« bullarium-franciscanum-4883 »

Dilectis filiis ministro provinciali fratrum ordinis Minorum et ipsis fratribus provinciae Angliae secundum morem dicti ordinis.

Ad fructus uberes, quos sacer ordo vester in agro militantis ecclesiae indesinenter producit, considerationis nostrae aciem convertentes, attente cupimus ordinem ipsum ubique ad Dei laudem et gloriam dilatari. Hodie siquidem pro parte dilectae in Christo filiae nobilis mulieris Mariae de sancto Paulo comitissae Pembrochiae nobis exposito, quod dudum ipsa ex certis causis rationabilibus de consilio et de consensu dilectarum in Christo filiarum abbatissae et conventus monasterii de Waterbech ordinis sanctae Clarae Elien. dioecesis quoddam aliud novum monasterium ipsius ordinis cum oratorio et necessariis officinis in manerio suo de Deneye dictae dioecesis, dicto monasterio de Waterbech vicino ac unius et eiusdem dioecesis atque dominii cum eodem, ad opus abbatissae et conventus praedictarum sub vocabulo beatae Mariae Virginis canonice fundaverat, aedificaverat et etiam construxerat ipsumque de bonis suis sufficienter dotaverat et illud sic fundatum et dotatum praefatis abbatissae et conventui, ut se ad illud transferrent et inibi perpetuo morarentur, donaverat in perpetuum et concesserat; quodque, licet praedicta abbatissa et maior pars monialium conventus ipsarum ad monasterium sanctae Mariae se transtulerint antefatum, reliquis monialibus dicti monasterii de Waterbech in praedicto monasterio de Waterbech remanentibus de licentia et voluntate abbatissae ac se transferentium monialium praedictarum pro custodia, ne ad manus deveniret laicorum vel potentium partium earumdem, dilectorum filiorum generalis et secundum morem dicti ordinis provinciae Angliae provincialis fratrum ordinis Minorum ministrorum, qui tunc erant, ad haec accedente consensu: tamen praefatae moniales, quae in praefato monasterio de Waterbech remanserant, ut praefertur, mutata postmodum in contrarium voluntate, ad dictum monasterium beatae Mariae transferre se recusarunt indebite ac etiam recusabant, quinimo in praedicto monasterio de Waterbech licet de facto abbatissam elegerant et inibi moniales de novo alias receperant, in grave dicti monasterii beatae Mariae praeiudicium ac personarum in eo degentium detrimentum et scandalum plurimorum; quodque pro eo, quod terrae et possessiones dictorum monasteriorum sunt vicinae invicem et coniunctae, et proinde, quia gentes utriusque monasteriorum ipsorum fructus et redditus terrarum et possessionum praefatarum interdum praeoccupare contendebant, brigae et scandala inter gentes praedictas et earum sequaces et amicos gravia orta erant et graviora oriri timebantur imposterum, nisi super hoc provideretur celeriter de remedio opportuno: nos venerabili fratri nostro episcopo Elien. dedimus per nostras litteras in mandatis, ut, si vocatis, qui forent evocandi, inveniret ita esse, eidem abbatissae, quam reliquae moniales in dicto monasterio de Waterbech ut praedicitur elegerant, executionem et administrationem abbatialis regiminis interdiceret et tam eam quam praefatas moniales, quae in dicto monasterio de Waterbech residebant, ut de praefato monasterio de Waterbech ad praedictum monasterium beatae Mariae cum omnibus bonis mobilibus in dicto monasterio de Waterbech existentibus se transferrent, inibi sub ipsius abbatissae obedientia devotum Deo famulatum perpetuo impensurae, et eidem abbatissae dicti monasterii beatae Mariae tamquam earum abbatissae parerent et intenderent, monitione praemissa per censuram ecclesiasticam appellatione remota compelleret ac bona stabilia dicti monasterii de Waterbech, quaecumque et qualiacumque forent, praefatis abbatissae et conventui eiusdem monasterii beatae Mariae ac ipsi monasterio auctoritate praedicta tradere et assignare curaret ipsasque faceret eorum pacifica possessione gaudere, invocato ad hoc, si opus foret, auxilio brachii saecularis: proviso, quod ecclesia dicti monasterii de Waterbech et eius coemeterium ad clericos seu laicos sicut hereditas minime deveniret, sed unus presbyter deputaretur inibi pro celebrandis divinis officiis in eodem.

Cum autem, sicut exhibita nobis pro parte vestra petitio continebat, abbatissa et conventus praedictae ipsius monasterii beatae Mariae praefatum monasterium de Waterbech vobis et ordini vestro intendant libere concedere ac donare, nobis supplicastis, ut eisdem abbatissae et conventui concedendi vobis vobisque recipiendi monasterium de Waterbech praedictum licentiam auctoritate apostolica concedere dignaremur. Nos igitur, huiusmodi vestris supplicationibus inclinati, praefatis abbatissae et conventui vobis dictum monasterium de Waterbech, postquam de ipso dicta abbatissa et moniales, quae in eo ut praefertur ad praesens resident, ad praefatum monasterium beatae Mariae translatae fuerint, sicut praedicitur, concedendi vobisque illud recipiendi, dummodo duodecim fratres ipsius vestri ordinis in eodem monasterio pro tempore moraturi honeste et congrue valeant sustentari, fel. rec. Bonifatii papae VIII praedecessoris nostri et quibuslibet aliis constitutionibus apostolicis nequaquam obstantibus, sine iuris alieni praeiudicio, plenam et liberam concedimus auctoritate apostolica tenore praesentium facultatem. Nulli ergo etc. Datum Avinione III nonas februarii anno septimo.a