Description
-
Boniface VIII (1294-1303)
-
Visitantibus Ecclesiam S. Mariæ de Pace Bononien. Diæcesis indulgentias impertitur. ex Reges. Vat. Pont. epist. 416. anni 5. ex Vadd. ad hunc annum n. 10. & Petro de Alva in Indiculo num. 7.
-
Anno 1299. die 26. Decembr.
-
1299
-
BONIFACIUS &c.
Dilectis filiis ‥ Guardiano, & Fratribus Ordinis Minorum Sanctæ Mariæ de Pacea Bononien. Diœcesis Salutem, & Apostolicam Benedictionem.
Ante thronum Divinæ clementiæ fideles Christi Sanctorum adjuti suffragiis ad eorum colenda festiva solemnia eò debent frequentiùs excitari, quò talium Patronorum adjuti præsidio potiora retributionis æternæ præmia promerentur: Nosque vigilis more Pastoris oves gregis Dominici curæ nostræ commissas, quas cupimus in loco pascuæ collocari, ad eorumdem Sanctorum trahimus libenter obsequia, ut eorum fulti patrociniis ad æternæ salutis valeant gaudia pervenire. Cupientes igitur, ut Ecclesia vestra sub vocabulo gloriosissimæ Virginis Mariæ ad honorem ejus, & Beati Francisci fundata frequentiâ fidelium honoretur, & circa eam quærentium Dominum tantò ferventiùs devotio ferveat, quantò abundantiùs spirituales ibi thesauros invenerit in cælesti Jerusalem perenniter profuturos, omnibus vere pœnitentibus, & confessis, qui ad eandem Ecclesiam in singulis ejusdem Virginis, unum annum, & quadraginta dies, qui verò in ipsius Beati Francisci, Sancti Bonifacii, Sancti Benedicti, & Sanctæ Mariæ Magdalenæ festivitatibus, necnon in anniversario die Dedicationis ipsius Ecclesiæ causâ devotionis accesserint annuatim, de Omnipotentis Dei misericordia, & Beatorum Petri, & Pauli Apostolorum ejus auctoritate confisi, centum dies de injunctis sibi pœnitentiis misericorditer relaxamus. Datum Laterani VII. Kalendas Januarii, Pontificatus nostri Anno Quinto.
-
Bullarium Franciscanum romanorum pontificum, tomus IV, n°CLXXV., p.494
-
(a) S. M. de Pace: de quo Vaddingus ad hunc an. n. 10. asserit, nullum sibi suppetere argumentum pro ejus exordiis certo termino concludendis. Verùm ex Archivo nostri Conventus S. Francisci Bononiæ habemus Cænobium hoc constructum fuisse a Pace Paci Doctore legum, in litteris insigni, agendisque rebus viro strenuo, qui anno 1305. factus fuit Prætor seu Potestas Patavii ex append. 2. ad Chron. Rolandini Patavini, cum ante ipsum quidam Gullielmus de Portanova ad ipsius primam erectionem bis centum & quinquaginta scutorum summam testamento legasset circa an. 1274.