« bullarium-franciscanum-4208 »

Dilectis filiis ‥ abbati monasterii s. Gemini Narniensis dioecesis et Sicardo de Galhaco Mimatensis ac Petro Symonis Iacobuci Spoletanae canonicis ecclesiarum.

Prudentum virginum votis etc. Cum itaque dilecta in Christo filia Alenucia nata dilecti filii Angeli Iannis de terra Arnulforum, puella litterata Spoletanae dioecesis, cupiat, sicut accepimus, una cum dilectis in Christo filiabus ‥ abbatissa et conventu monasterii s. Pauli inter vineas Spoletan., ordinis s. Clarae, in eodem monasterio sub regulari habitu virtutum Domino famulari, nos volentes dictam Alenuciam in huiusmodi laudabili proposito confovere, discretioni vestrae per apostolica scripta mandamus, quatenus ‥ ipsam Alenuciam, si sit idonea et aliud canonicum non obsistat, faciatis auctoritate nostra in dicto monasterio, si in eo certus monialium numerus non habetur vel etiam si huiusmodi numerus forsan existat et aliqua de dicto numero deest ad praesens, exnunc, alioquin quamprimum aliquam deesse contigerit, recipi in monacham et sororem sibique iuxta ipsius monasterii consuetudinem regularem habitum exhiberi ac ei de communibus ipsius monasterii proventibus sicut uni ex aliis dicti monasterii monialibus integre provideri ipsamque sincera ibidem in Domino caritate tractari: non obstantibus etc. Datum Avinione, XIV kalendas aprilis, anno quintodecimo.