Noverint universi quod constituti in presentia discreti viri magistri Mathei de Puteolis, commissarii dati a domino nostro rege Francie ad recipiendum temporalitatem domini episcopi Albiensis omnesque decimas ad ipsum episcopatum pertinentes occupatas et detentas per quoscumque a tempore quo bona temporalia dicti domini episcopi Albiensis fuerunt posita ad manum domini nostri regis, Pilusfortis de Rapistagno et Guillelmus, frater ejus, filii domini Guillelmi de Rapistagno, militis, et eisdem perlecta commissione facta eidem magistro Matheo per dominum nostrum regem, recognoverunt ac confessi fuerunt se recepisse redditus ad ipsos domicellos pertinentes, ut dixerunt, in honore Insule et in decimariis de Deraust, de Saurs, de Sancto Petro de La Vernieyra et de Sancto Vincentio, et hoc antequam dominus noster rex penderet bona temporalia dicti domini episcopi Albiensis ad manum suam, et post, et jure suo, ut dixerunt, et cum dictus magister Matheus peteret quod dicti domicelli jurarent de veritate dicenda, jurarent et per juramentum responderent super dictis decimis occupatis per ipsos domicellos, ut dicebatur, sub manu regia, et dicti domicelli recusarent jurare et per juramentum contradicerent respondere, dictus magister Matheus ipsos declaravit rebelles et contradictores voluntati et mandato dicti domini regis, precipiens dictis domicellis ne aliquid ex tunc reciperent de redditibus seu decimis antedictis ad dictum episcopum pertinentibus, nec dictum episcopum aut gentes suas in possessione predictarum decimarum in qua erat tempore quo dicta manus regia fuit apposita in bonis dicti episcopi molestarent seu etiam perturbarent, et quod de levatis et perceptis per ipsos de predictis eidem computum et rationem redderent et ea que de predictis levaverant seu perceperant, temporalitate dicti domini episcopi existente ad manum dicti domini regis restituerent eidem.

Dicti vero domini requisiverunt dictum magistrum Matheum ut ipsos non perturbaret nec impediret in possessione dictorum reddituum, nec eis aliquam violentiam faceret, quod si facere vellet, appellaverunt predicti domicelli ad dominum nostrum regem, vel ad illum ad quem de jure fuerit appellandum, ponentes se et omnia bona sua sub protectione domini nostri regis, requirentes dictum magistrum Matheum ut, pendente presenti appellatione, nichil innovaret contra ipsos.

Dictus vero magister Matheus dixit se nolle dictos domicellos in aliquo agravare indebite, seu etiam molestare, sed complere mandatum regium sibi factum juxta et secundum tenorem dicti mandati domini nostri regis, non admittens appellationem predictam, nisi quathenus de jure fuerit admittenda, requirentes dicti magister Matheus et predicti domicelli me notarium infrascriptum, ut ex debito mei officie de predictis publicum conficerem instrumentum.

Factum fuit hoc die sabbati ante festum beati Michaelis, regnante Philippo Francorum rege, Petro episcopo Tholosano, anno ab Incarnatione Domini millesimo trecentesimo quarto, in presentia et testimonio Nicasii de Putheolis et Jaqueti de Folreria, servientum domini regis, et mei Poncii Ferrerii, publici Tholose notarii et jurati curie domini vicarii Tholose, qui ad requisitionem dicti magistri Mathei et dictorum domicellorum cartam istam scripsi.

Extrait et collationné d'une copie en parchemin trouvée aux archives de l'evesché d'Alby ... Fait à Alby le septiesme may mil six cens soixante neuf.

Signé : De Doat

Capot.