« bullarium-franciscanum-4015 »

Venerabili fratri archiepiscopo Burdegalen. et dilectis filiis maioris et s. Severini capitulis necnon curatis et rectoribus parochialium ecclesiarum civitatis et suburbiorum Burdegalen.

Gravem dilectorum filiorum Praedicatorum et Minorum fratrum ordinum Burdegallen. querelam non absque admiratione recepimus continentem, quod vos, filii curati et rectores, iam per annum et amplius in ecclesiis vestris, vosque maioris et sancti Severini ecclesiarum Burdegallen. canonici in aliqua processione communi non permisistis nec permittitis eosdem fratres Praedicatores et Minores proponere verbum Dei, propter quod tam civitas Burdegallen., dolens et deflens subtractum sibi solitum pabulum verbi vitae, necnon dilectus filius senescallus Vasconiae, quam etiam dicti fratres, ne verbum Dei in praeiudicium populi civitatis eiusdem et suarum etiam periculum animarum sine causa diutius maneat alligatum, ad nos super hoc humiliter recurrentes, nobis pia precum instantia supplicarunt, ut eis in praemissis consulere paterna sollicitudine curaremus. Nos igitur fel. rec. Bonifatii papae VIII praedecessoris nostri in hac parte vestigiis inhaerentes, vos universos et singulos praesentium tenore rogamus et exhortamur attente, vobis nihilominus districte praecipiendo mandantes, quatenus, pro divina et apostolicae sedis reverentia atque nostra, praedictos ordines et professores eorum habentes affectu benevolo commendatos, fratribus ipsis non vos difficiles, graves, duros aut asperos, sed potius favorabiles, propitios et benignos, piaque munificentia liberales [exhibere] studeatis [eosque] iuxta constitutionem eamdem tamquam cooperatores vestros idoneos et laborum vestrorum participes prompta benignitate recipere et affectuose admittere minime omittatis, ut proinde vobis aeternae beatitudinis praemium augeatur et animarum salutis incrementa felicia procurentur. Nec vos lateat, quod, si secus a vobis agi fortasse contingeret in hac parte, nos dissimulare seu praeterire, salva conscientia non possemus, quin contra vos tanquam transgressores constitutionis eiusdem et exhortationum, ac iussionum nostrarum temerarios contemptores debite procederemus, prout contemptus et temeritatis huiusmodi qualitas postularet. Datum Avinione, IV kalendas iulii, anno duodecimo.