Description
-
Urbain IV (1261-1264)
-
Ut Episcopi Avenionen. pecuniæ detentores compellat pecuniam executoribus testamentariis assignare, & Canonicos Avenionen. instrumenta ea de re iisdem exhibere. (Ex Reges. Pontif. in Archivo Vatic. pag. 3. tom. 2. anno 1.)
-
Anno 1262. die 19. Aprilis.
-
1262
-
URBANUS &c.
Sua Nobis dilecti filiic ‥ Fratrum Ordinis Prædicatorum, & ‥ S. Michaelis de Busco Priores, ac ‥ Guardianus Fratrum Minorum Bononien. executores Testamenti bonæ memoriæ Zoenid Avinionen. Episcopie petitione monstrarunt; quod idem Episcopus a fel. record. Alexandro Papa f prædecessore nostro testandi de iis, quæ sibi superfuerunt ex parsimoniis reddituum Ecclesiasticorum, quos canonice in Lombardia, Ungaria, Francia, & Provinciag, & specialiter de Avinionen. Episcopatu perceperat, habens plenariam potestatemh in ultima voluntate sua Testamentum condidit; & inter alia quamdam pecuniæ summam, quæ de præmissis jamdudum penes Jacobinum de Racorgetoi, Amatorem de Pizecottis, Nicolaum Bongerardi, & quosdam alios Cives, & Mercatores Bononien. fiducialiter deposuerat, per manus dictorum executorum in pios usus erogari mandavit; mille libris Bononien. de hujusmodi pecunia, quæ summam earum longe magis excedit, Nobis, & Ecclesiæ Romanæ legatis. Porro dicti Mercatores super hoc ab eisdem executoribus requisiti eis pecuniam ipsam pro eo exhibere recusant, quia Nos olim ignorantes dictum Episcopum testandi licentiam habuisse dilecto filio ‥j Electo Bononien.k dedimus sub certa forma per litteras Apostolicas in mandatisl, ut totam prædictam pecuniam nomine Romanæ, vel Avinionensis Ecclesiæ sibi faceret assignari; & etiam quia instrumenta confecta super hujusmodi deposito penes quosdam Canonicos Avinionenses adhuc haberi noscuntur. Quare pro parte dictorum executorum humiliter petebatur a Nobis, ut providere super hoc paterna sollicitudine curaremus. Nos itaque considerantes attente, quod nil magis rebus humanis deberi dinoscitur, quam quod ultimæ voluntates Fidelium firmiter observentur; ac propter hoc hujusmodi mandatum nostrum eidem Electo directumm auctoritate præsentium revocantes, Fraternitati tuæ per Apostolica scripta mandamus; quatenus, si est ita, dictos Mercatores, quod pecuniam ipsam eisdem executoribus integre, ac sine dilatione assignent; præfatos vero Canonicos, quod instrumenta prædicta nuntio executorum ipsorum eorum nomine absque dilationis obstaculo exhibeant per eosdem Executores dictis Mercatoribus resignanda, per te, vel alium monitione præmissa per censuram Ecclesiasticam appellatione remota compellas: invocato ad hoc, si necesse fuerit, auxilio brachii sæcularis.
Datum Viterbii xiii. Kalend. Maji, Pontificatus Nostri Anno Primon.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXVII., p.441
-
(a) G.: Leg. P. nempe Philippo Boschetti Patritio Mutinensi, qui ab anno 1234. usque ad ann. 1264. sedit.
-
(b) Episcopo Mutinen.: In Æmilia tunc Ravennati, nunc vero Bononiensi Archiepiscopo subjecto ex Ughelli Italia Sac. tom. 2.
-
(c) Dilecti filii: Quorum nomina habes in epistola vi. Significantibus dilectis &c. anno superiore data.
-
(d) Zoeni: De quo in dicta epist. Significantibus &c.
-
(e) Avenionen. Episcopi: In Gallia Narbonensi, nunc Provincia, tunc sub Arelaten. Archiepiscopo, postea Metropolitana dignitate donati.
-
(f) Alexandro Papa: Hujus nominis IV.
-
(g) Et Provincia: Gallica vulgo Provenza, ubi anno 1243., & 1244. Sedis Apostolicæ legatus fuerat ex Innocentii PP. IV. litteris, quod fugit Annalium Eccl. continuatorem Raynaldum, sicut quoque latuit, quid officii, negotiique ei fuerit in Hungaria, Francia &c.
-
(h) Potestatem: Quam ei denegabant Mercatores Bononien. infra relati; ut in cit. epistola vi.
-
(i) De Racorgeto: De Recorecto dicitur in memorata epistola vi., & de Racorgatis in alia Exposuit nobis anno 1264. infra referenda.
-
(j) Dilecto filio: Octaviano Ubaldino juniori Florentino.
-
(k) Electo Bononien.: Hinc patet error Librarii in supracit. ep. vi., in qua hic enunciatur Episcopus, cum esset Electus solummodo, ut etiam ibi not. (a) admonui.
-
(l) In mandatis: Incip. Significantibus dilectis &c. anno superiore die 5. Novembris.
-
(m) Eidem Electo directum: Nempe supradictam epistolam vi. Significantibus dilectis &c.
-
(n) Extat & epistola ad executores testamenti Zoeni supra memorati Exposuit nobis &c. an. 1264. scripta.