Description
-
Nicolas III (1277-1280)
-
Ministrum Generalem Ordin. Minorum jam creatum S. R. E. Cardinalem significat, de ejusque ad S. A. reditu alias. (Ex Reges. Vatic. epist. 24. apud Waddingum ad hunc annum num. 21. nunc epist. 239. ejusdem Regesti.)
-
Anno 1278. die 23. Aprilis.
-
1278
-
NICOLAUS &c.
Dilecto in Christo Filio Fratri Hieronymoa quondam Fratrum Minorum Generali Ministro Sanctæ Romanæ Ecclesiæ Presbytero Cardinali Salutem, & Apostolicam Benedictionem.
Summus omnium Magister, & Opifex ore prophetico inquiens: Suscitabo Tabernaculum David, quod cecidit, ac post pauca subjungens: & ea quæ corruerant, instaurabo: Vicarios suos pro tempore futuros instruxit in Ecclesia Dei reparare, quæ decidunt; & ut necessarios Ministros ipsius, quos sortis humanæ fiagilitas frequentiùs subtraxit, & diutiùs manere non sinit, remedio vicissitudinariæ substitutionis instauret: & hinc Nos non sine multâ mentis amaritudine, recensentes solemnes a paucis retrò temporibus in Sacrosantâ Romanâ Ecclesiâ cecidisse columnas; & multiplicatas in ipsâ ex mùltorum Cardinalium subtractione ruinas; illas prætactam secuti doctrinam cum Fratribus Nostris frequenti, & perpensâ deliberatione præhabitâ implere studuimus, subtractorum vices aliis dilectis, ut credimus, & Electis a Domino de ipsorum Fratrum consilio subrogatisb; ut eidem piæ Matri Ecclesiæ pro Patribus filii nascerentur, quorum consilio dirigi possit in dubiis, & fulciri suffragiis in adversis. Inter quos ad personam tuam, quam virtutum Dominus multis virtutibus insignivit, considerationis convertentes intuitum te in Presbyterum Cardinalemc ipsius Ecclesiæ duximus assumendum. Licet itaque ad supportanda nobiscum ejusdem Ecclesiæ onera tua foret admodum apud Sedem Apostolicam præsentia opportuna; ne tamen negotium tuæ, ac dilecti Filii Fratris Joannisd Ordinis Fratrum Prædicatorum Magistrie prudentiæ commissumf aliquod ex absentiâ tuâ dispendium patiatur; de tuo ad Sedem eamdem reditu certo modo duximus ordinandum Nostrum circa hoc beneplacitum per alias Nostras litterasg communiter tibi, & eidem Magistro directas apertius exprimentes; quod prout opportunitas facti concesserit, prosequaris.
Datum Romæ apud Sanctum Petrum ix. Kalendas Maji, Pontificatus Nostri Anno Primo.
-
Bullarium Franciscanum romanorum pontificum, tomus III, n°XXI., p.300
-
(a) Hieronymo: Asculano aliàs & supra memorato.
-
(b) Subrogatis: Septem enim Cardinales creavit hoc anno ex autore Synchrono Ptolomæo Lucensi Hist. Eccl. lib. 23. cap. 26., 4. idus Martii in Sabbato 4. temporum, ex autore Memorialis Potestatum Regen.; & Guidone de Corvaria in Fragmen. Hist. Pisan. apud Murat. to. 8. & 24. Rer. Ital. Script., qui tamen 9. Cardinales creasse conscribunt.
-
(c) Presbyterum Cardinalem: Tit. S. Pudentianæ.
-
(d) Fr. Joannis: Vercellensis in pluribus præcedentibus epistolis commemorati.
-
(e) Magistri: Generalis.
-
(f) Commissum: Nempe legatio Gallica, & Hispanica ex superioribus epistolis.
-
(g) Nostras Litteras: Quæ adhuc desiderantur, nisi sint sequentes; ex aliis tamen certo constat rediisse Card. Hieronymum in Italiam anno sequenti.