Description
-
Jean XXII (1316-1334)
-
Episcopo Valentino committit, ut concedat facultatem fundandi unum monasterium Clarissarum in villa Xativa ex legatis a Laurina de Denteza vidua Rogerii de Lauria admirati relictis.1
-
1326, iunii 1, Avinione.
-
1326
-
Venerabili fratri episcopo Valentin.
Significarunt nobis dilecti filii Iacobus Zaguardia et Aegidius Martinus Denteza, laici tuae dioecesis, executores testamenti seu ultimae voluntatis quondam Laurinae Denteza, relictae quondam Rogerii de Lauria admirati regnorum Siciliae et Aragoniae viduae, quod dicta Laurina in dicto testamento voluit et ordinavit, quod unum solemne monasterium sororum ordinis sanctae Clarae construi et aedificari ac de bonis suis dotari deberet in villa Xativaa dictae tuae dioecesis, sufficientibus eis de bonis praedictis dotibus assignatis. Quare praefati executores nobis humiliter supplicarunt, ut, cum ipsi parati sint eiusdem testatricis piam in hac parte exequi voluntatem, eis construendi dictum monasterium in villa praedicta concedere licentiam dignaremur. Nos igitur ipsorum supplicationibus inclinati ac de tuae circumspectionis industria plenam in Domino fiduciam obtinentes, fraternitati tuae praesentium auctoritate committimus et mandamus, quatenus eisdem executoribus construendi et aedificandi dictum monasterium cum ecclesia seu oratorio et aliis necessariis officinis in villa praefata, dummodo sufficientes redditus pro supportandis necessitatibus saltem duodecim sororum eiusdem ordinis inibi ponendarum ad praestandum Domino perpetuum famulatum iuxta tuae discretionis arbitrium studeant assignare, auctoritate nostra concedas licentiam specialem, quacumque constitutione contraria non obstante, iure parochialis ecclesiae et cuiuslibet alterius semper salvo. Datum Avinione, kalendis iunii, anno decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°611., pp.-302
-
Reg. Vat. t. 81, ep. 1702, apud Wadd. l. c. n. 55.
1 -
(a) Xativa in custodia Valentiae prov. Aragoniae.