« bullarium-franciscanum-2189 »

NICOLAUS &c.

Venerabili Fratri …a Episcopo Augusten.b , & dilectis Filiis … Abbati Altecumbæc Cistercien: Ordinis, & … Guardiano Fratrum Minorum de Camberiacod Gebennensise , & Gratianopolitanæf Diœcesum Salutem, & Apostolicam Benedictionem.

Exhibita Nobis dilecti Filii Nobilis Viri Willhelmi de Castellario Fratris Venerabilis Fratris Nostri P.g Archiepiscopi Tarantasien.h, & dilectæ in Christo Filiæ Nobilis Mulieris Catharinæ natæ Nobilis Viri Theobaldi de Chor uxoris ipsius Willhelmi Tarantasien. Diœcesis petitio continebat; quòd cum dudum de contrahendo matrimonio inter eos tractatus habitus extitisset; quia ipsa Catharina cum quondam Jacobo Gonterii Bovet de Ayma eumdem Willhelmum tertia, & quarta consanguinitatis linea contingente matrimonium antea, dum viveret, duxerat contrahendum; a quo utpote propter sui frigiditatem maximami ad illam carnaliter cognoscendam penitus impotente dicta Catharina intacta, & virgo judicio fuisse dicitur Ecclesiæ separata; fel. record. Gregorius Papa Decimusj prædecessor Noster piæ memoriæ Innocentio Papæ Quinto prædecessori Nostro tunc Electo Lugdunen.k per suas sub certâ formâ scripsit litteras, ut cum Willhelmo, & Catharina prædictis auctoritate Apostolicâ dispensaret, quòd ad invicem, si vellent, matrimonium possent contrahere, impedimento hujusmodi non obstante. Sed eodem prædecessore Innocentio tunc Electo, antequam litteræ ipsæ sibi præsentatæ fuissent, in Ostien. & Velletren. Episcopuml primò, & tandem in Romanum Pontificem assumptom, nullus per easdem litteras habitus fuit processus; Sic itaque negotio hujusmodi se habente, Willhelmus & Catharina prædicti ad sedandum graves inimicitias dudum inter eumdem Archiepiscopum, & præfatum Theobaldum, eorumque Consanguineos exortas, ex quibus magna pericula imminebant, ex ignorantiâ non credentes post impetrationem litterarum Apostolicarum fuisse ulterius dispensandum; sed per solam impetrationem hujusmodi dispensatum; post unius tamen anni decursum a tempore separationis hujusmodi matrimonium invicem contraxerunt; & per plures annos insimul habitantes prolem procreasse noscuntur. Unde præfati Willhelmus & Catharina exinde habentes conscientias remordentes; & asserentes, quòd ex separatione hujusmodi matrimonii, si fieret, multa scandala provenirent; humiliter petebant a Nobis, ut animarum, & corporum imminentibus inde periculis occurrentes cum eis, quòd, impedimento hujusmodi non obstante, in ipso matrimonio licitè remanere valcant, dispensare, ac prolem susceptam, & suscipiendam facere nuntiari legitimam misericorditer curaremus. Quia verò vos de facto, & facti circumstantiis habere poteritis notitiam pleniorem, Discretioni vestræ per Apostolica scripta mandamus; quatenus, si præmissa vera sunt, & timeatur de scandalis, quæ narrantur; vosque secundum Deum hoc videritis expedire, super quo vestras intendimus conscientias onerare, cum eisdem Willhelmo & Catharina super præmissis auctoritate Nostrâ dispensare; ac prolem ipsam legitimam nuntiare curetis; nisi aliqua causa rationabilis in contrarium vos moveret. Quòd si hujusmodi causa se in iis forsan ingesserit; illam, & totius negotii qualitatem, antequam ulteriùs in ipso negotio procedatis, Nobis per vestras litteras harum seriem continentes studeatis fideliter intimare.

Datum Romæ apud Sanctum Petrum xv. Kalendas Maji, Pontificatus Nostri Anno Secundo.