« bullarium-franciscanum-786 »

INNOCENTIUS &c.

Dilecto Filio Fratri Jacobo Velletrensi a Ordinis Fratrum Minorum Salutem, & Apostolicam Benedictionem.

Licet olim, Venerabili Fratri nostro Episcopo Cracovien.b, & dilectis Filiis Clero Cracovien. Civitatis, & Diœcesis suis Nobis litteris intimantibus, quod mirabilis Deus in Sanctis suis piæ memoriæ Stanislao Cracoviensi Episcopoc tot, & tantis dat coruscare miraculis, ut illius Sanctitas apertis indiciis comprobetur; & ipsius inter alios Sanctos non invocare suffragia est indignum; Venerabilibus Fratribus nostris Archiepiscopo Gneznen., & Episcopo Wratislaviensi, ac dilecto filio Abbati de Lubens Ordinis Cistercien. Wratislavien. Diœcesis, nostris dederimus litteris in mandatis, ut ascitis sibi viris Religiosis, & Deum timentibus, de virtute morum, & veritate signorum operibus videlicet, & miraculis diligentissimè inquirentes, quæ invenirent, Nobis suis litteris fideliter nunciarent; ipsisque in negotio hujusmodi procedentibus, & rescribentibus Nobis, Nos fidem adhibeamus, ut convenit, Processui eorumdem; quia tamen in tanto negotio est gravitate, & maturitate prævia procedendum; te ad Partes transmittentes easdem discretioni tuæ auctoritate præsentium in virtute obedientiæ districtè injungimus, ut a dictis Inquisitoribus, si superstites, & præsentes in Provincia fuerint, ac sic processerint, sicut sub ipsorum sigillis recepimus, perscruteris; & ipsorum actorum exempla ad majorem certitudinem tecum portes, faciens præsentari tibi eos, qui dicuntur fuisse a diversis infirmitatibus liberati, quos, & quot potueris; ac illos duos centenarios, si superstites fuerint, de quibus est mentio in actis, qui dicuntur ab aliquibus accepisse; vel eorum alterum, quod Sanctum noverint eumdem; & de ipsius clara, & honesta conversatione, dum viveret, audiverunt; inquisiturus ab ipsis, an ita sit; & inspecturus nihilominus devotionem populi, & famam communem super martyrio, & causa martyrii, nec non & Sanctitate ipsius. Inquiras insuper, utrum Cracoviensis Diœcesis Paganis, & Ruthenis Schismaticis sit confinis; ut per hoc ex ipsorum confinio lucrum provenire valeat animarum. Ad hæc librum Chronicorum ad Capitulum pertinens, ad negotium memoratum ex Archivo Ducis Poloniæd editum, & etiam librum Annalium, & Epitaphium considera diligenter; & his summatim sub obtestatione juramenti, ubi tibi visum fuerit, coram prioribus Inquisitoribus præstiti plenius intellectis, si aliqui testes super prioribus, vel novis articulis tibi fuerint præsentati; eos juratos secundum formam recipiendorum Testium prudenter recipias, & diligenter examinare procures; & sic instructus ad Nos, ut per te super iis instruamur pleniùs, revertarise.

Datum Perusii vii. Kalendas Junii Pontificatus Nostri Anno Nono.