[1]

In quodam rotulo precium terre quam dominus rex habet apud Houdaing in Attrebatesio.

Aprise feite par Guillaume Tybout, bailli d'Amiens, appelé aveiques lui Jehan Butin et Wales Garmin sus la valeur de la terre de Houdaing en Artois pour savoir qu'elle vaut de rente par an et en quiex rentes elle est assise et se elle est forfeite au roy ou non et par la queile cause est en forfeite et pour savoir la verité des choses desus dites furent appelees les personnes qui ensuittent, c'est asavoir Robert de Launey, Nicholas Caurdelle, Gilles Maingnee, Pierres Evrenins, Jehan Hurtevauz, Jaques Li Pippe, Pierre de Viliers, Jehan Bougins, Jehans a as Pourchiaus et Lorenz li Cambiers, les quiex jurerent et raporterent par leurs seremenz la value de ladite terre en la maniere qu'il est ci desouz escript. Ce fu fait l'an de grace mil III^c et III., le jeudi apres feste saint Jehan Baptiste.

Premierement il dient que ladite terre vint en la main le roy le secont jour de juing qui fu l'an de grace mil II^c IIII^xx XVIII, et fu ladite terre monseigneur Guerart de Soteinguien, chastelain de Gant, qui la prist au mariage sa fame, liquel chastelain et sa fame se tournerent des lors par devers les aynemis et i sunt touzjourz puis demorez et quant li rois fu a Lile, il rendi au fiulz dudit chastelain le quart de ladite terre pour sa soutenance, et, si comme l'an dit, pour ce que ledit heritage estoit de par sa mere qui morte estoit, mes li enfes n'en joï onques pour ce qu'il a esté touzjourz devers les eynemis et i est encores.

Item il dient que li rois a en la ville de Houdaing le Chastel qui est clos de murs a cretiaus et de tournelles et de fossez a iaue tout entour et granz jardins et un boile qui est desouz le chastel clos de fossez a iaue et de riviere.

Item la ville qui est bonne ville et en grant (?) trespas et i ceurt bon marchié et i a eschevinage et est la justice de ladite ville et de 18 villes appartenenz au chastel toute le roy, excepté la haute justice qui est la contesse d'Artois.

Item il dient que il a 152 fiez qui tuit font homage au segneur du chastel, des quiex il en i a 19 qui sunt pers du chastel et qui donnent estage chacun 40 jours au chastel chacun an, et en i a grant planté de biaus, de 100, de 200, de 300, de 400 et de 500 l. de rente et i a bien 400 arreres fiez de granz values et sunt tuit li homme de fié jugeurs au chastel, et quant aus reliés, les fiez sunt de diverses conditions et ne peut l'an pas savoir le nombre des arreres fiez ne la value.

Item deniers de cens sus le tout 39 l. 12 s. 6 d.

Item blé de rente 29 muis, le mui prisié 72 s. Somme 100 l. et 2 s. et 6 d.

Item 14 muis et demi d'avoinne, le mui prisié 48 s. Somme 34 l. 16 s.

Item 412 chapons, prisié le chapon 11 d., valent 18 l. 18 s. et 8 d.

Item le four, les forages, le tonliu 43 l. et 10 s.

Item 200 mancaudees de bois ou la entour et valent bien 100 l. par an.

Item les terres gaingnables de Houdaing et de toutes les appartenences dudit chastel sunt baillees a ferme pour 206 l. 17 s. 9 d. par an.

Item en toute la terre de Houdaing a bien 500 tenenz, de quoy chacun est prisié a pris de terre par la coustume du pais a 12 d., valent 25 l.

Somme de tout le pris 573 l. 17 s. et 5 d. Et est a savoir que la justice ne le proffit des fiez, des yaues ne des jardins n'est prisié ne conté en ce pris et troverret l'an bien, qui toute la terre voudreit bailler a ferme, qui en donreit 700 l. de par. de rente et plue, et dient les persones desus dite que la terre vaut bien 1000 l.t. de rente.