« bullarium-franciscanum-2302 »

MARTINUS &c.

Dilecto Filio Moricoa Electo Suanen.b Sal., & Apostolicam Bened.

Rationis oculis intuentes commoda, quæ vacantibus Ecclesiis de salubri Prælatorum provisione proveniunt; reddimur corde solliciti, ut circa provisionem hujusmodi faciendam fructuosæ attentionis studium habeatur. Sanè dudum Suanen. Ecclesiâ per obitum bonæ memoriæ Davidc Episcopi Suanen. Pastoris solatio destitutâ, dilecti Filii Waltherinus Præpositus, & Capitulum ejusdem Ecclesiæ convenientes in unum dilecto Filio Gerardo Canonico Suanen. potestatem unanimiter contulerunt providendi eidem Ecclesiæ de Pastore; idemque Gerardus dilectum Filium Fratrem Donatum de Castellod Ordinis Minorum familiarem dilecti Filii Nostri M.e Sanctæ Mariæ in Porticu Diaconi Cardinalis elegit, seu postulavit in Episcopum Suanen.; Sed dictus Frater Donatus ex parte Præpositi, & Capituli prædictorum cum instantiâ requisitus hujusmodi electionem, seu postulationem renuit acceptare. Sicque iidem Præpositus & Capitulum ad tractandum de provisione ipsius Ecclesiæ iteratò insimul convenerunt, & post tractatum super hoc ab ipsis habitum dicti Capitulum prædicto Præposito, & dilecto Filio Ægidio Canonico ejusdem Ecclesiæ super hujusmodi provisione, illâ vice ipsi Ecclesiæ faciendâ tradiderunt similem potestatem, qui dirigentes in dilectum Filium Fratrem Nicolaum de Lavaretof prædicti Ordinis vota sua, ipsum in Suanen. Episcopum elegerunt. Et licèt dictus Frater Nicolaus hujusmodi electioni de se factæ a principio consensisset; demum tamen, cum jam essent certi Examinatores a Nobis in ejusdem electionis negotio in præsentiâ Nostrâ exposito deputati, dictis Præposito, & Capitulo apud dictum Fratrem Nicolaum, quòd præfatum negotium prosequeretur instantibus; idem Frater Nicolaus, mutato priori proposito, spontè cessit eidem electioni celebratæ de ipso, & omni juri sibi ex electione prædictâ quomodolibet acquisito. Verùm post hujusmodi cessionem, prædictis Præposito, & Capitulo, die ad eligendum statutâ, in dictâ Ecclesiâ congregatis, deliberatione præhabitâ, fuit ab eisdem Capitulo præfato Præposito potestas consimilis attributa. Idem verò Præpositus dilectum Filium Fratrem Rufinum de Mediolanog Ordinis supradicti familiarem dilecti Filii Nostri Jordanih Sancti Eustachii Diaconi Cardinalis duxit in Suanen. Episcopum eligendum; sed idem Frater Rufinus hujusmodi electionem de se factam noluit acceptare, renuntiando expressè ipsi electioni, ac omni juri, si quod ex eâ sibi fuerat acquisitum. Postmodum autem prælibati Præpositus, & Capitulum, vocatis omnibus, qui voluerunt, debuerunt, & potuerunt commodè interesse ad tractandum de futuri substitutione Prælati, convenientes in unum deliberaverunt super hoc per viam procedere compromissi, dictique Capitulum sæpedicto Præposito providendi eâ vice prædictæ Ecclesiæ de Pastore potestatem liberam concorditer concesserunt. Sanè memoratus Præpositus deliberatione super hoc præhabitâ diligenti, auctoritate concessionis hujusmodi te tunc Canonicum Assisinatem Cappellanum Venerabilis Fratris Nostri …i Episcopi Albanen., ut suis verbis utamur, eligendo postulavit, & postulando elegit; prout melius de jure valeret in Episcopum, & Pastorem Ecclesiæ supradictæ; tuque electioni hujusmodi celebratæ de te tuum præbuisti consensum; dicti quoque Præpositus, & Capitulum fecerunt Nobis decretum ejusdem electionis per Procuratores suos ad hoc constitutos specialiter præsentari; & tàm tu, quàm iidem Præpositus, & Capitulum, ut electionem ipsam confirmaremus, a Nobis suppliciter postulastis; ac demum propter quoddam dubium incidens in modo electionis ejusdem, omne jus, quod ex ipsâ electione tibi competebat, sponte ac liberè in Nostris manibus resignasti. Nos igitur hujusmodi resignatione receptâ, de ipsius Ecclesiæ ordinatione sollicitè cogitantes; ac illum eidem Ecclesiæ cupientes præfici Pontificem, per quem possit eadem Ecclesia salubriter gubernari; in te direximus oculos Nostræ mentis, qui de litterarum scientiâ, morum maturitate, prudentiâ spiritualium, & temporalium providentiâ apud Nos & Fratres Nostros fidedignorum testimoniis commendaris. Quapropter Gregi Dominico speciali volentes diligentiâ providere, de prædictorum Fratrum consilio te prædictæ Ecclesiæ præficimus in Episcopum, & Pastorem; firmâ spe, fiduciâque tenentes, quòd eadem Ecclesia per tuæ industriæ, ac circumspectionis studium auctore Domino præservabitur a noxiis, & adversis; ac spiritualibus, & temporalibus proficiet incrementis. Quocirca Discretioni tuæ per Apostolica scripta mandamus, quatenus impositum tibi onus a Domino, suscipiens reverenter, curam & administrationem ejusdem Ecclesiæ sic diligenter geras, & sollicitè prosequaris, quòd ipsa gubernatori circumspecto, ac fructuoso administratori gaudeat se commissam; ac bonæ famæ tuæ odor ex laudabilibus tuis actibus latiùs diffundatur; & præter retributionis æternæ præmium benevolentiæ Nostræ gratiam exindè pleniùs consequaris.

Datum apud Urbemveterem x. Kalendas Januarii, Pontificatus Nostri Anno Tertio.