« bullarium-franciscanum-3724 »

Dilectis filiis ‥ sancti Iacobi prope Perusium et ‥ sanctae Mariae de Villisgeminis Perusinae dioecesis prioribus ac Bussolo de Parma, capellano nostro, canonico Tornacensi.

Cupientibus vitam ducere regularem apostolicum debet adesse praesidium, ut eorum pium propositum possint ad laudem divini nominis adimplere. Cum itaque, sicut accepimus, dilecta in Christo filia Gemina nata Bindoli civis Perusini cupiat in monasterio sanctae Mariae de Montelucido ordinis sanctae Clarae prope Perusium una cum dilectis in Christo filiabus ‥ abbatissa et conventu dicti monasterii sub regulari habitu Domino perpetuo famulari: nos volentes dictam Geminam in huiusmodi suo laudabili proposito confovere, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios dictam Geminam, si sit idonea aliudque sibi canonicum non obsistat, auctoritate nostra recipi faciatis in dicto monasterio in monacham et sororem eique iuxta ipsius monasterii consuetudinem regularem habitum exhiberi et sincera in Domino caritate tractari. Non obstante de certo monialium numero, si forte ibidem existat, et aliis quibuscumque statutis etc. Datum Avinione, XIII kalendas iunii, anno quinto.