[1]

Anno Domini millesimo nonagesimo, die lune ante festum beati Andree apostoli, discretus vir dominus abbas Sancti Papuli et dominus Johannes Archiepiscopus, miles domini regis, castellanus de Verduno, inquisitores domini regis contra officiales Carcassone domini regis et in tota senescallia Carcassone intraverunt Carcassonam ad inquirendum.

Philippus, Dei gratia Francorum rex, discreto viro abbati Sancti Papuli et Johanni Archiepiscopo, militi, castellano nostro Verduni, inquisitoribus nostris in senescallia Carcassone, salutem. Mittemus vobis sub contrasigillo nostro inquestas seu aprisias factas incoatas per magistrum Guillelmum, thesaurarium Andegavensem, et G. de Bergeriis, militem, quondam inquisitores nostros ad dictam senescalliam deputatos, mandantes vobis quatinus ea que in ipsis inveneritis non perfecta perficiatis ad plenum, prout facultas et oportunitas vobis se offerat in presenti. Volumus etiam quod contra omnes officiales nostros, ministros, consiliarios et juratos predicte senescallie, de quibus in alia commissione vobis facta contra quosdam mentio non habetur, sicut contra alios equanimiter inquiratis, et eadem formam que contra certos nobis tradita extitit, observetis indifferenter et equaliter contra omnes. Actum Silvaneti, die veneris post festum Assumptionis beate Marie, anno Domini millesimo ducentesimo nonagesimo.

Item, anno quo supra, die jovis post Cineres, dominus Berengerius de Proliano, judex Carcassone, obtulit domino senescallo predicto et in ejus presentia palam et publice in publica assizia in consistorio burgi Carcassone perlegi fecit et exponi quasdam litteras patentes et pendentes sigillis dominorum B., abbatis Sancti Papuli, et domini Johannis Archiepiscopi, militis, sigillatas, auctoritate regia deputatorum inquisitorium contra curiales senescallis Carcassone in hec verba :

Noverint universi presentes litteras inspecturi quod nos B., abbas Sancti Papuli, Johannes Archiepiscopi, miles1, inquisitores in senescallia Carcassone et Biterris auctoritate regia deputati, restituimus magistrum Berengarium de Proliano ad judicaturam burgi Carcassone, sicut eam habere consuevit, cum nichil repertum fuerit contra ipsum. Quare debuerit a dicta judicatura removeri.

In cujus rei testimonium sigilla nostra duximus apponenda. Datum Tholose, die martis ante dominicam de Passione, anno Domini millesimo ducentesimo nonagesimo primo.

Anno Domino millesimo ducentesimo nonagesimo primo, die jovis in festo Sancte Crucis maii, dominus Simon Briseteste, miles domini regis, senescallus Carcassone et Biterris, recepit quasdam alias domini regis patentes litteras sub hiis verbis :

Philippus, Dei gratia Francorum rex, dilectis et fidelibus gentibus nostris Tholose tenentibus parlamentum, vel eis qui inventi fuerint ibidem, salutem et dilectionem. Cum abbas Sancti Papuli et Johannes dictus Archiepiscopus, castellanus Verduni, inquisitores a nobis dati in senescallia Carcassone, aliquos nostros officiales, eorum deffensionibus legitimis non auditis nec admissis, a serviciis suis amoverint, ut intelleximus, mandamus vobis quatinus, si inveneritis ita esse dictos officiales sic amotos, in pristinis serviciis reponentes ad presens donec de eorum meritis plenius simus instructi, inhibeatis eis ne in inquisitionibus predictis sibi commissis interim procedant, inquestas si quidem quas contra officiales predictos amotos fecerunt, nobis referri facientes. Actum Parisius, sabbato post Mediam Quadragesimam, anno Domini millesimo ducentesimo nonagesimo.

Anno quo supra, sexto idus decembris, dominus P. Radimundus, judex major dicti domini senescalli Carcassone et Bitterris quasdam domini regis litteras patentes et pendentes sigillo certo ejusdem domini regis et contrasigillo sigillatas quarum tenor talis est :

Philippus, Dei gratia Francorum rex, universis presentes litteras inspecturis, salutem. Notum facimus quod cum nos duos inquisitores contra officiales, procuratores et ministros nostros senescallie Carcassone ad presens deputaverimus, videlicet abbatem Sancti Papuli et Johannem Archiepiscopi, militem, nos eisdem duabus in officio predicte inquisitionis faciendo adjungimus magistrum Guillelmum de Alberici2, judicem vicarii Tholose, percipientes quod ipsi tres in officio predicto diligenter procedant secundum tenorem commissionis nostre super hoc directe abbati et Johanni predictis. Actum Parisius, die jovis post festum Omnium Sanctorum, anno Domini millesimo ducentesimo nonagesimo primo.

Extrait collationné sur un livre de parchemin couvert de bois trouvé au Trésor des Chartres de Sa Majesté en la cité de Carcassonne, intitulé Registrum Curie Francie ...

... Fait à l'Isle en Albigeois, le quatriesme octobre mil six cens soixante huit.