« bullarium-franciscanum-2293 »

MARTINUS &c.

Dilecto Filio Erico Magdeburgen.a Electo Sal., & Apost. Bened.

Sacrosancta Romana Ecclesia, cui super cunctas Orbis Terrarum Ecclesias collatus est a Domino Principatus, pium ad Ecclesias ipsas in hujusmodi Orbis latitudine constitutas habens maternâ provisione respectum, laudabili studet observantiâ custodire; ut, cum de ipsarum provisionibus agitur, earum regimini Pastores idonei proponantur. Ex hoc Nos, qui licet insufficientibus meritis in sublimi sumus Apostolici culminis specula, disponente Domino, constituti, curis continuis angimur, ut eædem Ecclesiæ per Nostræ sollicitudinis studium a Prælatis dirigantur idoneis, & Rectoribus providis gubernentur. Sane Magdeburgensi Ecclesiâ per mortem bonæ memoriæ Conradib Magdeburgen. Archiepiscopi Pastoris solatio destitutâ; dilecti Filii Præpositus, & Capitulum ipsius Ecclesiæ convenientes in unum, ut moris est, ad tractandum de futuri substitutione Pastoris, ad provisionem ipsi Ecclesiæ faciendam deliberaverunt per viam procedere compromissi; sicque quatuor præfatæ Ecclesiæ Canonicis concesserunt unanimiter potestatem providendi eâ vice ipsi Magdeburgen. Ecclesiæ de Pastore; qui ad eligendum juxta concessionem hujusmodi procedentes dilectum Filium Gunterum ejusdem Magdeburgen. Ecclesiæ Thesaurarium in Magdeburgen. Archiepiscopum elegerunt. Verùm Henrico dicto de Gronemberchc Presbytero Magdeburgen. Canonico electioni se hujusmodi opponente, negotium electionis ejusdem extitit ad Apostolicam Sedem delatum. Et cum in negotio ipso coram fel. record. Johanne Papa Vigesimo primo prædecessore Nostro, & eo viam universæ carnis ingresso, coram dilecto Filio Nostro M.d Sanctæ Mariæ in Porticu Diacono Cardinali, quem piæ memoriæ Nicolaus Papa Tertius prædecessor Noster Partibus dederat Auditorem, partes ipsæ aliquandiu litigassent; præfatus Thesaurarius electioni hujusmodi de se factæ sponte renuntians liberè in Capitulo Magdeburgen. cessit omni juri, si quod sibi ex electione ipsâ fuerat acquisitum. Et tandem quidam de dictis Capitulo, nonnullis Canonicis ejusdem Ecclesiæ Magdeburgen. contradicentibus Bernardum de Welpiae Ecclesiæ præfatæ Cellerarium duxerunt in Magdeburgen. Archiepiscopum eligendum. Idemque Cellerarius hujusmodi electioni de se factæ consentiens Procuratorem suum pro ipsius electionis negotio prosequendo ad Sedem destinavit eamdem. Eodem itaque Procuratore coram præfato prædecessore Nostro Nicolao petente electionem eamdem factam de ipso Cellerario confirmari; eidem super hoc se opposuit Albertus Major Præpositus Magdeburgen. Ecclesiæ supradictæ. Postea verò eodem prædecessore Nostro Nicolao sublato de medio; idem Cellerarius personaliter ad Apostolicam Sedem accessit; & cum aliquandiù moram traxisset ibidem, inde licentiâ non petitâ, nec obtentâ recessit. Nosque de Fratrum Nostrorum consilio Præposito, & Capitulo supradictis per Nostras sub certa formâ litteras inhibuimus, ne ad aliquam electionem, vel postulationem in ipsâ Magdeburgensi Ecclesiâ procederent quoquo modo. Decernentes irritum & inane, si per ipsos scienter, vel ignoranter secus super hoc contingeret attemptari. Postmodum verò dictus Bernardus usus consilio saniori liberè renuntiavit, & spontè in præfato Magdeburgen. Capitulo electioni de se factæ, ac omni juri, si quod ex electione ipsâ competebat eidem. Prædicti autem Capitulum considerantes, quòd providere hac vice de Prælato, inhibitione, & decreto prædictis obstantibus, ipsi Magdeburgen. Ecclesiæ non valebant, una cum eisdem Ecclesiæ suffraganeisf, Prædicatorum, & Minorum Ordinumg Fratribus, Clero, & Populo Magdeburgen. Civitatis Nobis humiliter supplicarunt, ut de Personâ tuâ, per cujus potentiamh, & industriam probitatis relevari sperabant præfatam Magdeburgen. Ecclesiam jam collapsam, providere ipsi Magdeburgen. Ecclesiæ dignaremur. Nos igitur attendentes, quòd per tuæ providentiæ studium, & nobilitatis favorem multa poterant ipsi Ecclesiæ commoda provenire, te tunc Ecclesiæ Sancti Bonifatii Halberstadensisi Præpositum Cappellanum Nostrum, cujus clara merita sunt Nobis, & Nostris Fratribus non ignota, de prædictorum Nostrorum Fratrum consilio, & Apostolicæ plenitudine potestatis prædictæ Magdeburgen. Ecclesiæ in Archiepiscopum præfecimus, & Pastorem, sperantes in Domino, quòd cum sis scientiâ præditus, generis nobilitate conspicuus, & in spiritualibus, & temporalibus circumspectus, Ecclesia ipsa inter cæteras illarum partium titulo nobilitatis insignisj; quæ discriminibus exposita variis, conquassata molestiis, direptioni patens, & predæ per aliquorum Potentum oppressiones multiplices gravem in suis bonis, & juribus dicitur incurrisse jacturam; tuo laudabili studio; & virtute potentiæ ad statum debitum debeat restaurari; & optata in spiritualibus, & temporalibus suscipere incrementa. Quocirca mandamus, quatenus jugum Domini leve collis humilibus impositum tibi devotis suscipiens humeris circa curam præfatæ Magdeburgen. Ecclesiæ te sic reddas sollicitum, & attentum, quòd Clerus & Populus in eâ tuæ curæ commissus, in te se gaudeat Ministrum invenisse salutis; & tibi tandem supremi Pastoris benignitas unicuique responsura pro meritis æternæ retribuat gloriam claritatis.

Datum apud Urbemveterem ii. Idus Maij, Pontificatus Nostri Anno Tertio.