« bullarium-franciscanum-3490 »

Dilectae in Christo filiae nobili mulieri Blancae, filiae sanctae memoriae beati Ludovici confessoris regis Franciae.

Eximiae devotionis affectus, quo velut filia benedictionis et gratiae erga nos et Romanam viges ecclesiam, promeretur, ut votis tuis, quantum cum Deo possumus, favorabiliter annuamus. Oblata siquidem nobis ex parte sua petitio continebat, quod nos olim tibi, ut infra septa sanctae Clarae iuxta Parisius et Humilitatis beatae Mariae Parisien. dioecesis monasteriorum ordinis eiusdem sanctae Clarae (extra tamen eorum claustra) liceret tibi cum decenti comitiva honestarum mulierum, quotiens et quando velles, habitare ibique habere ostium et clausuram, unde tu dictaeque mulieres ingredi et egredi ac extraneis loqui personis libere valeretis possentque inde necessaria intromitti ac intrare ad te confessor tuus de ordine fratrum Minorum, cum uno fratre dicti ordinis, cum vellet, et similiter physici et chirurgi tam saeculares quam religiosi, etiam dicti ordinis Minorum, nec non minutores, quando sibi visum existeret opportunum, per nostras certi tenoris litteras duximus indulgendum. Verum quia tu, sicut asseris, variis infirmitatibus amplius solito praegravata loca extra claustra et intra septa praedicta, quae te, ut praemittitur, inhabitare contigerit, absque personae tuae gravamine magno exire non posses personis tunc ad te venientibus locutura: nos, volentes te favore prosequi gratiae amplioris, tuis supplicationibus inclinati, ut viri et mulieres honesti ad te intra dicta loca, quae taliter inhabitaveris, quando et quoties tibi videbitur expedire, pro tuis negotiis aliisque causis congruis et honestis intrare libere valeant, praefata prima indulgentia nostra tibi nihilominus in omnibus semper salva, devotioni tuae auctoritate praesentium indulgemus. Nulli ergo etc. Datum Avenione, IV kalendas ianuarii, pontificatus nostri anno octavo.