seingneur et des bonnes gens, et vit venir conter ledit Guillaume a Lille devant ledit baillif de ce qu'il avoit fait esdiz molins, et plus ne siet dudit article.

... riens n'en siet, fors tant que il vit et fu present que Johan Brunbert, lors baillif de Heloin, vint en une loge qui estoit assise sus estaches en la rivere dont l'article parlet et qui estoit feu Gilebert le Boulenger, delay le pont de Menin, et vit qu'il y assembla les hommes et autres bonnes gens, et vit fere loy en ladite loge de gens qui se desheritoient et en heritoient autres. Requis des noms de ceus qui se desheritoient et de ceus qui estoient heritiés, dit que ne li en souvient. Requis du temps que ce fu, dit que entour 22 ans.

... riens n'en siet.

XXI. Rogier de la Haumete, ... de l'eage de 35 ans ou plus, ... [1] ... croit l'article estre vray, et le croit pour ce qu'il a touz jours accensé lesdiz molins des gens le conte, et dit qu'il a veu le baillif de Heloin qui est mis par le baillif de Lille touz jours justicier esdiz molins par l'espace de 15 ans et de plus, en touz cas de justice qui y avenoient.

Requis s'il siet nuls cas en espece dont il a veu justicier ledit baillif esdiz molins, dit que oïl, quar il vit un homme du nom duquel ne li souvient, qui demoroit outre le Lis, dedens la liue entour lesdiz molins, qui avoit molu blé au molin a vent, et puis vint esdiz molins contenuz oudit article, et la li baillis de Heloin qui avoit nom Johan de Sempene et prist ledit home et l'en mena pris a Heloin, et la le fit finer de l'amende a 60 s. pour ce qu'il avoit moulu a autre molin, et dit qu'il vit le baillif de Lille qui fit une enqueste ou Guelehen, de bois que Gautier de Le Beke avoit levé du Lis, et de ce depouset tout aussi comme Daniel Geraut, XIX^e tesmoing, a dessus deposé. Et plus n'en siet dudit article diligaument requis.

... riens n'en siet, fors tant que il a veü pluseurs fois le baillif de Heloin qui avoit nom Johan Gosse qui venoit en une loge qui estoit assise sus estachetes dela le pont de Menin en la riverete dont l'article parlet, et appeloit les hommes et autres bonnes gens et recevoit le desheritement de ceus qui se desheritoient et en heritoit autres. Requis de queus gens il y vit fere desheritement et heriter autres, dit qu'il vit Guillaume du Chaaingne qui se desherita en ladite loge en la main des eschevins de Heloin, et en herita ledit Johan Gosse. Requis du temps que ce fu, dit que entour 14 ans et plus n'en siet diligaument requis.

... riens n'en siet.

XXII. Guillaume de La Beke, ... de l'eage de entour 30 ans, ... [1] ... croit l'article estre vray.

Requis pour quoi il le croit, dit quar les molins sunt au conte et de la chastelanie et apartenances de Lille et de Heloin. Requis commant il le siet, dit quar il vit mons. P. de La Val, chevalier, qui estoit baillif de Lille, qui vint es diz molins et appella les hommes et y mist et establit un mosturer qui avoit nom Guillaume Gregoire pour garder le droit du seingneur et des bonnes gens, et dit plus quar il meïsmes qui parlet acheta blé a Heloin et le charga en l'eau du Lis pour mener a Courtray, et fit tant cils qui parlet vers ledit Guillaume Gregoire qu'il li donna congié de passer son blé, quar s'il l'eüst mené sans congié, il fust en l'amande.

Item dit que le pere de ceti qui parle envoia un sac de blé audit molin pour moudre et quant il fu audit molin, l'on demanda a celuy qui l'avoit amené combien il avoit de blé, et il dist que il en y avoit meins qu'il n'en fut trouvé quant il fu mesuré, et pour ce qu'il en fu plus trouvé dudit blé qu'il n'avoit dit, il fu arrestés, et le cheval qui l'avoit aporté, et puis le pere de cesti qui parle vint au baillif de Heloin et le pria qu'il li delivrast ledit blé, son vallet et le cheval, et il les delivra et quitta l'amande a son dit pere pour ce qu'il estoit mout ses acointes, et plus ne siet, diligaument requis.

Requis sus le II., le III, le IIII.article, dit que riens n'en siet.

XXIII. Guillaume d'Escovenant, de la parroisse de Menin, ... [1] dit qu'il a veü, passé a 24 ans, et par pluseurs fois, que le baillif de Heloin, qui par le temps estoient, metoient sergens esdiz molins pour garder le monage, et leur fesoit jurer par devant les hommes de la chastelanie de Lille, et dit qu'il a veü que les sergens mis par le baillif de Heloin gagoyent, entour les molins une liue, ceus qu'il trouvoient molans a autres molins qui estoient demoranz dedens la luye entour les molins, et prenoient la farine par forfaite et les gajoit par l'amande de 60 s., et li baillis de Haloin levoit ladite emande, exceptés les hommes Saint Pierre de Lille et les gens qui muevent d'Artois, les queus molent la ou il leur plest, et ce il a veü pluseurs fois avenir, mes il ne li remembre de noms des personnes, et dit encores qu'il a veü ou temps la dame de Courtray qui tenoit en douhere la chastelanie de Courtray que ses gens ne se mesloient de riens de portes ne dou val an le Lis, ains a veu que li baillis de Heloin y esploitoit sans nul contredit ausi comme es molins contenuz oudit article. Et cils qui tenoit les molins, il tenoit le peage du val et des portes.

... riens n'en siet.

..., dit qu'il a touz jours veü les poischeries de Menin en la poischerie du Lis se moivent par le baillif de Haloin, et que il rècevent estatuz de poischer du baillif de Heloin et que le baillif de Heloin condempna un homme en une amande de 10 l. pour ce qu'il poeschoit contre les estatuz dudit baillif. Et plus ne siet dudit article diligaument requis.

... riens n'en siet.

Et plus n'en siet, diligaument requis, sus touz les articles.

XXIIII. Johan le Quarel de Ront, ... de l'eage de 43 ans ou environ, ..., [1 et 2], dit par son serement que il croit que lesdiz molins soient des apartenances de la baillie de Lille et de Heloin, et le croit par ce qu'il siet bien que les molins dont l'article parlet sunt au conte et qu'il a touz jours veû le baillif de Heloin qui est establiz par le baillif de Lille a jousticier touz cas de justice qui y sont avenu, et metre et establir monsturers pour guarder le droit du seingneur et de bonnes genz. Item dit que il vit le baillif de Lille, du non duquel ne li souvent, et les homes de la ballie de Heloin, et pluseurs autres genz qui venirent ou Guelehen pour savoir la verité de bois que Gautier de La Begue avoit pardu et levé de la rivere du Lis et que li ballis de Lisle disoit qu'il l'avoit levé sanz congé, et cil Gauter disoit qu'il l'avoit levé du commandement de Johan Aymeri, alors ballif de Heloin, liquex Johan nia que il ne l'eut levé par son commandement, et puis ledit baillif de Lisle trova que il l'avoit levé par le commandement dudit Johan et delivré, tout quitte ledit Gauter et condempna ledit Johan a aler a Saint Jacque. Requis du tens que ceu fut, dit que entour 16 anz, et plus ne seit dudit article diligaument requis.

dit que les poicheries commencent des les eves mons. Guillaume de Nivele, chevalier, et vont jusques a Herlebeke, et outre. Requis comant il le seit, dit pour ceu que il mayme a poiché avec son oncle Giles Richart qui avoit ascensees lesdites pescheries du receveour de Lisle ou de son commandement et paiet ladite cense au receveor et peschoit es lieus dont il a dessus deposé, et pour ceu croit par son serement que lesdites eyves soient des apartenances de la baillie de Lisle, et plus n'en seit diligaument requis.

... rien ne seit.

XXV. Johan du Han, ... de l'eage de 60 anz ou environ, ... [1-4] ... rien ne seit fors que par oïr dire. Requis des nons a qui il oït parler, dit que ne li en sovient.

XXVI. Philippe du Pont, ... de l'eage de pres de 60 anz, ... le IX^e jour du mois de marz, l'an dessus dit, [1] dit par son serement l'article estre veray. Requis comant il le seit, dit quar il qui parle a bien esté ballis que souz ballis pour le conte, de la ballie de Lisle, par l'espace de 19 anz, au tans du conte Guy, et dit quar il a jousticé et exploité et fait justicer et expleiter par le ballif de Heloyn et par ses sergenz esdiz molins et eves contenuz oudit article de tout esploit qui avenoient es diz molins et eves, et levoit les amandes et feisoit lever par les sergenz de cieus qui demoroient une lieue entour les molins quant il aloient modre a autres molins, et ainsi faisoit il de touz autres meffaiz ou larroncins qui avenoient esdiz molins et eaus, et dit que il a touz jourz justicé et feit justicer en tout cas qui sont avenu des le chief du pont qui est pres du moustier devers Menin en çay, par devers Aloyn tant es eaus comme es molins et en la terre, et pour ceu seit et est certains que les molins, les eaus, le pont et la terre dessus dite sont des apartenances de la baillie de Lisle. Requis des nons de cieus sus qui il a feit expleit, dit que il ne li souvient, pour ceu quar son clerc qui avoit ses escriz les perdit touz ou tans des guerres. Et plus ne seit dudit article.

... rien ne seit fors ceu que dessus a deposé.

... rien n'en seit.

XXVII. Sire Baude le changeour, ... de l'eage de 75 anz ou environ, ... [1] dit par son serement l'article estre verai. Requis comant il le seit, dit que pour ceu que il qui parle fut receveor a Lisle pour le grant receveor de Flandres par l'espace de 35 anz et de plus, et dit quar il vit pluseurs foiz les briés de rantes du conte de Flandres qui estoient ordené par les chastelanies et ballies, et dit que il recevoit toutes les choses et rantes qui apartenoient au briés de la chastelanie de Lisle, et dit que par l'espace du tans dessus dit, il touz jours reçut jusques au tans de la derrere guerre de Flandres, tant du tans que les contes tenoient toute la terre, quant par le tans que li roys tenoit Lisle, touz les esmolumenz es parties dudit molin, des eaus, dou longuel et autres rantes ou redevances qui estoient dehues par raison des choses dessus dit du seigneur de Menin pour raison de la franchise du haut pont de Meinin et dou winage que ledit seigneur de Meinin lieve pres du moustier, prise 8 l.p. qu'il doit chescun an de rente au briés des rantes de la chastelanie et ballie de Lisle.

Item dit que toute la joustice du Lis, quelque part qu'il s'estende en la ville de Menin, est des apartenances de ladite chastelanie de Lisle.

Requis comant il le seit, dit que il maymes y a touz jours par le tans dessus dit feit guager et exploiter pour les rantes et redevances qui sont deüz es briés de la chastelanie et ballie de Lisle sanz contredit de nulluy. Item dit que il mayme, quant la chastelanie de Lisle estoit en la main le roy, fit reffere les portes dessouz le Lis en non du roy.

rien ne seit, fors ce que dessus a dit.

... ne seit mie la ou lesdites poicheries comancent ne jusques ou eles s'estandent, mes il dit que il les a pluseurs foiz ascensees a cieus qui les poichoient et receü l'ascense d'eaus et mis es contes de la chastelanie et ballie de Lisle.

... riens n'en seit, et plus n'en seit diligaument requis.

XXVIII. Robbert Boniaus, sergent de la baillie de Lisle, de l'eage de 60 anz ou environ, ... [1] dit l'article estre veray. Requis comant il le seit, dit pour ceu que il mayme qui parle, passé a 25 anz, par pluseurs foiz, comant (sic) sergent de la ballie de Lisle, du commandement celi qui estoit par le tans, a la requeste de sire Baude le changeur, adonc receveur des rantes du conte en la chastelanie de Lisle et ballie, a guagez les moniers des molins contenuz oudit article et arresté la mousture esdiz molins par deffaute du payement de la rante desdiz molins, et dit que il a vehu exploiter autres sergenz de la ballie de Lile en sanblable cas et sanz debat d'autre justice. Et dit encores que il qui parle, comant sergent de ladite ballie de Lisle, du commandement Johan Gosse, alors ballif de Heloyn, passé a 20 anz, guaga et prit guages en l'ospital qui siet entre le grant Lis et le moustier de Meinin, mes il ne seit par quel cause cen fu, et plus n'en seit diligenment requis, fors tant que il dit que lesdiz molins sont au conte et de la ballie ou chastelenie de Lisle et des apartenances.

... rien plus n'en set, diligenment requis.

XXIX. Johan Li Bons, ... de l'eage de 50 anz, ... [1] dit l'article estre veray. Requis comant il le set, dit pour ceu quar il touzjorz a vehu, passé a 35 anz, le ballif de Heloyn qui est mis pour le ballif de Lile justicer et expleiter touz cas de justice qui sont avenuz esdiz molins, es portes et ou val, sanz nul contredit, par tant de tans comme le conte de Flandres les tint en sa main, et a vehu venir par pluseurs foiz le ballif de Heloyn au Guelehen et recevoir frankementez de cieus qui estoient accusez d'auquns meffaiz. Requis se il seit nus en especial de quoi lidit ballis a receü frankementez, dit que oïl quar ceti mayme qui parle perdit ses engins et filez en la rivere et lors il s'en vint plaindre audit ballif de Helyon, lequel ballif vint en Guelehen et appela les homes et la reçut frankementez desdiz filez et engins et trova que Johan d'Arseres les avoit pris, et fut condempné a randre lesdiz filez et engins a cesti qui parle et en guaga l'amande audit ballif.

... dit par son serement que par tout la ou la rivere du Lis court, en la ville de Meinin, est de la chastelenie et ballie de Lille et des apartenances. Requis comant il le seit, dit que un sien conpains qui avoit non Johannekin Richart rendit un sac pour prandre anguilles en la rivere dont l'article parle et Johans Li Granz, ascenseour de Meinin alors, prit le sac et l'enporta, et celi Johannekin se vint plaindre audit ballif de Heloyn, lequel contrainsit ledit Johan le Grant a randre ledit sac. Item dit que il vit fere une enqueste en une louge qui estoit assise sus le Lis, qui fuï Gilebert le Belongier tenoit, qui sire Baude, changeur de Lile fit en ladite louge, que Gautier de la Beke avoit perdu, et la fit fere du commandement du ballif de Lile, et plus n'en seit dudit article.

... dit que il est verais, et dit pour quoi il le seit, pour ceu que il mayme qui parle est pecheour et bien a poiché esdites eaus par l'espace de 34 anz et de plus, et dit que lesdites poicheries comancent aus eaus mons. Guillaume de Nivele, chevalier, et s'en vont jusques a Five outre Arlebeke, et ascensoient lesdites poicheries du receveor de Lile et payoient ladite cense audit receveour et plus n'en seit, diligaument requis.

... rien n'en seit.