« bullarium-franciscanum-2211 »

NICOLAUS &c.

Dilectis Filiis … Abbati Sancti Petri foris Portam Viennensema , ‥ Priori Prædicat. Lugdunen.b , & Guardiano Min. Viennen.c FF. Ordinum, vel eorum Vicesgerentibus Sal., & Ap. Ben.

Ex incumbenti Nobis curâ Pastoralis officii Ecclesiarum omnium salubriter statui disponendo, instantia quotidiani Nostri laboris invigilat, ut sollicitudinis debitum, ad quod universis Ecclesiis jugo Apostolicæ servitutis astringimur, circa earum singulas exsolvamus in eo potissimè, ut ea per Nostræ providentiæ studium subducantur, quæ tempore vacationis ipsarum inter earum personas materiam dissensionis enutriunt; & Ecclesias ipsas dispendiosâ vacatione fluctuare compellunt; nam prout interdum experimento palpavimus, ex hujusmodi vacatione diutinâ in spiritualibus damna gravia, & in temporalibus detrimenta proveniunt Ecclesiis viduatis. Dudum siquidem Ecclesiâ Viennen.d per obitum bonæ memoriæ Guidonise Archiepiscopi Viennen. destitutâ Pastore, dilecti Filii Capitulum ipsius Ecclesiæ Cantorem ejusdem Ecclesiæ; ac dilectum Filium Capitulum Ecclesiæ de Romanisf Viennen. Diœcesis asserentes, ad se unà cum eisdem Viennensi Capitulo electionem Viennen. Archiepiscopi pertinere; ac dictum Capitulum ipsius Ecclesiæ de Romanis esse in possessione, vel quasi juris eligendi Viennen. Archiepiscopum unà cum Viennensi Capitulo supradicto, Magistrum Guillelmum de Valentiâg Archidiaconum Vindocinen.h in Ecclesiâ Carnoten.i in Viennen. Archiepiscopum elegisse dicuntur. Et tandem certis in hujusmodi electionum negotio appellationibus ad Sedem Apostolicam interjectis; ipsoque negotio proposito coram Nobis; licèt Boso dictus Poultres Canonicus ipsius Viennen. Ecclesiæ, ac aliqui Procuratores Capitulorum eorumdem in Nostrâ præsentiâ comparerent; quia tamen nec ipsi Electi, nec alii de prædictis Capitulis comparebant, per quos de qualitate Processus, & hujusmodi eligendi jure debita informatio, & instructio possent haberi, tali prætextu Viennen. Archiepiscopi substitutio retardatur. Nos autem sollicitis studiis præcavere volentes, quòd prædicta Viennen. Ecclesia occasione hujusmodi discordiæ jam exortæ, vel quæ ob id oriri posset imposterum, diù pastoris solatio non fraudetur; Discretioni vestræ in virtute obedientiæ districtè precipiendo mandamus, quatenus vos, vel duo; aut unus vestrum, receptis præsentibus cum omni celeritate, qua poteritis, mandatum Apostolicum exequentes eosdem Electos ex parte Nostrâ peremptoriè citare curetis; ut infra sex septimanas a die citationis hujusmodi, si electiones hujusmodi prosequi voluerint; vel aliàs sua crediderint interesse, cum omnibus actis, juribus, & munimentis suis, & ipsarum Ecclesiarum ipsos Electos, & jus eorum, seu præmissa contingentibus quoquomodo Apostolico se conspectui repræsentent; mandantes nihilominus Capitulis eisdem, quòd eorum singula quatuor, aut tres ad minus Canonicos de statu Ecclesiarum negotii & juris prædictorum, ac circumstantiarum omnium præmissorum notitiam obtinentes, cum sufficientibus mandatis plenè, ac diligenter ad omnia præmissa instructos, similiter cum omnibus actis juribus, munimentis suis, ac ea contingentibus quomodolibet, ad Nos infra prædictum terminum mittere non omittant, ut Electis, & Canonicis ipsis præsentibus per dictos Canonicos specialiter tam super processibus dictarum electionum, & meritis Eligentium, ac Electorum; quam super proprietate, possessione, vel quasi juris eligendi, quod iidem Capitulum ipsius Ecclesiæ de Romanis ad se, ut prædicitur pertinere proponunt, veritas apertius declaretur; & obvietur salubriùs anfractibus jurgiorum; ac patefactâ Nobis super prædictis pleniùs veritate, tam super ipso electionum negotio, quam super jure prædicto possimus de jure, vel aliàs de æquitate, prout ipsis Ecclesiis expedire viderimus, præsentialiter, & imposterum providere. Si verò dicti Electi commodè personaliter citari, vel eisdem Capitulis præmissa nuntiari non possent; nihilominus tam in Viennen., quàm de Romanis Ecclesiis supradictis proponatis publicè hujusmodi mandati, & citationis edictum, firmitatem pleni roboris habiturum, prænuntiantes Electis eisdem, quòd si ipsi, vel eorum alter venire ad Nos personaliter juxta formam citationis ejusdem infra terminum prædictum omiserint, dicti Electi, vel ex eis ille, qui, ut prædicitur, venire neglexerit vel infra terminum eumdem, aut saltem infra quindecim dies prædictas sex septimanas immediatè sequentes, de Canonico impedimento, si quod esset, quare personaliter venire nequiverint, Nobis non fecerint plenam fidem; eo ipso ex tunc omni jure, quod eis, vel ei quomodolibet competeret, vel competere posset ex prædictis electionibus, sint privati; & eisdem Ecclesiis ab eis, vel eo penitus absolutis, si ambos cadere ab hujusmodi electionum jure contigerit, provisionem ipsius Ecclesiæ Viennensis eâ vice Nobis reservamus de Apostolicæ plenitudine potestatis. Decernentes ex nunc in eo casu irritum & inane, si secus a quoquam extiterit attentatum. Reservatâ Nobis, sive dicti Electi, & Canonici, vel eorum aliqui venerint, sive non, procedendi medio tempore super prædictis electionibus, & jure eligendi, ac aliis spectantibus ad prædicta, & etiam contra Electos, & Capitula eadem, & eorum quodlibet, sicut expedire viderimus, juxta Canonicas sanctiones, & præsertim juxta mandatum Nostrumj de Electis, & Postulatis, ac personis, quæ electionibus, & postulationibus hujusmodi interfuerant, ad Sedem Apostolicam accedendis sub certâ formâ in audientiâ publicâ promulgatum citatione, mandato, & permutatione per vos faciendis nequaquam obstantibus, plenariâ potestate. Diem autem citationis hujusmodi, & quicquid in præmissis duxeritis faciendum, Nobis per vestras litteras harum seriem continentes celeriter, & fideliter intimare curetis. Non obstante Indulgentiâ, qua vobis, Prior, & Guardiane, vel vestris Ordinibus &c.k

Datum, ut supra.l