Bertaut de Villiers, de la chastellerie de Sanliz, est mestres de ladite forest et a letre dou roi Ph. au gages que Harchier qui fut avant lui avoit, c’est assavoir 2 s. de gages par jour, et li fut donée celle letre a Montargis, le mardi davant la feste Nostre Dame Mi Aoust en l’an m.cc.lxxvi, et dit que il ot le servise a sa requeste, que il le demanda le roi, et le roi le li dona. Et dit cil qui parle que son pere Renou de Villiers avoit até ou servise le roi toute sa vie.

Et a le dit Bertaut une autre letre dou roi Looys que li rois li avoit donée la garde de la forest de La Ferté Macie au gages que Arnou le Flament avoit, ce est assavoir 2 s. par jour. Et fut celle letre donée a Bone Ville sus Touque, le jueusdi d’aprés la feste de la Magdelene en l’an m.cc.lxix, et ot Bertaut ledit servise a sa requeste, aussint conme il a dit d’avant.

Et a ledit Bertaut une autre letre dou roi Looys dont il ot le servise de la forest dou Bur en la baillie de Quaan a 8 d. de gages, et fut celle letre donée a Paris as oictieves de la feste Saint Johan Bauptiste en l’an m.cc.lxvii.

Requis conmant les sergenz qui sunt souz lui ont servi en leur servise de la forest, il dit que il ont servi bien et leaument a son escient.

Requis quanz sergenz il a souz soi, il dit 5.

Requis de Chapellet son compaignon, il dit que il s’en apanssera. Et si ne parla puis a nous.

Odin Quoipin, dou Bois le Roi, de Biere, est sergent de ladite forest souz ledit Bertaut et Chapellet et a letre dou roi que li rois manda a mon seigneur Johan de Biaumont que il meïst ledit Odin, porteur desdites lettres, en aucun servise de forez, a 6 d. de gages ou a 8 d., des ques gages ledit Odin a 6 d. par jour. Et fut celle letre donée a Poitiers, le jueusdi d’apres la feste Saint Matie l’Apostre en l’an m.cc.lx.xvi. Et li fut donée ladite letre et le servise a sa requeste et dit que il le demanda le roi, et li rois le li ostrea. Et dit que il qui parle avoit até lonc tans ou servise le roi a garder ses brachez environ Guillaume Samoisiau.

Requis de ses conpaignons, conmant il ont servi en leur servise et en la forest, il dit par son seremant que il ont servi bien et leaument a son escient, et si conme il croit.

Requis de ses mestres, conmant il se sont menez en leur baillie, et conmant il ont servi, il dit par son seremant que il ne set en aus que bien et leauté. Et croit que il font leur servise bien et leaument.

Adenot Gautier est sergent en ladite forest et a letre dou roi a 6 d. de gages par jour et li fut donée celle letre a Vitri, le lundi après la Magdelene, en l’an m.cc.lx.xvii.

Requis par qui il ot le servise, il dit que il le requist le roi et li amentut que Joham Gautier son pere avoit servi le roi en la forest de Goumez et que il avoit até tuez ou servise, et lors li dona le servise que il a. Et dit cil qui parle que avant la letre donée que il avoit servi en celui servise 9 anz et a cez gages que il a, par le conmandemant le roi.

Requis de ses conpaignons conmant il ont servi en ladite forest, il dit que il croit que il aient servi bien et leaument.

Requis de ses metres conmant il se sont maintenu en leur baillie et conmant il ont servi a.

Estiene Flaci, nez de la parroisse de Loiri, est sergent en ladite forest de Courtci et a letre dou roi a 6 d. de gages par jour, et li fut celle letre donée a Saint Germain en Loie ou jour de la feste Saint Vincent en l’an m.cc.lx.xvi, et dit ledit Estiene que il demanda au roi ledit servise et li rois le li dona.

Et dit cil qui parle que il avoit servi en celui servise et a cez gages avant la letre donée 9 anz a la priere au dean Saint Aignen et a la priere mon seigneur Pierre de Biaumont et sire Johan Sarazin qui en prierent le roi Looys.

Requis conmant ses conpaignons ont servi en leur servise de la forest, il dit par son seremant que il croit que il aient servi bien et leaument.

Requis conmant ses mestres Bertaut et Chapellet ont servi en leur baillie de ladite forest, il dit que il ne set, que il se gardent de celui qui parle au plus que il puent et ne veullent que il qui parle sache rien de chose que il facent que il ne li mandent pas, ne a leur contens que il font, par que il qui parle ne pueut rien savoir de chose que ses mestres facent.

Guillot dou Pont est sergent en la baillie de Courtci et a letre dou roi a 6 d. de gages par jour et li fut donée ladite letre a Lorriz le dimanche d’aprés la feste de la Nativité Nostre Seigneur en l’an m.cc.lxxvi, et avoit a autés gages conme il a par le conmandemant au ballif Hue de Saint Just, que quant les prevostez furent mises en garde, qu’elles ne furent pas vendues, ledit baillif mist Ph. dou Pont, pere audit Guillot, a garder la prevosté d’Orliens. Et por ce ledit baillif mist ledit Guillot a garder les bois en leu doudit Ph. son pere.

Guillot Lendri, filz feu Simon Lendri, de Donesi lez Fai, est sergent en ladite forest de Courci, et a letre dou roi, a 6 deniers de gages par jour, et li fut ladite letre donée a Lorriz en l’an m.cc.lxxvi le dimanche d’aprés la Nativité Nostre Seigneur. Et dit ledit Guillot que il ot ledit servise dou roi, et le li dona le roi a la requeste dou pere a celui qui parle. Et dit cil qui parle que le roi vost que le pere audit Guillot servist aveuls son filz et que le pere eüst le quint des amandes et ledit Guillot eüst les 6 d. de gages.

Requis de ses conpaignons, conmant il ont servi ou servise de ladite forest, il dit que il croit que il aient servi bien et leaument.

Requis conmant Bertaut et Chapellet ses mestres ont servi en leur baillie de la forest b.