« bullarium-franciscanum-3186 »

BONIFACIUS &c.

Venerabili Fratri Alamannoa Archiepiscopo Arboren.b & Tyren.c Salutem, & Apostolicam Benedictionem.

Ad regimen &c.d Dudum siquidem Arboren. & Tyren. Ecclesiis, quæ per Sedem Apostolicam canonice sunt unitæe, per obitum bonæ memoriæ Scholayf Arboren. & Tyren. Archiepiscopi Pastoris solatio destitutis, dilecti filii Archipresbyter, & Capitulum ipsius Ecclesiæ Arboren. ad quos Archiepiscopi Arboren. de jure communi, & Tyren. ex privilegio dictæ Sedis eis concesso, electio pertinet, vocatis omnibus, qui debuerunt, voluerunt, & potuerunt commode interesse pro futuri substitutione Pastoris, die ad eligendum præfixa convenientes in unum deliberaverunt super hujusmodi negotio per viam procedere compromissi, & tandem post aliquot tractatus ab eisdem Archipresbytero, & Capitulo super hoc habitos in Marianum Mainelli, & Marianum de Ruo Canonicos Arboren. unanimiter, & concorditer compromittere curaverunt, concessâ eisdem Canonicis providendi ea vice Arboren. & Tyren. Ecclesiis prædictis de Pastore plenâ, & liberâ potestate. Prædicti verò Canonici hujusmodi compromisso recepto, Venerabilem Fratrem nostrum Raynerium Plovacen. Episcopum juxta formam hujusmodi compromissi, & potestatem sibi traditam in Arboren. & Tyren. Archiepiscopum concorditer postularunt, dictique Archipresbyter, & Capitulum per supradictum Marianum de Ruo, & dilectum filium Marianum de Alexandro earumdem Arboren. & Tyren. Ecclesiarum Canonicos ad Nos propter hoc specialiter destinatos Nobis decretum postulationis hujusmodi præsentarunt humiliter supplicantes, ut postulationem eamdem benigne admittere dignaremur. Nos autem, decreto ipso recepto, examinationem postulationis ejusdem Venerabili Fratri Joannig Tusculano Episcopo, ac dilectis filiis nostris Roberto tituli Sanctæ Pudentianæ Presbytero, & Francisco Sanctæ Luciæ in Silice Diacono Cardinalibus duximus committendam. Quibus decretum, & processum postulationis ejusdem examinantibus diligenter, Nobisque, ac Fratribus nostris super his facta relatione fideli, hujusmodi postulationem, non ratione postulatæ personæ, sed ex certis aliis rationabilibus causis non duximus admittendam, provisionem earumdem Ecclesiarum Arboren. & Tyren. ea vice dispositioni Sedis Apostolicæ reservantes, ac decernentes ex tunc irritum, & inane, si secus super hoc scienter, vel ignoranter a quoquam contingeret attentari. Et demum cupientes eisdem Ecclesiis, ut salubriter gubernentur, de persona idonea providere, ac talem illis præesse Pontificem, de quo certa esset Nobis notitia, quòd ipsum clara meritorum suorum insignia redimirent, nec ejus charitas erga plebem suo regimini committendam dubia redderetur, & in ejus fide fida recumberet securitas subditorum, in te Fratrum Ordinis Minorum professorem, cui litterarum scientiam, honestatem vitæ, morum maturitatem, spiritualium, & temporalium providentiam, aliaque virtutum merita grandia per familiarem experientiam novimus suffragari; quòdque grata, & devota obsequia Apostolicæ Sedi circa executionem negotiorum ab eadem Sede tuæ sollicitudini commissorum nosceris impendisse, direximus oculos nostræ mentis, teque de prædictorum FF. nostrorum consilio, & Apostolicæ plenitudine potestatis eisdem Arboren. & Tyren. Ecclesiis in Archiepiscopum præficimus, & Pastorem, plenam, & liberam administrationem ipsarum tibi in spiritualibus, & temporalibus committendo; tibi quoque postmodum per Venerabilem Fratrem nostrum Matthæumh Portuen. Episcopum munus consecrationis impendi, ac demum per dilectos filios nostros Matthæumi Sanctæ Mariæ in Porticu, Neapolionemj Sancti Adriani, Guillelmumk Sancti Nicolai in Carcere Tulliano, Franciscuml Sanctæ Mariæ in Cosmedin, Jacobumm Sancti Georgii ad velum Aureum, Petrumn Sanctæ Mariæ Novæ, & Richardumo Sancti Eustachii Diaconos Cardinales Pallium de Corpore Beati Petri sumptum, plenitudinis videlicet Pontificalis insigne, a te cum ea, qua decuit, instantia postulatum fecimus exhiberi: firmâ conceptâ fiduciâ, quòd dirigente Domino actus tuos, eædem Arboren. & Tyren. Ecclesiæ per tuam circumspectionem providam, & providentiam circumspectam salubri gubernatione lætabuntur, ac prospero proinde regimine dirigentur. Jugum itaque Domini prompta devotione suscipias, & tua ejus oneri reverenter colla submitte, dictarumque Arboren. & Tyren. Ecclesiarum curam, & administrationem gerere studeas fideliter, & prudenter, ut ipsæ sub tuo felici regimine spiritualibus, & temporalibus commodis amplientur, & dexterâ Domini tibi assistente propitiâ, grata, & votiva suscipiant incrementa. Datum Laterani IV. Kalendas Maii, Pontificatus nostri Anno Quinto.