Description
-
Alexandre IV (1254-1261)
-
Confirmat electionem Fr. Petri Ord. Minor. in Episcopum Hortanum a Capitulo illius Ecclesiæ factam. (Ex Regesto Vaticano epist. 292., & apud Ughellum tom. 1. Ital. Sac. de Episc. Hortan. num. 16.)
-
Anno 1255. die 12. Aprilis.
-
1255
-
ALEXANDER &c.
Dilectis filiis Clero Civitatis, & Diœcesis Hortensis Salutem, & Apostolicam Benedictionem.
Debitum officii nostri requirit, ut nostræ sollicitudines alias, quibus assidue premimur specialiter circa Ecclesias solertiam adhibentes ipsarum utilitatibus intendamus in eo maxime, ut viduatis ne longæ vacationis dispendia patiantur, de talium celeriter nostræ diligentiæ studio provideatur substitutione Pastorum, per quos spiritualiter, & temporaliter, auctore Deo, continuum suscipiant incrementum. Sane, Hortana Ecclesiaa dudum Pastoris solatio destituta, dilecti filii Canonici ejusdem Ecclesiæ; qui voluerunt, debuerunt, & potuerunt commode interesse, die ad eligendum præfixa convenientes in unum; & Spiritus Sancti auxilio invocato, in dilectum filium Fratrem Petrumb Ordinis Minorum electum Hortanum tunc Capellanum dilecti filii O.c Sanctæ Mariæ in Via Lata Diaconi Cardinalis, virum utique pietate, religione, ac honestate conspicuum, consilio providum, ac in spiritualibus, & temporalibus circumspectum unanimiter consenserunt, eligentes eum in eorum Episcopum, & Pastorem; propter quod dilectum filium Raynerium Nuncium ipsorum ad Sedem Apostolicam destinantes humiliter postularunt a Nobis, ut electionem hujusmodi confirmare de benignitate solita curaremus. Nos igitur, quia invenimus electionem præfatam de persona idonea canonice celebratam, illam de Fratrum nostrorum consilio duximus confirmandam. Ideoque Universitati vestræ per Apostolica scripta mandamus; quatenus eumdem Electum tamquam Patrem, & Pastorem animarum vestrarum devotè suscipientes, obedientiam sibi, & reverentiam debitam impendatis, ejus monitis, & mandatis salubribus humiliter intendendo. Alioquin sententiam, quam ipse tulerit in rebelles, ratam habebimus, & faciemus, auctore Deo, usque ad satisfactionem condignam, appellatione remota, inviolabiliter observari.
Datum Neapoli ii. Idus Aprilis, Pontificatus Nostri Anno Primod.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XL., p.31
-
(a) Hortana Ecclesia: Hetruriæ Civitas nunc Patrimonii S. Petri in Colle prope Tiberim fluvium inter Oppida Galesii, & Otriculi 4. mill. pass. distans nec procul a Civitate Castellana, cujus Episcopatui unita est uni Romano Pontifici subjecta: ubi S. P. Franciscus, testante S. Bonaventura in ejus vita cap. 12., puerum figura deformem, & conglomeratum sanavit.
-
(b) Fratrem Petrum: De Popleto, qui anno 1284. ex hac vita decessit, cum Ecclesiam primum S. Theodori, deinde aliam S. Angeli Hortæ suis Consodalibus attribuisset ex Ughello tom. 1. Ital. Sac., & Waddingo ad hunc ann. 1255. num. 18. edit. 2.
-
(c) Filii O.: Octaviani Ubaldini Florentini Apostolicæ Sedis in Sicilia Legati in Annal. Eccles., & ab aliis Scriptoribus celebrati.
-
(d) Meminit hujus Episcopi, & epistolæ cl. Fontaninus in Antiquit. Hortæ lib. 2. cap. 7. n. 25. addens alias Alexandrum litteras dedisse x. Kalendas Maji Pontif. anno 1. pro eodem Episcopo a Card. Episcopo Prænestino consecrato, illas se in Appendice daturum; sed oblivione ipsa, vel supina scribarum negligentia nihil in Appendice legitur.