Assignatio 300 l.t. annualium Othoni de Monte Alto militi facta.

Ph. Dei gratia rex. Notum facimus universis tam presentibus quam futuris quod nos infrascriptas vidimus litteras tenorem qui sequitur continentes :

Universis presentes litteras inspecturis Johannes de Auxeyo cantor Aurelianensis et Nicholaus de Lusarchiis, prepositus de Auversio in ecclesia Carnotensi in partibus senescallie Tholosane et Albiensis pro reformatione patrie destinati, salutem et fidem presentibus adhibere. Litteras d. n. regis Franc. nos recepisse noveritis in hec verba :

Ph. Dei gratia Franc. rex dilectis et fidelibus clericis nostris cantori Aurelianensi et preposito de Auversio in ecclesia Carnotensi salutem et dilectionem. Cum nos dilecto et fideli Othoni de Monte Alto, militi nostro, et suis heredibus, obtentu sui grati servicii nobis impensi, dederimus 300 l. annui redditus habendas et percipiendas in thesauro nostro Parisius donec eas sibi duxerimus alibi assignandas et licet mandaverimus informationem fieri de locis in quibus cum nostro minori incommodo in senescallia Thol. assideri possent 300 l. predicte, in quibus rebus et de valore ipsarum rerum, nos tamen, informatione hujusmodi super hoc facta remissa nobis, visa et diligenter inspecta, quam sub sigillo secreti nostri vobis clausam remittimus, non ut adhibeatis fidem aliquam informationi predicte, sed ut facilius in hujusmodi negocio procedatis, committimus et mandamus vobis quatinus in locis de quibus fit mentio in informatione predicta, dictum annuum redditum dicto militi pro se et suis heredibus, facta prius informatione de valore rerum singularum et vocatis quos videritis evocandos prout, cum nostro minori incommodo melius poteritis et citius assidere et assignere curetis et vos [fol. 78] pro jure nostro servando quos quantum ad hec preelegimus intersitis. Et quia idem miles pro assisia dicti redditus fieri pertrahenda fecisse dicitur magnos sumptus, assisiam et assignationem hujusmodi cum minoribus sumptibus dicti militis quam poteritis faciatis. Et factis assisia et assignatione hujusmodi dictum militum vel procuratorem suum pro eo in possessionem rerum et reddituum quos eidem assignaveritis inducatis et ipsum gaudere faciatis eisdem, quicquid super hoc feceritis nobis per vestras litteras patentes remissuri, ut quod per vos in hac parte actum fuerit confirmari faciamus eidem. Et si premissis exequendi negociis nostris magis arduis vos urgentibus forsan intendere commode non possitis, ea per alios ydoneos fieri faciatis de quorum factis sicut de vestris nobis in hac parte possitis fideliter respondere. Damus autem justiciariis et subditis nostris tenore presentium in mandatis ut quantum ad hoc vobis pareant et intendant. Actum apus Fontembliaudi die XXVI januarii anno Domini M^oCCC^o quinto.

Quarum auctoritate per personas fidedignas de quibus sicut de nobis ipsis confidebamus diligenter inquiri fecimus et informationem fieri de valore reddituum ville de Ardisanis d. regis, de quibus alias pro eadem assignatione facienda informatio facta fuerat. Qua informatione de mandato nostro facta, visa et plena relatione audita de eadem, cum dicto d. Othone seu ejus procuratore ad hoc specialem potestatem habente, convenimus et concordavimus in modum qui sequitur, videlicet quod pro absolutione, quittatione et remissione quam fecit et concessit dicto d. regi dictus d. Otho de Monte Alto imperpetuum de dictis 300 l.t. annui redditus cum publico instrumento ejus sigillo proprio nichilominus sigillato, dictam villam de Ardisanis cum omnimoda juridictione alta et bassa, mero et mixto imperio et juribus et pertinenciis suis, vice et nomine dicti d. regis et autoritate dicte commissionis nobis facte, eidem d. Othoni concedimus et tenore presencium assignamus cum 1200 l.t. quas per thesaurarium Tholose d. regis eidem d. Othoni vel ejus mandato solvi et deliberari fecimus de pecunia dicti d. regis et de dicta assignatione dicte ville de Ardisanis, ut predictum est, cum 1200 l. predictis sibi solutis per dictum thesaurarium d. regis, dictus d. Otho de contentum reputavit et d. regem, ut predictum est, absolvit penitus et quittavit, volentes nos cantor et prepositus predicti et concedentes dicto d. Othoni vice et nomini dicti d. regis, quod dictus d. Otho, heredes et successores ejusdem et ab eo causam habentes dictam villam de Ardisanis cum juribus et pertinenciis suis, cum omnimoda jurisdictione alta et bassa, mero et mixto imperio, habeant, teneant et possideant perpetuo, pro omnimoda voluntate ipsorum perpetuo facienda, retento tamen et in pacto expresso deducto quod si dictus d. Otho, heredes aut successores ejusdem dictam villam de Ardisanis venderent vel alienarent in toto vel in parte quod dictus d. rex et successores ejusdem dictam villam seu partem ejusdem habeant et habere possint pro illo pretio quod alius ibi dare vellet, retentisque eidem d. regi 30 s.t. quos homines dicte ville de Ardisanis tenentur solvere dicto d. regi seu ejus baiulo Verduni quolibet anno pro amperantia. retentis in predictis exercitu et cavalcata, incursu heresum et ressorto, et quod villam predictam cum juribus et pertinenciis suis dictus miles heredes et successores ejusdem a d. rege teneant in feodum honoratum, et quod fidelitatis juramentum teneantur prestare ipsi d. n. regi, et salvo in aliis jure d. regis et quolibet alieno. Actum et datum Tholose die lune in crastino Penthecostes ; anno Domini M^oCCC^o sexto. In quorum testimonium sigilla nostra duximus presentibus apponenda.

Nos autem assignationem, concessionem et quittationem ac omnia et singula predicta rata et grata habentes prout in antedictis litteris exprimuntur, ea volumus, approbamus, concedimus et laudamus, presentium que tenore auctoritate regia confirmamus, salvo [fol. 78 v^o] in aliis jure nostro et quolibet alieno. Quod ut perpetuo stabile perseveret presentibus nostrum fecimus apponi sigillum. Actum Parisius anno Domini millesimo CCC^o sexto, mense julio.