Description
-
Innocent IV (1243-1254)
-
Ut fundando ab Episcopo Monasterio Constantiensi Moniales tribuat, eisque Religiosos directores assignet. (Regest. Vatican. epist. 14., & ex eo Waddingus in Regesto Pontif. num. 74. edit. 2.)
-
Anno 1250. die 6. Julii.
-
1250
-
INNOCENTIUS &c.
Dilecto filio Ministro Provinciali Fratrum Minorum Alemaniæ a Salutem, & Apostolicam Benedictionem.
Cum Venerabilis Fr. … Episcopus Constantiensisb Monasterium Monialium inclusarum Ordinis Sancti Damiani in parte Pontis Constantiensis construere desideret; prout ex parte ipsius fuit propositum coram Nobis; Nos ejus in hac parte votis benignis annuentes præsentium tibi auctoritate in virtute obedientiæ firmiter præcipiendo mandamus, quatenus ejusdem Monasterii, postquam incæptum fuerit, curam gerens ponas ibidem quatuor, vel plures, prout eidem Episcopo, & tibi visum fuerit, probatæ vitæ, ac Religionis expertas ipsius Ordinis Moniales; faciens per te, vel aliquos Fratres tui Ordinis, quos ad hoc idoneos noveris, eisdem Monialibus celebrare Divina; & exhiberi Ecclesiastica Sacramenta; & alia omnia, quæ in domibus ejusdem Ordinis Sancti Damiani per Fratres Minores consueverunt hactenus exhiberi: Non obstantibus aliquibus Statutis, vel Indulgentiis, seu Privilegiisc eidem a Sede Apostolica concessis, per quæ id impediri, vel differri possit; & de quibus specialem oporteat in præsentibus fieri mentionem.
Datum Lugduni ii. Nonas Julii Pontificatus Nostri Anno Octavod.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCCXXXI., p.546
-
(a) Alemanniæ: Superioris, quæ & Argentinæ Provincia nuncupatur, cujus tertia Custodia est Constantiensis, seu
Laciex veteri Provinciali Ordinis FF. Minorum apud Polychronicon, & Pisanum Conform. xi. -
(b) Fr. … Episcopus Constantiensis: Etsi plures sint hujus nominis Civitates Episcopales in Europa, & Asia; tamen ex commissione Pontificis Ministro Provinciæ Alemanniæ data lucet, sermonem esse de Constantia in Svevia urbe fœderata, ubi Episcopus erat Eberhardus ii. dapifer a Waldburg. ex Bruschio, & Gallia Christiana tom. 5.
-
(c) Privilegiis. Ut illud Inspirationis divinæ &c. dat. hoc anno die 6. Martii, quo Fratres non teneri recipere curam Monialium quarumlibet edicitur.
-
(d) Hoc Monasterium mox constructum fuit extra Civitatem & appellatur de
Paradisoex diplomate Alexandri IV.Paupertati, quam propter Deum &c.anno 1257. die 20. Aprilis infra referendo, quo dictum Monasterium a solutione procurationum, collectarum, aliarumque exactionum exemit, ejusdem meminit in alio Cum a nobis petitur &c. anno 1255. die 8. Martii Ministro Prov. Alemanniæ misso.