« bullarium-franciscanum-3087 »

BONIFACIUS &c.

Dilecto filio Nobili Viro Heliæ Thalayrandi Comiti Petragoricen.a ... & Vicecomiti Leomaniæb & Altivillaris, & dilectæ in Christo filiæ nobili mulieri puellæ natæ quondam Geraldic Comitis Armaniacid uxori ejus Salutem, & Apostolicam Benedictionem.

Etsi conjunctionem copulæ conjugalis in tertio consanguinitatis gradu Sacri Canones interdicante, Apostolicæ tamen Sedis consueta benignitas rigorem ipsorum Canonum temperans, mansuetudinis lenitate super iis interdum certis personis gratiam dispensationis indulget, & quod juris severitas denegat, concedit de abundantia pietatis cum conditione personarum ipsarum, locorum, & temporum sollicita consideratione discussa id, quod necessitate cogente, vel utilitate suadente cognoverit expedire. Sane oblata Nobis pridem per dilectum filium Fratrem Amanneum de Mota Ordinis Minorum ex parte vestra petitio continebat, quòd ab olim inter prædecessores, & Vassallos, ac amicos vestros, instigante pacis æmulo humani generis inimico, gravia guerrarum discrimina suscitata fuerunt, quarum occasione præter non modica damna rerum, plurima personarum, & animarum pericula evenerunt, & verisimiliter dubitabatur, ne inde provenire contingerent graviora. Unde ad hoc, ut hujusmodi cessarent discriminaf, pericula tam gravia vitarentur, cum aliud in hac parte non appareret opportunum remedium, affectabatis invicem matrimonialiter copulari. Sed quia tertio estis consanguinitatis gradu conjuncti, non poterat, impedimento hujusmodi obsistente, vestrum in hac parte, absque dispensatione Sedis Apostolicæ, desiderium adimpleri. Quare idem Frater Nobis ex parte vestra humiliter supplicavit, ut super hoc de opportunæ dispensationis gratia providere misericorditer curaremus; Nobis autem non denegantibus, nec expresse concedentibus dictam gratiam a prædicto Fratre taliter postulatam, idem Frater credens per hoc, sicut ex relatione ipsius postmodum didicimus, Nos petitionibus hujusmodi annuisse, vobis concessam esse a Nobis prædictam dispensationis gratiam per suas litteras intimavit, cujus litteris vos fidem credulam adhibentes ad sedandas guerras prædictas, & alia prædicta pericula evitanda matrimonium contraxistis. Quare per sæpedictum Fratrem culpam suam in hoc humiliter confitentem, iteratò Nobis ex parte vestra fuit cum instantia suppliciter postulatum, ut cum ex hujusmodi contractu matrimonii videatur fore prædictis dissidiis, & periculis obviatum, providere in hac parte vobis salubriter per dispensationis beneficium de benignitate Apostolica dignaremur. Nos igitur, qui salutem quærimus singulorum, & libenter Christifidelibus quietis commoda procuramus, consideratis præmissis, & aliis, quæ super hoc putavimus attendenda, vestris supplicationibus inclinati, ut impedimento consanguinitatis hujusmodi non obstante, possitis in dicto matrimonio licite remanere, auctoritate præsentium de speciali gratia dispensamus, prolem suscipiendam ex vobis legitimam nuntiantes. Nulli ergo omnino hominum liceat hanc paginam nostræ dispensationis &c. Datum Romæ apud Sanctum Petrum IV. Idus Maii, Pontificatus nostri Anno II.