« bullarium-franciscanum-4403 »

a) Carissimo in Christo filio Eduardo regi Angliae illustri.

Decet catholicos reges et principes non solum praelatis et personis ecclesiasticis negotium catholicae fidei contra haereticos prosequentibus praesidiis et favoribus opportunis adesse, sed etiam defensores eiusdem fidei existere principales ac temerariis ausibus eorumdem, qui prosecutionem dicti negotii impedire conantur, debitae provisionis remedio obviare. Cum itaque, sicut habet venerabilis fratris nostri Richardi episcopi Ossorien. in Hibernia expositio facta nobis, ipse, qui negotia fidei contra certos haereticos illarum partium inimicos eiusdem fidei diutius in Romana curia prosecutus est et adhuc prosequitur, ac ecclesia sua Ossorien. ad dictorum haereticorum instantiam bonis multis fuerint spoliati et multipliciter lacessiti: nos eidem episcopo in hac parte paterno compatientes affectu ac sperantes firmiter, quod celsitudo tua pro exaltatione catholicae fidei praefato episcopo in restitutione ablatorum eidem se debeat promptam et favorabilem exhibere, serenitatem regiam rogamus in Domino et hortamur, quatenus attente considerans, quam meritorium apud Deum et apud homines commendabile tibi sit, si praefato episcopo in praemissis assistas, quantumque honori tuo et nomini derogares, si spoliationem praedictam ad talium instantiam factam conniventibus oculis pertransires, iustitiario et ceteris ministris tuis in Hibernia mandes districtius et iniungas, ut omnia et singula bona ipsius ecclesiae Ossorien. episcopo et ecclesiae praedictis ac ministris ipsius ecclesiae ablata, postquam idem episcopus iter arripuit pro huiusmodi prosecutione negotii ad dictam curiam veniendi, restituant et ab illorum detentoribus cum integritate sine dilationis obstaculo restitui faciant cum effectu, ita quod idem episcopus ob defectum necessariorum non compellatur negotii prosecutionem relinquere memorati: preces huiusmodi, quae ex paterno affectu prodeunt, sic ad exauditionis debitum admissurus, quod praeter retributionis aeternae praemium tibi ex inde a Domino proventurum apostolicae sedis et nostram gratiam ac favorem uberius assequi merearis. Datum Avinione VIII idus novembris anno primo.

b) Eidem regi.

Unigenitus Dei vivi et veri, dominus noster Iesus Christus, qui corda fidelium sua ineffabili claritate illuminat et illustrat, ut excellentiam agnoscant ipsius, in omnipotentiam suam credant et in eius virtuosa virtute confidant et propterea salvi fiant perveniantque post vitae praesentis exilium ad patriam civium supernorum, diebus novissimis detexit in tua terra Hiberniae lupinae rapacitatis astutiam vellere agnino velatam, patefecit vulpeculas demoliri vineam Domini pro viribus praesumentes, et ostentavit tribulos infra segetem agri Dominici usque ad haec tempora latitantes, haereticos quidem pestiferos diversas habentes facies, sed colligationes execrabiles et execrandas insimul ineuntes, utpote convenientes de vanitate deceptoria in idipsum. Nam, sicut nuper ad apostolatus nostri proh dolor pervenit auditum, dum venerabilis frater noster Richardus episcopus Ossorien. suam dioecesim iure ordinario visitaret, apparuerunt in medio catholici populi homines et eorum fautores haeretici, coeno pravitatis haereticae labefactati. Quorum quidam asserebant, Iesum Christum fuisse hominem peccatorem et iuste crucifixum pro suis extitisse peccatis; alii vero, factis per eos homagiis daemonibus et eis sacrificiis impensis, ad dictorum informationes daemonum de sacramento Corporis Christi aliter sentiebant, quam de illo catholica et Romana ecclesia sentit, dicentes non esse colendum nec adorandum ullo modo sacramentum praefatum, et etiam asserentes, quod decretis et decretalibus, etiam mandatis apostolicis credere vel obedire minime tenebantur, nec non ad consulendum daemones in agendis iuxta ritus et sectas gentilium et paganorum, spretis ecclesiae catholicae sacramentis, Christifideles suis superstitionibus attraxerunt. Haec profecto labes haeretica intermixta fidelium coetibus foedat illos, hic morbus sui pudore contagii proximos fideles inficit adhaerentes, et hoc pestiferum aconitum serpens interimit animas illius pestilentia interfectorum.

Unde, cum, sicut accepimus, in eadem Hibernia et regno aliaque terra tui dominii Angliae non sint inquisitores haereseos nec ex officio inquisitionis suae pravitatis haereses ibidem inveniri et puniri soleant, propter quod iura et privilegia inquisitionis eiusdem pravitatis incognita et inusitata inibi existere dignoscuntur, ad tui favoris clypeum, fili carissime, in quo splendor longe lateque irradiat fidei orthodoxae, velut ad strenuissimum Christi et eiusdem fidei pugilem pro huiusmodi pravitate et eius cultoribus confundendis et extirpandis recurrit sancta mater ecclesia confidenter. Quapropter serenitatem regiam attente requirimus, attentius exhortamur in Domino et obnixius deprecamur, cum in fulcimentum ecclesiasticae potestatis temporalis fortitudinis sit gladius institutus, quatenus pro divina reverentia, honore ipsius fidei et populari salute tam iustitiario tuo Hiberniae praelibatae quam ceteris ministris tuis per ipsam Hiberniam constitutis dare cures pervigil, ferventer et efficaciter per tuas litteras in mandatis, ut dicto episcopo ceterisque antistitibus Hiberniae supradictae, quotiens et quando ab eis fuerint requisiti, viriliter et potenter assistant auxilio brachii saecularis ad capiendum, puniendum et extirpandum praefatos haereticos et alias haereses in illis partibus noviter pullulantes ac etiam ceteros credentes, fautores, receptatores et defensores eorumdem haereticorum, iuxta canonica instituta, quae etiam praesidentes regimini regni, provinciae sive loci obligant et astringunt. Ex hoc enim aeternae maiestati offeres gratitudinis debitae holocaustum, fidem exaltabis eamdem, sanctam ecclesiam honorabis, requisitioni, exhortationi et deprecationi nostris huiusmodi acquiesces, tuique regalis nominis titulus extolletur altius, et continuus tibi prosperitatis et salutis proveniet usufructus. Datum Avinione VIII idus novembris anno primo.a