« bullarium-franciscanum-2400 »

JOHANNES Miseratione Divina Tusculanus Episcopus Apostolicæ Sedis Legatus &c.a

Quum nuper propter facinus in carissimos Nobis Fratres Prædicatores domus Argentinen. a Magistris, & Civibus Argentinensibus perpetratum Civitatem ipsorum inter alias graves, & aggravatas sententias Interdicto Ecclesiastico subderemus; nostræ sententiæ quidam multipliciter illuserunt. Nam Fratres & Sorores de Pœnitentia, vel ut superinducto utamur vocabulo, de tertia Regula plus solito apud Fratres Minores, quorum non magis interest, quam aliorum ingessere Divinisb, & humanæ sapientiæ verbis tamquam cujusdam exemptionis specie plurimos sibi attrahere studuerunt. Profecto quibus hujus temeritatis audaciam magis quam vobis, & vestræ negligentiæ imputemus? Nam quum esset aliquando a Nobis in vestros subditos lata excommunicationis, & interdicti sententia; præmissæ personæ apud dictos Fratres Minores, & apud S. Claram, vel alibi non sunt veriti audire Divina, & Ecclesiastica suscipere Sacramenta: unde factum est, ut jam in multis partibus Theuthoniæ soluto magis ac magis nervo Ecclesiasticæ disciplinæc parvi mucronem Pontificum, quo piacula resecari consueverant, nesciant formidare, quam extenuatam comperiunt facilitate detestabili claudicare. Expergiscimini igitur, quorum est satagere, ne vineam Domini Sabaoth vulpes demoliantur parvulæ; providentes, ne mali per moras longiores convalescentibus adhibeatur sera ut inefficax medicina; sed citò remedium conveniens apponentes non patiamini a præfatis personis auctoritatis vestræ sententias violari. Ecce enim nos Fratres, & Sorores de Pœnitentia, sive de tertia Regula, quarum habet concessio, sicut vidimus sub sigillo Curiæ Argentinen., quòd tempore generalis Interdicti possunt in locis privilegiatis audire Divina, & Ecclesiastica recipere Sacramenta, adjecto, nisi causam darent Interdicto, vel id ipsis contingat specialiter interdici: in Civitate Argentinensi expressè, ac nominatim specialiter interdicimus, constituentes, & præcipientes firmiter sub pœnâ excommunicationis, ne quis eorum, durante nostro Interdicto, & causâ Civium Argentinen., cum Fratribus prædictis, præsumat audire Divina, vel Ecclesiastica recipere Sacramentad. Universitati igitur vestræ sub pœna excommunicationis latæ in his scriptis præcipimus, quatenus præmissam sententiam ubicumque, sicut optimum videbitur, ad requisitionem ipsorum Fratrum Prædicatorum publicetis; & eodem modo contra tales etiam vestras sententias in antea defendatis nihil hæsistantes, quòd privilegium meretur amittere, qui concessâ sibi abutitur potestatee.

Datum &c.