Description
-
Jean XXII (1316-1334)
-
Praeficit Sinibaldum Minoritam dioecesi Auximanae in episcopum.1
-
1326, augusti 6, Avinione.
-
1326
-
Dilecto filio Sinibaldo electo dioecesis Auximan.
Romani pontificis etc. Olim siquidem, dum ecclesia Auximanaa, eidem ecclesiae Romanae immediate subiecta, episcopatus titulo potiretur ac bonae memoriae Berardus, dioecesis Auximanae (tunc Auximanus) episcopus, ipsius ecclesiae Auximan. regimini praesideret, nos exigentibus gravibus et notoriis culpis atque demeritis universitatis et incolarum terrae (tunc civitatis) Auximan., qui maligno spiritu concitati adversus nos et Romanam ecclesiam furentibus et obstinatis animis patenter et manifeste rebellionis calcaneos erexerunt, nos et dictam Romanam ecclesiam provocando et afficiendo multimodis iniuriis et offensis, dictam terram (tunc, ut praemittitur, civitatem) de fratrum nostrorum consilio et de apostolicae plenitudine potestatis episcopalis dignitatis honore privavimus, iustitia exigente, ac voluimus et decrevimus de consilio et plenitudine antedictis, ut ex tunc idem Berardus, et qui successor in antea pro tempore sibi foret, Auximanae dioecesis episcopus vocaretur. Deinde vero praefato Berardo in partibus illis sublato de medio, nos attendentes, quod nullus praeter nos de provisione praefatae dioecesis, constitutae in terra spectante ad Romanam ecclesiam memoratam, de pontifice praeficiendo eidem se possit intromittere ista vice, pro eo quod nos diu .... reservavimus ....; cupientes quoque regimini praefatae dioecesis nostrae providentiae studio utilem et fructuosam praeesse personam: post deliberationem, quam cum eisdem fratribus super hoc attentam habuimus, demum in te ordinis fratrum Minorum, ordinem ipsum expresse professum et in sacerdotio constitutum, litterarum scientia praeditum, morum et vitae honestate decorum, in spiritualibus providum et temporalibus circumspectum et aliis multiplicibus virtutum donis coram nobis et dictis fratribus fide dignorum testimonio commendatum, convertimus oculos nostrae mentis. Quibus omnibus debita meditatione pensatis de persona tua de dictorum fratrum consilio auctoritate apostolica dictae dioecesi providemus teque sibi in episcopum praeficimus et pastorem, curam et administrationem eiusdem dioecesis tibi in spiritualibus et temporalibus plenarie committendo etc. Dat. Avinione, VIII idus augusti, anno decimo.b
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°621., pp.-306
-
Reg. Vat. t. 81, ep. 2770, apud Wadd. l. c. n. 60; cfr. infra n. 632.
1 -
(a) Osimo in marchia Anconitana.
-
(b) In e. m. clero ac populo dioec. Auximan. Die 26 ian. 1329 summus pontifex rectori marchiae Ancon. mandat, ut de castro Montisfano (Monte Fano), quod Sinibaldus ep. dioec. Auximan. ad suam ecclesiam pertinere praetendit, se informet et rescribat (Reg. Vat. t. 115, f. 36, ep. 230).