Ph. de Comeni, de la chastellerie de Pontoise, est sergent de ladite forest, et a letres dou roi a 12 deniers de gages par jour et 100 s. de tornois por robe par an et 10 l. por rator de chevau, et nous avons veü contenu en la letre que il a dou roi, laquelle letre li fust donée au Chastiau Neuf sus Loire, en l’an m.cc.lx.xii, le lundi d’avant la Chandeleur.

Requis par qui il ot celle letre, il dit par le roi, a la requeste mon seigneur Robert le Veneur, chastellain dou Vau de Rueuill.

Requis commant ses conpaignons ont servi en leur servise de la forest, il dit par son serement que il ont servi bien et leaument, si conme il croit.

Requis de Robert de Hupecourt son mestre, se il set que il ait riens meffet ne mal servi en la forest, il dit par son seremant que il est mot hatis et dit que il qui parle se doute mout que Robert son mestre ait mespris, que quant venait au jourz que le mestre tenait des mesfez de la forest, que il en y avoit aucuns qui avoient esté pris a mesfet en la forest, le mestre disait que il leur conmandait de par le roi que il en amendassent le mesfet que il avoient fet, et tieux y avoit qui ne voullaient amender, et le mestre les retenait de par le roi. Et dit cil qui parle, le mestre les delivrait si conme il voulait, aucuns, si que il qui parle n’en seust ja commant Robert de Hupecourt, son mestre, les avoit delivrez, ne quele chevisance il avoit fete a cez que il avoit retenuz, et dit que aucune foiz ledit Robert disait a celui qui parle : "Ge chevi et fine a cez" mes il ne li disait pas de touz.

Et dit cil qui parle que il prist Odiasc Biau Pere qui avoit tendu roisiauz en l’eurle de la forest et denui et ajourna cil qui parle ledit Biau Pere au jourz par davant son mestre Robert de Hupecourt, et quant ledit Biau Pere fut au jourz davant Robert, Robert de Hupecourt s’asenti que il fust mis en respit, et croit cil qui parle que encores soit ou respit, que il n’en oït puis parler d’amende que ledit Biau Pere en feïst.

Et dit cil qui parle que il et ses conpaignons ont aucune foiz pris charretes en la forest chargées de bois que l’en disait qui estoient au prevost l’eveque, et au notoires de la court, lesques n’ont point de usage ou bois. Et quant il avoient prises lesdites charretes, il les metaient davant Robert de Hupecourt leur mestre, et cil Robert les delivrait sanz ce que il qui parle et ses conpaignons seüssent la delivrance ne qu’il seüssent que li rois en eüst nul proffit ne amande.

Perret de Lonc Champ est sergent de ladite forest souz Robert de Hupecourt et a dou roi.

En la prumiere a contenu que il a 8 d. de gages par jour et li fut donée celle letre a Bernai le dimanche d’apres la feste sainte Croiz en moi, en l’an M. CC. LX. XII, a la requeste mon seigneur Robert le Veneur, Remont et Gautier et Robert de Lonc Champ. Et est contenu en la seconde letre que il a dou roi que ses gages li furent creüz de 4 d., si que il ores par la derreniere letre 12 d. de gages, et fut donée ceste letre a Anet le mardi d’avant Pasques flories en l’an M. CC. LX. XIIII et la li dona le roi a la priere mon seigneur Robert le Veneur et les autres desus diz si conme il dit.

Requis commant ses conpaignons ont servi en ceste forest, il dit par son seremant que il ont servi bien et leaument, si conme il croit.

Requis de Robert de Hupecourt, son mestre, conmant il a servi et conmant il s’est maintenu en servise, il dit par son seremant que pluseurs genz qui avoient été ajornéz au jourz par devant ledit Robert, por aucun forffet que il avoient fet en la forest, ledit Robert les retenait por les amendes, et puis Robert les delivrait si conme il voulait senz ce que il qui parle seüst la delivrance que Robert en fesait et que il seüst que li rois en eüst proffit ne amende, ne ne croit que si conpaignon le seüssent, la chevisance que ledit Robert en fesoit. Et dit cil qui parle que Tenot, sergent l’eveque, a usé des charbonages des bois l’eveque, et mis en autre leu que la ou il devoit user, et li prist cil qui parle et li mist jour davant Robert de Hupecourt, et dit que Robert le delivra si conme il vost senz ce que le roi en eüst ons proffit ne amende, que il qui parle seüst. Et dit cil qui parle que il prist la charrete et 2 des charretes de Mamonvile et leur fist gagier 3 amendes de 9 livres dont il ne paierent ons riens et les delivra Robert de Hubecourt, si conme il vost, senz ce que li rois en eüst proffit ne amende que il qui parle seüst. Et dit cil qui parle que Robert de Hupecourt donna a Gillet de Saumeri 3 chesnes a fere sa meson, si conme Gillet recognut a celui qui parle. Et dit cil qui parle que il trova la charrete au seigneur de Lengenerie qui n’usoit pas si com il devoit de l’usage et la prist et la mist davant son mestre Robert de Hupecourt. Ledit Robert la delivra si conme il vost senz ce que li rois en eüst proffit ne amande que il qui parle sëust. Et en ot ledit Robert 1 apervier dou seigneur de Lengenerie. Et dit cil qui parle que la concierge de Neufville fist fere de son usage qu’elle tient dou roi a Saune que elle fist vendre, et ce sot Robert de Hubecourt, et la delivra senz ce que li rois en eust proffit ne amande que il qui parle sëust.

Et dit cil qui parle que Ph. de Commeni, sergent de ladite forest, vet en son païs mot sovant par que il ne fet pas bien son servise, si conme il deüst.

Guillaume le Gobe, nez de Cepai, est sergent de ladite forest, et a 6 d. de gages, et en a letres dou roi qui li furent donées au Chastiau Neuf sus Loire le lundi davant la Chandeleur en l’an M. CC. LXXII, et la li dona le roi a la priere au conte de Pontiz et avant que il eüst celui servise, avoit il servi le roi, de garder ses chiens si conme il dit.

Requis de ses conpaignons, comment il ont servi en la forest, il dit par son seremant que il ont servi bien et leaument si conme il croit.

Requis commant Robert de Hubecourt, son mestre, a servi et s’est maintenuz ou servise, il dit que il ne set riens de ses esplaiz ne de ses contes que il n’i fust ja apellez, et dit que il retenait de ses esplaiz aucune foiz, mes il ne set pas la summe, et dit que il set bien que il doit le roi, mes il ne set la summe, ne ne la puet sauvoir car ledit Robert se gardait de celui qui parle. Et dit cil qui parle que quant il li montrait sa defaute que Robert le menaceit a fere chacier dou servise.

Et dit cil qui parle que il trova feu Champion de Neufville qui en menait 3 charretées de chesnes aprés pié et le prist cil qui parle et l’ajourna au jorz au dit Robert et quant il fut venu au jourz par davant ledit Robert, ledit Robert dist a celui qui parle que il s’en soffrist et croit cil qui parle que Robert de Hupecourt avoit donées les 3 charretées de chesnes audit Chanpion. Et dit encore cil qui parle par son seremant que il prist Robin et Oudiau Biau Pere qui avoient tendu roisiaus et peniaus en la forés en Bois Bernart, delez les Barres, et les recrut et les ajourna au jourz par davant Robert de Hupecourt et quant il i furent venu Robert de Hubecourt s’en souffri. Et dit le dit Robert a celui qui parle, voient touz ses conpaignons, que il s’en soffrist.

Et dit cil qui parle que Ph. de Comeni ne fet pas son servise si comme il deüst, que il vet trop souvant en son païs, et demeure longuemant.

Colin Trino, nez de la parraisse de Neufville, est sergent de ladite forest et a letres dou roi a 6 d. de gages, et li fut donée celle letre a Paris le jour de la Nostre Dame Mi Aost en l’an m.cc.lx.xvii.

Requis par qui il ot celle letre et le servise, il dit que il le requist au roi et li amentut que son pere avoit torjouz servi le roi, et lors li rois li dona le servise, au tesmoign de Raou d’Orliens.

Requis conmant ses compaignons ont servi en leur servise de la forest, il dit que il ont servi bien et leaument si com il croit.

Requis conment Robert de Hupecourt a servi en sa baillie de la forest, il dit que il croit que il a servi bien et leaument et dit que son mestre Robert de Hupecourt a aucune foiz retenu de ses esplaiz a acun conte, et les rendait au conte d’aprés, et dit que Ph. de Comeni qui a 12 d. de gages s’en ala en son païs environ la Madelene et demora jusques a la Touz Sainz et lessa 1 vallet a pié en son servise en leu de lui.

Aallot de la Ferté Milon est sergent en ladite forest, de la baillie Robert de Hupecourt, et a letres dou roi a 6 d. de gages par jour et li fust donée celle letre a Loches en l’en m.cc.lxxv le jour de la feste Sainte Croiz en moi, a la priere de Robert de Lonc Champ et de Gautier, veneurs le roi. Et dit que avant que il eust celui servise, servoit il le roi de garder ses chiens.

Requis commant ses conpaignons ont servi en leur servise, il dit que il ont servi bien et leaument, si conme il croit.

Requis commant Robert de Hupecourt, son mestre, a servi, il dit que il croit que il ait servi bien et leaument, et dit que les forffez que il qui parle renaitb en la forest, que il les metait par davant ledit Robert son mestre, et le mestre en chevissait si conme il voulait, que il ne fust ja apellez a sa chevissence ne a ses contes quant il les fesait, ne de ses contes ne set riens.

Requis se il qui parle set que ledit Robert ait riens eu de nuli par la reson de la forest, il dit que il oï dire au genz de Saint Yvertre que l’abbé de Saint Yvertre d’Orliens avoit doné a Robert de Hubecourt drap blanc, de que il fist 1 sercot parti a roie, que le Mignon de Biauvillier avoit et que le Mignon ot autant dou drap blanc que Robert li dona pour son roié. Et dit cil qui parle que il et si conpaignon avoient 4 l. de parisis de leur droit des tables dou pasnage, lesquelles 4 l. Robert de Hupecourt leur mestre retint senz ce que il en eussaint il rien.

Requis se il et si conpaignons les demanderent puis audit Robert leur maistre, il dit que nenil que il ne ent demander, que il se doutoient que il leur deist vilenie, einz atandaient tant que il le montrassent au baillif.

Gille dou Pont, nez de Loiri delez Orliens, est sergenz en ladite forest en la baillie Robert de Hupecourt et a letres dou roi a 6 d. de gages par jour, et li fut donée celle lettre a Lorriz le dimanche d’aprés la Nativité Nostre Seigneur en l’an m.cc.lxxvi. Et dit ledit Gille que il requist au roi ledit servise et que li rois le li dona. Et dit ledit Gille que avant celle lettre donée, il avoit servi 16 anz en la baillie de Vitri a autés gages conme il a ores, par le conmandement au ballif qui a cel tans i menait les sergenz.

Requis conmant ses compaignons de la forest ont servi et se il est que il aient de riens mespris en la forest, ne vers le roi, il dit que il n’a que 4 anz que il vint aveuls cez conpaignons, que son servise li fut changiez, et que il croit que il aient servi bien et leaument, et se il y ont mespris, dit que il croit que ce n’est que par leur mestre.

Requis de Robert de Hupecourt son mestre conmant il s’est maintenu en la forest et conmant il a servi, il dit que Robert de Hupecourt entent plus a ses chiens et a ses oisiaus que il ne fet a fere le proffit de la forest, et dit que ledit Robert souffit a user par 2 atez le chantre Saint Aignen d’Orliens a somaier le bois de la forest a 1 cheval, et dit que il qui parle et ses conpaignons le li montrerent que il ne fesait pas bien, et lors il deffendit que il n’i usast plus, et croit que Robert soffrait le chantre ensint a user par aucun servise que le chantre lui fesait. Et dit cil qui parle que Robert de Hupecourt son mestre dona 2 chesnes a prendre en la forest au mestre de Saint Ladre dou Puisat a fere 2 jumelles a 1 presseoir que il ont entre Bourg Neuf et Rebrachien.

Requis se il set por quoi il dona ycez 2 chesnes, il dit que il croit que por ce que toutes les foiz que ledit Robert s’en vet en son païs, que il vet en leur meson a hostel, et ses chiens et ses genz, et dit cil qui parle que Robert de Hupecourt dona a Girart le paintre d’Orliens 4 charretées dou bois saic dou demoine de Sarcotes, et dona ledit Robert congié a Reimbaut de la Chaucie que il en alast querre en 1 até tant conme il voudrait a se chauffer l’iver, et celui Rembaut en envea querre tant que il en ot assez, de celui bois saic dou demoine de Sarcotes. Et dit cil qui parle que ledit Robert dona 6 chesnes a Adan des Apoisses, les ques chesnes furent pris ou Bois Bernart ou demoine le roi. Et dit cil qui parle que ledit Robert soffrit que les enfanz de Villiers donerent a celui Adan des Apoisses 2 chesnes de leur bois a fere 2 tres, et les trova ledit Robert ouvrant les 2 chesnes a charpentiers en la court audit Adan, il n’en parla ons ne n’en fist plus, et le soffrit senz en fere amende. Et dit cil qui parle que il vit que ledit Robert ocist 1 senglier en la forest, mes ledit Robert disoit que il estoit aveugles, de que il se hurtait as chesnes, et dit que quant Robert sot que cil qui parle et ses conpaignons sorent qu’il avoit tué le senglier, le dist Robert le fist savoir au baillif et li en envoia 1 costé. Et dit cil qui parle que Ph. de Comeni son conpaignon, sergent en ladite forest, le sot bien. Et dit cil qui parle que il qui parle prist les charretes de Mamonville, 2 qui ont usé la ou il n’ont point de usage, et dit que Robert de Hupecourt estoit presanz, qui dist aus charretiers : " Alez vos en par le bois hardiemant, ne vos en alez pas vuiz, menez en dou bois assez a l’ostel ". Et enssint les a Robert de Hupecourt lessiez user par 4 anz 3 foiz la semene. Et dit cil qui parle que Perret de Lonc Champ prist la charrete au seigneur de Lengenerie, qui menait doner une charretée de son bois a Orliens, que il ne poait ne ne devait, et ajourna Perret de Lonc Champ ledit seigneur au jourz par davant son mestre Robert de Hupecourt et vint le seigneur de Lengenerie au jourz par davant ledit Robert, et Robert conmanda audit seigneur de par le roi que il amendast ce que il sera meffet. Li sires dist que il n’i avoit pas par que il le deüst amander et Robert de Hupecourt le mist en sa souffrance, et le vit cil qui parle, et croit que il soit encore en souffrance, que il qui parle n’en oit puis parler, fors que tant que ledit Robert ot 1 apervier doudit seigneur de Lengenerie.

Et dit que il qui parle prit Salmin de la Barre Saint Avi, qui en menait une charretée de charbon dou bois l’eveque que il ne poait ne ne devoit, et Tenot, sergent l’eveque, en fist l’amande por ledit Salmin a Robert de Hupecourt, de laquelle amende il ne fut ons paié denier, que il qui parle sache. Et dit cil qui parle que ledit Robert a lessié user Guillemi le Barbier de la Croiz Saint Michiau d’Orliens, ou bois a la buche et au charbon sanz ce que il i ait nul droit de user. Et dit que Robert conmanda audit barbier, presant celui qui parle, qu’il empreist assez tant conme il voudrait et quant il voudrait.

Requis se il set por quoi il le soffrait einssint, il dit que il croit por ce que ledit barbier ret et saigne ledit Robert, et li fet courtaisie quant Robert vet a Orliens.

Et dit cil qui parle que Robert de Hupecourt trova Martin, le charron, de Langeneriee, ouvrant bois en son atellier. Ledit Robert vost que ledit Martin s’apurjast par son seremant. Le charron chevi de son seremant au dit Robert a 20 s. et paia le charron les 20 s. a 1 sellier d’Orliens a qui Robert les devoit d’une selle.

Guillaume Huve dit par son serement que Robert de Hupecourt a levé de lui 60 s. a tort, senz cause et senz reson. Et dit cil qui parle que ledit Robert a eu des usagiers de Rebrachien 20 s. avant que il vossist ostroier le patiz au bestes, et a eu ledit Robert de cez de Bourc Neuf autres 20 s. avant que il vossit ons ostroier le patiz au betes. Et dit cil qui parle qui Guillaume le Vouier a eu une roe de molin toute fornie, que ledit Robert la soffrit a prandre as usages ou il n’avoit nul droit, et en ot ledit Robert 1 faucon doudit Guillaume por le soffrir. Et dist ledit Robert audit Guillaume que se il en avoit mestier d’une autre roe, que il la preïst.

Le prieur de Saint Ladre d’Orliens dit en parolle de provaire que Robert de Hupecourt prist molt de foiz leur charretes sanz reson et les leur recreait a grant paine et en avoient grant domache avant que il les poïssent avoir.

Et dit le dit prieur que il estoit une foiz a Checi ou il fesait remuer ses vins et que ledit Robert i vint et dist a 1 sergent des bois qui a non Le Piquart que il li feist mener le meilleur thoniau de vin que iqui fust en sa meson, et que il rendrait au prieur les deniers que il vallai. Et dit le prieur que ensins en fist ledit Robert le vin audit prieur, et ledit prieur que il n’en ot ons denier, et dit le prieur que quant il demandait audit Robert son argent dou vin, que ledit Robert disait au prieur que il li devoit plus d’amandes que le thoniau de vin ne vallait. Et dit le dit prieur que leur mesons ont esté mot grevées et chargées doudit Robert et de ses chiens et de ses oisiaus et de ses ooes, que quant ledit Robert envoiet 100 oes en une de leur mesons, il les convenait garder et norrir au couz de leanz, et quant il les voullait avoir, s’elles n’estoient bien grasses, ledit Robert en fesoit mot male chiere au prieur et au genz de leanz, et prenait leur charrete, senz reson et les menait mot mal, et ensint ere perdu quanque l’en li fesait de bien.

Et dit ledit prieur que Robert de Hupecourt fut 1 jour a Aschieres en la meson Guillaume Brune et vit passer ledit Robert 1 des freres de Saint Ladre d’Orliens et 1 frere de l’aumosne, et les fit apeller ledit Robert et quant li dui frere furent devant ledit Robert, Robert dist a ses genz : " Alez querre 2 quartes de vin, si buront cez freres ".

Et fist savoir ledit Robert conbien il devoit leanz, et l’en li dist que il devoit 7 s. que il avoit euz en vin et en denrées. Ledit Robert dist au 2 freres que il paiassent ces 7 s. et li frere les paierent et les conterent a leur metres que il les avoient paiez por ledit Robert de Hupecourt.

Le mestre de l’Aumosne d’Orliens et frere Raau dient en parolle de provoire que ledit Robert leur a fet mot de griés et de domaches, conme de prandre leur charretes sanz reson et d’avoir dou leur que il covenait que il le servissent por avoir pez a lui, et dient que il ot dou leur 3 aunes de brunete vermoille qui fut prise de Johan de Saint Mezmin, drapier, et les paia le dit frere Raou.

Ce sunt les griés que li seigneur de Saint Yvertre d’Orliens dient par leur seremant que Robert de Hupecourt leur a fez, et Ph. de Marreigni et Perret de Lonc Champ, et Ayelot, sergenz des forez.

Prumierement dit que ledit Robert et cez desus nomez ont pris par 40 foiz ou par 30 une foiz 3 chevaus, autre foiz 6 chevaux, et les en menoient une fois a Saint Lié, autre foiz à Bouc Neuf, et se defuient par cez bois que les genz de Saint Yvertre ne les povaient trover, et deffendaient a ces ches que il metaient les chevaus que il ne les rendissent, et enssint doumageent l’abaïe Saint Yvertre sanz reson et en despans de chevaus et en despans de cez qui les alaient querre, et metaient ladite abaïe en grant domache par ce que li chevau ne fesaient rien de leur proffit.

Et dient celle genz de Saint Yvertre que en cez couvrailles darrenieres passées Aalot preist 6 de leur chevaus d’Artenai sanz reson, que cez de Saint Yvertre n’estoient de riens defaillanz de nul droit et les tindrent par 4 jourz dont cil de Saint Yvertre sont en domache par la seson qui demora et ou despans que les chevaux firent, de 40 s. et de plus.

Et dient cil de Saint Yvertre que Robert de Hupecourt a bien demoré en leur abaiee par 100 foiz, une foiz a 3 chevaus, a 4 garçons, a 3 chiens o ses oisiaus, sovant a 3 conpaignons, a 2 au mains, par que l’abaïe a fet de despans en boivre et en mengiers de que a 40 l., et dient cil de Saint Yvertre que pluseurs foiz quant il se partaient de l’abaïe, que les garçons demandaient dou pain et dou vin, et quant il n’en avoient a leur talant, il disaient que il domacheraient l’abaïe, et avenait sovant que il prenaient leur chevaus sanz autre reson. Et dient cil de Saint Yvertre que quant Robert de Hupecourt venaient a Orliens et gisaient en la ville, il envoientc querre en l’abaye dou pain et dou vin a aus et a leur garçons et de l’avaine a leur chevaus. Et ensint ont ledit Robert et ses genz torjour grevée et domachée l’abaïe de Saint Yvertre d’Orliens, si conme les seigneurs dient.

Et dient cil de Saint Yvertre que Robert de Hupecourt est venuz mot de foiz a leur granges, a Cuni et a Artenai ; quant il trovoit les portes fermées si hurthait et apellait et disait que ce estoit le sergent le roi, et demandait bon vin et convenait que il eüst bon vin de taverned, de la Provenchiere ou d’Artenai, et refusait le vin que l’abé buvait, et dient que ledit Robert fut une foiz en leur granche a Artenai, 1 jour que il despandit 4 s. en vin senz ce que il ot dou vin que l’abé buvait, qui estoit bon et soffisant. Et ensint a grevé Robert de Hupecourt tourjorz l’abaïe Saint Yvertre et leur granches.