« bullarium-franciscanum-1009 »

ALEXANDER &c.

Venerabilibus Fratribus Archiepiscopis, & Episcopis, ac dilectis filiis Abbatibus, Prioribus, Archipresbyteris, & aliis Ecclesiarum Prælatis Salutem, & Apostolicam Benedictionem.

Patris Æterni benignitas pro sui nominis attollenda gloria, & procuranda salute inter personas plurimos divinis obsequiis deputatas viros in Ecclesia sua sancta constituit conversationis, & vitæ honeste conspicuos, & scientiæ titulis insignitos. Hi sunt dilecti Deo, & hominibus Fratres Ordinis Minorum, & Prædicatorum, qui suum semper affectum ad amorem cælestium dirigentes virtutem divini nominis per Orbem Terrarum publicant, & Christianæ Religionis ampliando cultum vigili attentione desudant. Hi sunt, qui vitam, & merita Bm̄i Pauli Apost. contemplantes gloriantur in sola Cruce Domini spernendo Mundi solatia pro deliciis Paradisi. Hi sunt, qui hostes animæ per scutum Fidei, loricam justitiæ, gladium spiritus, salutis galeam, hastam perseverantiæ debellantes obtinere satagunt, ut Catholicis universis Fidei, Spei, & Charitatis augmenta proveniant; ac perfidis veritatis via pateat; & hæreticæ pravitatis insania evanescat. De tantorum siquidem meritorum provenit claritate, quod Nos Fratres eosdem in Christo affectu sincerissimo diligamus; & ipsos ubique Terrarum statu gaudere pacifico affectamus, pro re indigna, & nimis amara ducentes, si quis de numero Fidelium, & potissime Prælatorum eos aliquibus turbat injuriis, vel offensis. Rogamus itaque devotionem vestram & per Dei misericordiam obsecramus, per Apostolica scripta vobis mandantes, ac remissionem vobis peccaminum injungentes, quatenus illos, qui sunt ex eis in vestris Civitatibus, & Diœcesibus constituti; seu qui ad præsentiam vestram quandocumque pervenerint; pro divina, & nostra reverentia affabiliter, & benigne recipere, ac eos vestræ charitatis studeatis affluentia confovere, permittendo uti libere Regularibus eorum observantiis, ac statutis per Sedem Apostolicam approbatis; & etiam Indulgentiis, & litteris, quas circumspecta pietas Sedis ejusdem olim concessisse dignoscitur de sua gratia speciali. Cœterum prædictos Fratres de favoris vestri plenitudine plenius honorantes, eis liberaliter concedatis; & quæ sunt opportuna pro animarum salute fieri, ab eis auctoritate vestra libere valeant exerceri; præsertim cum ipsi cordi habeant ministerium suum ita laudabiliter, & prudenter exequi, quod exinde apud vos possint sinceram, & stabilem benevolentiam promereri. Preces autem nostras, quas vobis ex intimo cordis affectu dirigimus, sic adimpleat vestra sinceritas, quod propter hoc vobis gratiosi favoris præmia opportuno tempore compensemus.

Datum Neapoli v. Idus Aprilis, Pontificatus Nostri Anno Primoa.