Description
-
Clément IV (1265-1268)
-
{62}Ut corpus Rostagni militis Galli apud eos sepulti reddant alibi tumulandum. (Ex ep. 193. Clementis IV. apud Martene & Durand. tom. 2. Thesaur. Anecdot., & ex Indic. Bullarii Seraph. Petri de Alva, ac Vatic. Reges. epist. 116.)
-
Anno 1265. die 7. Decembris.
-
1265
-
CLEMENS &c.
Dilectis Filiis … Guardiano, & Fratribus Minoribus Montis Flasconisa Salutem, & Apostol. Bened.
Devotionem dilecti Filii Hugonis Sageti Militis Arelaten., & aliorum suæ cognationis militum annuentes, qui debito humanitatis affectu propinqui sui Rostagni de Alvernico commilitis in Ecclesiæ Romanæ obsequio mortui corpus apud vos tumulatum ad majorum suorum sepulcra transferre desiderant, vobis per Apostolica scripta præcipiendo mandamus; quatenus eidem Militi in carissimi in Christo nostri C. illustris Regis Siciliæb exercitu militanti dictum corpus sine difficultate reddatis ad partes suas libere transferendum.
Datum Perusii vii. Idus Decembris, Pontificatus Nostri Anno Primo.
-
Bullarium Franciscanum romanorum pontificum, tomus III, n°LX., pp.61-63
-
(a) Montis Flasconis: Quem plures etiam Geographi Montem Phisconem insulse antea nuncupatum esse scripserunt; tunc Castrum, postea ab Urbano V. Episcopali dignitate donatum Lacui Volsinio imminens est in Provincia Patrimonii B. Petri, ac ditione Pontificia a Viterbio 8. mill. pass., 20. vero a Corneto, cui Sede Episcodali unitum, & vino quoque a multis celebratum habetur. Locus Fratrum quando sit receptus, ignotum; de eo Waddingus primum agit ad ann. 1291. num. 35., quo narrat ei a Nicolao IV. Idibus Januarii concessum esse hortum Romanæ Ecclesiæ loco vicinum: & ad num. 67. refert extasse extra muros Oppidi, sed sub Benedicto XII. obtinuisse anno 1336. locum alium intra muros; estque 5. Custodiæ Viterbiensis in Provincia Romana apud Polychronicon, & Bartholomæum Pisanum Conform. xi. Plura de eo habet Theulus in Appar. Minor. lib. 2. cap. 3.
-
(b) C. illustris Regis Siciliæ: Nimirum Caroli Ducis Andegaven. fratris S. Ludovici Regis contra Manfredum Siciliæ Regni usurpatorem bellum in Italia gerentis ab Urbano IV. ad Regnum Siciliæ evecti.
Informations
Document
bullarium-franciscanum
admin
(IRHT), dans
Bullarium Franciscanum
Bullarium Franciscanum romanorum pontificum, dir. I. Heullant-Donat, éd. électronique TELMA (IRHT), Orléans, 2021 [en ligne], acte n. 153713 (bullarium-franciscanum-1800), http://telma.irht.cnrs.fr/chartes/en/bullarium-franciscanum/notice/153713 (mise à jour : 26/01/2021).