Description
-
Alexandre IV (1254-1261)
-
Ut statutum contra Cleri concubinatum a S.A. Legato editum revocans, censuras Eccles. in eum latas commutare, vel relaxare valeat. (Ex Archivo Vaticano in Reges. Pontif. epist. 218. an. 4.)
-
Anno 1258. die 26. Augusti.
-
1258
-
ALEXANDER &c.
Tua Nobis Fraternitas intimavit, quod bonæ memoriæ Willelmus Episcopus Sabinen.c tunc in partibus Svetiæ Legatus Sedis Apostolicæ statuitd, ut quicumque Sacerdos, vel Clericus Concubinam haberet publice, vel occulte, sententiam excommunicationis incurreret ipso facto. Unde cum nonnullos sententia ipsa involverit, & involvat, provideri super hoc a Nobis eorum saluti humiliter postulasti. Verum quia sæpe, quod providetur ad bonum, antiqui hostis invidia procurante tendit ad noxam; & statutum hujusmodi, quod pro animarum procuranda salute fuerat editum, tum propter irregularitates, quas Clerici sententia prædicta ligati multoties contrahunt, tum propter contagiosæ pœnæ contagium, qua excommunicati sibi communicantes excommunicationis labe inficiuntur; animabus ipsis laqueos mortis æternæ parat; & quamplures sæpissime laqueo ligantur unius. Nos attendentes, quod pro varietate personarum, & Regionum pœnæ sunt provide variandæ, tuis supplicationibus inclinati Fraternitati tuæ præsentium auctoritate concedimus, ut præfatum statutum in tua Civitate, ac Diœcesi, & Provincia revocans, ac relaxans dictam sententiam juxta formam Ecclesiæ, si absolvi per te ab ea Presbyteri, & Clerici earumdem Civitatis, Diœcesis, & Provinciæ cum humilitate petierint, sententiam ipsam in pœnam aliam, quam personarum, locorum, & temporum circumstantiis provida circumspectione pensatis earumdem animarum saluti magis expedire videris, possis libere commutare; ac dispensare cum illis super irregularitate, quam sic ligati suscipiendo Ordines, vel celebrando Divina Officia, seu immiscendo se illis, non tamen in contemptum clavium contraxerunt; injuncta eis pro modo culpæ competenti pœnitentia; prout animarum suarum saluti videris expedire; proviso, quod iidem Concubinarii concubinis ipsis a se prorsus abjectis cautionem exhibeant de illis, vel aliis minime resumendise.
Datum Viterbii vii. Kal. Septembr. Pontificatus Nostri Anno Quartof.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXIX., p.305
-
(a) Ven. Fratri ...: Laurentio Gotho ex Ord. Min. pluries in isto, & præcedenti tomo memorato, V. epistolam 143. hujus Pontificis.
-
(b) Upsalen.: In Svecia ex alias ibi notatis.
-
(c) Episcopus Sabinen.: De quo in epistola 355. Innocentii IV. Cum a nobis petitur &c. anno 1250. 7. Decembr. data præter alias de eo prolatas.
-
(d) Ssatuit: In Concilio Schoningen. anno 1248., ut censuit Spondanus ad ann. 1247. n. 9., & post eum Cosartius in Labb. Concil. collect. ex Jo. Magno Gotho in Metrop., ubi ait Svecos, Gothosque Sacerdotes, & Clericos induxisse Græcorum morem accipiendi uxores, Apostolicum vero Legatum illum extirpasse pœnis impositis.
-
(e) Resumendis: Hanc poterat epistolam intellexisse cit. Jo. Magnus, dum ait Constitutionem illam Concilii Schoningen. contra Presbyteros, & Clericos uxoratos, atque concubinarios confirmatam fuisse ab hoc Alexandro; sed cum addit dat. Anagniæ anno quinto, indicat aliud diploma ejus anno sequenti datum; nempe 3. Non. Martii, ut infra.
-
(f) Rescriptum istud vidit, & citat Raynaldus in Annal. Eccles. ad hunc annum num. 15.; idque ex Vatic. Tabulario; at non vidit aliud datum Archiepiscopo Upsalen., & Suffraganeis ejus Anagniæ iii. Nonas Martii Pontif. anno quinto incip. Vestra nobis Fraternitas intimavit &c. eodem tenore, ac præsens epistola, nisi quod hæc finit: minime resumendis: ibi vero in illa additur: & quod pœna eadem ad quæstum pecuniæ; seu aliud turpe lucrum, de qua Clerus scandalizari valeat, minime se extendat: estque in Regesto Pontif. Archivi Vaticani epist. 71. anni 5.