Description
-
Alexandre IV (1254-1261)
-
Ecclesiasticas censuras in Urbinates latas ob Abbatem S. Sylvestri de Iscleto jussis Pontificis non obtemperantem ab ipsis protectum observari faciat. (Ex Autographo in Archivo Urbinat. Monasterii S. Luciæ Ord. S. Claræ sub plumbo.)
-
Anno 1258. die 18. Maji.
-
1258
-
ALEXANDER &c.
Dilecto filio ‥ Abbati Monasterii Sancti Anastasiia Ordinis Sancti Benedicti Feretranæ Diœcesisb Salutem, & Apostolicam Benedictionem.
Per litteras nostrasc sub certa forma Venerabili Fratri nostro ...d Episcopo Forosempronien. dedisse meminimus semel & iterume in mandatis, ut dilectis in Christo filiabus ‥ Abbatissæ, & Conventui Monasterii Castri Bengnif Ord. S. Damiani ad Romanam Ecclesiam nullo medio pertinentis Feretranæ Diœcesis a proprio Monasterio exulantibus propter guerras Monasterium Sancti Silvestri de Iscletog Ordinis Sancti Benedicti Urbinat. Diœcesis ad tempus authoritate nostra conferret, Monachis ipsius Monasterii, qui computato Abbate quatuor esse dicuntur, in aliis Monasteriis ejusdem Ordinis interim collocatis; contradictores per censuram Ecclesiasticam appellatione postposita compescendo. Verum nonnullis una cum prædictis Abbate, & Monachis super hoc se motu opponentibus propriæ voluntatis, mandatum hujusmodi non potuit executioni debitæ demandari: quinimo familia prædictorum Abbatis, & Monasterii, sicut accepimus, Nuncium dicti Episcopi nostras, & ipsius ad eosdem super hoc litteras deferentem non sine conniventia, ut creditur, enormiter verberavit. Et licet hac de causa dictum Abbatem ad præsentiam nostram citari fecerimush; idem tamen tamquam sibi male conscius illicentiatusi de Curia nostra recessit. Unde Nos hujusmodi gratiam circa eas omnino prosequi, ac præsumptiones præfatas circa prædictum Abbatem, & Monachos corripere intendentes dilecto filio Magistro Jacobo Alberici de Assisio Scriptori nostro in virtute sanctæ obedientiæ districte dedimus per nostras litterasj in præceptis, ut eisdem Abbate, & Monachis ab ipso Monasterio prorsus amotis, illud per se, vel per alium eis conferre, & assignari curaret, ab ipsis Abbatissa, & Conventu, donec de earum statu melius providerentur, cum omnibus suis possessionibus, juribus, & pertinentiis possidendum, inducens ipsas in illius corporalem possessionem, & defendens inductas: contradictores per censuram Ecclesiasticam appellatione postposita compescendo; invocato ad hoc, si opus fuerit, auxilio brachii sæcularis. Propter quod dictus Scriptor mandati nostri forma servata Monasterium ipsum, amotis eisdem Abbate, & Monachis ab eodem, prædictis Abbatissæ, & Conventui contulit; ipsasque, seu Procuratorem earum nomine earumdem in illius corporalem possessionem induxit; & nobilem virum ... Potestatem, & Consiliarios Civitatis Urbinaten. Excommunicationis, & in Civitatem ipsam Interdicti sententias pro eo, quod Abbatem prædictum ad ipsius requisitionem a quadam domo ipsius Monasterii, quam per violentiam retinebat, amovere, cum possent, juxta mandatum Apostolicumk non curarunt, exigente justitia promulgavit. Quocirca discretioni tuæ per Apostolica scripta mandamus, quatenus sententias hujusmodi facias usque ad satisfactionem condignam authoritate nostra inviolabiliter observari; ac illas pulsatis campanis, & accensis candelis singulis diebus Dominicis, & festivis, ubi, & quando videbitur expedire, publice, & solemniter innovari.
Datum Viterbii xv. Kalendas Junii, Pontificatus Nostri Anno Quartol.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXIII., p.289
-
(a) S. Anastasii: Cujus Monasterii nulla extat mentio in Annal. Benedict.
-
(b) Feretranæ Diœcesis: Ut in no. (f) ad epistolam 399. Ne dilectæ &c.
-
(c) Per litteras nostras: Quas infra videbimus.
-
(d) Fratri nostro ...: Gentili, ut in no. (c) ad cit. epistolam Ne dilectæ &c.
-
(e) Semel et iterum: Primis ad hunc Antistitem litteris anno 1257. datis caremus; secundæ datæ sunt hoc anno idibus Januarii incip. Ne dilectæ &c., & ibi vulgatæ.
-
(f) Castri Bengni: De quo in not. (e) ad prædictam epistolam Ne dilectæ &c.
-
(g) De Iscleto: Al. de Hischito, & Ischeto; cujus tamen Monasterii ab Urbino ad 5. mill. pas. distantis apud Annales Benedictinos nulla fit memoria.
-
(h) Citari fecerimus: sed hæ citationis litteræ non apparent.
-
(i) Illicentiatus: Scilicet non obtenta licentia recedendi.
-
(j) Per nostras litteras: Quæ etiam non habentur; ex his tamen earum tenorem obtinemus.
-
(k) Apostolicum: Quod pariter non extat, nisi fuerit in aliqua, quam deesse diximus, epistola.
-
(l) Etiam anno sequenti pridie Kal. Maji Pontifex scripsit civibus Urbinat. Sanctimoniales in Monasterio Iscleten. collocatas commendans Illum ad personas &c.