« bullarium-franciscanum-2299 »

MARTINUS &c.

Dilecto Filio … Guardiano Conventus Fratrum Ordinis Min. Nivernen.a Salutem, & Apost. Bened.

Lecta Nobis dilectorum Filiorum Capituli Ecclesiæ Frasniacen. Nivernen. Diœcesisb petitio continebat, quòd dudum vacante Decanatu ipsius Ecclesiæ per mortem quondam Hugonis Jordani Ecclesiæ jam dictæ Decani, ejusque corpore tradito sepulturæ, ac ab eodem Capitulo, ad quod electio Decani Ecclesiæ prædictæ pertinet, certâ die ad eligendum Decanum præfixâ, pulsatâ campanâ, prout moris est, ad capitulum congregandum, horâque solitâ Capitulo congregato, præsentibus omnibus, qui voluerunt, debuerunt, & potuerunt commodè interesse, placuit omnibus & singulis de præfato Capitulo procedere per viam scrutinii super futuri electione Decani. Deinde verò electis tribus fide dignis de ipso Capitulo ad inquirendum super hoc secreto, & singillarim vota cunctorum; illisque per illos requisitis juxta traditam eis formam, & in duos scilicet, quondam Iterium de Thiengiis tunc viventem, & in dilectum Filium Magistrum Johannem de Chaonio Canonicos Ecclesiæ Nivernen., votis divisis illorum, iidem Iterius, & Johannes in discordiâ electi fuerunt ad Decanatum eumdem. Hujusmodi igitur negotio per appellationem ad Sedem Apostolicam devoluto, medio demùm tempore memoratus Iterius apud Sedem ipsam causâ prosequendi prædictum negotium commorans viam fuit universæ carnis ingressus. Quia verò prædicta Ecclesia ex eo, quòd per decem annos, & amplius Decano vacavit, passa est, ut asseritur, & adhuc sustinet spiritualiter, & temporaliter non modicam læsionem, ex parte ipsius Capituli Nobis fuit humiliter supplicatum, ut hujusmodi electionem de ipso Magistro Johanne, quem iidem Capitulum in spiritualibus providum, & in temporalibus circumspectum, ac de legitimo matrimonio procreatum, & in sacris Ordinibus constitutum existere; cuique maturitatem ætatis, morumque gravitatem, & litterarum scientiam suffragari asserunt, celebratam confirmare, vel saltem de ipso Magistro Johanne eidem Ecclesiæ providere de benignitate Apostolicâ curaremus. Ne igitur dicta Ecclesia propter Decani defectum detrimenta patiatur ulterius in præmissis; Nos de tuâ Circumspectione confisi præsentium tibi auctoritate mandamus, quatenus vocatis, qui fuerint evocandi; & inquisitâ de modo electionis, studiis Eligentium, & Electi prædicti meritis diligentiùs veritate; si electionem ipsam inveneris de personâ ydoneâ, videlicet de dicto Magistro Johanne canonicè celebratam, illam auctoritate Nostrâ confirmes; ipsumque Magistrum Johannem in dictâ Ecclesiâ instituas, ac admitti facias cum solemnitatibus debitis in Decanum. Alioquin præmissâ electione ritè cassatâ, facias ipsi Ecclesiæ de personâ ydoneâ in Decanum per electionem canonicam provideri. Non obstante indulgentiâ &c.c

Datum apud Urbemveterem viii. Idus Octobris, Pontificatus Nostri Anno Tertio.