> Une enquête sur la forêt de Roumare
En l’an de l’incarnation Nostre Seigneur mil iic quatre vins et quinze, le vegile de la feste Nostre Dame a mi aoust, je Climens de Savy, clers de très noble prince Phelipe, par la grace de Dieu, roi de France, rechiu unes lettres pendans seelees de sen seel, dont la fourme est escrite chi après, par la vertu de laquele letre je fis savoir a Gononvile, a l’ostel mon segneur Nicole Malesmains, qu’il, a l’endemain de ladite feste, dedens heure de midi, vausist estre a Saint Joire de Baukiervile pour aller avant en l’enqueste a lui et a mi commise selonc le teneur desdites letres, et fis aussi asavoir a l’abé et au convent de Saint Joire qu’il fussent par devant nous deux, ou par devant mi se mesires Nicoles n’i venoit, pour aller avant selonc ledit mandement, et i apelai aussi le forestier de la forest de Rommare. Auquel jour je ving a Saint Joire et atendi ledit mesire Nicole dusques après nonne. Et quant je vi qu’il ne venoit, je resgardai que par ladite letre j’avoie pooit d’aller avant sans lui, et considerai que li delais pooit estre damageus a nostre segneur le roi, et dis audit forestier qui presens estoit et au procureur l’abé et le couvent de Saint Joire, qui se comparut par la vertu d’une procuration dont la teneurs <est>a chi après escrite, que je iroie avant en l’enqueste tous seus, selonc che qui m’estoit commis. Et après mout de debas, je demandai audit procureur se se eglise avoit letres, privileges ne estrumens ou aucun fait especial de l’usage qu’il disoit que l’eglize de Saint Joire avoit en ledite forest, et que s’il les avoit, qu’il le mes monstrast et qu’il proposast toutes ses bonnes raisons a fonder sen usage, s’aucunes en avoit, et se usage y avoit. Li ques procureur respondi que dudit usasge l’eglize avoit mout de privileges, lesques volentiers il me monstreroit et diroit ses raisons volentiers, par lesqueles il demourroit eldit usage, et me monstra letres dont les teneurs sont chi après escrites, et dit que avec les letres avoit l’eglize tel et si lonc usage que memoire n’estoit mie du contraire.
Et pour che que a savoir se ladite eglize avoit mesuré et en autre maniere usé qu’ele ne pooit ne ne devoit, ou fait excés de l’usage devant dit et fait et usé outre che que ses drois n’estoit ne ne li donnoit, il convenoit veir a l’uell tous les edefices de l’abeye, je dis que je les veloie veoir l’un après l’autre. Et les vi et les resgardei diligamment trestous, viés et nouviaus, desous et desus,
Et toutes ches choses veües je trouvai que a l’entree d’un parloir a l’entree du cloistre, on avoit fait sieges tout entour de gros mairiens de caine escarre et de grant pris, leques on peüst avoir fait d’autre matere pour bien peu de coust.
Item je trouvai que li edefice qui estoient bien anciennement fait, si comme on me dist, estoient fait de kemun mairien, et chil qui erent plus nouvel et qui n’estoient mie mout anchien estoient de si gros mairien, si bel et si alignié que ch’estoit mervelles a veir et a regarder. Et bien sanloit que selonc le nature des edefices, qu’il i eüst plus gros mairien et plus de mairien qu’il ne deüst et que de plus petit mairien le peüst on et deüst avoir fait, et qui autant durast et plus. Et estoit mervelleuse coze a regarder les mairiens assis sur les murs des edefices que on dysoit qui n’estoient mie des plus anchiens de laiens, de lonc en lonc les murs, car aucun en avoient 2 piés et demi de face aparant, et aucun 2 piés, et en aucun desdis murs en avoit mis 2 gros l’un sur l’autre, et en aucun liu 3 dont il sanloit mervelle a veir, et de quoi li mur erent mont carchié, et dysoient aucun que les maisons fussent plus durans de plus petits mairiens, et que che n’estoit fors wastemens de mairien et de forest.
Après je trouvai une maison el clos deriere desus le puis, faite en maniere de pavellon, sur 8 grosses estakes a gros las au dehors, fais de cuer de caine, a lingne batant en escarure, et par desus trop bel mairien pour l’engien du puis, li ques edefices si grans et de si noble mairien ne desirroit mie si grant chose, si comme il me sanloit et a mout d’autres ; le disoient aussi et briement de tel coze ne puet on faire monstre, ne par escrit ne autrement, fors par veoir a l’oell, mais li veirs ensegne a plain s’il ont mesusé ou non.
Après je vi en le tonnelerie que a l’ennee d’oen il avoient fais 24 tonniaus de espesse deuve de caisne de prés de 2 dois d’espes et erent li tonnel assés plus grant que de muyson commune, tout fust il qu’il en eüst bien laiens prés de 100 viés ancore bons, des ques en aucuns avoit eu cidre, et en aucuns vin, si comme il sanloit et comme on le disoit, et pour ces 24 tonniaus faire il disoient que li forestiers l’en avoit livré 14 caines gros. Et enquis au plus soutivement que je peuch s’il en vendoient, donnoient ne escangoient nul, mais je ne peuch riens trouver qu’il l’eussent onques fait.
Après je trouvai a la caronnerie si gros hestres que c’estoit mervelles a veir, de quoi on faisoit les caretes, limons, caretix, roes, rays et essius, et convenoir que an faire tele coze eüst grans wast de mairien, car il n’i avoit nule brance, mais tiges courtes, grosses, presterines. Et de tel mairien faisoit on le fu a le tuilerie et au caus quant li four cuisoient si comme on disoit, mais je ne peuch trouver que des tuiles ne de la caus ne des cendres ne des heirens reussis de l’usage, ne de riens qui venist de l’usage qu’il en vendesissent, donassent ou alienassent riens, et s’en enquis au mix que je peuch.
Item il ont fait un batel en Saine de leur usage, mais je ne peuch trouver qu’il le louassent ne prestassent onques et s’en enquis au mix que je peuch.
Item el clos de l’abeie a 1 molin a vent fait puis 12 ans en encha de leur usage, si comme il dient, el quel nus ne puet maure fors chil de l’abeie et est lidis molins avironnés de bos haut et de montaingnes aussi comme de 3 pars, si qu’il ne puet avoir vent soufisant pour maure, fors d’un costé ou de 2 au plus, et est de moult grant mairien et sanle que che ne soit mie choze necessaire, ne qui deüst estre faite d’usage, car devant il n’i avoit onques mais eu molin.
Item en pluseurs leus des maisons j’ai trouvé les solives si drues et de si gros mairien que il n’a se peu non entre 2 solives aussi comme se che fussent garites de fortereches, et che puet cascuns veir a l’uell en trop de lius.
Item tout fust il qu’il se peüssent raisonnablement passer des estans du cuer, tout soient il anchien et de anciene fachon, li forestiers, puis 4 ans a, leur a livré grant mairien et gros de caine pour faire nouviax estaus et sont commenchié prés de 4 ans a, et ne sont mis encore parfait, anchois en gist grant plenté du mairien en le nef de lmeur moustier, d’une des parties, et avec che mairien en le nef du moustier, a 5 pieches de cainne dont l’une a 60 piés de lonc et les autres en ont cascune plus de 40, et i sont ilec de mout lonc tans, ne ne peut trouver pour quoi c’estoit faire. Et sanle que che soit pour verges a petis engiens.
Item li abbés et li procureurs du couvent reconnut devant mi que il n’a mie encore 2 ans qu’il soloient prendre pour ardoir branques, ne ne pooient riens couper pour leur ardoir enprés terre, ne n’avoient onques fait de quoi il souvenist, fors, puis 2 ans ara en decembre qui vient, et adonc li serjans forestiers leur livra usage en ccertain liu pour couper le hestre enprés terre, pour leur ardoir, par la vertu d’une letre qui fu empetree de nostre segneur le roi l’an mil cc iiiixx et xiii el mois de decembre, et sanle que la letre ne s’i estende de riens qui bien le regarde et ensi chil qui soloient prendre leur usage en branke, le prindrent, puis 2 ans a, par terre, et connut li forestiers que c’estoit voirs.
Après ces choses je vaus savoir combien il avoient wasté de forest puis qu’il commenchierent ensi a user, et alai a la livree, present l’abé, le procureur du convent et le forestier, et trouvai par commune estimation du forestier et d’autres gens que puis le tans qu’il commenchierent ensi a user il ont bien wasté, coupé et aloué 3 acres et demie de forest assés soufisant et plus encore, selonc che que on disoit ilec en le livree, et que chil qui s’i connisoient tesmoingnoient. Et dist li forestiers qu’il cuidoit que leur letre si estendesist et ensi l’entendoit il. Item il ont pris de leur abeie 2 molins a 2 grans liues et reconnut li abbés et li procureur du convent que il usoient pour lesdis molins du tout en tout en le maniere qu’il usent pour le cors de ladite abeye.
Chi après sont les commissions, li procurations et li teneur de leur privileges :
a est, omis.
1 Paris, 1293, décembre. Acte de Philippe IV le Bel
2 1198, 18 mai. Acte de Richard, cœur de Lion
3 1295. 15 août. Acte de l’abbé de Saint-Georges de Boscherville
4 1295. 14 août. Acte de Philippe IV le Bel
Elisabeth Lalou. "Une enquête sur la forêt de Roumare (Archives nationales, J 781 n° 16)", dans Enquête sur la forêt de Roumare, Elisabeth Lalou, Benjamin Suc, éds, Orléans : Institut de Recherche et d'Histoire des Textes, 2006. (Ædilis, Publications scientifiques, 4). [En ligne] http://www.cn-telma.fr/enquetes/roumareenquete1/ .