« bullarium-franciscanum-4103 »

Universis christianis in imperio Persidis constitutis.

Votis zelamus ardentibus et summis desideriis affectamus, ut cunctis mortalibus, quos Dei filius Iesus Christus suo sanguine pretioso redemit, et coelestis gratiae radius illucescat et salus votiva proveniat animarum, ut hostis antiqui (semper quaerentis, ut noceat) elusa nequitia supernae beatitudinis gloria, quam non sufficit capere intellectus humanus quamque Salvator noster se diligentibus repromittit, in suavitatis fecundae dulcedine perfruantur; hoc etiam profundius perpeti cura revolvimus, hoc sitimus ardentius, hoc in solidae charitatis ardore crebris orationibus postulamus, ut inter omnes, quos regeneravit unda baptismatis, cesset [s]cissurae divisio, errorum nebulae fidei claritatem non maculent et mentales oculos in Christo credentium et colentium nomen eius detestabilis scismatis inimicatio et temeratae fidei perfidia non obducat, sed una sancta catholica et universalis Romana ecclesia nulla scismatum scissura divisa in unitate fidei orthodoxae sub uno pastore et unius ovilis intemerata et solida unione ad conquirendam eiusdem beatitudinis gloriam felicibus prosperetur eventibus et gratis successibus fecundetur. Ideoque universitatem vestram rogamus, monemus et hortamur attente in domino Iesu Christo, per ipsius aspersionem pretiosi sanguinis obsecrantes, quatenus venerabilem fratrem nostrum Guilelmum de Zigiisa episcopum Taurisien., quem nuper ad episcopalis dignitatis apicem auctoritate apostolica duximus promovendum quemque ad partes ipsas velut fructuosum futurum et utilem, ut speramus, ad messem nationum ipsarum partium in horrea Dominica inferendam, ad dictas partes providimus personaliter destinandum, necnon dilectos filios fratres Praedicatorum et Minorum ordinum in dictis partibus commorantes vel illuc venientes ob reverentiam nostram et sedis apostolicae habere velitis propensius commendatos eosque benigne recipientes et caritative tractantes sacris instructionibus, quas in doctrina catholicae fidei vobis facient, vestrarum mentium aures devotius impendatis animosque vestros, quorumlibet schismatum pulsis erroribus, unitati catholicae fidei et sanctorum patrum auctoritatibus in omnibus cooptetis; quoniam id est summe et immense universali gregi fidelium profuturum, si ubique locorum in cunctis fidelibus, qui gaudent nomine christiano, unus Deus, una fides, unum baptisma, una totius mundi confessione vobis concordibus teneatur. Datum Avinione, XII kal. septembris, anno tertiodecimo.b