Description
-
Alexandre IV (1254-1261)
-
Ut Inquisitoribus hæret. pravit. tradantur omnes scripturæ ad eorum officium spectantes, quo in officio eis plures facultates concedit. (Ex Nostris Assisiati S. Francisci, Venetoque Archivis apud Pegnam in calce Directorii Inquisit., Waddingum in Annal. Min. n. 3., & in Bullario Romano tom. 1. Bul. 18. al. tom. 3. Bul. 52.)
-
Anno 1260. die 4. Martii.
-
1260
-
ALEXANDER &c.
Dilectis filiis ... Fratribus de Ordine Min. Inquisitoribus hæreticæ pravitatis in administratione S. Franciscia Sal., & Apost. Benedictionem.
Cupientes, ut Inquisitionis negotium contra hæreticam pravitatem sollicitudini nostræ commissum ad Dei gloriam, & augmentum Fidei Catholicæ in vestris manibus feliciter prosperetur, compellendi appellatione remota per censuram Ecclesiasticam per vos, vel per alios, quos ad hoc idoneos vos, vel alter vestrum duxeritis eligendos, omnes illos, qui scripta, vel Instrumenta Inquisitionis, vel ad ejus officium pertinentia per quoscumque hactenus facta, ac etiam facienda contra hæreticos, credentes, receptatores, fautores, seu defensores eorum habent, vel habuerint; ut ea sine cujuslibet difficultatis, seu dilationis dispendio vobis, vel alteri vestrum exhibeant: nec non absolvendi a sententia excommunicationis omnes illos, qui demissa hæreticorum perfidia ad unitatem Catholicæ Fidei libere, ac humiliter redire voluerint; & credentes, receptatores, fautores, ac defensores eorum; ac etiam reconciliandi eos Ecclesiæ, a qua noscuntur diabolica suggestione præcisi; convocandique Clerum, & populum Civitatum, Castrorum, aliorumque locorum contra tales; itaut in ferendis sententiis contra ipsos possitis peritos, & discretos, prout expedierit, advocare. Dandi quoque omnibus accedentibus ad vocationem hujusmodi auctoritate nostra quadraginta dierum Indulgentiam. Procedendi etiam contra illos, quos in dicta Provincia commisisse constiterit; licet ad alias partes se duxerint transferendos: nec non ut in eodem negotio summarie absque Judiciorum, & Advocatorum strepitu procedere valeatis, auctoritate præsentium vobis, & cuilibet vestrum concedimus facultatem; Contradictores per censuram Ecclesiasticam, appellatione postposita, compescendo. Non obstantibus, si aliquibus sit indultum ab eadem Sede, quod interdici, suspendi, vel excommunicari non possint per litteras Apostolicas, nisi plenam & expressam, vel de verbo ad verbum fecerint mentionem; & constitutione de duabus dietis edita in Concilio generalib.
Datum Anagniæ iv. Nonas Martii, Pontificatus Nostri Anno Sextoc.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°DXXXVIII., pp.387-388
-
(a) In administratione B. Francisci: Idest in Provincia Umbriæ, & ultra.
-
(b) In Concilio generali: Lateranensi IV. anno 1215. celebrato sub Innocentio III. cap. 37.
-
(c) Extat & in Bullario Ord. Prædicator. tom. 1. Bul. 277. dat. hoc anno die 9. Octobris Inquisitoribus Lombardiæ, & Marchiæ Januensis: estque notandum etiam, quod ex hac Constitutione non mediocriter illustratur c. Ut commissi tit. De Hæreticis lib. 6., & alia juris de Hæreticis loca ex cit. Waddingo, & Pegna, qui addit, hanc extare etiam Bononiæ in Archivo Inquisitionis Dominicanis transmissam, sed pro Franciscanis esse copiosiorem.