« bullarium-franciscanum-4393 »

Dilecto filio ‥ ministro generali ordinis fratrum Minorum.

Compatiens et misericors etc. Porrecta siquidem nobis dilecti filii Bartholomaei Brugerie Albien. dioec. presbyteri, tui ordinis professoris, petitio continebat, quod dudum, prohdolor, tempore, quo... Romae fuit erectum ab impiis et filiis Belial simulacrum antipapae, dilecto filio ‥ inquisitori haeresis in Carcassonen. partibus extitit accusatus et per eum ad suum carcerem ... per septennium condemnatus pro eo, quod in quadam ecclesia dictae dioecesis in publica praedicatione dixerat, quod rumor erat, quod duo erant papae, unus Avinione et alius in dicta Roma, quem imperator fecerat fieri, et pro quo eorum ipse et eum tunc audientes orare deberent,... ipsi audientes dictam suam praedicationem viderent, sed cum fortiore ipse ac dicti audientes se tenere debebant; et [quod] in festo b. Antonii eiusdem ordinis, ad quod fratres Praedicatores venerant, idem Bartholomaeus tum duobus ipsorum Praedicatorum in capitulo dixerat, quod, quando fuerat in illo passu missae, in quo oratur pro domino papa, sibi acciderat cogitatio, pro quo debebat orare, an pro verissimo Christi vicario Romano pontifice vel pro antipapa iam dicto; ipsoque capto existente in dicto carcere per ministrum generalem dicti ordinis, qui tunc erat, habitu ipsius ordinis expoliatus et ad procurationem ‥ generalis procuratoris dicti ordinis in Romana curia de mandato fel. rec. Ioannis papae XXII praedecessoris nostri habitus, quem dictus Bartholomaeus gestabat, fratribus ipsius ordinis extitit assignatus; et postremo post longam per eum toleratam poenitentiam patienter per dictum inquisitorem sibi impositam, pie consideratis patientia humili et conversatione devota, idem inquisitor ipsum de praefato carcere misericorditer liberavit certis sibi poenitentiis iniunctis, utpote psalteriis et ieiuniis et quod, quam cito cum eo super executione ordinum et officii sacerdotalis existeret dispensatum, per triennium duas missas pro domino papa (unam de sancto Spiritu et aliam de beata Virgine Maria) celebrare teneretur qualibet septimana. Quare nobis praefatus Bartholomaeus supplicavit humiliter et devote, quatenus secum, ut huiusmodi poenitentiam sicut cupit valeat adimplere et alias commodius Domino famulari, super executione praedicta dispensare ipsumque ad eam integre restituere misericorditer dignaremur. Quia igitur eadem sancta ecclesia nulli claudit suae pietatis gremium ad eam humiliter redeunti, nos ad instar misericordiarum Patris et Domini miserentis, ipsius Bartholomaei piis et devotis in hac parte supplicationibus inclinati, discretioni tuae per apostolica scripta mandamus, quatenus eundem Bartholomaeum, nisi aliud canonicum obsistat, auctoritate nostra recipias et recipi facias in tuo et eius ordine supradicto, et si post duos annos post receptionem huiusmodi praedictus Bartholomaeus tibi emendatus bene videbitur, cum eo eadem auctoritate dispenses, ut in susceptis ordinibus secrete valeat celebrare ac etiam ministrare, iniuncto eidem quod salubriter conspexeris iniungendum. Datum Avinione III idus aprilis anno primo.