« bullarium-franciscanum-1714 »

URBANUS &c.

Dilecto filio ‥ Guardiano FF. Min. Papien.a Salutem, Apost. Bened.

Cum, sicut intelleximus, Ecclesia Beatæ Mariæ de Bregundisb Papien. tanto tempore vacaverit, & adhuc vacare noscatur, quod ejus collatio ad Nos est juxta Lateranen. Statuta Conciliic legitime devoluta; discretioni tuæ mandamus, quatenus, si est ita, cum Papien. Episcopusd dicatur vinculo excommunicationis astrictuse, Ecclesiam ipsam per te, vel per alium, seu alios alicui personæ idoneæ auctoritate nostra conferre, & assignare procures, inducens ipsam in illius corporalem possessionem, & defendens inductam, amoto ab ea quolibet illicito detentore: Contradictores per censuram Ecclesiasticam appellatione postposita compescendo, non obstante, si aliquibus a Sede Apostolica sit indultum, quod excommunicari, suspendi, vel interdici non possint per litteras Apostolicas non facientes plenam & expressam, ac de verbo ad verbum de indulto hujusmodi mentionem; seu alia qualibet ipsius Sedis indulgentia, per quam effectus præsentium impediri valeat, vel differri; proviso, quod persona, cui eam contuleris, prout ipsius Ecclesiæ cura requiret, se faciat ad Ordines statutis temporibus promoveri; & personaliter resideat in eadem. Alioquin hujusmodi gratia nullius penitus sit momenti: non obstante indulgentiaf, qua Fratribus tui Ordinis ab Apostolica Sede dicitur esse concessum, quod de negotiis, quæ ipsis a Sede committuntur eadem, intromittere se inviti nullatenus teneantur.

Datum apud Urbem veterem vi. Idus Maji, Pontificatus Nostri Anno Tertio.