Description
-
Grégoire IX (1227-1241)
-
Consules Mercatorum Senen. Spiritualibus afficit gratiis pro dispositione, & ministratione bonorum Monasterii S. Damiani Senensis. (Ex Regesto Vatic. epist. 428., &
Waddingoin Regesto Pontif. n. 28.) -
Anno 1235. die 27. Januarii.
-
1235
-
GREGORIUS &c.
Dilectis filiis Consulibus Mercatorum Senensium a Salutem, & Apostolicam Benedictionem.
Ei, qui est cogitationum salubrium inspirator, actiones referimus gratiarum, quod per inspirantem ejus gratiam ad ea vos studia pietatis induxit, ut serviendi Ei necessitatem sponte vobis duxeritis imponendam. Significante sanè dilecto filio Vitalib Cive Senensi Nobis innotuit, quod cum ipse, fundato apud Senas suis sumptibus Monasterio inclusarumc Sancti Damiani, bona sua ipsarum Monialium necessitatibus duxerit deputanda; quæ cum nolint temporalia possidere, recipere denegarunt: Aldebrandinus, Vivianus, Bonoincontrus, & Accatapan. Antecessores vestri Deo in hoc intendentes gratum obsequium exhibere, pro sua, & suorum Successorum salute, de voluntate Vitalis prædicti, nullum quærendo exindè temporale commodum, sed æternum, bona ipsa dispensanda perpetuò per se, ac Successores suos, ad manus receperunt ipsorum; obligantes seipsos, ac succedentes eisdem per publica Instrumenta de convertendis integrè annuatim fructibus eorumdem bonorum in alimenta, & necessitates alias Monialium prædictarum. Ut ergo vos, & Successores vestri plenius ex hoc possitis Divinam gratiam obtinere, de hoc vos monentes, & hortantes attentiùs, vobis, & Successoribus vestris, qui pro tempore fuerint in officio Consulatus, in remissionem omnium peccatorum, de quibus corde contriti, & ore confessi fueritis, nihilominus injungentes, quamdiù propositum vobis divinitùs inspiratum, Ejus intuitu, pro cujus amore illud assumere studuistis, laudabiliter prosequi procuretis; ita quod præter speratæ retributionis æternæ profectum benedictionem Apostolicæ Sedis, & Nostram possitis abundantiùs promereri; Nosque vobis constituere debeatis in vestris opportunitatibus debitores. Volumus quoque, ut prædictis Prædecessoribus vestris, & aliis, qui ad hoc dederunt auxilium, consilium, vel favorem, hæc, quæ per vos facta sunt intuitu pietatis, in remissionem proficiant peccatorum.
Datum Perusii vi. Kalend. Februarii Pontificatus Nostri Anno Octavo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CLIII., p.146
-
(a) Mercatorum Senensium: Ad quos anno 1233. die 21. Septembr. litteras dedit Significante &c. vocans
Consules Pizzicarolos Mercatorum Senen. -
(b) Vitali: De Donato, al. de
Donicato, ut in supradictis litterisSignificante &c. -
(c) Inclusarum S. Damiani: Quæ in prædictis litteris
Significante &c.dicuntur Moniales pauperes inclusæ S. Petronillæ: in aliis vero incip.Magna, sicut dicitur &c.anno 1227. die 12. Augusti scriptisAncillæ mulieres Monasterii S. Mariæ Senen., non tamen fuit diversum Monasterium: Continuator enim Annal. Min. Waddingi ad annum 1554. tom. 19. num. 30. tria narrat Monasteria Clarissarum extasse Senis, quorum duo extra civitatis mœnia posita, nimirum S. Petronillæ, & S. Claræ, eo anno intra mœnia introducta fuisse tumultus bellici causa; alterum vero S. Laurentii, de quo ibi notitia excipi potest; omisso illo S. Nicolai intra civitatem circa annum 1345. ex bonis Nicolactii Petronii de Petronibus constructo; ut ex litteris Clementis VI. Exhibita nobis &c. eo anno nonis Decembris scriptis, & a Waddingo ibi relatis.