« bullarium-franciscanum-3674 »

a) Dilectae in Christo filiae Blanchae, natae carissimi in Christo filii nostri Philippi regis Franciae et Navarrae illustris, moniali de Longocampo ordinis sanctae Clarae Parisiensis dioecesis.

Ut erga sedem apostolicam eo amplius crescat tuae devotionis affectus, quo eam benigniorem inveneris in faciendo tibi gratiam specialem, tuis devotis supplicationibus inclinati, ut liceat tibi duas mulieres saeculares honestas habere, quae tibi usque ad annos tuae pubertatis in monasterio, in quo te morari contigerit, valeant deservire, non obstantibus quibuscunque statutis etc. tenore praesentium indulgemus. Nulli ergo etc. Datum Avinione, idibus ianuarii, anno quarto.

b) Eidem.

Tuae devotionis sinceritas promeretur, ut in hiis, quae pie postulas, desideriis tuis favorabiliter annuamus. Hinc est, quod nos tuis et carissimae in Christo filiae nostrae Ioannae reginae Franciae et Navarrae illustris, matris tuae, pro te nobis super hoc humiliter supplicantis, supplicationibus inclinati devotioni tuae habendi, postquam ad annos perveneris pubertatis, unum capellanum et unum medicum saeculares, quos tu vel dicta regina duxeris eligendos, ad investigandum et referendum statum tuum tuis parentibus et amicis, quando et quoties tibi videbitur expedire, dictisque capellano et medico monasterium ordinis sanctae Clarae, in quo te pro tempore morari contigerit (dummodo processerit de licentia illius, qui ipsi monasterio praeest vel praeerit pro tempore, cuius conscientiam oneramus), libere intrandi, ita tamen quod ibi non comedant nec pernoctent, non obstantibus quibuscunque etc., tenore praesentium indulgemus.a Nulli ergo etc. Datum Avinione, idibus ianuarii, anno quarto.

c) Eidem.

Benigno sunt illa tibi concedenda favore, per quae, sicut pie desiderare dinosceris, conscientiae tuae pacem et salutem etiam animae Deo propitio consequaris. Hinc est, quod nos tuis devotis supplicationibus inclinati, ut unum de ordine Minorum sacerdotem, qui fuerit de conventu loci ipsius ordinis existentis iuxta monasterium, in quo te morari contigerit, in tuum possis eligere confessorem, qui tuam confessionem infra claustrum dicti monasterii audire teque visitare valeat, quoties fuerit opportunum, et pro commissis poenitentiam tibi salutarem iniungere et super hiis beneficium debitae absolutionis impendere, nisi forte talia fuerint, propter quae sedes apostolica sit merito consulenda, tibi auctoritate praesentium indulgemus. Nulli ergo etc. ‥ Datum Avinione, idibus ianuarii, anno quarto.

d) Eidem.

Desideriis tuis libenter annuimus etc. Hinc est, quod nos tuis devotis supplicationibus inclinati, ut usque ad decennium post tuae tempora pubertatis dilectus filius guardianus fratrum ordinis Minorum Parisiensium, qui pro tempore fuerit, tecum super constitutionibus, statutis vel observationibus regularibus ordinis sanctae Clarae, ad quae es per tuae religionis ingressum astricta (continentiae, obedientiae et propriae abdicationis substantialibus articulis dumtaxat exceptis), dispensare valeat, tibi et eidem guardiano auctoritate praesentium indulgemus. Nulli ergo etc. Datum Avinione, idibus ianuarii, anno quarto.