« bullarium-franciscanum-3011 »

NICOLAUS &c.

Dilectis filiis ‥ Potestati ‥ Capitaneo, Consilio, & Communi Januensia Sal. & Ap. Ben.

Clara vestræ devotionis obsequia Romanæ Ecclesiæ probatis affectibus impensa diutiùs pulsant mentis nostræ ostium, ut a quibuslibet nocivis, & deviis avertamus incessus, & ad salutiferas vias, & rectas illos paternis suasionibus dirigamus. Sane quantis persecutionibusb, & impugnationibus quondam Petrus Aragonum Rex eamdem Ecclesiam attentarit, vulgaris famæ præloquium publicat, & ipsorum excessuum perpetratio notorie manifestat. Nec est alienum a communi scientia, quòd Jacobus natus ejus hostis publicus, & persecutor Ecclesiæ manifestus, in quo paterni criminis experimur exempla, vitiorum successor, & hæres, ac Siculi cum eodem præfatam Ecclesiam enormiter, ac multipliciter offenderuntc, propter quod varii, & horrendi processus per Sedem Apostolicam contra dictos Petrum, & Siculos habiti inter cetera patenter inhibent, & sub inflictione pœnarum excommunicationis, & Ecclesiastici interdicti, quas ipso facto contrafacientes incurruntd, expressiùs comminantur, ne cum ipsis societatem, conjurationem, vel fœdus aliquod quævis Civitas, Communitas, vel specialis persona Italiæ inire præsumerent quomodolibet, vel tentarent, quòdque nullus ad eumdem Jacobum Nuncios, vel litteras destinet, vel recipiat ab eodem, nec aliquod sibi consilium, auxilium, vel favorem impendat publice, vel occulte, sicut in ipsis processibus pleniùs continetur. More igitur pii patris volentes vestris, & aliorum Christifidelium præcavere periculis, cum processus dicti Jacobi scandala pariant, producant dissidia, & ex iis impediatur subsidium Terræ Sanctæ; Universitatem vestram rogamus, & hortamur attente in Domino Jesu-Christo, vobis nihilominus per Apostolica scripta mandantes, quatenus nullus vestrum ad eumdem Jacobum Nuncios, vel litteras destinet, vel recipiat ab eodem, nec aliquod sibi consilium, auxilium, vel favorem impendat publice, vel occulte, nec ulla fœdera, societatem, conjurationem, & pactionem, treguas, vel inducias cum eisdem Jacobo, aut Siculis, Frederico Jacobi præfati germano, Vicariis, Officialibus, Ministris, aut satellitibus eorumdem inire quomodolibet præsumatis, per quæ incidatis in pœnas processuum eorumdem. Quòd si secus feceritis, Nos singulares personas super hoc consilium, auxilium, seu favorem præstantes excommunicationis sententiâ innodamus, & Civitatem Januensem Ecclesiastico supponimus Interdicto. Et cum a malo non sufficiat abstinere, nisi quod bonum dignoscitur esse fiat, Nobis, & ipsi Ecclesiæ, ac charissimo in Christo filio Nostro Caroloe Siciliæ Regi Illustri, cujus causa est ejusdem Ecclesiæ, ac status, cura, & sollicitudo ad Nos præcipue spectare noscuntur, in imminentibus Nobis, & ipsi casibus, tamquam filii benedictionis, & gratiæ promptis studiis, & efficacibus auxiliis assistatis. Ecce quidem pro iis dilectum filium Fratrem Nicolaum de Camplisf Ordinis Minorum, zelatorem vestri honoris, & commodi ad Universitatem vestram providimus destinandum, quem mittentis intuitu, & suæ ad vos charitatis affectu sinceritas vestra devote recipiat, patienter audiat, & præmissa ad effectum laudabilem votivæ executionis adducat. Datum Romæ apud Sanctam Mariam Majorem II. Kalendas Martii, Pontificatus nostri Anno Quinto.