Description
-
Nicolas III (1277-1280)
-
Electionem Abbatis Monasterii S. Benedicti Salernit. Monoculi discutiendam injungit; & an Electus citandus sit, ut se sistat apud Sedem Apostol. (Ex Vat. Reges. Pontif. epist. 41. anno 2.)
-
Anno 1279. die 17. Februarii.
-
1279
-
NICOLAUS &c.
Dilectis Filiis … Priori Prædicatorum, & … Guardiano Minorum Fratrum Ordinum Salernitan.a Salutem, & Apostolicam Benedictionem.
Ad audientiam Nostram pervenit, quòd dudum Monasterio Sancti Benedictib Salernitan. ad Romanam Ecclesiam nullo medio pertinente Ordinis Sancti Benedicti Abbatis regimine destituto, Monachi ejusdem pro futuri substitutione Abbatis convenientes in unum Thomam de Ebuloc ejusdem Monasterii Monachum defectum intollerabilem utpote oculorum orbatum altero patientem in suum Abbatem concorditer postularunt. Verùm idem Thomas mœtu defectus hujusmodi, ut asseritur, Apostolicæ Sedis conspectui se deferens præsentare pro negotio postulationis hujusmodi prosequendo administrationi ipsius Monasterii septennio & ampliusd jam elapso se ingerere non sine multâ temeritate proprio motu præsumpsit; & illius adhuc gubernationi in hujusmodi præsumptione obfirmatus incumbit. Ne igitur hujusmodi præsumptionis audatia, si veritati deserviat, fiat aliis temeritatis exemplum; ac propter hoc per debitæ indaginis studium cupientes ad præmissorum certitudinem pervenire Discretioni vestræ per Apostolica scripta mandamus, quatenus prædictum Thomam ad vestram præsentiam evocare, & tandem ab eo sollicitè exigere studeatis, cujus auctoritate ministerium hujusmodi gubernationis assumpsit; & an obtinuerit legitimè postulationem hujusmodi admitti; & si fortè admissa non fuit, cur illius admissionis beneficium distulit postulare, vel prosequi postulationis hujusmodi negotium, si existit inchoatum? alia etiam, per quæ veritas super hoc patefiat, exacturi diligentiùs ab eodem. Demum verò, ex iis, quæ inveneritis, quæ vestræ nunc conscientiæ duximus relinquenda, forsan dictus Thomas non censetur citandus; nihilominus tamen de eorum qualitate, nec non & defectu præmisso Nos pleniùs per vestras litteras informetis: Si autem ex hujusmodi qualitate vestræ Discretionis judicium citationis edictum decreverit proponendum; ipsum ex parte Nostrâ peremptoriè citare curetis, ut infra unum mensem post citationem vestram cum omnibus juribus, & monimentis suis compareat personaliter coram Nobis, recepturus super hoc, quod justitia suadebit; & rescribatis Nobis tandem similiter per vestras litteras harum seriem continentes tàm diem citationis, & formam, quam quæ ad instructionem Nostram super hoc noveritis oportuna.
Datum Romæ apud Sanctum Petrum xiii. Kalendas Martii, Pontificatus Nostri Anno Secundo.
-
Bullarium Franciscanum romanorum pontificum, tomus III, n°CI., p.380
-
(a) Salernitan.: De quorum Cœnobio agit Waddingus ad ann. 1238. n. 18., estque caput Custodiæ sui nominis in Provincia Terræ Laboris hodie Neapolitana.
-
(b) Monasterio S. Benedicti: De quo Mabillonius lib. 42. ad ann. 942. n. 42., & alibi lib. 55. ad annum 1025. num. 83.
-
(c) Ebulo: Vulgo Evoli Oppido Principatus citerioris 15. mill. pas. Salerno distante in ortum Ducatusque titulo florente.
-
(d) Septennio et amplius: Igitur ante annum 1272. promotus.