« bullarium-franciscanum-370 »

GREGORIUS &c.

Dilectis filiis Generali, & universis Ministris Ordinis Fratrum Minorum Provincialibus præsentes litteras inspecturis Salutem, & Apostolicam Benedictionem.

Licet ad hoc Fratrum vestri Ordinis pia desudet intentio, ut ab eis in his, quæ faciunt, prudenter, & providè procedatur, per hoc & suæ religioni proficere, & Dei cupientes Ecclesiam honorare: tamen aliquando ex conditionis humanæ fragilitate contingit, quod quidam ex ipsis excedunt in casibus, in quibus excommunicationis sententiam, & notam irregularitatis incurrunt. Quare a Nobis supplicatione humili postulastis, ut cum viri contemplationi dediti sint in religionis favorem a discursibus cohibendi, ac propter viarum pericula eisdem Fratribus ad nostram, & Diœcesanorum præsentiam impediatur accessus, super hoc providere benignitate solita curaremus. Nos itaque piè volentes, quod vestra devotio in his, quæ dignè possumus, Sedem Apostolicam reperisse gaudeat gratiosam; ut singuli vestrum in Provinciis sibi commissis prædictis Fratribus constitutis ibidem absolutione, ac dispensatione indigentibus, sive priusquam Ordinem intraverint, sive postea in casibus excesserint memoratis, de conscientia discretorum Fratrum vestrorum, qui litterati sint, & Deum timentes, impertiri valeant absolutionis beneficium, & dispensare cum eis juxta formam Archiepiscopis, & Episcopis super hoc ab Apostolica Sede traditam, vobis auctoritate præsentium concedimus facultatem; nisi adeò gravis fuerit excessus, quod meritò sint ad Sedem Apostolicam destinandi. Nulli ergo omnino hominum liceat hanc paginam Nostræ concessionis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, & Beatorum Petri, & Pauli Apostolorum ejus se noverit incursurum.

Datum Laterani viii. Idus Junii. Pontific. Nostri Anno Decimoquintoa.